martes, 27 de febreiro de 2018

CELEBRAMOS O DÍA DE ROSALÍA

Esta mañá reunímonos na biblioteca do centro para celebrar o "Día de Rosalía". Os motivos polos que tivemos que retrasar esta conmemoración foron as actividades programadas previamente: o venres fomos de excursión á cidade de A Coruña, e onte os grupos de 1º e 2º de Primaria participaron nun obradoiro sobre a elaboración do bolo do pote en A Picota, polo que ata hoxe non tiñamos a axenda libre!

Pero esta mañá, por fin, adicamos a "Hora de Ler" a falar da nosa Rosalía, a ler os seus poemas, a contar por que nos parece tan importante destacar a súa figura... E así, persoa a persoa, fomos abrindo as nosas fiestras e amosando as paisaxes dos poemas que eliximos, quedando un acto moi fermoso e emotivo que, como vén sendo habitual, pechamos con bicos e abrazos!!! Mais as nosas fiestras seguirán estando abertas, unha vez expostas no corredor do cole, para que siga entrando nas nosas vidas, día tras día, aire fresco e luz, moita luz...

Queremos agradecer á Asociación de Escritores en Lingua Galega (AELG) a súa invitación, unha vez máis, a sumarnos á celebración desta data tan significativa tamén para nós. 

Espero que vos gusten as fotos que vos fixen durante esta linda xornada adicada a Rosalía, á poesía, ao amor... Premede AQUÍ para ver todas as imaxes!!! En canto teña todas as vosas fiestras, farei un vídeo para que poidades contemplar as paisaxes que se ven a través de cada unha delas...


sábado, 24 de febreiro de 2018

EXCURSIÓN Á CORUÑA

Despedimos a semana viaxando ata A Coruña, onde desfrutamos moito das actividades que tiñamos programadas e tamén do día, xa que foi estupendo para ir de excursión.
O alumnado de 3 e 4 anos de Infantil foi ao Acuario, xunto cos mestres Patri e David. Alí descubriron un montón de animais mariños que lles encantaron: os peixes pallaso, os polbiños, as estrelas e os cabaliños de mar, as focas... E, sobre todo, o tiburón Gastón!!!
Mentras tanto, o grupo de 5 anos de Infantil e toda Primaria foron ata o Palacio da Ópera, acompañados de Xavi, Óscar e Susi. Alí asistiron ao concerto didáctico "Noé, Noemí e Noemilia", interpretado pola Orquestra Sinfónica e a narradora Belén Otxotorena, baixo a dirección de Andrés Valero Castells.
Despois, xuntámonos para subir ao monte San Pedro, onde recibimos a visita da profe Cruz, comemos ao aire libre e xogamos un ratiño antes de regresar, pasándoo xenial nas randeeiras, nos tobogáns e, sobre todo, no labirinto!!!
Premendo AQUÍ podedes ver todas as imaxes da excursión de Infantil (3-4 anos).
Premendo AQUÍ podedes ver as fotos da excursión de Infantil (5 anos) e Primaria.
Premendo AQUÍ podedes ver as fotos que fixemos no monte San Pedro.

mércores, 21 de febreiro de 2018

DÍA DE ROSALÍA

O vindeiro 24 de febreiro é o aniversario do nacemento de Rosalía de Castro. Aínda que esta data aínda non está marcada dentro das conmemoracións escolares, somos moitas as persoas que, desde diferentes centros, nos vimos sumando á iniciativa da Asociación de Escritoras e Escritores en Lingua Galega (AELG). 

Esta entidade encomenda cada ano a un autor/a o texto do manifesto que se propón ler en cada un dos actos que desexen celebrar o Día de Rosalía de Castro. Este ano foi a escritora lucense María Reimóndez a encargada da súa elaboración. Para lelo, premede AQUÍ.


Partindo do seu título, pensei en propoñervos a seguinte actividade. Durante os próximos días entregarémosvos o debuxo coas contras dunha fiestra que vós deberedes decorar como queirades. O que se vexa a través dela cando as abramos é o traballiño que vos propoño: elixir un poema (ou unha parte) de Rosalía, e escribilo tras esas contras, engadíndolle unha ilustración. Seguro que vos quedan de marabilla e a próxima semana expoñerémolos no corredor, para que todos poidan contemplar o que se ve a través de cada unha das vosas fiestras unha vez abertas!!!

luns, 19 de febreiro de 2018

DESPEDIDA DO ENTROIDO

Este ano o Meco despediuse de nós disfrazado de Donald Trump, o presidente dos Estados Unidos desde o ano 2017. Para algunhas das persoas do cole era a primeira vez que asistían á "Queima do Meco", así que as caras de sorpresa estiveron presentes en moitas delas.

Despois celebramos o xogo das piñatas, que quedara pendente da xornada adicada ao Entroido. E pasástelo realmente ben, non si? 

Para ver todas as fotos premede AQUÍ. 


xoves, 15 de febreiro de 2018

DÍA DA RADIO 2018

Pois estrenamos data no calendario!!!! E contentísimas todas as persoas implicadas de poder compartilo con toda a xentiña que nos segue dende o blogue. Trátase do "Día da Radio", que se celebra o 13 de febreiro. Nesta ocasión coincidiu coas vacacións do Entroido, pero non por iso pasou desapercibido, xa que a plataforma educativa Rede Espora propuxo unha actividade moi fermosa na que nos invitou a participar. E nós, aínda que polo de agora non sabemos moito sobre este mundo máxico da radio, dixemos... SI!!!! 

O que fixemos foi gravar un pequeno texto no noso estudio, que enviamos a "Rede Espora". O programa este año propoñía a temática das mulleres deportistas, facendo visibles a algunhas delas a través da personificación en alumnas dos centros participantes. A encargada de representar ao noso cole foi Paula Maneiro Bergantiños, de 5º de Primaria, quen se converteu por uns segundos en Ronda Rousey, unha campioa en artes marciais. Non sabemos se Paula chegará a destacar neste deporte pero, como locutora, ENCANTOUNOS e dende aquí queremos darlle a nosa NORABOA!!!

Aquí deixamos o enlace para que poidades escoitar e desfrutar o programa enteiro:


venres, 9 de febreiro de 2018

ENTROIDO 2018

Aquí está o desfile do exército de panos de San Cosme de Antes!!! Pasámolo de marabilla e desfrutamos moito coas persoas que nos acompañaron nesta celebración. Moitas grazas a todos os familiares que se achegaron ao cole nesta húmida mañá e tamén a Marcos por acompañarnos tocando a marcha xunto co profe Óscar, axudando a que os nosos pasos foran máis acompasados dentro do cole e de camiño ata o "Pegho", onde tivemos que dar a volta debido á chuvia. 
 
No comedor, axudados polas nosas cociñeiras Lourdes e Mariví, así como por José, o noso súper-conserxe, colocamos todas as sobremesas que achegastes as familias dos nosos rapaces e rapazas, facendo que as conversas estiveran acompañadas de sabores doces e típicos desta festa que tanto nos gusta.

Premendo AQUÍ podedes ver as fotos desta mañá.

xoves, 8 de febreiro de 2018

O ENTROIDO ESTÁ CHEGANDO...

Si!!! Xa se nota que está a punto de celebrarse unha das nosas festas preferidas... Esta semana xa puiden comprobar que cada día tratades de ter en conta o "mandadiño do Meco"... E que incluso preparastes a marcha para desfilar mañá!!!! Carai, vós si que sodes profesionais: "esquerda, esquerda, esquerda-dereita-esquerda"; aínda me parece que vos estou escoitando o ensaio que fixestes no patio esta mañá!!!

Seguro que tamén vós estades desexando ver as fotos que recollen parte do que pasou estes días, non? Pois só tedes que premer AQUÍ.

 

luns, 5 de febreiro de 2018

CHARLA SOBRE PATRIMONIO

Esta mañá recibimos a visita de Nina, a arqueóloga do concello. Nina xuntounos na biblioteca do centro para falarnos do que é o patrimonio. Este termo, que provén do latín patri (pai) e monium (recibido), fai referencia a todo aquelo que recibimos por liña paterna, ao que herdamos dos nosos ascendentes.


Comentamos que cousas consideramos forman parte do noso patrimonio e cales son as diferenzas entre patrimonio material e inmaterial. 
Dentro do patrimonio material están os bens feitos polas sociedades do noso pasado:
-Arquitectura (monumentos, edificios e construcións que representan a nosa evolución).
-Arqueoloxía (elementos de valor producidos por culturas previas).
-Artístico e histórico (pinturas, esculturas ou producións artísticas que nos falan doutras épocas). 
-Natural (bens e riquezas naturais, ou ambientais, que a sociedade herdou dos seus antecesores. Tamén ecosistemas con especies endémicas ou en perigo de extinción, así como lugares delimitados polo seu valor excepcional).
-Industrial (edificios, máquinas, talleres, muíños, fábricas, minas, depósitos e medios de transporte).
Mural elaborado en 5º e 6º sobre o patrimonio material da nosa comarca.

O patrimonio inmaterial constitúeo o patrimonio intelectual e o sentido que fai única a unha comunidade, como as tradicións, a gastronomía, a literatura, as teorías científicas e filosóficas, a relixión, os ritos e a música, así como os patróns de comportamento que se expresan nas técnicas, na historia oral, a música e a danza. Estaría neste apartado:
-Saberes, tradicións e crenzas (coñecementos e modos de facer enraizados na vida cotiá. Formas de ser e de pensar que se transmitiron sobre todo oralmente, como son as lendas, ditos, crenzas...).
-Celebracións e coñecementos (rituais de música, danza, teatro... Tamén a gastronomía, os oficios artesanais e os coñecementos e prácticas relacionados coas plantas).
-Lugares simbólicos (mercados, feiras, santuarios, prazas e outros espazos nos que teñen lugar prácticas sociais únicas).

Mural elaborado en 5º e 6º sobre o patrimonio inmaterial da nosa comarca.

Premede AQUÍ para ver as imaxes desta charla informativa, e lembrade que en breve tocaravos a vós elixir que incluiriades vós dentro do patrimonio!!! Todas aquelas persoas interesadas teredes que estar moi atentas ás miñas vindeiras publicacións no blogue!!!!

Un saúdo,

 

xoves, 1 de febreiro de 2018

A NOSA RADIO

Ai, xentiña!!! Non vos podedes imaxinar a que se montou esta tarde no cole. Vós xa non estabades aquí, así que non sei se o saberedes, pero os profes do cole andan montando unha boa: un estudio de radio!!! A min xa me parecía que había moito movemento de traballadores nese espazo que hai frente á sala de profes: que se pintura, que se madeira, que se mesas... E hoxe descubrín en que se está convertendo ese recuncho: nun ESTUDIO DE RADIO!!!! Pero un estudio en serio, PROFESIONAL, co seu equipo informático, mesa de mezclas, auriculares, micrófonos... E para comezar a traballar con todo ese material, que con tanto esforzo colocaron o noso equipo de conserxes, hoxe estivo no cole Javier Prado, un experto nisto de empregar a radio para aprender. E os vosos mestres e mestras xa se estrenaron!!! Si, estiveron gravando, escoitándose... E mesmo entrevistaron a dúas persoas que traballan moito para que teñamos o cole sempre impecable: María e Luzdivina. Creo que o pasaron moi ben, que están moi ilusionados co proxecto e que pronto seredes vós as persoas que se senten diante deses micros para... facer radio!!!
 
Por se non me credes, AQUÍ vos deixo as fotos que puiden sacar ás agachadas!!!