venres, 3 de decembro de 2021

RECOMPILACIÓN DE RECURSOS RELACIONADOS CO ESPAZO

Ola, amiguiñas e amiguiños!!!

Que tal estades? Seguro que con ganas de desfrutar moito desta ponte... Uns días de descanso antes de rematar o primeiro trimestre non está nada mal, eh? Tamén sei que aproveitaredes para ler moito, dar algúns paseos na natureza e, por se queredes mergullarvos no mundo da astronomía, o espazo e outros temas relacionados con eles, aquí vos presento outra proposta. Premendo sobre a imaxe do cartel que deseñamos este curso, e no que botaron unha man as nenas e nenos de 5º e 6º, atoparedes diferentes enlaces para coñecer máis cousiñas sobre o ceo. Anímovos a entrar nesta páxina e descubrir que constelacións podemos ver estas noites e onde, que noticias interesantes relacionadas coa ciencia espacial se van publicando, ver algún vídeo sobre fenómenos que suceden no ceo, descubrir imaxes espectaculares e mesmo ver a posta de sol en directo desde Fisterra!!! Eu non o pensaría moito e aproveitaría algún ratiño para descubrir cousas ben interesantes... E, á volta destas vacacións, contámonos que nos pareceu, vale?

O cartel do proxecto deste curso xa se atopa no corredor do cole.

Apertas infinitas,

Rosiña

mércores, 1 de decembro de 2021

CONVOCAMOS O CONCURSO DE POSTAIS DE NADAL

Ola, rapaciños e rapaciñas!!!

Xa pronto chega o Nadal, así que aquí estou para animarvos a participar no “Concurso de Postais de Nadal”. Sei que vos encanta debuxar, que o facedes moi ben, e que o tema do universo vos dará moitísimas ideas para desexar un bo ano 2022 a todas as persoas que queredes...

Tamén podedes centrarvos na figura do Apalpador, ese personaxe que baixa das montañas do Courel para apalpar as barriguiñas das nenas e nenos, comprobando así se pasan fame ou non. Para aquelas barriguiñas que nota non comen dabondo, o Apalpador deixa un bo puñado de castañas... Así nolo contou tamén Anxo Moure no cole. Sexa ou non inspirador para vós, lembrade que na biblioteca podedes atopar varios libros sobre este interesante personaxe, ademais de que ao longo deste mes escoitaredes nas cancións do cole a canción que a el lle adicou Paco Nogueiras.

Lembrade que se queredes podedes incluír un texto no seu interior para enviala por correo antes de que remate o trimestre. O prazo para entregalas remata a vindeiro mércores, 15 de decembro. Expoñeranse no corredor e votaremos pola que máis nos guste.

Haberá cinco agasallos: dous para Educación Infantil, outro para 1º e 2º, un máis para 3º e 4º e outro para 5º e 6º.

A que máis votos reciba será a que se envíe a toda a comunidade para felicitar as festas do Nadal. Pode ser a túa, así que... A COMEZAR!!!
 
Rosiña

sábado, 27 de novembro de 2021

RECIBIMOS UNHA CARTIÑA MOI ESPECIAL DE...

Que alegría recibir unha carta!!! E ademais dunha persoa á que queremos moito porque asociamos con momentos moi fermosos no cole: ANXO MOURE!!!

Si, Anxo escribiunos desde Chantada, a onde regresou coa súa bici cargada de libros, e desde alí adicounos estas palabras:

Bos días dende o Val do Asma, terras de Chantada.
Aquí vai o grande agradecemento unha vez máis á vosa xenerosidade, cariño, tenrura, conversa, confianza...., e todo o que nos fai sentir que este mundo pode ser mellor grazas a proxectos coma o voso que incluíu gastronomía, contos, cantos.
Grazas Antes, grazas Mazaricos e, sobre todo, grazas nenas e nenos porque non sabedes o que significa que cando un contacontos entra polo pasillo dunha escola xa lle chamen polo seu nome como se fora da familia, do lugar ou da escola, un agasallo inesquecible.
Apertas 

Anxo

Ilustración que acompañou a carta de Anxo Moure.
Anxo, moitísimas grazas!!! Nós encantadas de recibirte, de abrirche as portas desta casiña con historias cheas da vitamina da Natureza, con cancións que nos levan polos bosques, con apertas arbóreas que practicaremos... Quedouche o atrapacontos, que gardamos con orgullo na nosa biblioteca, agardando que volvas!!!

Unha aperta enorme de todas nós!!!!

Rosiña

NOTICIAS SOBRE ASTRONOMÍA EN RADIO ROSIÑA

Ola, xentiña!!!

Estou de novo aquí para contarvos unha noticia moi interesante e relacionada con dúas das actividades que máis nos gustan no cole: a radio e o proxecto do curso. En 3º e 4º xuntaron os dous temas e, despois de redactar unha noticia sobre astronomía, gravárona individualmente en "Radio Rosiña", para que poidamos desfrutalas todas as persoas que temos a sorte de escoitalas!!! Non esperedes máis e premede sobre o nome de cada unha das nenas e nenos da aula para escoitar o ben que falan!!!! 

En hora boa a: AINHOA, ALEJANDRO, ALICIA, ANXO, ISMAEL, LAURA, LUCÍA, LUZDIVINA, OLALLA, PABLO, PAULINA e UXÍA.

Apertas,
            Rosiña

xoves, 25 de novembro de 2021

DÍA CONTRA A VIOLENCIA CARA A MULLER: "DEIXÁDEAS BRILLAR"

Ola!!! 

Que bonito vos quedou o mural que realizastes para celebrar o "Día contra a violencia cara a muller". A actividade proposta, "DEIXÁDEAS BRILLAR", consistiu en escribir nunha estrela o nome de cada unha das nenas do cole, das nais, das avoas, das mestras e doutras mulleres que coñecerades e quixerades para incluílas nun ceo que quedou verdadeiramente fermoso, coma se dun universo cheo de esperanza e liberdade se tratara.

O mural atópase no corredor do colexio, formando parte da decoración deste curso.

Ese día, ademais, adicámolo a facer varios obradoiros coa compañía Dinamo nas diferentes aulas: unha xincana sobre as tarefas da casa, un xogo sobre as profesións que mesturaba a carreira de relevos e o coñecido memory, ou un xogo para averiguar palabras, algunhas das cales descoñeciamos, como sororidade, que fai referencia á solidaridade entre mulleres, especialmente ante situacións relacionadas co machismo.

E, pola tardiña, Carmen Domech contounos unha versión do coñecido conto "Artur e Clementina", de Adela Turin e Nella Bosnia que podedes ver de novo premendo aquí.

Desafortunadamente, este é un tema moi duro do que non debemos evitar falar, para percatarnos da súa problemática a todos os niveis e cambiar e denunciar todas aquelas cousas que observemos e que non permiten que as nenas e as mulleres de calquera lugar do mundo brillen libremente. 

Unha aperta enorme,

Rosiña


martes, 23 de novembro de 2021

HISTORIAS DE MEDO EN RADIO ROSIÑA

Ola, rapaciños e rapaciñas!!!

Hoxe escríbovos para comunicarvos que xa comezamos a emitir dende a nosa radio: "Radio Rosiña". Estamos moi contentas de que os podcasts inicien a súa viaxe ata os vosos fogares, as vosas familias, a outras persoas da contorna e mesmo fóra dela, porque o bo das ondas radiofónicas é que poden chegar a un montón de lugares...

O primeiro deles é a historia que gravaron na aula de 5 anos de Educación Infantil, para a cal crearon tamén unha canción que cantaron no comedor o día da entrega de premios. Escoitade este conto tan orixinal:


O segundo podcast pertence a Luzdivina, quen gañou o premio na aula de 3º e 4º de Primaria. Queredes escoitala?


E aquí tedes o que redactaron conxuntamente en 1º e 2º, e que podedes escoitar no seguinte enlace:

Apertas, 

Rosiña


luns, 15 de novembro de 2021

MAGOSTO 2021

Chegou o San Martiño, e con el a celebración do Magosto, unha das festas tradicionais máis bonitas do outono!!! Este curso, ademais de degustar as castañas, contamos tamén coa compañía de ANXO MOURE, un dos nosos contacontos preferidos!!! Anxo chegou ao cole na súa bici cargada de contos, e baixo o noso castiñeiro compartimos historias, cancións, poemas, sorrisos... Coma sempre, Anxo deu voz ás árbores do bosque, ás que debemos coidar, desfrutar e mesmo abrazar!!! Foi unha xornada ben fermosa, que tamén podedes lembrar a través das imaxes e algúns vídeos que fixemos. Premede nela para acceder ao enlace: 

Anxo e a súa ciclobiblioteca á sombra do castiñeiro.

 Rosiña

martes, 2 de novembro de 2021

SAMAÍN 2021

O último venres de outubro celebramos a primeira grande festa do curso: o Samaín!!! Sei que o pasastes en grande, e para o cal tamén vos esforzastes moito en redactar unhas historias de medo moi interesantes, así como de amosar a vosa capacidade creativa na transformación de cabazas en cousas tan curiosas como caveiras, seres fantásticos, fondos de constelacións ou soles do sistema solar. Este foi o tema que máis inspirou a todas as familias, pero non había ningunha igualiña a outra, polo que o corredor converteuse durante esa semana nun espazo de orixinalidade, cor, algo de medo e moita ilusión!!!

Moitas das nenas e nenos do cole viñeron vestidas para a ocasión.

O venres, durante a mañá, fixemos varias actividades que vos conto brevemente. Premendo sobre as imaxes podedes ver todas as fotos e outros documentos que resumen en que consistiu cada unha:

-Entregouse a Guía de Lectura do Samaín a todo o alumnado.

-Realizamos os petiscos terroríficos nas nosas aulas, que degustamos antes do recreo. 

Nas aulas de Infantil cociñaron con arañas na cabeza!

-Celebramos uns obradoiros coa Compañía Dinamo, que organizou xogos populares adaptados ao Samaín para todas as nenas e nenos do cole.

Ademais de pasalo xenial, os xogos esixían concentración!
 -Ao mediodía entregamos os premios ás Historias de Medo, momento no cal tamén o grupo de Infantil de 5 anos se animou a cantar unha canción sobre a historia que crearon coa profe Patri. Premendo sobre cada título podedes ler a historia premiada nas diferentes categorías, ademais do resto de relatos presentados.

As persoas premiadas coas súas cabazas.

-O resto das cabazas presentadas podedes velas premendo aquí.

-Pola tarde aproveitamos para realizar actividades nas aulas relacionadas con esta festividade.

Espero que o pasarades tan ben coma min!!!!

Unha aperta,

Rosiña

martes, 26 de outubro de 2021

DÍA DO DANO CEREBRAL ADQUIRIDO

Sarela, Asociación de Dano Cerebral de Compostela

Hoxe celébrase o "Día do Dano Cerebral Adquirido", aínda que pouco coñecida, seguro que as súas causas vos resultan máis familiares: ictus, traumatismos por accidentes, etc. As secuelas, moitas veces invisibles, poden ser moi variadas, afectando á autonomía das persoas que a padecen. Onte estiveron no cole tres persoas para falar sobre o DCA ao alumnado de 5º e 6º de Primaria. Pertencen á Asociación "SARELA", que ten como obxectivo acadar a máxima recuperación das persoas que padecen algún dano cerebral adquirido, mellorando a súa calidade de vida e buscando a súa reincorporación ao mundo laboral, académico e social. Na aula de 5º e 6º estiveron falando sobre este importante problema coas persoas que nos visitaron, realizando algunhas actividades a través das cales se deron conta do importante que é coñecer esta realidade para dárlle visibilidade e aportar o noso gran de area.

Dende o cole queremos agradecer o voso esforzo por achegarvos ata aquí e o voso tempo para comprender un pouquiño mellor esta lesión, a vida cotiá das persoas que a padecen e algunhas cousas que podemos facer para mellorar a súa situación. 

Premendo AQUÍ podedes ver algunhas fotos da charla, e sobre a imaxe podedes acceder á páxina da Asociación "SARELA", que xa leva máis de vinte anos axudando ás persoas con dano cerebral adquirido.

Unha aperta, 

Rosiña

venres, 22 de outubro de 2021

DÍA DAS BIBLIOTECAS

O 24 de outubro celébrase o "Día das Bibliotecas", un dos espazos con máis maxia que existe. Na nosa biblioteca, tan acolledora, pasamos moitos momentos ao longo do curso, e aínda que a covid nos impide compartir moitas actividades en grandes grupos, podemos sentirnos moi orgullosas de mantela aberta durante toda esta época de cambios.

Por iso, esta semana rematámola facendo nela unha actividade que nos gusta moito: compartir historias!!! Por iso veu ao cole Alba Bermúdez, que nos xuntou en dúas quendas na biblioteca, onde pasamos unha xornada moi entretida e divertida. Baixo o título "Comechíns, segundo prato", Alba mergullounos nun mundo imaxinario e a través de varias historias descubriunos como a lectura pode abrir o apetito... Moitas delas témolas na nosa biblioteca, así que xa sabedes que podedes facer cada vez que vos entre a fame!!! 
Premendo aquí podedes ver as fotiños que fixemos nesta magnífica sesión. Moitas grazas, Alba!!!
Apertas, 
Rosiña