mércores, 31 de outubro de 2018

SAMAÍN 2018

Que ben o pasamos nesta semana de Samaín!!!! Foron tan só 3 días, pero cheos de emoción e moita orixinalidade... Sorprendéronnos as cabazas presentadas ao Concurso, no que tivestes moi en conta o tema do proxecto, polo que no corredor do cole puidemos ver varios Einstein, algún Newton, científicos imaxinarios, robots..., e mesmo laboratorios equipados ao completo ou circuítos que sorprenderían a calquera persoa adicada ao mundo da ciencia!!! NORABOA A TODAS AS PERSOAS que participaron nesta nova edición do Concurso de Cabazas!!!

Paula Maneiro, Uxía Grille e Jorge Lema foron as persoas gañadoras desta edición, pero premendo AQUÍ podedes ver todas as cabazas presentadas.

Por outro lado, tamén o Concurso de Relatos de Medo recolleu no buzón de Rosiña historias moi terroríficas, onde os seus protagonistas eran científicos/as, os sucesos transcurrían en laboratorios pouco comúns, etc. Tremín de medo na biblioteca con todas elas, así que PARABÉNS a todas as persoas que se esforzaron por facerme pasar con esas lecturas uns ratos tan entretidos!!!

A aula de Educación Infantil presentou "A casa encantada" e recibiu o premio con esta alegría.
Aquí vos deixo o seu relato:




Soraya gañou o premio dos relatos presentados en 1º e 2º.

Aquí está a súa historia:




Paula recibiu o premio dos relatos presentados en 3º e 4º.
Podedes lelo completo aquí:




Mª José recibiu o premio en 5º e 6º.
Aquí podedes ler a súa historia:



Anxo estaba contentísimo co premio especial ao seu relato.
Podedes lelo aquí:



O resto das imaxes da entrega de premios atoparédelas premendo AQUÍ.
Antes da entrega de premios adicouse o día a esta primeira gran festa do curso, polo que organizamos varios obradoiros no comedor do cole, no que participastes todo o alumnado e o profesorado. Comezamos entrando en calor bailando dúas cancións sobre o medo ("Medomedá") e as caveiras ("Chumbalacachumba"); preparamos os petiscos terroríficos que zampamos durante o recreo; maquillámonos e montamos un títere terrorífico e vimos " Coco", unha das películas máis fermosas que trata o tema da morte e ademais nos amosa unha tradición mexicana onde a música e a relación dun meniño coa súa familia están moi presentes.

Para algunhas nenas e nenos foi o seu primeiro Samaín no cole.
Outras xa desfrutaron desta festa en varias ocasións.
Podedes ver todas as fotos do obradoiro de música premendo AQUÍ.
Para ver as do obradoiro de maquillaxe, AQUÍ.
O obradoiro de petiscos está premendo AQUÍ.
Se premedes AQUÍ veredes as imaxes da proxección de "Coco".

Os petiscos tiñan tan boa pinta que custaba moito decidirse por un!
Foi unha xornada estupenda e espero que todas as persoas desfrutaran tanto coma min!!!
Vémonos o  vindeiro luns!!! 


CHARLA SOBRE INTERNET

Onte recibimos a Adrián Brañas Castro, quen veu ofrecernos unha charla dentro do programa "Navega con Rumbo polo Ciberespazo", unha iniciativa encamiñada a que as rapazas e rapaces naveguen coa maior seguridade posible pola rede, evitando riscos de Internet. Esta charla, á que estabades convidadas/os tamén todas/os as nais e pais do alumnado, foi entretida e moi interesante, e aínda que foron poucas as persoas que asistiron á mesma, pensamos que é moi importante coñecer moitas das recomendacións que expertos como Adrián nos ofrecen, antes de que calquera de nós se vexa nunha situación de ciberacoso ou outro risco. Prever nunca está de máis; seguro que pensamos todas o mesmo!!!
Se queredes coñecer o programa podedes acceder premendo aquí. 
Para ver as imaxes da charla no cole, premede AQUÍ.

Un saúdo, 




luns, 29 de outubro de 2018

A RECOLLIDA DE TAPÓNS TEN SENTIDO

Resultado de imagen de matías rey mourelle
Matías, coa súa familia, cando tiña 8 anos.
Dende hai varios cursos, no noso cole xuntamos todos os tapóns que podemos. Cada certo tempo, encárganse de vir recollelos, e así seguimos... Para algunhas persoas pode parecer unha tontería, mais esta fin de semana a prensa recolleu unha noticia que amosa a importancia desta actividade, converténdoa nun xesto moi solidario. Cos tapóns que recollemos estamos axudando a financiar a terapia de Matías, un neno compostelán de 11 anos con parálise cerebral. É certo que non resolvemos o seu problema, e tamén que son moitas as persoas que o precisan, pero se o pouquiño que facemos dende o cole serve para que unha soa persoa teña unha vida máis digna, non cabe dúbida de que merece a pena, non cres? Podedes ler a noticia premendo AQUÍ.
Aínda que no cole adoitamos recoller tapóns de tetrabriks de leite e de botellas de auga, son moitos os tapóns que serven para esta campaña solidaria. Aquí podedes ver diferentes tipos de tapóns que podedes achegar dende os vosos fogares:



mércores, 24 de outubro de 2018

CELEBRAMOS O DÍA DA BIBLIOTECA CON XURXO SOUTO

Fermosa a tarde que pasamos hoxe na compañía de Xurxo Souto!!! Esta persoa tan coñecida achegouse ao cole para celebrar con nós o "Día da Biblioteca", convertendo a xornada nun día moi especial. Xurxo acompañounos no xantar, para despois ser entrevistado polos rapaciños e rapaciñas de 5º e 6º en "Radio Rosiña". A emoción e os nervios levaban presentes varios días no grupo, onde pasaron algúns ratiños investigando sobre a figura deste personaxe tan entrañable e incombustible: escritor, músico, locutor... Con Xurxo inauguramos un novo programa na nosa radio, que ademais comezou a emitir neste curso. O programa titúlase "Entrevistas Porquiñas" e emitirá sempre que teñamos a ocasión de preparar algunha entrevista que poida ser emitida dende "Radio Rosiña". Pasamos un rato moi agradable conversando co noso primeiro invitado, e queremos compartilo con todas as persoas que nos siguen a través dos nosos podcast, polo que aquí volo deixamos:


Despois do interrogatorio, xuntámonos na Biblioteca, como non podía ser doutra maneira tal día coma hoxe. E todas as persoas xuntas cantamos "O rato de biblioteca" para darlle a benvida a Xurxo, que mesmo chegou a improvisar unha estrofa máis para esta divertida canción. 

E despois comezamos a viaxe co noso convidado, navegando polo mar, como a el lle gusta, escoitando o seu son a través dunha enorme buguina, coñecendo historias de mariñeiros, de seres fantásticos que habitan nas augas salgadas..., e do emblema da súa cidade: a Torre de Hércules... Houbo tempo para cantar ao son do acordeón, para rir, para descubrir cousas moi interesantes, e mesmo para chegar á conclusión de que o centro do mundo está en Pazos!!!


Ademais desta fermosa foto de grupo, podedes ver AQUÍ o resto das imaxes e vídeos que fixemos na biblioteca, e premendo AQUÍ as realizadas en "Radio Rosiña".

Desde aquí queremos dar as grazas a Isabel, da libraría "Ler" de Santa Comba, quen nos facilitou o contacto con Xurxo Souto para facer deste "Día da Biblioteca" unha auténtica ledicia. E, por suposto, a Xurxo: "MEDRE O MAR!!!!"

luns, 22 de outubro de 2018

CONCURSOS DO SAMAÍN 2018

Xa está chegando o Samaín, e esta tarde deixei nas vosas aulas a cartiña convocando o Concurso de Cabazas e o de Relatos de Medo deste ano... Ai, non damos feito!!!! Entre preparar o Samaín, celebrar o Día da Biblioteca... Estamos que non paramos!!!! Pero a min encántame vervos a todas e todos con moitas ganas de aprender e de inventar!!! Por iso espero con moitas ganas esas historias que tan bos ratos me fan pasar, aínda que iso vaia unido a tremer durante toda a noite....

Aquí vos deixo toda a información:

PREMEDE AQUÍ PARA LER A CARTA

E PREMEDE AQUÍ PARA LER TODA A INFORMACIÓN SOBRE O SAMAÍN E O CONCURSO DE CABAZAS

Lembrade, ademais, que nos esperan moitas máis sorpresas o día da celebración. Seguro que tedes tantas ganas coma min!!!!

DÍA DA BIBLIOTECA 2018


O próximo 24 de outubro celebramos o "Día da Biblioteca"!!!
 
Este ano, a Asociación Española de Amigos do Libro Infantil e Xuvenil celebrará o “Día da Biblioteca” en Oviedo, na biblioteca “Ramón Pérez de Ayala”. Alí reuniranse persoas que se adican a profesións moi relacionadas cos libros: persoas bibliotecarias, escritoras, ilustradoras, narradoras de historias, editoras… E tamén mestras e mestres. Pode que incluso se acheguen algúns animais á citada biblioteca… Eu, polo menos, penso ir. Ademais, coma cada ano dende 1997, a Asociación encarga a elaboración dun pregón e dun cartel, que nesta ocasión recaeu no escritor Gonzalo Moure (Premio Cervantes Chico 2017), e no ilustrador Alfonso Zapico (Premio Nacional de Cómic 2012).
Gonzalo Moure é un escritor do que temos varias obras na nosa biblioteca, algunha das cales foi elixida tamén no noso club de lectura “Os Xurelos Lectores”. Se non o coñecedes, memorizade ben o seu nome, xa que este escritor é desas persoas que sempre aportan, que merecen a pena, que son imprescindibles… Queredes ler o pregón que escribiu para celebrar o “Día da biblioteca” este ano? Leva por título “O día da luz”, e di así:

Veño do deserto do Sahara, de inaugurar unha biblioteca. Está en Dajla, o máis afastado, o máis olvidado dos cinco campamentos de refuxiados saharauis. É a cuarta biblioteca que construímos, e é fermosa. No centro plantamos árbores, para que os nenos e xóvenes do Sájara poidan experimentar o gozo de sentarse á súa sombra a ler un libro. Non queremos que esa biblioteca sexa ningún “templo do silencio”, senón máis ben un espazo para o son, para o ruído. Unha biblioteca que xa é o lugar máis fermoso do campamento. Un espazo para desexar ir a buscar lectura, pero tamén amizade, soños compartidos. Incluso amor. Un lugar no que namorarse mirando uns ollos por riba dun libro. Porque ao fin e ao cabo, a biblioteca é o lugar no que se descubre ao outro, de papel ou de carne.
Nunha película inesquecible, a mellor película de ciencia ficción da historia, “2001, unha odisea do espazo”, aparece un monólito cada vez que o home se dispón a dar un salto cualitativo. Kubrick, o seu director, debería poñer un libro no seu lugar. Porque foron os libros os que marcaron o ritmo dos cambios do ser humano. Porque o libro é o laboratorio do home, o lugar no que se experimenta con emocións, descubrimentos, utopías, apostas. Somos o que somos porque pensamos e escribimos sobre como ser e sobre como non ser. E seremos o que pensemos, o que pensen e escriban as próximas xeracións. 
Así que unha biblioteca non é só un lugar no que invitar a ler, senón tamén, ou por iso, un lugar no que invitar a escribir. As bibliotecas do século XXI son, poden ser, teñen que ser o sementeiro de novas novelas, novos monólitos, mollóns do noso futuro. Se o século XX foi sen dúbida o século da lectura, o século XXI pode chegar a ser o século da escritura, xa o está sendo. 

Por todo iso construímos bibliotecas nos campamentos do deserto. Porque non son só para os saharauis. Págaas a nosa sociedade civil, mediante socios adultos, e mediante actividades solidarias en colexios, institutos e bibliotecas. E os alumnos e lectores que as sufragan fanse conscientes do extraordinario que é ter unha biblioteca, aprender a valorar a súa, a defendela. Cada biblioteca do deserto ten detrás a miles de nenos, xóvenes e adultos que fixeron o posible co seu pequeno esforzo. Sumando. Cada lector saharaui ten ao seu carón a miles de lectores, máis conscientes da importancia dunha biblioteca, porque co seu traballo construíuse unha, nun clima en un lugar tan hostil.  
Pensa na túa biblioteca. Houbo un día no que esa biblioteca non existía. Alguén soñouna, loitou por ela, encheuna de libros e tamén de soños. Faite do equipo dese alguén que a fixo posible, loita por un mundo no que non haxa un ser humano que non teña cerca unha biblioteca, ou un amoroso bibliobús. Que non haxa un só neno, xoven ou adulto, que non roce a man dunha bibliotecaria que lle aconselle, que o oriente no labirinto. Que é o mesmo que dicir que non haxa un só ser humano conectado ao que foi, ao que é e ao que será. 
Na túa man hai millóns de mans, estreitando a túa, acompañándote no camino. Tenras ou cheas de callos, pequenas ou grandes. No libro que te espera na mesiña de noite ou onda o sofá, hai millóns de libros. Inxenuos ou complexos, humildes ou luxosos. Pero todos preciosos. Conectados todos por un invisible fío de prata que une man con man, andel con andel, un fío inacabable e luminoso. Inacabable, e así sexa. Hoxe é o Día da Biblioteca, que é o mesmo que dicir O día da luz.
Feliz día, feliz século.
(Texto: Gonzalo Moure. Cartel: Alfonso Zapico)

venres, 19 de outubro de 2018

TEATRO NA CASA DA CULTURA

Rematamos a semana viaxando ata a Casa da Cultura de A Picota para asistir á representación teatral "Contos do Recreo", da compañía "Redrum Teatro". Nesta comedia musical, Alicia desfruta mofándose dos seus compañeiros e compañeiras do cole. No recreo previo ao exame máis importante do curso, aparece nun lugar máxico habitado por Xacobe, unha estrafalaria estatua que se encarga de vixiar a porta da entrada dese territorio. Para poder saír de alí e chegar ao exame, Alicia terá que resolver os enigmas e superar as probas que se agochan tras as portas dos recreos pasados, presentes e futuros. 
Esta obra continúa tratando o tema do acoso escolar, iniciado xa na representación "A nena que quería navegar", á que tamén asistimos o curso pasado. 

Para ver as fotos desta xornada, premede AQUÍ.


xoves, 18 de outubro de 2018

RESUMO DE "RADIO NA BIBLIO"

Ai, rapaciñas e rapaciños!!!!
Hoxe chegoume unha noticia estupenda!!! Un vídeo no que "Radio Espora" recolle algúns dos momentos vividos nos coles que participamos no proxecto "Radio na Biblio" o curso pasado. Si, e tamén sae "Radio Rosiña"!!! A verdade é que é emocionante ver con canto entusiasmo e ilusión participamos a través deste medio de comunicación que nos marabillou dende o primeiro momento. Co resumo do 2017-2018 presentado, xa podemos comezar a nosa aventura neste novo curso. Estades preparados/as? Seguro que si!!! Novos retos esperan a todas as persoas que se animen a participar na nosa "Radio Rosiña". 
Antes de enlazar o vídeo, queremos tamén agradecer á Asesoría de Bibliotecas Escolares por loitar por este proxecto tan interesante, así como a Javier Prado, quen nos visitou para formarnos e demostrarnos que, dende logo, esto da radio si que engancha!!!

martes, 16 de outubro de 2018

O LEMA GAÑADOR É...

Xa temos o lema gañador deste curso:

"LER CON-CIENCIA"  
 
Este foi o lema que máis votos recibiu por parte do alumnado e o profesorado, así que a partir de agora, será o que identifique todo o relacionado con este tema tan interesante.
En breve poderedes ver o cartel que estamos preparando para colocar no corredor do colexio!!!
Unha aperta a todas e todos!!!!

CELEBRAMOS O DÍA DA BIBLIOTECA

Para celebrar o Día da Biblioteca, este curso no que o eixe temático é a ciencia, eliximos unha canción na que o protagonista é un dos animais máis utilizados nos laboratorios científicos: os ratiños. Neles realízanse estudos de biotecnoloxía e na industria médico-farmacéutica, co obxectivo de desarrollar novos produtos (vacinas, por exemplo), e probar a eficacia e seguridade de todo tipo de medicamentos, así como para analizar procesos coma o cancro e enfermidades infecciosas, entre outras.  

Considéranse un animal idóneo para isto porque é pequeno, manexable, fácil de criar e cun ciclo vital rápido, aínda que son moitas tamén as persoas que amosan a súa oposición a esta actividade, que acaba coa vida de miles de animaliños dunha maneira pouco digna.

Pero nós imos elixir un ratiño que non é empregado para estes fins, afortunadamente!!! Este é un ratiño de campo, pero ao que deixou de gustarlle o queixo… Seica coñeceu a Rosiña e fixo moi boas migas con ela, así que lle contaxiou a súa afección pola lectura. Esa paixón tamén a transmiten día tras día as persoas que traballan nas bibliotecas, así que con esta canción queremos homenaxear a todas as bibliotecarias e bibliotecarios!!!! Escoitade e cantade “O rato de biblioteca”, poema escrito por Xoán Neira no seu libro “Chafarís”: