sábado, 29 de decembro de 2018

VÍDEOS DO FESTIVAL DE NADAL

Xa están aquí os vídeos do festival de Nadal!!!! Seguro que teredes moitas ganas de velos e de comentalos coas persoas que vos acompañan estes días de vacacións: familiares, amigos e amigas... Desfrutade moito con eles!!!!
En primeiro lugar, a presentación do festival:


No seguinte vídeo podedes ver a primeira actuación de Infantil: "Na casa da miña avoa".


A continuación, o grupo de ukeleles e guitarras e o coro de 1º, 2º, 3º e 4º interpretando "Heiche de contar un conto":


En 3º e 4º prepararon unha obriña de teatro moi simpática: "Loliña e a galiña".


Infantil volveu subir ao escenario para bailar con "A científica incorrixible":


1º e 2º tamén puxeron un toque de humor no escenario con "Os calzoncillos de Papá Noel":


Tamén repetiron o grupo de guitarras e ukeleles, que co coro de 1º, 2º, 3º e 4º tocaron e cantaron "A Lúa":


En 5º e 6º prepararon unha adaptación ao teatro da obra de Carlos Casares "A galiña azul", que podedes ver en dúas partes:




Este grupo foi tamén o encargado de pechar o festival, coa súa actuación "The final count-down":







E, ademais, cantamos o "Cumpreanos feliz" a Anxo e recibimos a Papá Noel!!!

venres, 21 de decembro de 2018

FESTIVAL DE NADAL


Que ben o pasamos esta mañá!!! Celebramos o Festival de Nadal, e estabamos cheas de ilusión por amosar ao noso público as cousiñas que con tanto cariño e esforzo preparamos nas diferentes clases!!!! Aínda que está todo gravado, os vídeos non se subirán ata dentro duns días, pero as fotos xa as podedes ver!!!! 

O festival foi presentado por Paula, Mª José, Daniela e Pablo, que cursan 6º de Primaria. As catro persoas estaban nerviosísimas, pero fixérono de marabilla!!! As actuacións do noso festival foron as seguintes:
-O grupo de Infantil bailou "Na casa da miña avoa";
-o grupo de guitarras e ukeleles, incentivado polo profe Óscar hai dous cursos, interpretou "Heiche de contar un conto", axudado polas voces dos nenos e nenas de 1º a 4º de Primaria;
-3º e 4º representaron a obra de teatro "Loliña e a galiña", conseguindo que todo o público se partira de risa;
-Infantil acompañou con xestos a canción "A científica incorrixible";
-1º e 2º puxeron outro toque de humor con "Os calzoncillos de Papá Noel";
-novamente o grupo de guitarras e ukeleles interpretou outro tema: "A lúa", no que o coro de 1º a 4º cantou estupendamente;
-5º e 6º representaron "A galiña azul", de Carlos Casares e
-de novo 5º e 6º con "The final countdown" para pechar o festival.

Rematado o festival, a ANPA contactou con Papá Noel e invitouno a visitar o cole. Marchou encantado de estar convosco e ademais deixouvos uns agasallos estupendísimos, non si? 

Todas as persoas reunidas no comedor esta mañá pasámolo moi ben, e queremos agradecer a todas as que se achegaron ao cole para compartir connosco este tempiño xuntas. Ao final, o verdadeiramente importante é este tempo que pasamos xuntas, falando, rindo, tranquilizándonos, bailando, cantando... Compartindo!!!! E así queremos seguir facéndoo durante o 2019!!!!

Mentras non están preparados os vídeos, premendo nas imaxes podedes ver as fotos deste festival.

Unha aperta enorme!!!!






Infantil pasouno en grande enriba do escenario
3º e 4º fixéronnos rir moito con "Loliña e a galiña"

O grupo de guitarras e ukeleles co grupo de voces que o acompañou

En 1º e 2º buscando os calzoncillos de Papá Noel

Un momento da representación "A galiña azul" de 5º e 6º

"The final countdown" pechando o festival deste 2018




xoves, 20 de decembro de 2018

XORNADA DE INCHABLES E OUTRAS ACTIVIDADES

Izan, Luzdivina e Valeria desfrutaron a tope!
A xornada de hoxe anticipou as próximas vacacións. Despois do recreo, a empresa encargada das actividades extraescolares no centro trouxo un dos agasallos cos que máis desfrutades as nenas e nenos do cole: os inchables!!!! Pero tamén organizaron xogos de equipo e algunha actividade individual, como a elaboración de chapas que vós mesmas/os deseñastes!!!
O xogo da ra tamén atrapou o entusiasmo de nenas e nenos
As imaxes xa amosan o ben que o pasastes, nun día que adicamos a ensaiar para o festival de mañá, entregarvos as notas, recoller algúns dos traballos que fomos facendo ao longo do trimestre, etc.
O paracaídas
Tamén nos encantou o obradoiro de chapas!!!
Premendo sobre as imaxes tedes as fotografías de hoxe. Queremos agradecer ás monitoras e ao monitor a súa proposta e o esforzo por desenvolvela desta maneira!!!


mércores, 19 de decembro de 2018

POSTAIS DE NADAL E GUÍA DE LECTURA

Alba, Pablo, Luzdivina e Olalla recollendo os premios.
Un ano máis, as postais de Nadal decoraron o noso corredor, e participaron todas no Concurso convocado polo centro. De todas elas, seleccionouse unha en cada aula: a de Olalla en Infantil, a de Luzdivina en 1º e 2º, a de Alba en 3º e 4º e a de Pablo en 5º e 6º. Destas catro finalistas, a que recibiu máis votacións por parte das nenas e nenos do cole foi a de Alba, polo que esa é a postal que neste Nadal se envía ás familias para desexar unhas felices festas dende o noso cole. Premendo sobre a imaxe podedes ver as fotos da entrega de premios que tivo lugar esta tarde.
E se premedes AQUÍ podedes ver todas as postais presentadas ao concurso. 

A postal de Alba cos nosos mellores desexos para este Nadal e o vindeiro 2019 podedes vela aquí:



Tamén vos deixo a Guía de Lectura que elaboramos dende a biblioteca, por se os Reis Magos ou o Apalpador vos queren agasallar con algunha desas recomendacións:







venres, 14 de decembro de 2018

TEATRO EN INGLÉS

Luzdivina e Guille tamén tiveron un pequeno papel.
Víctor e Candela, con outros rapaces de Pino, en plena actuación.
Un ano máis, os centros de Pino de Val e San Cosme xuntámonos na Aula de Cultura de A Picota para asistir a unha representación teatral da compañía "Face 2 Face". E, unha vez máis, encantounos!!! As primeiras persoas en ocupar o espazo da biblioteca foron as de Infantil e 1º e 2º de Primaria. Para elas a actriz contou a historia de Lara, unha rapaciña que explora o espazo no seu cohete. Na súa viaxe polo Universo, visita planetas, lúas e estrelas, pero tamén alieníxenas. Un día, Lara atópase con Benny, un alien que se atopaba perdido, e ao que trata de axudar a voltar ao seu fogar. Conseguirano? Para coñecer máis detalles desta entretida aventura, falade coas persoas que asistiron á función, seguro que vola contan de marabilla!
Pola outra banda, para os grupos de 3º a 6º de Primaria preparáronlles unha adaptación da coñecidísima obra de Daniel Defoe "Robinson Crusoe".
Entre unha quenda e outra, as rapaciñas e rapaciños viron tamén unha película no salón de actos, "Atrapa la bandera", que remataron de ver no cole.

CINE E CIENCIA EN 360º

As nenas e nenos de Infantil dentro do iglú.
Este xoves recibimos no cole a visita de Pau, un rapaz que veu cargado cun equipamento moi especial: un iglú inchable que instalou na aula de psicomotricidade para proxectar no seu interior películas moi interesantes relacionadas co mundo da ciencia. Así, en grupos diferentes, fomos entrando no iglú e deitándonos no seu interior para ver proxeccións que nos descubrían elementos do Universo, do Sistema Solar, da orixe da vida... Durante toda a mañá, as rapaciñas e rapaciños de Infantil e toda Primaria fostes ampliando os vosos coñecementos sobre algo que tanto chama a vosa atención. 

O lanzamento de cohetes no patio.
E para rematar a actividade, Pau levounos para o patio do cole para facer un obradoiro conxunto moi atractivo: "Obradoiro Astronáutica", que consistía en lanzar cohetes e en facer un xogo sobre o Sistema Solar no que interactuabamos entre nós facendo de planetas, lúas, estrelas, cometas, etc.
Foi moi interesante, pasámolo moi ben e aprendemos moitísimo!!!


luns, 10 de decembro de 2018

DÍA DOS DEREITOS NO COLE

https://photos.app.goo.gl/VW6feiaB2c1w2mnBAEsta semana arrancou coa celebración dunha data moi importante para nós: os 70 anos da Declaración dos Dereitos Humanos. Este documento, firmado en París polos países da Organización das Nacións Unidas (ONU) en 1948, é un dos documentos máis importantes da historia da humanidade. Os dereitos humanos son os dereitos que temos todas as persoas polo simple feito de existir. Respectalos permite crear as condicións indispensables para que os seres humanos vivamos dignamente nun entorno de liberdade, xustiza e paz. Moitos deles foron elixidos por vós para decorar o símbolo do ADN, que acabamos colgando na nosa árbore de Nadal!!! Tristemente, moitos deses dereitos aínda non se cumpren en moitos lugares do noso pequeno planeta. Por iso pensamos que, neste ano adicado á ciencia, sería marabilloso podelos incluír dentro das instrucións do noso ADN. Se entre as instrucións xenéticas dese libriño, como nolo explicou Ángel Carracedo, estiveran todos estes dereitos, canto máis amor non habería no mundo!!! Cada unha de nós temos que facer todo o posible para que iso sexa así, estades de acordo?  
Podedes ver todas as fotos premendo na imaxe.

xoves, 6 de decembro de 2018

PREMIO A UNHA BIBLIOTECA

Os pasados 28, 29 e 30 de novembro celebrouse en Logroño, a capital de A Rioxa, o IX Congreso Nacional de Bibliotecas Públicas. Nel falaron de moitos temas interesantes relacionados coas bibliotecas públicas de España, e tamén entregaron o premio ao mellor vídeo, que nesta ocasión foi para a Biblioteca Pública Menéndez Pelayo, de Castropol. Esta vila asturiana, situada á beira do río Eo, presentou un vídeo no que as protagonistas son as persoas de menor idade: os nenos e nenas do lugar, que visitan con frecuencia este espazo marabilloso do que tan orgullosa me sinto eu tamén. Pero no vídeo tamén podemos ver como a biblioteca está aberta a toda a comunidade, e tamén avós e avoas, nais e pais, mestras e mestres, etc., fan que sexa un lugar cheo de vida. Se queredes podedes velo premendo AQUÍ, aínda que a mensaxe que eu vos quero enviar hoxe é lembrarvos que a nosa biblioteca está tamén aberta para todas as persoas que visitades o centro, que nos axudades nas gardas de comedor, que botades unha man no transporte escolar, que vos reunides para falar dos vosos fillos e fillas... Estou convencida de que un dos mellores agasallos que podedes facerlles é a paixón pola lectura, pero esta comeza a contaxiarxe practicándoa, así que xa sabedes: aquí tedes a vosa biblioteca!!!



CELEBRACIÓN DOS DEREITOS DO NENO E HUMANOS

O vindeiro luns, 10 de decembro, celébrase o "Día dos Dereitos Humanos". Durante os últimos cursos vimos xuntando esta conmemoración á do 20 de novembro ("Día dos Dereitos do/a Neno/a"), así como á Carreira "Save the Children", na cal sempre participamos.
Nesta ocasión, eu aproveitei tamén para animarvos a participar na actividade da decoración da árbore de Nadal, que leva por título "O noso ADN". Xa que este curso vai de ciencia, pensei que sería unha boa maneira de desexar un Bo Nadal e adornar a nosa árbore colgando nela o símbolo do ADN cos dereitos que traballedes na aula, para falar deles a próxima semana. Déixovos aquí a carta, na que tamén anuncio o Concurso de Postais no que con tanta ilusión participades. Estou desexando ver as vosas creacións científicas!!!!



Unha aperta enorme,


CARREIRA CAMPO A TRAVÉS



https://photos.app.goo.gl/W1PjF7556y4c5md57

Un ano máis, o profe David inscribiu ao alumnado do noso cole na Carreira de Campo a Través, que se celebrou en A Baña o pasado 4 de decembro. Nesta ocasión fostes un grupo estupendo de corredores e corredoras dende 2º ata 6º de Primaria, acompañados/as polos mestres David, Marco e a mestra Carmen. En total, 15 rapaciños e rapaciñas: Soraya, Guille, Ángel, Brais Capelo, Brais Carreira, Alejandro, Miguel, Joel, Jorge Lema, Jorge Otero, Samuel, Paula Barcia, Nerea, Pablo e Paula Maneiro. E das quince persoas clasificáronse 4!!!! NORABOA  a todas, e moito ánimo ás que acudirán á seguinte fase: Soraya, Paula Barcia, Jorge Otero e Paula Maneiro!!!! Podedes ler a noticia da prensa premendo AQUÍ e, premendo sobre a imaxe superior, poderedes ver as fotos feitas en A Baña nesta ocasión. Tamén podedes ver os vídeos premendo AQUÍ. Seguiremos informando...


Na imaxe de La Voz de Galicia podemos ver a Soraya, co dorsal nº 200.

xoves, 29 de novembro de 2018

ENTREVISTA A ÁNGEL CARRACEDO


Xa está dispoñible o programa nº 2 de "Entrevistas porquiñas", gravado en "Radio Rosiña" o 27 de novembro. Nesta segunda entrevista, o convidado foi o noso querido Ángel Carracedo, que respondeu ás preguntas dos nenos e nenas de 5º e 6º  durante 48 minutos!!! Lembrade que podedes descargala nos vosos dispositivos (móbiles, ordenadores, tablets...) e escoitala cando queirades. Recoméndovos que non vos perdades este encontro radiofónico cunha das persoas máis marabillosas que coñezo!!! A través da entrevista descubriredes moitas cousas relacionadas coa ciencia (como funciona un laboratorio, que están a investigar actualmente, en que consisten enfermidades coma o cancro, por que van morrendo as células do noso corpo, etc.), pero tamén descubriredes o nome dalgúns científicos pouco coñecidos, as afeccións preferidas de Ángel, a grande paixón que sente pola súa familia, cal foi a súa mellor viaxe, algúns dos seus libros preferidos ou se lle gustaría viaxar ao espazo ou á Lúa
Ángel leunos dous contiños que escribiu a súa filla.
As ondas radiofónicas non dan a posibilidade de que vexades o ambiente que se creou no noso recuncho, pero eu podo asegurarvos que o pasamos moi ben, e que aprendemos moitísimo con Ángel, así que quero felicitar a todas as persoas que fixeron posible este resultado, un auténtico tesouro: ás entrevistadoras Daniela, Paula Barcia, Paula Maneiro, Mª José, Nerea; aos entrevistadores, Joel, Miguel, Alejandro, Jorge Otero, Jorge Lema, Pablo e Samuel; aos técnicos de son Jorge Otero e Jorge Lema, asesorados por Pablo; as mestras Marina, Carmen e Susi, que axudaron na preparación da entrevista; a David porque sen el as fotos serían moi escasas e de moita peor calidade; a Xavi porque foi o contacto principal para que Ángel aterrizara no noso cole e, por suposto, a Ángel, que pasou máis dunha hora no noso estudio encantado connosco e enchendo de maxia a "Radio Rosiña". Emocionadísima estou!!!





martes, 27 de novembro de 2018

A VISITA DE ÁNGEL CARRACEDO

Alejandro entregándolle un agasallo a Ángel.
Que alegría recibir a Ángel Carracedo no cole!!!! Alegrámonos sempre que sabemos noticias súas, pero cada vez que nos visita o ambiente do cole énchese dunha maxia que só Ángel consigue!!! 
Somos unhas persoas moi privilexiadas por poder contar coa súa presenza nun centro coma o noso, compartindo con el unha xornada de conversas cheas de sabeduría, e non só sobre ciencia, senón tamén sobre temas da vida cotiá que tanto nos preocupan como os valores do ser humano ou o sentido da nosa vida. Pero ademais de magnífico contador, Ángel ten unha cualidade que o diferencia de moitas outras figuras que destacan en distintos ámbitos: a súa humildade. Que unha persoa tan recoñecida a nivel mundial, solicitada en multitude de eventos relacionados coa ciencia (e tamén fóra dela), se ofreza a escoitarnos durante toda unha xornada debe enchernos de orgullo a todas as persoas que compartimos con el estes momentos. 

 
Na nosa biblioteca conversamos durante parte da mañá.
Na biblioteca reunímonos en dúas quendas, unha para o alumnado e outra para o profesorado, as nais e pais do alumnado e todas as persoas do contorno que quixeran achegarse ata San Cosme. E entre estas catro paredes xurdiron preguntas con e sen resposta, pero tamén reflexións moi interesantes nun ambiente distendido e ameno que gardaremos no noso recordo con moitísimo cariño. 

Momento da entrevista en "Radio Rosiña".
Pero tamén no noso recuncho radiofónico, xa que Ángel foi entrevistado en "Radio Rosiña" polas rapazas e rapaces de 5º e 6º, todo un acontecemento que prepararon con moitísimas ganas e cuxo resultado foi moi gratificante. En breve poderedes escoitar esta entrevista, que rematou cun agasallo para as locutoras e locutores de maoir idade do cole: un par de contos a micrófono pechado que Ángel leu para nós.


Ángel, moitísimas grazas por facer deste 27 de novembro un día máxico e inesquecible!!!

Premendo nas imaxes podedes ver todas as fotos da xornada. A entrevista subirémola nos próximos días.

luns, 26 de novembro de 2018

PROBETAS CONTRA A VIOLENCIA DE XÉNERO

https://photos.app.goo.gl/SkeXr53HFJUZDdbG7Pois xa temos as nosas probetas preparadas contra a violencia. Estou convencida de que calquera persoa maltratadora deixaría de selo se as probara!!!! Están cheas de abrazos, bicos, axuda, empatía... Ao tempo que lemos todas as fórmulas, tamén falamos de dúas diferentes maneiras que hai de agredir aos demais: as agresións verbais (empregando a palabra para insultar ou para contar mentiras sobre outras persoas, por exemplo) e as agresións físicas (escupir, pegar, etc.), entre outras. Pero neste 25 de novembro quixemos tamén centrar a atención na violencia cara á muller, xa que son moitas as mulleres que a sofren, e nunha porcentaxe moi elevada provocada polos homes máis achegados a elas: maridos e pais. Un momento de reflexión que rematamos cunha chea de apertas entre todas e todas!!!! Premede sobre a imaxe para ver todas as fotos.
Tamén vos deixo un vídeo moi interesante que relaciona a desigualdade de homes e mulleres en moitas das actividades da vida cotiá co dereito á saúde, para que reflexionemos sobre algo que nos afecta a todas as persoas:



venres, 23 de novembro de 2018

O PRÓXIMO MARTES, ÁNGEL CARRACEDO NA NOSA BIBLIOTECA

Xa non podo esperar máis!!!! O próximo martes visítanos Ángel Carracedo, o padriño da nosa biblioteca. E pareceume estupendo rematar a semana anunciándoo no noso blog, así que aquí tedes o cartel que fixemos para esta esperadísima visita!!! 
Ademais de escoitar a Ángel na biblioteca, tamén lle faremos unha entrevista para "Radio Rosiña", na nosa sección "Entrevistas Porquiñas". Seguro que aprendemos un montón cunha das persoas máis importantes no mundo da ciencia. Canta ilusión nos fai recibir a Ángel, coincidindo ademais co curso no que adicamos o proxecto documental integrado á ciencia.
Vémonos o vindeiro martes na biblioteca!!!!


 


xoves, 22 de novembro de 2018

25 DE NOVEMBRO-DÍA CONTRA A VIOLENCIA CARA A MULLER

OLA, RAPACIÑAS E RAPACIÑOS!!!!
Aquí vos deixo a carta que vos escribín hoxe para a actividade coa que imos celebrar entre mañá e o luns o "Día contra a violencia cara á muller". Espero as vosas fórmulas máxicas!!!



Unha aperta,


UN RAPAZ ENGANCHADO Á LECTURA

Hoxe chego cunha noticia extraordinaria, e seguramente tamén chame a atención de moitas das persoas que nos seguen no blog. É a noticia dunha rapaz que vive en Barcelona e visita practicamente todos os días unha das librarías da cidade. Chámase Hau Yu e ten 12 anos, polo que tamén vai ao cole coma nós, pero gran parte do seu tempo libre adícao á que xa se converteu na súa grande paixón: LER! Nesta libraría pode pasar ata 3 horas ao día, completamente hipnotizado polas historias que vai atopando en cada un dos libros que vai descubrindo. Non está nada mal, eh? 
Podedes ler un pouquiño máis sobre esta noticia premendo AQUÍ, onde tamén teredes a oportunidade de escoitalo falar nun breve vídeo.  

xoves, 15 de novembro de 2018

LUÍS SOTO, BENVIDO!!!!

Esta semana recibimos a visita de Luís Soto, un músico marabilloso que xa nos visitou o curso no que estabamos traballando a temática da música no cole. Nesta ocasión, e como non podía ser doutro xeito ao tratarse dun frautista, volveu encher a nosa biblioteca con obras musicais moi fermosas. Pero tamén tivo a grande idea de ter en conta o noso proxecto deste ano, sobre a ciencia, e Luís falounos entre peza e peza de cousas moi interesantes relacionadas coa mesma. Destacou a importancia do silencio para que poida existir a música, da ausencia de ruído, e atreveuse a interpretar para todas as persoas aquí reunidas unha das pezas que máis deu que falar no século XX: "4'33", de John Cage. Foi tan sorprendente que seguramente non sexa necesario lembrarvos que caracteriza esta obra de 1952. 
Luís tamén tivo un ratiño para contarnos un par de recordos que quixo compartir con todas nós. A primeira delas foi que hai un ano e un mes Galicia ardía de xeito pavoroso, e a aldea na que se criou foi unha das afectadas. Luís contounos o sorprendente silencio que sentíu no primeiro paseo que deu polo bosque completamente queimado. A segunda, hai dous anos Luís visitounos para celebrar connosco o "Día de Santa Cecilia", patroa da música. Nese ano, o 2016, Fran Pérez, NARF, acababa de morrer. A música galega perdía así a un músico marabilloso, pero afortunadamente quedan tamén músicos e persoas tan fantásticas coma Luís, que rematou o concerto de hoxe cun dos temas máis fermosos de Narf: "Aló irmao"
https://photos.app.goo.gl/oeGVsfRShMHg24RA7
Premendo sobre esta imaxe podedes ver todas as fotos.
E por se fora pouco, trouxo outro fermoso agasallo para o cole: dúas fotos do concerto da "Novena Sinfonía" de Beethoven en Santiago de Compostela, co que celebramos a "Xornada de convivencia" do curso 2016-17, e unha foto espectacular do último concerto de Narf no Teatro Principal de Compostela que el mesmo sacou. Luís, deixáchesnos sen palabras!!! Agradecidísimas todas as persoas que te coñecemos e que tanto te queremos...