EXCURSIÓN A SANTIAGO DE COMPOSTELA

Hoxe pasamos o día en Santiago de Compostela. Fomos todo o cole, pero o alumnado de Infantil e 1º e 2º de primaria viaxaron nun autobús e visitaron o Centro Galego de Arte Contemporánea (CGAC). Ademais de coñecer a exposición da man das monitoras Rebeca e Susana, tiveron tamén a oportunidade de realizar un obradoiro no que demostraron que a parte creativa dáselles verdadeiramente ben!!! Sorprendeume moito en que foron capaces de convertir un simple prato de cartón!!! Despois foron paseando polas rúas de Compostela ata a Alameda, onde xantaron na compañía do resto do cole.

A xornada foi ben bonita e para iso só hai que preguntarlles a elas e eles, e ver as fotos que fixeron, onde podemos comprobar que non perderon ningún detalle:

As Marías alegráronse moito de recibir a visita de Infantil, 1º e 2º.

Pola súa parte, 3º, 4º, 5º e 6º de primaria estiveron no CESGA, o Centro de Supercomputación de Galicia, no que Fernando e Mª José lles explicaron a función deste edificio situado no Campus da Universidade de Santiago, importantísimo para as persoas que se adican á investigación na nosa comunidade, grazas aos servizos que ofrece, entre os que destaca o almacenamento masivo de datos ou a posibilidade de acceso desde calquera ordenador conectado á rede Internet.

Mª José e Fernando despois de amosar as instalacións do CESGA.

E, por último, visitaron o Parlamento de Galicia, onde foron convidados a participar nun pleno dentro da Campaña Mundial pola Educación. Para iso, as ONG Ayuda en Acción e Educo propuxéronnos escribir un texto describindo o cole, explicar cales eran as melloras necesarias para que o centro fora inclusivo e plantexar algunhas preguntas para facer ás autoridades. Neste proceso guiounos Laura, a representante de Educo que visitou o noso centro. No Parlamento representáronnos Soraya e Guille, que o fixeron de marabilla e mesmo chegaron a emocionarnos co seu discurso e o ben que falaron nun ambiente tan novidoso para todos/as nós. Premendo na imaxe podedes ver tamén as fotos que fixeron (algunhas das cales nos enviou Laura), así coma o vídeo no que falan Soraya e Guille.

Soraya e Guille ocupando os sillóns do Parlamento.

Tamén podedes ver o vídeo completo deste acto premendo aquí.

A experiencia foi moi gratificante para todo o grupo, e desde aquí queremos agradecer a todas as persoas que o fixeron posible, en especial ás mencionadas ONG pola súa implicación connosco: Jenni e Laura.

E tamén ás que nos acompañaron nas actividades sinaladas anteriormente a esta: as monitoras do CGAC -Rebeca e Susana- e a Mª José e Fernando -do CESGA-, que con tanta atención nos recibiron. 

Unha aperta,

Rosiña

EXCURSIÓN A CORUÑA

OLA, XENTIÑA!!!

Que tal estades? Eu hoxe con moitas ganas de compartir con todas vós a excursión que fixemos o venres, 13 de maio. Aínda que todo o cole viaxou ata A Coruña, non todos os grupos fixeron as mesmas actividades, así que cóntovos...

O alumnado de 5 anos visitou o Planetario, na Casa das Ciencias, xa que non puideran asistir na ocasión anterior. Ao rematar, foron co outro grupo de Infantil e o de 1º e 2º de Primaria para visitar o Acuario, no que o mundo mariño os tivo hipnotizados/as durante o tempo que alí pasaron.

No acuario ninguén quería perder detalle das explicacións.

Pola súa parte, os grupos de 3º a 6º de Primaria asistiron a un concerto no Palacio da Ópera, no que a Orquestra Sinfónica interpretou algúns dos temas máis coñecidos das películas de Walt Disney. Seguindo a trama ideada por Víctor Grande, con intervencións dunha parella de solistas e un coro, desfrutaron, cantaron e mesmo bailaron ao son de "O rei león", "Vaiana" ou "Coco". Ao rematar, foron camiñando ata o Castelo de San Antón, e desde alí desprazáronse en autobús ata o monte de San Pedro.

Ao rematar o concerto, os grupos de 3º a 6º camiñaron ata o Castelo de San Antón.

Despois de xantar, regresaron para San Cosme, con moitas cousiñas para contar esta fin de semana!!!

Unha aperta,

Rosiña

ENTREVISTA AO ALCALDE DE MAZARICOS

OLA A TODOS E TODAS!!!

O pasado luns, o alumnado de 3º e 4º viaxou ata A Picota para colocar a exposición de promoción do sancosmeiro na Casa da Cultura, como xa puidestes ler na entrada anterior do blog.

Tamén visitaron o Concello, onde os recibiu Juan Blanco, o alcalde de Mazaricos, quen lles ensinou as instalacións da Casa consistorial e lles explicou o seu funcionamento.

O grupo de 3º e 4º na súa viaxe ata A Picota.

Aproveitaron a ocasión para facerlle unha entrevista para "Radio Rosiña", con algunhas preguntas feitas por eles/as e outras formuladas polos compañeiros/as de 5º e 6º. Queredes escoitar que lles respondeu o alcalde? Pois aquí tedes o programa que emitiron:

O grupo de 3º e 4º quere agradecer desde aquí o recibimento e o tempo adicado para realizar esta entrevista.

Saúdos,

Rosiña

EXCURSIÓN DE 5º E 6º A PONTEVEDRA

Ola, rapazas e rapaces!!!

Hoxe escríbovos para contarvos por que esta xornada non estiveron no cole as nenas e nenos de 5º e 6º: foron de excursión a Pontevedra!!! A viaxe, dentro das programadas polo "Proxecto Terra", foi unha proposta dentro das actividades do Club de Lectura. Para iso, tiveron que madrugar un pouquiño máis que un día normal, pero mereceu a pena, xa que aproveitaron moito o tempo que pasaron na cidade do Lérez. Acompañáronnas unha guía profesional, Uxía, a quen queremos agradecer os coñecementos que compartiu connosco, e os mestres Xavier e Susi. Durante a mañá descubriron algúns dos edificios máis fermosos de Pontevedra, ao tempo que Uxía lles ía contando parte da súa historia, coñecendo moitos datos interesantes. Visitaron a oficina de información turística e, despois de descansar un pouquiño, achegáronse ao Museo de Pontevedra e a Museo Castelao, onde lles chamou moito a atención o moderno edificio. Ao tempo que camiñaban polas prazas e rúas da cidade, puideron comprobar que Pontevedra é merecedora de premios que recoñecen as súas boas prácticas para mellorar as condicións de vida das persoas que a habitan: na parte vella case non hai tráfico, moitas rúas son peonís e está moi limpa.

Xantaron nun parque onde tamén puideron xogar un ratiño, antes de continuar a viaxe hacia Lourizán. Aquí atópase un enorme pazo de estilo modernista que non pode visitarse, pero o máis fermoso e interesante do lugar atópase ao seu redor: o xardín!!! Cheo de árbores chegadas de diferentes partes do mundo, é un lugar fabuloso para aprender e desfrutar paseando, ao tempo que conversaron sobre camelias de diferentes tipos, teixos, buxo, cedros, etc.

Todo o grupo regresou moi contento da experiencia, e con ganas de repetir!!!

Apertas,

Rosiña

VISITAMOS A CASA DAS CIENCIAS E O PLANETARIO

Nun curso adicado ao espazo, a visita ao planetario era unha das máis desexadas polo alumnado do cole. Aínda que houbo que cancelar un dos grupos a última hora (que irán máis adiante porque o virus non entende de excursións), o resto do centro viaxamos ata A Coruña para visitar un dos seus estupendos museos: a Casa das Ciencias e o Planetario. Fixemos dúas quendas: mentras un grupo entraba no planetario, o outro descubría as exposicións sobre astronomía, realizaba experimentos de física ou observaba o movemento do péndulo de Foucault. 

A xornada foi fantástica!!! Premede para ver as fotos.

Aperta grande,

Rosiña

 

DE CONCERTO EN A CORUÑA

Esta semana de xaneiro rematou cunha viaxe para o alumnado de Educación Infantil-5 anos e 1º e 2º de Educación Primaria. Foron de excursión a Coruña, para asistir a un concerto no Palacio da Ópera. Os protagonistas, o grupo de percusión ODAIKO, que no cole xa coñecemos e que tanto nos gustan. Ademais, convidaron a algunhas das nenas e nenos a subir ao escenario; entre elas Zaira. Tamén Sofía foi a destinataria dun agasallo improvisado polos músicos: unha baqueta que escachou en pleno concerto!!!

Chegaron ao cole moi contentas e contaxiando as ganas de facer o mesmo ao resto do alumnado!

Na entrada ao Palacio da Ópera de A Coruña.

Premendo aquí podedes ver as fotos que fixeron! 

Rosiña

"O LIXO MARIÑO", UNHA ACTIVIDADE EN COLABORACIÓN CO CEIDA

O Centro de Extensión Universitaria e Divulgación Ambiental de Galicia, CEIDA, situado na illa de Santa Cruz, Oleiros (A Coruña), é un centro de referencia en canto á educación ambiental. As súas actividades están dirixidas a traballar na procura de solucións aos problemas ambientais, así como a fomentar boas prácticas entre as cidadás para que a pegada do ser humano na natureza non sexa tan negativa. Por este motivo, este curso solicitamos unha actividade titulada "O lixo mariño", que se dividiu en dúas partes: 

-por un lado, unha charla no centro sobre a problemática do lixo, onde Laura e Flor nos falaron da importancia dos mares, os problemas que lles afectan (cambio climático, sobrepesca, explotación industrial, lixo...) ou os impactos ambientais e socioeconómicos que provocan os desperdicios que chegan ao mar, etc.;

-por outra banda, aínda que a situación é moi preocupante, non debemos rendernos, podemos mellorala facendo moitas cousas que tampouco supoñen un grande esforzo. Unha delas foi a que realizamos este venres, que consistiu en visitar a praia de O Ézaro e observar como estaba.

Despois da recollida falamos dos residuos atopados con Jorge e Laura.

 

Para esta segunda actividade acompañáronnos Laura e Jorge, e en grupos pequenos fixemos un inventariado dos residuos que atopamos na praia, facendo despois unha posta en común na que quedou claro que a maior porcentaxe do lixo que atopamos pertencía ao grupo dos plásticos!!! Afortunadamente, o Concello de Dumbría realiza unha limpeza da praia a cotío, polo que os residuos atopados non foron moitos, algo que xa nos comentou antes de comezar o traballo Raúl, un dos concelleiros que nos recibiu á nosa chegada ao Ézaro. 

Esta saída coincide ademais con dúas datas ben importantes relacionadas coa natureza, xa que mañá, 5 de xuño, celébrase o "Día Mundial do Medio Ambiente", e o vindeiro martes, día 8, o "Día Mundial dos Océanos". A xornada foi realmente interesante e sei que desfrutastes moito, tanto con esta actividade como coas outras que completaron este fermoso día: visita á fervenza do Xallas, xantar ao aire libre, paseo pola praia, xeado... Vamos, que repetiriades outra vez seguro!!!

Moitas grazas ás persoas que nos acompañaron nesta importante formación!!!

Unha aperta,

                     Rosiña

EXCURSIÓN AO ÉZARO

Estou moi contenta de poder compartir con todas vós a primeira excursión do curso!!! Os primeiros grupos en estrearse este curso foron os de Educación Infantil e 1º e 2º de Primaria, que o pasaron en grande... O destino tamén era moi atractivo, xa que visitaron O Ézaro, a fervenza do río Xallas, a praia, aproveitaron para xogar e degustar os primeiros xeados... E como a temperatura era estupenda, tamén se atreveron a mollar os pés na beira do mar!!!   

Aprendemos moitísimo con Dani e Sergio.

 

Ademais, esta actividade fixérona en colaboración coa ONG "Ayuda en Acción", e acompañáronos Sergio ("Laboratorio de Radio") e Dani!!! E aproveitaron esa gran oportunidade para prestar moita atención a un dos compoñentes máis interesantes da natureza: os sons. En ocasións poden pasar desapercibidos, ben por falta de atención ou polos ruídos que xeramos nós ou outros elementos que se atopen no entorno, pero nesta viaxe quixeron que non se perderan no recordo, polo que moitos deles graváronos con estes dous profesionais da radio. 

A verdade é que tan só tedes que ver as fotos que fixeron para comprobar que pasaron unha xornada marabillosa!!! E todo o demais que queirades saber, preguntádelles a eles e elas; de seguro estarán encantados/as de contarvos...

Pasamos un día fantástico no Ézaro!!!

Unha aperta, 

Rosiña

"RADIO ROSIÑA" EN RTV ENXEBRE

A semana rematou cunha actividade moi especial para o alumnado de 5º e 6º de Primaria: a gravación, en directo, dun programa de radio con "RTV Enxebre" no Auditorio de Vimianzo, no que tamén participaron o CPI Virxe da Cela de Monfero e o CEIP Labarta Pose de Zas. 

Este programa foi unha das actividades do proxecto que a ONG "Ayuda en Acción" desenvolve no noso centro durante este curso a través do "Laboratorio de Radio", de quen estivemos recibindo formación ao longo deste curso.

Foi un acto moi emotivo, no que o alumnado dos tres centros amosou a súa boa preparación e moito entusiasmo para que o programa se levara a cabo como estaba previsto. Todo iso, por suposto, coa axuda de Sergio e Dani, así como de Lorena, que en todo momento estiveron pendentes de todas e cada unha das persoas implicadas no proxecto.

As ondas das tres radios uníronse para dar voz á infancia rural, á que tamén se uniron tres grandes mulleres que os diferentes centros tiveron a oportunidade de entrevistar: Beatriz Varela (delegada de "Ayuda en Acción" en Galicia), Mónica Viqueira ("Plataforma de Organizaciós de Infancia" de Galicia) e a mestra Alicia López Pardo, integrante da "Rede Galega de Educación e Desenvolvemento Rural".

Desde o noso centro queremos agradecer a todas as persoas que fixeron posible esta inesquecible xuntanza, así como ao concello de Vimianzo, por concedernos a posibilidade de reunirnos nun espazo que permitiu manter as medidas recomendadas debido á covid-19. E, por suposto, á rapazada que representou aos tres centros a través das súas radios: "Onda Labarta", "Radio Xesteira" e a nosa "Radio Rosiña". 

A voz da infancia rural rematou con esta foto conxunta.

Podedes ler tamén a noticia publicada polos xornais "La opinión de A Coruña",  "La voz de Galicia" e Adiante Galicia.

Para ver as fotos, premede sobre a imaxe, e algúns vídeos do momento de ensaio premendo aquí.

Apertas!

              Rosiña

EXCURSIÓN A SANTIAGO DE COMPOSTELA

Rematamos a semana de viaxe a Santiago de Compostela. Nesta ocasión, tamén en dúas quendas.

Por un lado, o alumnado de 3º a 6º de Primaria asistiu a un concerto didáctico no Auditorio de Galicia. Aproveitando que o concerto comezaba ás 12, ao chegar ao Auditorio fixeron unha visita guiada á exposición "Xirarei: deseño de cubertas no disco galego 1955/1995". A través dela coñecemos como foron evolucionando as carpetas dos discos de vinilo, ademais de poder ver algúns dos reprodutores e outros aparatos que xa forman parte case en exclusiva das persoas que os coleccionan.

Despois dun pequeno descanso, entramos na sala de concertos, na que o grupo de percusión Píscore nos ofreceu, acompañados pola Banda Municipal de Música, un concertazo!!! Pasámolo xenial con este espectáculo titulado "Con fusión", no que mesturan música, teatro, humor, comedia xestual, participación do público... Cunha marimba como eixo principal, van incorporando diversos matices musicais e ritmos moi diferentes: música latina, rock and roll, reggae, pop e ata música disco. Un auténtico espectáculo!!!!

Ao rematar o concerto fotografámonos cos catro membros de Píscore: Pepe, Diego, Félix e Pablo.

Por outra banda, os grupos de Infantil e 1º e 2º de Primaria visitaron o Centro Galego de Arte Contemporánea (CGAC).  

Realizando o obradoiro de arte no CGAC.

Aínda que se repartiron en dous grupos, fixeron as mesmas actividades: visitaron a exposición paisaxística relacionada coa natureza do artista lucense CHRISTIAN VILLAMIDE, titulada "In landscape mode", e a fotográfica do compostelán JESÚS MADRIÑÁN, que baixo o título "I am light" amosa unha novedosa mirada sobre a realidade do Camiño de Santiago e os seus peregrinos.
Ademais disto, realizaron un obradoiro no que modificaban fotografías de grandes cidades sobre as que pegaban diferentes elementos da natureza (árbores, flores, ríos) que atraeran a chegada de diferentes animais, que tamén incorporaron nos seus deseños.
Pasárono tamén moi ben!!!!
E despois, os dous grupos regresaron ao cole para xantar.

Os grupos de Infantil e 1º e 2º de Primaria no CGAC.

Para ver todas as fotos só tedes que premer sobre calquera das que aquí aparecen.

"VOAMOS" ATA A RÍA DO BURGO CON ANTONIO SANDOVAL!!!

Antonio Sandoval Rey falando para todo o cole.

A de hoxe foi unha xornada que non esqueceremos, xa que realizamos unha das actividades máis bonitas ás que nos está levando o proxecto sobre as aves: saír á natureza para observalas!!! E ademais fixémolo ao grande, xa que organizamos unha excursión ata A Coruña!!! Alí esperábanos Antonio Sandoval Rey, quen nos acompañou facendo un percorrido pola ría do Burgo ao tempo que nos comentaba que tipo de aves eran, desde onde viaxaban, algunhas características do seu comportamento, etc. Foi toda unha sorte poder contar con Antonio para esta saída, xa que ademais de ornitólogo é escritor, e colabora mensualmente en "La Voz de la Escuela", o suplemento semanal que recibimos desde 4º a 6º de Primaria. A través dos seus textos descubrimos que era un apaixonado paxareiro, así que ao longo destes cursos xa puidemos ler varios artigos seus sobre as aves. E hoxe compartimos con el un fermoso día no que tivemos a sorte de ver corvos mariños, virapedras, garzas, garzotas, gaivotas, píllaras, cisnes... E mesmo algúns tímidos cullereiros.

Puidemos manexar telescopios e prismáticos profesionais.

Despois entramos no Xardín Botánico, onde Alberto Monteagudo, o compañeiro de Antonio, nos explicou en que consistía o anelamento de aves, ensinounos algúns tipos de aneis e outros materiais relacionados con esta actividade. Pero o que máis nos gustou foi poder ver de preto algúns fermosos paxariños que Alberto nos amosou con moito coidado: un par de paporroibos, unha papuxa das amoras e un picafollas. 

Pasámolo xenial e todas as persoas regresamos moi contentas desta fermosa mañá de febreiro. Non sabemos se algunhas se chegarán a adicar á ornitoloxía, pero o que si é seguro é que no cole xa hai un grupo de paxareiras e paxareiros a ter en conta!!! 

Desde aquí queremos agradecer a Antonio e Alberto a súa amabilidade para realizar esta actividade; sabemos que non é fácil organizar cousas que capten a atención de idades tan distantes. Vós conseguístelo, así que NORABOA!!!

Premendo sobre as imaxes poderedes ver máis información e as fotos que fixemos, e se premedes AQUÍ atoparedes algúns vídeos curtiños.

Ao rematar a excursión fixemos esta foto de grupo.

EXPOSICIÓN DINOSAUROS SANTIAGO DE COMPOSTELA

Ola!!!

Hoxe escríbovos para facervos unha proposta para esta fin de semana. Xa que en Educación Infantil están desenvolvendo un proxecto sobre os dinosauros, e xa que as aves evolucionaron a partir destes antigos animais, chegou unha interesante exposición chamada "Dinosaurs Tour". Desde mañá, 18 de xaneiro, e ata o domingo 26, poderase visitar esta exposición de dinosauros animatrónicos en Santiago de Compostela. O horario da mesma non coincide co do cole, polo que non poderemos ir en horario escolar, pero para as persoas que estean interesadas na mesma e poidan viaxar ata a capital de Galicia, déixovos aquí a información (premede sobre a imaxe):

Un saúdo e boa fin de semana!!!

GRAND PRIX FINANCIERO A PICOTA

Esta mañá o alumnado de 3º, 4º, 5º e 6º de Primaria viaxou ata A Picota para participar nunha actividade moi interesante que compartiron tamén con outros rapaces e rapazas do concello: o "Grand Prix Financiero". 

A actividade, que resultou moi interesante, consistía en xogar a ser maiores partindo de situacións da vida cotiá nas que hai que xestionar os cartos. O obxectivo do xogo non era outro que amosar que os cartos non aparecen por arte de maxia, e que hai que diferenciar entre o necesario e o desexado. Foi moi interesante!!!

As nenas e nenos de 3º a 6º tamén interactuaron co alumnado de A Picota.

VISITA Á RADIO GALEGA

Hoxe os grupos de 4 e 5 anos de Infantil e o de 1º e 2º de Primaria fixemos unha saída moi especial: estivemos na RADIO GALEGA!!!! Esta visita foi parte do premio que recibimos por gañar o curso pasado un premio no "I Concurso de Podcasts Radio na Biblio", e tiñamos moitísimas ganas de facelo realidade. Nas instalacións da Radio Galega recibiunos Lola, unha muller encantadora que nos acompañou durante todo o tempo que durou a visita. Tamén coñecemos a Carlos, quen con moita amabilidade nos foi explicando cales eran algúns dos recunchos que formaban parte deste lugar no que a maxia existe: os estudios, os aparatos que neles hai, que é unha pecera, por que as portas son tan fortes, o código das luces para saber se están gravando, etc. O técnico de son Quique tamén nos ensinou a súa mesa de mezclas, moito máis complicada ca da nosa Radio Rosiña...

A cara de alegría indica o ben que nos trataron na Radio Galega.

E despois vimos como emitían en directo o programa "Galicia por diante", que dirixe Kiko Novoa. E foi aquí onde vivimos un momento inesquecible: o mesmísimo Kiko invitounos a entrar no seu estudio!!!!! A todas as persoas!!!!! En directo!!!! Puxémonos algo nerviosas porque non contabamos con ese agasallo extra, e porque non todos os días podemos contar cousas así de sorprendentes... Kiko e a súa compañeira Cristina abriron os micrófonos para nós, así que nas ondas da Radio Galega soaron as voces dalgunhas das nenas e nenos do cole: Óliver, Betty, Luzdivina, Krasimir, Víctor... Pero tamén de todas as persoas á vez!!! Queredes velo? Premendo aquí tedes a proba auditiva e visual.

Despois, Lola acompañounos para que viramos o boneco Xabarín e o coche dos Picapedra, onde tamén quixemos facernos varios retratos. 

E no momento da despedida agasalláronnos cun libro sobre animais que nos encantou!!!

A verdade é que esta foi unha visita desas inesquecibles, por todo o que vivimos esta mañá na Radio Galega: moitísimas grazas a todas as persoas que compartiron connosco este ratiño, con tanta paciencia e amabilidade... Regresamos encantadas!!!

EXCURSIÓN A SANTIAGO DE COMPOSTELA

Hoxe viaxamos ata Santiago de Compostela en dous autobuses. O primeiro deles, co alumnado de 3º a 6º de Primaria, con rumbo ao Auditorio de Galicia, onde asistiron a un concerto didáctico no Auditorio de Galicia. O concerto, titulado "Clásicos á galega", é idea de Xosé Lois Romero e Suso Vaamonde, e foi ofrecido pola Banda Municipal de Música de Santiago. Nel interpretaron melodías moi coñecidas da música clásica, pero dándolles un "acento galego" ao incorporar instrumentos populares galegos (noz, charrasco, tarabela, culleres, pandeiro, pandeira, tixola, lata, zanfona, requinta, asubío, gaita, sacho...). Así, a Banda e a narración de Suso Vaamonde achegáronnos obras de Beethoven, Strauss, Bizet, Grieg, Rossini, Ravel ou Brahms, entre as cales incluso soou algún paxariño. 

O grupo de 3º a 6º de Primaria diante do cartel da exposición.

E despois da música, fixemos unha visita guiada á exposición "I̶N̶ ̶VISIBLE WOM@RTS", centrada na obra de mulleres artistas que parten dunha realidade cultural e xeracional propia. A través das súas creacións presentan cuestións tan interesantes como a "natureza" da muller, o arraigo social, a historia ou os pasos futuros. Unha exposición moi interesante que nos fará reflexionar tamén de cara ao vindeiro 25 de novembro, "Día contra a violencia cara á muller".

Gustáronnos moito as dúas actividades!!! Premendo sobre a imaxe podedes ver as fotos que fixemos no Auditorio de Galicia.

 

TEATRO EN INGLÉS

Esta mañá viaxamos ata A Picota para asistir a dúas sesións de teatro en inglés. A compañía "Face 2 face", que xa coñecemos dende hai varios cursos, ofreceu dous espectáculos diferentes na Casa da Cultura. O primeiro deles, para o alumnado de Infantil e 1º e 2º de Primaria titulábase "Under the sea", onde a serea Milly nos convidou a acompañala nas súas aventuras no fondo do mar e axudarlle a atopar o que máis desexaba: unhas pernas!!! Para iso contou coa axuda dalgunhas das nenas do noso cole: Luzdivina, Alicia, Paulina, Sofía e Laura, ademais doutras rapaciñas do colexio de Pino de Val.

Sofía, Laura e Paulina mergulláronse nun mar imaxinario.

O segundo espectáculo, chamado "Circus Life", estaba dirixido aos grupos de 3º a 6º de Primaria, e contaba a historia de Meg, unha rapaza que sempre soñara con ser artista. Cando o circo visita o seu pobo, pensa que pode facer realidade os seus soños. Para preparar o seu número pide axuda a varias persoas, entre as cales se atopaban Joel, Paula Barcia e Martina, ademais de dous rapaciños de Pino de Val. 

Joel parecía un rockeiro auténtico.

Pasámolo moi ben con estas aventuras en inglés, coas que sempre aprendemos moito!!!

Premendo sobre as imaxes podedes ver o resto das fotografías.

POMPAS DE XABÓN NA CASA DA CULTURA DE A PICOTA

Rematamos esta semana cunha saída á Casa da Cultura de A Picota, para asistir a un espectáculo de pompas de xabón para todos os públicos. 

Retratámonos cos Fabulosos Cleaners ao rematar a actuación.

"Os Fabulosos Cleaners" son dous operarios de limpeza do teatro, que descobren por casualidade as múltiples posibilidades que lles ofrecen as súas ferramentas de traballo combinadas con auga e xabón. A partir de aí, os personaxes emprenden unha excitante viaxe conducidos polas fantásticas pompas e burbullas. Durante o espectáculo gozamos con estas máxicas burbullas: pompas transparentes, con fume, con vapor, pequenas, grandes, estáticas ou voando polo escenario. Divertímonos moito neste máxico mundo cheo de cor e de moito humor!

Premendo sobre a imaxe podedes ver as fotos e os vídeos desta primeira saída do curso.

"CANTA MIÑA PEDRA, CANTA"

Charo Pita e Xoán Curiel actuaron para os 3 centros do concello.

Este é o título da representación que fomos ver esta mañá na casa da cultura de A Picota: "Canta miña pedra, canta". Neste espectáculo participan o músico Xoán Curiel e a contadora Charo Pita, a través do cal ofrecen algúns relatos populares e cancións que Antonio Fraguas (o escritor ao que este ano se lle adicou o Día das Letras Galegas) recolleu ao longo da súa vida. Ademais de desfrutar da función, entregáronnos un libro de agasallo a cada unha das persoas que asistimos á función, na que desfrutamos moito.

Premendo sobre a imaxe podedes ver as fotos e algúns vídeos deste "Canta miña pedra, canta".

VISITAMOS O MUNCYT DE A CORUÑA

Diante da cabina do "Lope de Vega".

Rematamos a semana viaxando ata A Coruña, onde visitamos un museo moi especial: o MUNCYT, o Museo Nacional de Ciencia e Tecnoloxía, situado no edificio Prisma de Cristal. Neste emblemático edificio, un cubo de vidro que xa foi galardoado con algún prestixioso premio de arquitectura, realizamos unha visita guiada por algunha das salas expositivas. Puidemos así coñecer aos robots Pepexán e Marilú, con quenes mantivemos unha interesante conversa e con quenes nos sorprendemos tamén moito. Na Sala "Iberia" contáronnos moitas curiosidades sobre os avións, e visitamos a cabina do Jumbo "Lope de Vega", un dos avións máis emblemáticos da historia de España, xa que no ano 1981 trasladou de Nova York a Madrid a obra cume do pintor Pablo Picasso: "O Guernica". E tamén vimos o primeiro ordenador e a lanterna da Torre de Hércules na Sala "Mayúsculas".

Por outra parte, fixemos dous obradoiros moi interesantes. O primeiro deles, para Infantil, 1º e 2º de Primaria, chamábase a "Vidrieira de Peteiro", no que traballamos en equipo amosando a nosa capacidade de observación e de clasificación, a nosa agudeza visual, a memoria e a orientación.

O acueduto aguantou grazas ao traballo en equipo.

 Para 3º, 4º, 5º e 6º de Primaria estaba reservado o "Obradoiro de enxeño", no que manexamos conceptos básicos de enxenería, tensións, esforzos, etc. A través de pezas moi lixeiras con formas diferentes, fomos quenes de construír o emblema da cidade -a Torre de Hércules- e un acueduto, ao tempo que fixemos unha viaxe pola historia ata a época romana.

Xogar, comer e compartir momentos de conversas e sorrisos completaron esta inesquecible excursión!!!
Premendo sobre calquera imaxe podedes ver o resto das fotos desta xornada.

VISITAMOS A EXPOSICIÓN DE LEONARDO DA VINCI EN SANTIAGO DE COMPOSTELA

Observando A Gioconda (en galego a alegre).

A xornada de hoxe fixemos unha viaxe a Santiago de Compostela, para visitar unha exposición moi relacionada coa ciencia: "LEONARDO DA VINCI: A EXPOSICIÓN", ubicada no Mosteiro de San Martiño Pinario. Despois de ver un vídeo sobre este xenio italiano, puidemos deternos nalgúns dos obxectos que conforman a exposición, agrupados segundo a temática, xa que Leonardo da Vinci (1452-1519) foi un auténtico polímota. Xa sei que esta é unha palabra pouco coñecida, pero entenderás o seu significado rapidamente: unha polímota é unha persoa que ten moitos coñecementos sobre diversos campos da ciencia, da arte ou das humanidades. Como Leonardo!!! Só hai que citar a cantidade de profesións nas que traballou: pintor, anatomista, arquitecto, paleontólogo, botánico, escultor, filósofo, inxenieiro, científico, escritor, inventor...

No apartado adicado á pintura vimos reproducións dalgúns dos seus cadros máis destacados: A última cea e A Gioconda ou A Mona Lisa, diante dos cales falamos dunha das técnicas nas que máis destacou o artista: o sfumato, que consiste en que non se noten as liñas, os bordos...

No apartado sobre os seus estudos sobre o corpo humano (anatomía), puidemos apreciar o grande coñecemento que sobre o mesmo tiña Da Vinci, onde non podía faltar o seu Home de Vitruvio.

Fermosa foto coa impresionante catedral de fondo.

Había tamén un apartado adicado á auga, onde vimos flotadores, un traxe de mergullador con escafandra e mesmo un prototipo de submarino...

Un último espazo estaba reservado ao voo, unha cuestión que sempre interesou ao artista renacentista.  

Desta maneira puidemos coñecer un pouco unha das figuras máis importantes de todos os tempos, xa que na actualidade aínda seguimos empregando os seus inventos, e iso que este ano cúmprese o 500 aniversario da súa morte!!!

E despois, camiñata pola zona vella de Compostela, que sempre é unha estupendísima opción, ata a Alameda, onde fixemos unha paradiña para xantar e xogar antes de regresar a San Cosme. Foi unha xornada estupenda, verdade?
Premede sobre calquera imaxe para ver todas as fotos!