xoves, 17 de decembro de 2015

POSTAIS DE NADAL E GUÍA DE LECTURA

Antes de comezar as vacacións, despedimos o 1º trimestre coa celebración do Concurso de Postais de Nadal. Nesta ocasión, sorprendéronnos moitísimo as vosas olímpicas ilustracións! Mira que lle dades á cabeciña... Reis Magos subidos ao podio olímpico, árbores de Nadal ou nubes construídas a base de aros olímpicos, xogos inventados por vós ("despluma-pavos", "come-turrón"), e mesmo o "Discóbolo" transformado en Papá Noel participaron nun concurso no que se entregaron 5 medallas de ouro: 
-en Educación Infantil o premio foi para TODA A CLASE;
-en 2º de Educación Primaria houbo dous agasallados: NEREA OZÓN OTERO e ALEJANDRO VILLAR NEGREIRA, quen obtivo a medalla especial do xurado;
-en 4º, a medalla foi para IRIA BLANCO DEL RÍO;
-en 6º, para DIEGO COUSO NIETO.
E como seguro que queredes velas, aquí tedes as cinco premiadas:

E, de todas elas, seleccionouse unha para imprimir e enviar ás familias, felicitando as festas do Nadal e o vindeiro ano 2016. E así de fermosa luciu a postal de Alejandro, a elixida para adornar os nosos fogares durante estes días. Acompañámola cun poema sobre o ano novo do escritor recentemente falecido Xosé Neira Vilas:

A continuación podedes ver o resto de postais expostas no corredor:

E, para rematar, tamén elaboramos unha guía de lectura na que atoparedes libros, xogos, películas ou CD's que podedes incluír nas vosas cartas ao Apalpador ou aos Reis Magos!

venres, 11 de decembro de 2015

DEREITOS E DESEXOS PARA O NADAL

Esta tarde xuntámonos no patio do colexio para celebrar un acto con motivo do Día dos Dereitos do Neno (20 de novembro) e os Dereitos Humanos (10 de decembro). Aínda que ambas datas xa pasaron, hoxe reunímonos para falar do traballo realizado nas aulas durante estas últimas semanas, e o alumnado de 6º tamén nos leu un pequeno resumo sobre a Convención dos Dereitos do Neno, aprobada pola Asamblea das Nacións Unidas no ano 1989. 
Xunto á actividade de traballar nas aulas os dereitos, este curso tamén engadimos unha novidade, que consistíu en convertir un aro olímpico nun adorno para a nosa árbore de Nadal. Así, cada grupo decorou varios aros e escribiu un desexo en cada un relacionado cos dereitos. Esta tarde lémolos e colgámolos na árbore, na que tamén engadimos imaxes relacionadas coas Olimpíadas: deportes, iconas, deportistas, etc.
E por último, fixemos unha carreira moi especial, ao participar na XII edición de "Quilómetros de solidariedade" de SAVE THE CHILDREN. Medrar san e feliz, cumprir anos, soñar con ser maior..., son algunhas das cousas que esperamos suceda na vida de calquera neno/a. Pero non todos poden facelo. Cada día morren no mundo 16.000 nenos e nenas menores de 5 anos a causa de enfermidades como a desnutrición, a diarrea, o xarampón ou a malaria, debido a que non teñen acceso á atención médica ou non dispoñen de alimentos e tratamentos adecuados a tempo. Así ocorre en países do continente africano coma Burkina Faso, Níxer, Mauritania ou Malí. E a estes países e aos que Save the Children destinará os fondos recadados entre todos/as nós. 
E aquí están as imaxes dunha tarde solleira na que tamén escoitamos cancións tradicionais africanas, mais estas non saen nas fotos:

xoves, 3 de decembro de 2015

AS OLIMPÍADAS NOS ANUNCIOS

Os xogos olímpicos son tamén a inspiración para algunhas das persoas que realizan anuncios publicitarios. Nalgunhas ocasións, aproveitan a recoñecida imaxe de grandes deportistas para publicitar prendas de roupa, complementos, colonias, etc. E nesta época previa ao Nadal tamén hai anuncios relacionados coas comidas e bebidas que adoitan servirse nesta celebración anual: turróns, mazapáns, polvoróns..., e cava ou champán. 
Pois un deses anuncios protagonízao este ano o conxunto español de ximnasia rítmica. As ximnastas clasificáronse para os Xogos de Río 2016, ao gañar en setembro a medalla de bronce nos Mundiais de Rítmica.
Aquí tedes o resultado dun vídeo que nos amosa ás ximnastas movendo os instrumentos cos que adoitan acompañarse: aros, fitas, mazas, pelotas, cordas... E os 5 aros olímpicos sempre presentes: nas burbullas, nos movementos, nos fugaces debuxos que fan as deportistas cos seus movementos... 


Xa no 2008 a selección española de natación sincronizada protagonizara o anuncio desta mesma compañía:


sábado, 28 de novembro de 2015

DESPEDÍMONOS DE XOSÉ NEIRA VILAS

Pois rematamos esta semana con esta triste noticia, sobre o falecemento de Xosé Neira Vilas, o autor do libro máis vendido na historia da literatura galega: "Memorias dun neno labrego". Cando lle preguntaban por esta obra, dicía que "eu só quería contar o que pasaba na aldea". E contouse incluso noutros idiomas, xa que entre os 600.000 exemplares vendidos está, ademais do galego, as traducións ao castelán, inglés, francés, alemán, chinés, ruso, búlgaro..., e mesmo en Braille! 
Os seus compañeiros (de profesión, da RAG da que formou parte, da editorial Galaxia -na cal publicou unha grande parte da súa obra-, etc.), falan de Xosé Neira Vilas coma "un bo e xeneroso". Tamén din que "nunca cansaba. Editaba e reeditaba. Facía e refacía. Descorría, sempre". E é que, aínda que xa tiña 87 anos, todavía seguía moi activo.
Concedéronlle case todos os premios que se poden conceder a un escritor: as medallas Castelao, o Pedrón de Honra e Celanova Casa dos Poetas. Foi investido Doutor Honoris Causa pola Universidade de A Coruña. Tamén é Premio da Crítica Española e da Crítica Galega, ademais de Premio Laxeiro e Trasalba. Pero, sobre todo, como escribiu a periodista Montse Dopico, Xosé Neira Vilas é dos "ninguén", da humildade, do que representaba a voz de Balbino (o protagonista das "Memorias dun neno labrego"), da procura da verdade e da xustiza.
Tamén no CEIP Víctor Sáenz nos sumamos a esa tristeza pola morte dun escritor que sempre tivo en conta aos nenos e nenas de Galicia, do rural, para os que escribiu tantas fermosas historias, tantos fermosos poemas! Coma o que aprendemos este outono e que serve de homenaxe a este grande autor!
Aquí podedes ver tamén unha entrevista ben interesante na que Xosé Neira Vilas fala, sobre todo, dos nenos e das nenas!



A continuación podedes ver as fotografías do recuncho que preparamos esta mañá para expoñer todos os libros que temos na nosa Biblioteca de Xosé Neira Vilas, e o cartel que elaboraron en 5º para lembrarnos un poema que aprendemos e ao que puxemos ritmo na clase de música, ou algunhas das declaracións que nos pareceron non debemos esquecer. Agora só falta animarvos a levar algunha das súas obras para desfrutar coa súa lectura!



mércores, 25 de novembro de 2015

DÍA INTERNACIONAL CONTRA A VIOLENCIA DE XÉNERO

O certo é que é moi triste que teñamos que celebrar datas coma esta. O "Día Internacional da eliminación da violencia contra a muller", débese, segundo á Organización das Nacións Unidas (ONU), a datos tan horribles coma os seguintes:
-a violencia contra a muller é unha violación dos dereitos humanos;
-a violencia contra a muller é consecuencia da discriminación que sofre, tanto en leis como na práctica, e nas desigualdades pola razón de xénero;
-a violencia contra a muller afecta e impide o avance en moitas áreas, incluídas a eliminación da pobreza, a loita contra a paz e a seguridade, etc.;
-a violencia contra a muller pódese evitar. A prevención é posible e indispensable;
-a violencia contra a muller segue sendo unha pandemia global. Ata un 70% das mulleres sofren violencia na súa vida.
O caso é verdadeiramente grave e alarmante!!!!
A ONU decidiu poñer en marcha a campaña "16 días contra a violencia de xénero", que comeza o 25 de novembro e remata o 10 de decembro, Día dos Dereitos Humanos. Esta campaña ten como obxectivo chamar á acción para poñer fin á violencia contra as mulleres e as nenas en todo o mundo.
Este ano, a campaña invita á participación na iniciativa "Pinta o mundo de laranxa: pon fin á violencia contra mulleres e nenas".
Ademais de pintar o mundo de laranxa, tamén podedes ver algúns dos seguintes vídeos, que tratan en profundidade este tema tan preocupante:

UN XOGO PARA OS RAPACIÑOS E RAPACIÑAS DE ED. INFANTIL:


"LITTLE MERMAID"
Esta curta conta a historia de Saúl, un meniño de 5 anos que decide vestirse de "Sereo" para a festa de Entroido do seu cole, e a súa nai comeza a preocuparse en exceso... 


"SEIS GRADOS"
Un anuncio publicitario que gañou un premio no ano 2009.


"NO ES AMOR"
Este anuncio tamén obtivo un premio no ano 2013.


E QUE SUCEDE NO DEPORTE? Aproveitando que as Olimpíadas é o tema principal do noso proxecto este curso, non queremos deixar pasar esta data sen telo en conta. Vós que pensades? Hai diferencias nos deportes entre homes e mulleres? E no cole? Que sucede cando xogades? Estas preguntas son unha invitación á reflexión para os rapaces e rapazas de 5º e 6º. Para todos, aquí van algúns vídeos que tratan este tema a partir de mulleres deportistas:

-VÍDEO QUE RESUME BREVEMENTE A PRESENCIA DA MULLER NOS XOGOS OLÍMPICOS



-VÍDEO POLA IGUALDADE DE MULLERES DEPORTISTAS ESPAÑOLAS


-VÍDEO REALIZADO PARA CELEBRAR AS "II XORNADAS DE DEPORTE, IGUALDADE E VIOLENCIA DE XÉNERO", ELABORADO POR UN EQUIPO FEMININO DE RUGBY 

luns, 23 de novembro de 2015

VISITA A FEIRACO

O concello de Mazaricos está celebrando a súa "Semana Gandeira". Por este motivo, ademais de convocar un concurso de ilustración e fotografía, no cal participamos todas as persoas que quixemos, tamén nos convidaron a visitar a fábrica da cooperativa FEIRACO. E viaxando ata Pontemaceira foi como comezamos esta semana. Alí puidemos ver o lugar ao que chegan os camións que recollen o leite dalgunhas das cooperativas de Mazaricos, así como o seu envasado en tetra-briks. Ao final, o presidente de FEIRACO, explicounos con moita amabilidade a evolución desta cooperativa dende a súa fundación, no ano 1968. E convidáronnos cuns riquísimos iogures!!!
A TVG tamén estaba alí, e gravounos un pouquiño. Se queredes ver a reportaxe, premede aquí e poderedes acceder á mesma.
Pero tamén fixemos fotos, por suposto!!!



E, xa no cole, Radio Nordés veu entrevistar ao alumnado de 6º e á nosa titora, Marina. Foi unha auténtica experiencia!

domingo, 22 de novembro de 2015

ALICIA CUMPRE 150 ANOS

Hai 150 anos un catedrático da universidade de Oxford chamado Charles Lutwidge Dodgson contáballes historias a tres meniñas. Unha delas, Alice Liddell, pediulle que escribira un dos contos cos que se entretían á beira do río Támese (Londres). E Charles Lutwidge pasou dous anos escribindo un manuscrito con máis de 30 ilustracións que debuxou el mesmo.
Ese escritor é mundialmente coñecido polo seu seudónimo, LEWIS CARROL, e o conto, Alicia no país das marabillas.
Esta novela cambiou por completo o concepto da literatura infantil, xa que era a través da súa lectura podes divertirte á vez que aprendes moitísimas cousas. O escritor Alberto Manguel refírese a esta obra dicindo: "Hai obras que nos guían, ilumínannos, fortalécennos, fannos máis intelixentes, sen dicirnos xamais como o fan nin por que (...) Entre elas destacan, resplandecentes, os libros de Alicia".
Non me digades que non vos entran ganas de lela... Se xa tes 9 anos, animámoste a desfrutar da súa lectura. E se non os tes, podes atopar outras opcións para desfrutar desta marabillosa obra da literatura. Se premes sobre o título seguinte, podes ver os debuxos de Disney:

venres, 13 de novembro de 2015

MAGOSTO 2015

Rematamos a semana celebrando o Magosto!!! E ademais, da maneira que máis nos gusta: xogando!!! Noutras ocasións, debido ás condicións meteorolóxicas, non puidemos festexalo así, pero hoxe desfrutamos dunha fermosa tarde de sol que nos permitiu non só realizar os xogos que tiñamos preparados, senón tamén asar as castañas no patio do cole, cantar e bailar ou falar coas persoas que se achegaron ata o centro para compartir con nós a festa!!! 
Das castañas encargáronse Miguel e Rubén, quen nos botou unha man enorme e polo cal queremos agradecerlle a súa desinteresada axuda. Dos xogos, os mestres, repartindo as distintas zonas do patio para xogar aos birlos, ao balón-parella, á culler-castaña, aos ladrillos, etc. Despois de xogar cantamos, tocamos e comemos as castañas; exquisitas!!!
Aínda que, coma sempre que celebramos algunha festa ou data importante no cole, o mellor de todo é poder compartilo co resto da comunidade educativa, así que foi un pracer recibir a pais, nais, avoas..., ou mestras que nos deron unha grata sorpresa: Cruz e Rocío, grazas!!!
E, para que vexades que ben o pasamos, aquí van as fotos que puidemos facer:

sábado, 7 de novembro de 2015

VISITOUNOS FÉLIX FERNÁNDEZ!!!


Esta semana tivemos a sorte de contar coa presenza dun gran artista:
FÉLIX FERNÁNDEZ. (Se premedes sobre o nome poderedes acceder á súa páxina web).
Félix, licencidado en Belas Artes, achegounos ao mundo da fotografía como recurso artístico. Durante as mañás do mércores e do venres, Félix ensinounos a "ler" imaxes analizando diferentes fotografías do máis peculiares, tendo en conta aspectos tan diferentes como a posición do corpo, os obxectos que están presentes na imaxe, as cores, a vestimenta, os textos, etc., así como a posición da cámara.
Así, puidemos ver imaxes que parecían enganarnos (os pés das persoas fotografadas non estaban en contacto co chan), outras xogaban coa camuflaxe, algunhas amosaban un cambio de xénero (homes que simulaban mulleres e viceversa), outras eran fotografías ocasionais, sen preparación, etc. 
Despois puidemos crear a nosa propia obra de arte, representando cada un/unha de nós unha situación. No caso de terceiro e cuarto eliximos o tema das emocións, e para iso empregamos carteis, maquillaxe, obxectos diversos..., todo o que a nosa imaxinación e creatividade nos "deixou". En quinto e sexto a consigna era pensar no que quixeramos para tratar de comunicalo a través do noso corpo, empregando para elo pinturas, palabras escritas, obxectos que tiveramos na escola, etc. E tamén xurdiron as emocións, entre outras cousas (representar o día e a noite, o "yin" e o "yang", a diferenza ou mesmo a morte).
Pasámolo moi ben vendo o resultado final das nosas fotografías e analizando as nosas posturas corporais e faciais.
Moitas grazas, Félix, por achegarnos a unha nova forma de arte para nós descoñecida.
Aquí podedes ver todas as nosas fotografías:


E a continuación as demais fotos deste obradoiro tan especial:

xoves, 29 de outubro de 2015

SAMAÍN 2015, COMEZANDO AS "OLERPÍADAS"

Aínda que a celebración non é a primeira vez que se realiza, nesta ocasión houbo algunhas cousiñas diferentes para festexar o Samaín. 
A primeira delas foi a visita ao cole dunha parente da Rosiña cando estabamos a punto de entregar os premios dos concursos. Nada máis e nada menos que PEPA PIG, que ao escoitarnos cantando, achegouse a ver que pasaba e xa quedou con nós para entregar os agasallos aos premiados.
Durante esta semana puidemos comprobar que a vosa creatividade non ten límite, e que coa axuda de todos os membros da familia elaborastes unhas cabazas moi especiais -logrando incluso que se adecuaran ao proxecto olímpico que queremos desenvolver este curso-, así que queremos agradecer a vosa participación neste primeiro concurso do ano. Claro que nos resultou complicadísimo, porque había verdadeiras obras de arte. O "podio olímpico" compartírono:
MARTINA PEREIRA TUÑAS, de Educación Infantil (5 anos);
JORGE OTERO PITA, do 2º curso de Ed. Primaria;
ÁLEX ÍNSUA MOLDES, do 6º curso de Ed. Primaria.

Pero seguro que queredes velas todas, así que aquí as tedes:

Tamén os relatos foron moi especiais, e nas historias de terror aparecían todo tipo de personaxes. Mesmo seres fantásticos ou persoas coas que coñecemos moi ben e se convertiron nas protagonistas destes relatos terroríficos. Como non nos deu tempo a lelos, xa que Pepa acaparou toda a atención, déixovos aquí os que recibiron a medalla de ouro nesta ocasión:
A AULA DE EDUCACIÓN INFANTIL, polo seu relato "A bruxa e a galiña".


JORGE LEMA ZAMORA, de 2º, coa súa historia "As Olimpíadas zombies".


PAULA MANEIRO BERGANTIÑOS, de 3º, escribiu "A cabaza que sempre ía aos Xogos Olímpicos".


MARIO ANTELO CAMBEIRO gañou o premio en 6º pola historia "A gran aventura polas Illas Canarias".
O premio especial foi, nesta ocasión, para ÁLEX OTERO MOLEDO, de 5º curso, quen escribiu "Marcos e o lobishome".

O momento da canción e da recollida de premios coa nosa invitada especial:

Tamén elaboramos petiscos terroríficos para degustar no recreo. E para moitos foi a primeira vez que probou crema de cacahuete, galletas "mariñeiras" ou ovos de paspallás. Claro que non parecían tales cousas!!!
A outra novidade tivo lugar pola tarde. Visitáronnos TÍTERES CACHIRULO cun espectáculo adicado integramente a historias de medo. E así o pasamos:

E para que sigades creando historias tan sorprendentes, tamén elaboramos esta guía de lectura para que vos inspiredes a calquera idade!!!

sábado, 24 de outubro de 2015

O NOSO DÍA DA BIBLIOTECA

E nós quixemos celebralo tamén, a pesar de que cadraba en sábado. Así que aproveitamos o fermoso venres 23 para xuntarnos no patio do cole e compartir a "Hora de Ler" dun xeito especial. Ademais de ler o pregón, tamén creamos un pequeno poema que incluía o nome de deportes ou xogos ben coñecidos por todos. Pero había que adiviñar de cal se trataba atendendo á súa rima. Todas as mestras e mestres do cole participamos nesta actividade lendo para vós, que destes coa solución de todas as estrofas, ás que incluso puxemos música! Fantástico!!!

venres, 23 de outubro de 2015

DÍA DA BIBLIOTECA

As bibliotecas tamén están de festa. Non van celebrar o Samaín, nin o Halloween... Non, van celebrar o seu día, o DÍA DA BIBLIOTECA!!!
Esta celebración realízase por iniciativa da Asociación Española de Amigos do libro Infantil e Xuvenil, dende o ano 1997, co obxectivo de concienciar á sociedade da importancia da lectura e como homenaxe e recoñecemento á labor das persoas bibliotecarias.
Cada ano celébrase nunha Biblioteca Pública diferente; este ano, a elixida foi a de Cidade Real, en Castela-A Mancha. 
Ademais, encárgase a un/unha escritor/a a redacción do pregón, e a un/unha ilustrador/a o deseño do cartel. Nesta ocasión, o autor seleccionado é Diego Arboleda (Premio Nacional de Literatura Infantil 2014) e a ilustradora Leticia Fernández.
Aquí podedes ler e ver o que prepararon para celebrar este día especial.
NORABOA A TODAS AS PERSOAS QUE FAN POSIBLE QUE AS BIBLIOTECAS SEXAN UNS DOS NOSOS ESPAZOS MÁIS QUERIDOS, POR MOITÍSIMAS RAZÓNS!!!

xoves, 22 de outubro de 2015

SAMAÍN 2015

Tedes ganas de facerme traballar, eh? Nada máis comezar o outono e xa comezades a activarvos por completo. Que alegría me dá que me fagades traballar tanto!!! Non sei vós, pero o meu buzón é o meu pasatempos, así que cada vez que o abro e atopo algún papeliño, algunha carta, algún debuxo... Non vos imaxinades o contenta que me poño. 
Esta semana, para celebrar o próximo día 29 o Samaín, deixeivos a convocatoria para o VI Concurso de Relatos de Medo, e esta mañá xa vos vin moi concentrados escribindo as vosas historias. Tanto foi así que non me atrevín a interrumpirvos!!!
Pero por se queda algún rezagado/a que non sabe moi ben de que vai isto, aquí quedan as bases para que se anime a participar:


Ademais, tamén convocamos o Concurso de Cabazas, así que xa vos vexo esta fin de semana percorrendo as leiras de toda a veciñanza para conseguir unha cabaza que se axeite á composición que tedes pensada. Eu xa estou imaxinando... Pero non quero dicir nada para non dar ideas. Esperamos a que vaian chegando o luns e veremos con que nos sorprendedes!!! Se queredes volver ler o díptico, que ademais inclúe algunha información para saber máis sobre esta celebración tan antiga, aquí queda á vosa disposición:

MOITO ÁNIMO!!! A vindeira semana ímolo PASAR DE MEDO!!!

mércores, 30 de setembro de 2015

O TEMA DOS PROXECTOS PARA ESTE CURSO

Pois por fin chegou Rosiña!!! Tardou pero veu cos deberes feitos: deixounos unha cartiña na que xa propón o tema sobre o cal xirarán todas as actividades posibles ao longo do curso. E cal é? Pois para todas aquelas persoas que non puideron ler a súa misiva adiantámoslles que a nosa porquiña preferida elixiu os XOGOS OLÍMPICOS!!! Será que quere viaxar a Brasil o próximo verán? Ou é idea dalgunha das persoas que se cartean con ela no seu buzón? Fora como fora, o caso é que xa está decidido. Como diría unha tartaruga que todos/as vós coñecedes, "a miña decisión está tomada"! 
E xa sabedes que neste primeiro comunicado Rosiña retouvos: adiviñastes de onde vén iso de "MARATÓN"? Por que se lle chama así a esa carreira tan longa? Non esperedes para sorprendela e comezade a deixar as vosas conclusións no seu buzón!!!


venres, 18 de setembro de 2015

ÁNGEL CARRACEDO RECIBE O PREMIO NACIONAL DE XENÉTICA

O noso querido Ángel Carracedo recibe hoxe o Premio Nacional de Xenética na cidade de Córdoba. O galardón, concedido pola Sociedade Española de Xenética recoñece a súa labor pioneira no desarrollo de novas tecnoloxías para a identificación forense baseadas na xenética molecular.
Ángel valorou o traballo do equipo de Medicina Xenómica que dirixe e a eles e á súa familia foi a quen lles adicou este premio: "Somos un grupo, porque unha persoa individual non é nada". 
Nós tamén nos sumamos a este recoñecemento e alegrámonos moito de que a súa gran labor sexa ben recoñecida. 
PARABÉNS, ÁNGEL!!!

domingo, 13 de setembro de 2015

COMEZAMOS UN NOVO CURSO!!!!

Ola, rapaciños e rapaciñas!!! Como estades? Como foron as vacacións??? Seguro que xa tiñades ganas de voltar ao cole e contar todo o que fixestes durante estes meses aos vosos compañeiros, aos mestres, ... 
A min xa me contaron algunhas novedades: que temos unha compañeira nova en 3º, e outro en 2º. Que ben!!! Espero que lles derades unha boa benvida e que lles vaiades contando como funciona o noso cole! Teño moitas ganas de coñecelos, como tamén ás meniñas e meniños que comezan en Infantil!!! Xa sei os nomes de todos, e dentro duns días xa os coñecerei en persoa!!! Teño moitísimas ganas!!! 
Mentras tanto, envíovos esta curta que vin hai poucos días e que me encantou. Ten moito que ver co cine, por suposto, pero tamén cos sentimentos, coa natureza... Desfrutádeo, e ídevos preparando para comezar un novo proxecto este curso!!! Unha aperta enorme,
Rosiña.

martes, 30 de xuño de 2015

FESTIVAL DE FIN DE CURSO

Aquí tedes as fotos do festival de fin de curso. Este ano foi moi emotivo!!! Non quero poñerme triste aquí, pero o certo é que despedirse de persoas que se implican, aportan, participan..., sempre dá pena. Tamén eu, Rosiña, quero desexarlles o mellor neses novos camiños que inician en setembro.
Para o curso que vén seremos menos, pero viremos cargados de enerxía e con moitas ganas de continuar ensinando e aprendendo!!!
Agora, a desfrutar do verán!!! Apertas para todos e todas!!!





mércores, 17 de xuño de 2015

ALEJANDRO, O NOSO DIRECTOR DE CINE MÁIS ESPECIAL

Alejandro é un rapaciño de 2º que nos fixo un dos agasallos máis emotivos deste curso: nada máis e nada menos que unha película!!! Xunto coa mestra Cris, nas clases de Audición e Linguaxe prepararon unha das historias que máis lle gustan a Alejandro: "Os tres porquiños". Xuntando imaxes sobre este conto por todos/as coñecido, Alejandro vai narrando os sucesos dos seus protagonistas. E como non podía ser doutro xeito, houbo unha presentación oficial desta creación na aula de 1º e 2º, onde todas as persoas asistentes nos emocionamos con este impresionante traballo!!! E para aquelas que non puidestes asistir, aquí tedes o vídeo do noso director de cine máis noviño. NORABOA A ALEJANDRO E A MESTRA CRIS!!!!

luns, 15 de xuño de 2015

PROXECTOS DOCUMENTAIS SOBRE O CINE

POIS AQUÍ ESTÁN!!! Despois dun curso adicado ao cine, no que aprendemos un montón de cousas ata agora descoñecidas por todos nós, chegou o momento de ver unha parte do noso traballo: son os nosos proxectos documentais. Cada curso decidiu adentrarse nun dos moitísimos camiños que o cine ofrece, e a partir de aí, investigou con maior profundidade o tema elixido. E así foron nacendo todos estes traballiños, nos que vós, meniños e meniñas do cole, fostes os principais creadores!!! 
Como xa sabemos que levades tempo querendo velos, e posiblemente non tivestes ocasión de desfrutar da súa lectura debido aos preparativos do final de curso, aquí poderedes comezar a ler as interesantes investigacións de todos os grupos. Comezamos?
En Educación Infantil non houbo quen lles fixese cambiar de idea, e Walt Disney foi o centro do traballo deste curso na aula de 3, 4 e 5 anos. 

En 1º e 2º invitaron á súa aula a un dos actores máis importantes do cine mudo: Charles Chaplin. E durante todo o curso, Charles Chaplin formou parte do grupo, xa que a súa figura estaba presente en gran parte das actividades da aula.

En non tiñan outra ilusión que converterse en superheroes e superheroínas. Foi por iso que elixiron a unha rapaciña que, a pesar de non ter poderes coma os personaxes que asociamos aos superheroes e superheroínas, pode ser unha auténtica heroína: Pipi Calzaslargas.

E como aprenderon moitas palabras novas que teñen que ver co mundo cinematográfico, quixeron non esquecelas e contar o seu significado coas súas propias palabras; así foi como compuxeron este pequeno Dicionario Cinematográfico

En dubidaron durante un tempo, e finalmente aventuráronse con Mr. Fogg en A volta ao mundo en 80 días. A través desta novela, en 4º crearon un proxecto no que contan o que aprenderon a través da lectura desta obra de Julio Verne.

En animáronse co tema da caracterización, e ademais de aprender conceptos teóricos, tamén puxeron en práctica o  que ían aprendendo (no Entroido iban espectaculares!) Seguro que queredes saber moito máis sobre a caracterización! Pois adiante o proxecto de 5º.

En titularon o seu novedoso proxecto documental "Investigando sobre o cine". E dicimos novedoso porque este proxecto non está impreso, senón online. Así que se queredes velo tedes que premer sobre a seguinte imaxe:



Pero non quedaban satisfeitos se non deixaban algo elaborado que puidera ser manipulado, así que se animaron a facer un xogo moi entretido para recoñecer os actores e actrices do cine clásico. Que difícil!!!

 Tamén nos chegou, dende a aula de Inglés, o Cinema Project, elaborado polos diferentes grupos, que participaron entusiasmados nalgúns dos seus apartados:

E na aula da profe María xurdiu unha aportación novedosa: crearon varios xogos baseándose nas imaxes de diferentes películas ou no vocabulario propio da industria do cine. E así quedou esta caixiña titulada Enigmas de cine, chea de sopas de letras, de debuxos para atopar as diferenzas, de encrucillados e de xeroglíficos que te farán pensar durante un bo anaco:




domingo, 14 de xuño de 2015

EXCURSIÓN A MANZANEDA

Por fin temos dispoñibles as fotos da Excursión de Manzaneda dos rapaces e rapazas de 6º. Eran tantas, tantas...!!!
Foi unha viaxe xenial!!! Compartir días e noites xuntos, comidas, e tantas actividades e xogos...
Ademais non tivemos ningún percance!! Ata tivemos moita sorte co tempo que estaba algo tormentoso pero respectounos e non se tivo que suspender ningunha actividade. 
Grazas á profe María por acompañarnos e aturarnos!!
Portámonos todos moi ben e a profe Asun viña moi contenta sobre todo vendo como se portaban os doutros coles!! Agora di que somos uns santiños!! jajaja



venres, 5 de xuño de 2015

XORNADA DE CONVIVENCIA

Un ano máis, no cole celebramos unha xornada de convivencia para despedir o curso. Certo é que aínda quedan un par de semaniñas, pero reservamos o primeiro venres de xuño con bo tempo para ir todos xuntos a Balarés. Este lugar encántanos pola súa beleza, pola súa cercanía, pola comodidade que o seu piñeiral ofrece para organizar o xantar e a colocación dos hinchables, etc. 
Nesta ocasión, ademais, descubrimos unha nova ruta que fixemos camiñando todas as persoas que se animaron a percorrer os 5 km. que separan a praia de Balarés de Corme, guiados por Javier. O traxecto, coñecido como PR-G 148 (ruta de pequeno percorrido), ofrece unhas panorámicas excepcionais de Laxe e Corme. Pasamos tamén pola "Pedra da Serpe" e ao carón dunha praia en forma de media cuncha: a "Praia da Ermida", frente á cal se pode observar a Illa da Estrela. Chegando xa a Corme, vemos a praia de "O Osmo", e á súa esquerda unha pequena furna chamada "A furna dos encantos", na cal se celebra un festival de música no mes de agosto, que cambia de data e hora dependendo das mareas. 
Uns metros máis adiante atópase Corme, pobo moi coñecido polo seu faro ("O Roncudo"), onde se di que se atopan os mellores percebes do mundo!!!
O resto do día pasámolo diante da praia de Balarés, onde despois de degustar unhas exquisitas pizzas e empanadas, rimos un bo rato coa actuación do mago que contratou a ANPA para a ocasión, ademais de pasalo de medo nos hinchables e no toro mecánico. E claro, con tanta actividade entrounos unha sede enorme e, ademais de refrescarnos co xeado co que nos convidou a ANPA, atacamos a froita antes de regresar a San Cosme.

PASÁMOLO MOI BEN!!! O importante é desfrutar da compañía e compartir unha xornada de festa; moitos lugares poden ser fermosos para iso, e dende logo Balarés é un deles!!!
E como estaredes desexando ver as fotos que nos fixo o profe David, aquí van:

xoves, 28 de maio de 2015

O NOSO CONTO VIAXEIRO

Pois aquí temos xa o resultado final dun conto que comezou a súa viaxe en 6º, e despois de pasar uns días en cada unha das aulas do colexio, rematou en Infantil, onde o ilustraron de xeito ben fermoso. A Rosiña encantoulle a historia, as ilustracións, e considera que é un dos agasallos máis fermosos que recibiu a biblioteca!!! Así que PARABÉNS A TODAS E TODOS!!!!
Aquí o tedes para ler unha e outra vez:

venres, 22 de maio de 2015

"THE KID" de CHARLES CHAPLIN

Rematamos a semana asistindo a unha espectáculo moi especial no Centro Cultural de A Picota: o visionado da película "The Kid" con interpretación da súa banda sonora en directo!!! Ao tratarse dun filme mudo (foi rodada no ano 1921), naquela época empregaban música en directo para acompañar as proxeccións, conseguindo con iso que o ruído que facía o proxector non se percibira tanto, ademais de conseguir efectos sonoros que incrementaban os sentimentos que transmitían as diferentes escenas (alegría, tristeza, ira, etc.)
E así ocorreu co "Cuarteto Ancestral", un grupo de músicos creado no ano 2007. A película de Charles Chaplin acompañada por teclado, violín, viola e violoncello fixo que desfrutaramos moitísimo dunha historia que a todos nos marabillou.
Se queredes saber máis sobre este grupo e sobre a película, premede sobre a imaxe e poderedes traballar a Unidade Didáctica elaborada polo "Cuarteto Ancestral" para esta actividade:



venres, 15 de maio de 2015

CELEBRAMOS OS MAIOS E O DÍA DAS LETRAS GALEGAS

Hoxe foi un día de celebracións!!! 
-Construímos o Maio con todas as flores, follas e herbas que trouxestes ao cole durante estes días.
-Lemos o Conto Viaxeiro que comezamos polo "Día do Libro" e que agora teñen que rematar na aula de Infantil, ilustrando o que será a súa portada. Lembrade que tedes que ir deixando as vosas propostas para o título do mesmo no buzón de Rosiña.
-Cantamos o "Maio de As Nogais" con moita alegría.
-Entregamos os premios do Concurso Literario das Letras Galegas.

Que ben o pasamos!!! As fotos de hoxe tamén reflexan ese sentimento de alegría, así que desfrutade véndoas:

CONCURSO LITERARIO LETRAS GALEGAS 2015

Xa temos aquí os gañadores do Concurso das Letras Galegas deste ano. Despois de varios días coñecendo a obra de Filgueira Valverde, inspirámonos nos seus textos para crear os nosos propios, e o resultado foi moi bo. Rosiña quere agradecervos que todos e todas participarades neste concurso; gustáronlle moito as vosas narracións, os vosos poemas, as vosas ilustracións... Estivo moi entretida durante esta semana. E aquí tedes as creacións premiadas, para que todos poidades lelas e desfrutalas!!!

xoves, 14 de maio de 2015

LETRAS GALEGAS 2015

Con motivo do Día das Letras Galegas, dende a Coordinadora Galega de Equipos de Normalización e Dinamización Lingüística propoñénnos difundir unha mensaxe positiva de orgullo do noso idioma que vaia máis alá dunha efeméride puntual coma o 17 de maio e que chegue a toda a sociedade: "PRESUME DE GALEGO".


Tamén dende a revista Ollos de aula nos propoñen 17 cousas que podemos facer pola lingua:

luns, 27 de abril de 2015

OUTRO PREMIO PARA AGUSTÍN FERNÁNDEZ PAZ!!!


  http://www.sermosgaliza.gal/articulo/cultura/agustin-fernandez-paz-mais-lido-nos-clubs-lectura/20150424114226036793.html

Un dos nosos escritores preferidos é Agustín Fernández Paz, a quen lle concederon a semana pasada o Premio dos Clubs de Lectura 2015, ao ser o autor máis lido nestes grupos de lectura.
E nós, que o consideramos un dos mellores escritores galegos, alegrámonos moitísimo por tan merecido premio e queremos tamén felicitalo.
Se premedes sobre a imaxe poderedes ler a noticia completa.

venres, 24 de abril de 2015

CONCERTO E EXPOSICIÓN

O alumnado de 3º, 4º, 5º e 6º cursos rematamos a semana cunha saída a Santiago de Compostela. No Auditorio de Galicia asistimos a un concerto ofrecido pola Filarmónica de Galicia e a compañía de monicreques Per Poc, quenes representaron a súa versión da obra "Romeo e Xulieta". Esta coñecidísima obra de teatro de William Shakespeare inspirou moitas películas e obras musicais, sendo unha das máis destacadas o ballet que compuxo Sergei Prokofiev en 1938.
Despois do concerto, asistimos á actividade "Emocións creativas dunha colección-Teatro de Emocións", na Sede Afundación da rúa do Vilar. Aquí falamos de sentimentos, identificámolos, resolvemos situacións e construímos un cubo das emocións. 
E despois de comer, regreso ao cole moi contentos con todo o aprendido. 

APADRIÑAMENTOS LECTORES

Con motivo dun día tan especial coma o de hoxe, 23 de abril, celebramos a "Hora de ler" dunha maneira especial: os rapaciños e rapaciñas de 3º, 4º, 5º e 6º curso léronlles un ou varios contos ao resto dos meniños e meniñas do cole despois do recreo, elixindo a zona do cole que máis atractiva lles resultase para dita actividade. Así foi como se encheron os diferentes recunchos, patio incluído, de lectores e oíntes que desfrutaron moitísimo con esta actividade que, desde que se iniciou no cole, repetimos cada "Día do Libro". Aquí tedes as imaxes:

Tamén quedaron moi bonitos os marcapáxinas que cada un/unha de vós elaborou para o taboleiro que colocamos ao lado da exposición de libros. Aquí podedes ver as vosas versións de carteis xa publicados ou as vosas creacións máis orixinais. En calquera caso, o certo é que con estes marcapáxinas tan ben feitos seguro que non hai quen vos deteña nas vosas lecturas... Fixádevos ben onde se atopa o voso para recollelo a vindeira semana!

Ademais, dende a Biblioteca elaboramos unha Guía de Lectura na que vos recomendamos películas que inclúen escenas que teñen lugar en bibliotecas moi diferentes!!! Coñécelas todas?

martes, 21 de abril de 2015

CANTANDO CON HÉCTOR LORENZO NA BIBLIOTECA

Desta maneira tan musical comezamos a semana do "Día do Libro". O guitarrista Héctor Lorenzo visitounos esta mañá, acompañado da súa guitarra e dun feixiño de poemas de Raúl Gómez Pato musicados por el mesmo. Foi un ratiño no que desfrutamos escoitando, acompañando con palmas ou xestos algunhas das cancións, e mesmo cantando!!! Ademais, Héctor agasallounos con algún bis, interpretando unha segunda vez algunha das cancións que máis nos engancharon.
Agradecemos moito a súa visita ao noso cole e esperamos volver compartir con el un ratiño de música.
Aquí podedes ver as fotos desta mañá:

domingo, 19 de abril de 2015

DÍA DO LIBRO 2015

Con motivo da celebración do Día do Libro, este curso preparamos unha semana cheíña de actividades.
Comezamos o luns cun contacontos a cargo de Héctor Lorenzo. Ese mesmo día, en 6º comezará a viaxar un conto creado por todos e todas vós. 
Tamén vos propoñemos ilustrar un marcapáxinas que expoñeremos o xoves. Ese día, o 23, faremos os apadriñamentos lectores na "hora de ler" e teremos algunha sorpresa relacionada co mundo do cinema.
Este é o cartel que elaboramos, cunha ilustración de Leandro Lamas, para unha semana moi especial dende a Biblioteca:

martes, 14 de abril de 2015

DOUS GRANDES ESCRITORES

Hoxe despedímonos de dous grandes escritores. Por un lado, GÜNTER GRASS, escritor alemán ao que lle foi concedido o Nobel de Literatura e o premio Príncipe de Asturias das Letras no ano 1999. A obra máis coñecida (para adultos) deste escritor nacido en Polonia no ano 1927 é El tambor de hojalata, novela que foi adaptada ao cine e gañou varios premios.



Por outro lado, o escritor uruguaio EDUARDO GALEANO (Montevideo, 1940). Aínda que a súa obra está escrita para adultos, algunha das súas historias foi adaptada para o público infantil, coma o libro que temos na nosa biblioteca Historia da resurrección do papagaio (Editorial Kalandraka). Os seus libros contan historias curtas, a través das cales se observa a súa preocupación polas inxustizas do mundo. Moitas delas entenderédelas dentro duns anos, pero outras xa podedes animarvos a lelas. E é que dentro das súas preocupacións sociais tamén atoparedes pequenas historias que falan da natureza, da escola, do cine, ou dalgo tan importante coma o DEREITO A SOÑAR. E non esquezades que, como decía o propio Eduardo Galeano, "mucha gente pequeña, en lugares pequeños, haciendo cosas pequeñas, puede cambiar el mundo".

martes, 24 de marzo de 2015

MÚSICA E CINE EN COMPOSTELA

Comeza a última semana do trimestre cargadiña de actividades e saídas. Esta mañá parte do alumnado (3º, 4º, 5º e 6º) viaxamos a Santiago de Compostela, para asistir a un espectáculo no colexio La Salle, ofrecido polo grupo "La armónica invisible". Este grupo, formado por tres músicos (teclado, guitarra, batería e voces) interpretou unha serie de temas ilustrativos do que foi e é a música na historia do cine. Desfrutamos con temas adaptados aos distintos xéneros cinematográficos e faláronnos sobre a función da música nalgunhas escenas de películas moi coñecidas. Todo iso, con música en directo e imaxes dos filmes proxectados nunha pantalla que nos mantivo moi atentos/as durante parte da mañá.
Despois, completamos a viaxe coa visita á exposición no Auditorio de Galicia "Leopoldo Nóvoa. Papeis e cartóns". Alí puidemos ver parte da produción deste creador pontevedrés, que traballou e investigou en soportes e técnicas diferentes. As obras expostas no Auditorio, en papel e cartón (probas de autor, gravados, técnicas mixtas sobre papel, pochoirs, etc.), fixeron voar a nosa imaxinación!
E a pesar de que ameazaba chuvia, puidemos desfrutar da nosa comida ao aire libre e dun ratiño facendo o que máis nos gusta: XOGAR!!!
Aquí van as fotos dun día especial no que botamos de menos aos rapaciños e rapaciñas que non puideron vir e ao resto dos grupos e mestres que quedaron no cole.

martes, 17 de marzo de 2015

UN ECLIPSE SOLAR!

O próximo venres 20 de marzo despedimos o inverno dun xeito especial: producirase un eclipse de Sol.
Un eclipse prodúcese cando a Lúa oculta ao Sol, desde a perspectiva da Terra.
Nos seguintes vídeos poderás entender mellor como se produce este fenómeno:









Dependendo do lugar no que nos atopemos, veremos un eclipse total (toda a superficie do Sol queda cuberta pola Lúa) ou parcial (a Lúa non tapa por completo ao Sol), que será como se vexa na maior parte de Europa. En España o eclipse comezará ás 09:05 da mañá, e acabará ás 11:18. Os case 3 minutos máis espectaculares chegarán ás 10:09. Se queredes coñecer máis detalles sobre o eclipse do próximo 20 de marzo, premede AQUÍ. Tamén vos pode resolver moitas dúbidas o enlace que atoparedes neste artigo de La Voz de Galicia ou nestoutro do Observatorio da Armada, que inclúe tamén varias animacións sobre este espectáculo astronómico (premede sobre os nomes escritos a cor).
A mellor zona para velo será GALICIA, así que xa sabedes!! Pero para poder observalo tedes que tomar varias precaucións, xa que é moi perigoso mirar cara o Sol directamente, e pode provocar graves lesións nos ollos. Así que nada de gafas de sol, radiografías, cristais afumados e cousas similares. Si podedes empregar filtros solares, cristais de soldadura cun alto factor de protección ou gafas especiais. 

Pero tamén hai outras opcións:
http://www.oan.es/eclipse2015/OAN_precauciones_eclipse.pdf-unha delas, proxectando a imaxe do Sol empregando dúas cartulinas. A unha fáiselle un buratiño duns milímetros e agarrámola de costas ao Sol, de xeito que a luz pase polo burato e apareza na outra cartulina, situada a dous palmos de distancia e á sombra da primeira.
Se premes enriba da imaxe poderás ler un documento do Observatorio Astronómico Nacional que contén máis información sobre as precaucións que debemos tomar á hora de ver un eclipse.

E como seguramente estaredes moi impacientes, no seguinte vídeo podedes ver o eclipse de Sol do ano 2008, desde Novosibirsk, Rusia, aínda que tamén queremos recordarvos que o eclipse de mañá será retransmitido en directo desde as illas Feroe (situadas no Atlántico Norte). 

sábado, 14 de marzo de 2015

DÍA INTERNACIONAL DA MULLER

No cole tamén quixemos ter en conta esta data, que conmemora a loita da muller pola súa participación na sociedade e no seu desarrollo íntegro como persoa en igualdade co home.
Nesta ocasión, cada aula afondou un pouquiño na vida dunha muller relacionada co mundo do cine, dacordo co noso proxecto integrado. Foi por iso que elaboramos este traballo que expuxemos o venres, onde nos xuntamos todas e todos co desexo de que a sociedade sexa cada vez menos inxusta con algúns grupos de persoas.
Na seguinte imaxe podedes ver os murais elaborados polos distintos cursos, sobre a figura feminina elixida:
-personaxes de película, como MULAN (Ed. Infantil) e PIPI CALZASLARGAS (3º de Primaria);
-as actrices galegas A BELA OTERO (4º de Primaria) e MABEL RIVERA (1º e 2º de Primaria) ou a americana LOIS WEBER (6º de Primaria);
-mulleres cuxas historias personais inspiraron películas, como a de ANNA SULLIVAN e HELLEN KELLER ("O miragre de Anne Sullivan") ou a de VERÓNICA GUERIN (5º de Primaria).


A continuación atoparedes as fotos sacadas durante o acto de celebración:

mércores, 11 de marzo de 2015

CONTACONTOS EN INGLÉS

Hoxe asistimos, en compañía tamén do profesorado e alumnado do cole de Pino de Val, a un contacontos moi especial na Picota. Realmente, era unha storyteller, xa que a rapaza encargada da actividade contounos todo en inglés! A profe Marina axudounos moito durante os días previos a este espectáculo e puidemos entendelo de marabilla!
O alumnado de 3º a 6º pasouno xenial coas historias dunha rapaza entusiasmada co mundo do circo. Para Infantil, 1º e 2º, as historias tiveron que ver co mundo do mar, e foron tamén moi divertidas. Ademais, algúns e algunhas de vós tivestes a sorte de poder transformarvos en músicos ou animais! Rimos, emocionámonos, cantamos, saltamos, bailamos... E aprendemos inglés!

A segunda parte da visita á Picota foi unha sorpresa cinematográfica, pero iso será un segredo que quedará entre nós...

Aquí van as fotos, que de seguro vos farán rir recordando as aventuras que nos contou esta marabillosa contacontos: 


A NOSA UXÍA NA TELEVISIÓN

A nosa Uxía actuou no Luar o vernes 27 coa Escola Municipal de Música Tradicional de Santa Comba
Para ver a súa actuación situádevos ata o seguinte momento: 1h:41min:22s do video que vos deixamos aquí abaixo.
Vela aquí a nosa pandereteira!


Tamén vos deixamos unha foto de Uxía coa presentadora do Luar: Lucía Regueiro.


Uxí !!! Eres unha artistaza!!

Fixéchelo xenial!!

Bicos do teu Club de Fans!

martes, 10 de marzo de 2015

IMAXES DO SALÓN DO LIBRO DE PONTEVEDRA

Poida que este ano non poidamos acudir á XVI Edición do Salón do Libro Infantil e Xuvenil de Pontevedra pero eso non quere dicir que non poidamos acudir virtualmente.
Rosiña fixo unha escapada esta fin de semana e acaba de enviarnos unhas fotos para que lle botemos un olliño ao que alí atopou.


 Nesta ocasión o Salón leva por título "Da ciencia á ficción" e está dedicado ás ciencias.
"A ciencia, a lóxica, a explicación racional a feitos incribles: O home na lúa, os robots, a realidade virtual...etc. As matemáticas, a astronomía, a bioloxía, a física e a química... esclarecen feitos obxectivos e observables que inspiraron grandes historias de ficción. Historias, que chegaron e chegarán a converterse en realidade grazas á ciencia.
Falamos de ciencia, de ficción e da delgada liña que as separa".
O Salón inaugurouse o 27 de febreiro e estará aberto ata o 28 de marzo no Pazo da Cultura de Pontevedra.
Podedes consultar a súa programación pinchando AQUÍ.
Tamén podedes consultar a bibliografía da temática deste ano para que vexades os libros que tratan o tema da ciencia.


xoves, 5 de marzo de 2015

A HISTORIA INTERMINABLE

A historia interminable, tamén coñecida como A historia sen fin, é unha novela fantástica do escritor alemán MICHAEL ENDE. Dende a súa primeira publicación (no ano 1979), foi todo un éxito, sendo traducida a máis de 36 idiomas e adaptada para diversas producións cinematográficas.
Segundo conta o propio autor, a novela expresa o desexo de atopar a realidade que nos rodea a través de percorrer o camiño inverso, é dicir, a parte interior de cada un que se atopa na súa imaxinación:

"Cando nos fixamos un obxectivo, o mellor medio para acadalo é tomar sempre o camiño oposto. Non son eu que inventou dito método. Para chegar ao paraíso, Dante, na "Divina Comedia", comeza pasando polo inferno. (...) Para atopar a realidade hai que facer o mesmo: darlle as costas e pasar polo fantástico. Ese é o percorrido que leva a cabo o heroe de A historia interminable. Para descubrirse a si meso, Bastián debe abandonar primeiro o mundo real (onde nada ten sentido) e penetrar no país do fantástico, no que, polo contrario, todo está cargado de significado. Sen embargo, hai sempre un risco cando se realiza tal periplo; entre a realidade e o fantástico existe, en efecto, un sutil equilibrio que non debe perturbarse: separado do real, o fantástico tamén perde o seu contido". (MICHAEL ENDE)

Invitámosvos a todos os nenos e nenas de 3º, 4º, 5º e 6º a coñecer esta estupenda historia, xa que o vindeiro mércores, día 11, asistiremos a dous espectáculos na Casa da Cultura de A Picota: un deles consiste nun contacontos en inglés; o segundo será a proxección de fragmentos da película realizada sobre esta marabillosa novela, que de seguro vos enganchará a todas e todos. A sinopse da mesma podería ser a seguinte: escondido no faiado do seu colexio, Bastián devora durante as horas de clase un libro enigmático, A historia interminable, que relata a progresiva destrución do Reino da Fantasía. Unha especie de "Nada" misteriosa destrúe o país e as criaturas que o habitan. A medida que avanza na lectura, Bastián dase conta de que a salvación de Fantasía depende del; de que consiga entrar dentro do libro...  Aquí podedes ver o tráiler dunha das súas adaptacións ao cine:


Apetécevos saber máis? No seguinte enlace tedes algunhas actividades que podedes traballar antes e despois de ver os fragmentos do filme seleccionados:

SENTIMENTO: A EMPATÍA

A empatía é a habilidade que ten unha persoa para comprender as emocións doutra. É dicir, poñerse no lugar dos demais, axudando así a entender os seus sentimentos. Se queredes traballar este sentimento, podedes comezar por ver algún fragmento dos seguintes vídeos:

"For the birds"


"A galiña ou o ovo?"


"Empatía"


"O poder da empatía"

 

"Os ollos de Lena"

sábado, 28 de febreiro de 2015

EMOCIÓNS E SENTIMENTOS

O profesorado do cole está realizando un curso sobre Intelixencia Emocional, para o cal invitamos á experta TERESA MOLEZÚN, quen asistiu ao centro durante varias xornadas para poñer en práctica as habilidades socio-emocionais, que teñen unha influencia directa no éxito das relacións humanas en todos os seus ámbitos. E tamén queremos traballalas con todo o alumnado do cole. Por iso, dende o blogue iremos compartindo toda aquela información que nos pareza interesante ter en conta. Empezamos?
Para traballar algúns dos sentimentos que máis coñeces, preme na seguinte imaxe:

 http://www.vedoque.com/juegos/identidad-sentimientos-diversidad.swf?idioma=es 

Se queres descubrir como cambia o pelo da protagonista desta historia en función dos seus sentimentos, mira o seguinte vídeo:



Nestoutro enlace podes observar e crear rostros que expresan diferentes sentimentos:
 https://es.tiching.com/la-expresion-del-rostro/recurso-educativo/71169

E nestoutro vídeo atoparás personaxes cinematográficos que amosan tamén emocións que de seguro poderás identificar: