martes, 22 de marzo de 2022

PRIMEIRO RECREO SEN MÁSCARAS

OLA!!!!

Canta ILUSIÓN vos fixo saír esta mañá ao patio!!!! Xa sei que vos gusta sempre, pero hoxe sentistes cunha emoción especial, xa que despois do regreso ás aulas debido á covid-19, esta foi a primeira xornada na que puidemos desfrutar do tempo libre no patio SEN MÁSCARA!!! Estabades tan contentas e contentos, tan guapas e tan guapos, que o profe David non puido conterse e fíxovos unhas cantas fotos nas que, por fin, vemos os vosos sorrisos!!!!

As caras de alegría brillaban hoxe moito máis!

Unha aperta,

Rosiña


O COLE ESTÁ DE CUMPREANOS!!!

"Parabéns para ti..." é unha das cancións que máis escoitamos ao longo do curso no cole. Pero nesta ocasión non a cantamos adicándolla a un neno ou unha nena, tampouco a un/unha profe, nin a ningunha das mamás ou papás que fan garda no comedor... Estes días cantámoslla ao cole, xa que o edificio no que se atopa a escoliña que tanto queremos está de cumpreanos: 50 ANOS!!! Case nada, eh? Cantas persoas pasaron parte da súa vida neste espazo!!! Se botamos contas seguro que sae unha cantidade ben grande: entre alumnado, profesorado, familias, persoas que nos visitaron con certa frecuencia... Ai, se as paredes deste cole falaran cantas historias nos contarían... Nós quixemos poñelo ben guapo para a celebración, polo que durante este mes ocupou o patio do cole Brais, un rapaz que forma parte do colectivo "Vella Escola", que se adica a realizar cultura urbana, e transformou deste xeito tan colorido a parede do ximnasio:

O cambio na fachada do ximnasio é moi notable.

Ademais, o alumnado de 3º a 6º puido experimentar como se pinta con spray, algo que lles encantou e no que amosaron ser verdadeiros/as artistas. 

Unha aperta, Rosiña.  

luns, 21 de marzo de 2022

NO COLE DICIMOS "NON Á GUERRA"

"NON Á GUERRA" é o lema que escribimos nas ventás do colexio, que xa colocamos a semana pasada para amosar o noso rechazo ante calquera tipo de violencia. Son moitos os conflitos armados que están sucedendo en diferentes zonas do mundo (Gaza, Siria, Afganistán, República Democrática do Congo...), ao que desde hai varios días se veu sumar un máis: o ataque a Ucraína por parte do exército ruso. No cole celebramos un acto conxunto, colaborando tamén na recadación de fondos impulsada por "Save the Children", lendo un manifesto e bailando unha canción do folclore ucraíno titulada "Oi u haiu".

Este acto comparte a data con outras conmemoracións moi interesantes que teremos en conta tamén ao longo da xornada e mesmo da semana, xa que hoxe é o "Día Mundial da Poesía", o "Día Internacional dos Bosques", o "Día Mundial do Síndrome de Down" ou o "Día Internacional da Eliminación da Discriminación Racial". 

Podedes premer na imaxe para ver todas as fotos e tamén algún dos vídeos que gravamos:

No CEIP Víctor Sáenz dicimos: "NON Á GUERRA"

Unha aperta,

Rosiña

DÍA MUNDIAL DA POESÍA CON ROSALÍA

O pasado 23 de febreiro celebramos no cole o "Día de Rosalía de Castro", e a partir das actividades que realizamos, na aula de 5 anos de Educación Infantil ocorréuselles unha idea fantástica: xa que Rosalía é unha das nosas escritoras preferidas, que ademais escribiu un dos poemas que máis lles gustan a este grupo de nenos e nenas ("O moucho"), por que non adicarlle un programa en "Radio Rosiña" polo "Día Mundial da Poesía"? Así foi como emitiron este programa tan entretido no que nos contan todo o que pasou no patio o pasado mes de febreiro... Aquí o tedes para que o desfrutedes tanto coma min:

En hora boa, rapaciños e rapaciñas. Fixestes un traballo estupendo!!!

Rosiña

venres, 18 de marzo de 2022

CINE EN 360 GRAOS

Esta mañá recibimos no cole a Pau, que chegou desde Xixón co seu planetario inchable para amosar ao alumnado de Infantil e Primaria varias películas sobre o Universo e o noso planeta. Ao rematar os filmes, Pau proxectou tamén varias imaxes de estrelas, constelacións e planetas, mentras ía contando aos nenos e nenas algunhas das súas características. 

Como remate da actividade, fixemos un obradoiro de astronáutica no patio, onde todo o alumnado lanzou un foguete con toda a súa forza, ademais de realizar un xogo sobre o sistema solar.

Seguro que non esquecedes todo o que aprendestes esta mañá. Para recordar algúns momentos, premede na imaxe:

O alumnado de Infantil lanzando con forza un foguete.

Unha aperta,

Rosiña

PROGRAMA Nº 2 DE ROSIÑA DJ

Bos días!!!

Rematamos esta semana de marzo contándovos en "Radio Rosiña" que músicas soan ao longo do mes para as entradas, saídas, cambios de clase... Con este novo programa de "Rosiña DJ" o alumnado de 5º e 6º está ampliando moito o seu repertorio musical, e quere compartilo con todas as persoas que nos escoitan. Ao micrófono escoitaredes as voces de quenes non participaron no 1º programa: Ángel, Sara, Paula, Brais e Martina; no control, Mai e Aroa. En hora boa, rapaciñas e rapaciños!!!


Rosiña

xoves, 17 de marzo de 2022

"AYUDA EN ACCIÓN" VISITA O NOSO COLE

A ONG "Ayuda en Acción", que desenvolve un proxecto no noso centro desde o curso pasado, estivo durante esta semana no cole, para reunirse co profesorado, coa ANPA e con parte do alumnado, para analizar e reflexionar sobre a situación na que nos atopamos e perfilar o camiño que queremos andar. Para iso é importante falar, escoitar, dialogando sobre os temas que máis nos preocupan e que queremos colocar como prioritarios. E, por suposto, implicarse, porque todas as persoas formamos parte da educación... 

Os mellores resultados sempre se consiguen actuando en equipo.
Apertas,

Rosiña


martes, 15 de marzo de 2022

OBRADOIRO "PROGRAMANDO O UNIVERSO"

Este martes o alumnado de 3º, 4º, 5º e 6º de Primaria realizou un obradoiro no cole moi interesante. Baixo o título "Programando o Universo", e coa axuda de Eloy ("Naturnova"), fixeron un pequeno repaso das características dos planetas do sistema solar: tamaños, composición, distancias, satélites, etc. Despois elixiron un planeta, puxéronlle un nome e describírono brevemente para facer unha programación empregando a aplicación gratuíta Scratch

A verdade é que sempre desfrutades moito con estas propostas, nas que cada vez sodes máis autónomas/os. Podedes ver as fotos e algúns vídeos premendo na imaxe.

O destinatario deste obradoiro foi o alumnado de 3º a 6º de Primaria.

Rosiña

mércores, 9 de marzo de 2022

A SEMANA DA PRENSA NO COLE

Ao longo destes días celebrouse a "Semana da prensa", e na aula de 3º e 4º fixeron un traballo estupendo que comparten con todas nós a través do blog da biblioteca e de "Radio Rosiña". A actividade consistiu en redactar unha noticia na que falan dun dos programas nos que estamos participando este curso, que leva por título "Rapazas emprendedoras nas TIC". 

Ademais da imaxe da noticia escrita, aquí vos queda o enlace para que escoitedes tamén o programa de radio:

En hora boa polo traballo, rapaciñas e rapaciños!!!


Apertas,

Rosiña

VISITA DE JOSEFINA LING, UNHA MULLER ASTRÓNOMA

A actividade desta xornada tamén estivo centrada nas mulleres, nesta ocasión relacionándoa tamén co proxecto deste curso. Por ese motivo, contactamos con Josefina Ling, unha experta en astronomía. Josefina estivo contándolle ao alumnado do cole como comezou a interesarse por este tema tan fascinante e explicándolles en que consistía o seu traballo no Observatorio Astronómico Ramón María Aller (Santiago de Compostela), centrado na observación das estrelas dobres. Confesounos a súa emoción cando descubriu unha destas estrelas, na constelación de Casiopea, que agora leva o seu nome: Ling 1. Falounos tamén dalgunhas das vidas de grandes astrónomas, como Carolina Herschel, Jocelyn Bell ou a galega Antonia Ferrín Moreiras, que forman parte da exposición que podedes visitar no noso cole durante esta semana, que foi coordinada pola propia Josefina Ling. 

O alumnado de 3º a 6º con Josefina na entrada da biblioteca.
 Ao final, o alumnado de 3º a 6º de Primaria tamén puido facerlle unha pequena entrevista para realizar un programa de radio adicado a esta importante muller que tivemos a sorte de coñecer. Moitísimas grazas, Josefina, polo teu traballo e pola túa amabilidade con todas as persoas que compartimos esta mañá contigo!!!

Premendo sobre a imaxe podedes ver o resto das fotografías.

Unha aperta,

Rosiña

martes, 8 de marzo de 2022

8 DE MARZO, DÍA DA MULLER

Hoxe, 8 de marzo, celebramos o Día da Muller, e por iso no cole temos varias actividades programadas. Unha delas iniciámola no mes pasado, coa proposta para o "Día da nena e a muller na ciencia" na que cada familia realizaría un traballo de investigación sobre unha científica elixida libremente. O resultado desa exposición xa podedes observalo na entrada da biblioteca, na que atoparedes as creacións que fixestes nos vosos fogares. Podedes visitala cando queirades, e aínda que nas aulas xa falastes e expuxestes cal foi a vosa elixida, aproveitade tamén para descubrir a elección do resto dos grupos. Descubriredes as interesantes vidas dalgunhas biólogas, astrónomas, naturalistas, químicas..., de distintas partes do mundo (galegas tamén!). Os traballiños quedaron moi xeitosos, pero o máis importante é que reflexionemos como sociedade para que a igualdade da muller sexa acadado en todos os ámbitos: o científico, por suposto, pero tamén moitos outros que a pesar de non estar presentes na exposición é necesario ter en conta, xa que o xénero non debería ser nunca motivo de discriminación

Estes días, a cor violeta ilumina a entrada da biblioteca.

 

Unha aperta,

Rosiña

venres, 4 de marzo de 2022

QUEIMA DO MECO

O regreso das vacacións de Entroido reuniunos no patio do cole esta mañá, para facer unha das actividades que despiden esta festa ata o ano que vén: a queima do Meco. Nesta ocasión, ademais, falamos moito nas titorías sobre os medos que temos, e mesmo chegamos a debuxalos e poñerlles nome para metelos nunha caixiña que tamén queimamos co Meco. Premendo na imaxe podedes ver todas as fotos.

Os nosos medos arderon co Meco.
Apertas,

Rosiña

xoves, 3 de marzo de 2022

1º e 2º CONTAN EN RADIO ROSIÑA...

Ola!!!!

Que tal foron esas festas de Entroido? Parece que chegastes con moita enerxía, porque xa o primeiro día recibo no meu buzón un montón de traballiños realizados polas nenas e nenos de 1º e 2º de Primaria. Pero non pensedes que nos veñen a contar o que fixeron nestes días de vacacións... Non! Do que nos falan hoxe en "Radio Rosiña" é das historias que inventaron elas mesmas na aula, e cóntannolas na radio para que as entendamos moito mellor. Queredes escoitalas? Pois ide premendo en cada unha para coñecer estas entretidas aventuras.


1-Conto "El alien y el astronauta"

2-Conto "El extraterrestre"

3-Conto "El niño, el padre y el abuelo"

4-Conto "Estreliña e o seu compañeiro"

5-Conto "Estreliña"

6-Conto "O astronauta e Saturno"

7-Conto "O astronauta que viaxou á Lúa"

8-Conto "O loro e o astronauta"

9-Conto "Pepe, Spiderman e Juan"

10-Conto "Vacaciones en el espacio"

Que vos parecen? Xa vedes que o tema do universo é moi inspirador... EN HORA BOA, RAPACIÑOS E RAPACIÑAS!!!

Apertas, 

Rosiña