luns, 18 de outubro de 2021

PREPARÁMONOS PARA O SAMAÍN

 Ola, rapazada! 

Xa está chegando o Samaín!!! Ademais, este curso celebrarémolo uns días antes, xa que o día propio, que é o 31, coincide cun domingo, polo que a primeira festa do curso terá lugar o venres, 29 de outubro. Como sei que vos gusta moitísimo, xa comezamos cos preparativos no cole, así que cóntovos algúns deles!

O primeiro, como moitas de vós saberedes, é a creación dunha historia de medo para o “XII Concurso de Relatos de Medo”. Seguro que o proxecto deste curso vos inspira narracións cheas de misterio arredor dos elementos que atopamos no universo: planetas, astros, galaxias, satélites, obxectos non identificados… Pero como estou segura de que as vosas ideas son moito mellores que as que poida aportarvos eu, non quero influír na vosa imaxinación, polo que queda aberto o campo da ficción para que o redactedes como mellor queirades. 

O que si vos vou lembrar son as bases, que seguirán como en anos anteriores:

-Estarán escritos en galego.

-Entregaranse rotulados unha vez corrixidos.

-Terase en conta a presentación: valorarase moito a curiosidade.

-Pódense realizar ilustracións que acompañen o texto, así conseguiredes que a vosa historia sexa máis atractiva!!! Lembrade rotulalas e pintalas...

-Facédelle unha portada onde se poida ler o título da historia, o voso nome e, se queredes, unha ilustración.

-Se estades en Educación Infantil ou en 1º e 2º de Primaria, podedes escribir unha historia colectiva entre todas as persoas do grupo.

-Para os que estades nos cursos de 3º a 6º, os traballos serán individuais.

-Os traballos meteranse no meu buzón, á entrada da Biblioteca, pero comunicádello antes á vosa mestra ou mestre, para metelos todos xuntiños!!!!

-O prazo de entrega remata o vindeiro MÉRCORES, 27 de outubro.

-Os premios entregaranse o día 29, cando celebraremos a festa no cole. Haberá un premio para Infantil, outro para 1º e 2º, un máis para 3º e 4º e outro para 5º e 6º.

AGARDO AS VOSAS HISTORIAS!!!

A outra noticia que quero comentarvos e que haberá Concurso de Cabazas!!! Premendo na imaxe podedes ler toda a información!!!
 

 

 

Rosiña

 

venres, 8 de outubro de 2021

ATENTAS AO CEO

Boas, rapaciños e rapaciñas!!!!

Esta semana de outubro remata cunha noticia moi interesante relacionada co noso proxecto deste curso: as dracónidas. Seguro que xa sabedes que son estrelas fugaces que se ven durante o mes de outubro, e aproveitando que o ceo está despexado durante esta fin de semana, pode resultarvos moi interesante. Se premedes aquí podedes descubrir moito máis sobre este interesante fenómeno.

Ademais, pouco despois do amencer tamén podedes ver o paso da Estación Espacial Internacional, que tanto interese causa entre boa parte do alumnado. Para saber por onde pasa esta noite, premede aquí.

E por hoxe nada máis, pero ao longo deste mes ireivos subindo algúns enlaces que seguro vos gustarán moito, así que estade atentas ao blog; seguro que aprendedes moitísimo contemplando o ceo nocturno!

Antes de despedirme, gustaríame dicirvos tamén que mañá é o Día das aves migratorias, as cales viaxan tamén orientándose a través do ceo, entre outras cousas, así que estou segura de que serán moitas as aves que esta noite tamén se fixen nas estrelas fugaces sobre a constelación de Draco.

Boa fin de semana!!!

Rosiña

 

mércores, 6 de outubro de 2021

TEXTO 1 do PROXECTO DOCUMENTAL 2021-22

Xa estou aquí de novo co primeiro texto do Equipo de Biblioteca, no que nos contan algo moi interesante sobre o universo. Para lelo só tedes que premer AQUÍ. A partir deste texto, propoñereivos unha actividade para conmemorar o Día da muller rural, que se celebrará o vindeiro 15 de outubro, así que estade atentas a todas as novidades que vaia publicando!!! 

Rosiña

martes, 5 de outubro de 2021

E O LEMA GAÑADOR É...

Xa temos o lema para este curso 2021-22, no que os vosos proxectos estarán centrados arredor do universo e o mundo da astronomía. Entre todos eles houbo un que recibiu un maior número de votos, polo que será o que se anuncie no cartel e nas actividades que realicemos ao longo do curso. E ese lema ou slogan é...

TANTOS LIBROS NO COLEXIO
COMO ESTRELAS NO UNIVERSO

É máis longo dos que foron seleccionados en ocasións anteriores, pero a verdade é que soa moi ben... 

Espero que vos guste a todas moitísimo e que aprendamos moito con este tema tan atractivo. Comezamos xa!!!

Rosiña

mércores, 15 de setembro de 2021

ANUNCIAMOS O PROXECTO DO CURSO 2021-2022!!!

Bos días!!!

Hoxe escríbovos para para darlle a benvida ás persoas que chegaron novas ao centro: ás profes Susana, Sara, Cris e Lucía; e ás nenas e nenos de 3 anos: Saúl, Paula, Gael, Jimena, Aroa e María!!! Espero que teñades un curso marabilloso neste cole no que vos recibimos con moita alegría. E tamén quero saudar ao resto de profes, nenos e nenas, moitos dos cales levan días preguntándome sobre que vai tratar o proxecto deste curso 2021-22, así que hoxe chegou o momento de desvelarvos a grande incógnita...

Desde que comezou a pandemia son moitas as persoas que se decataron da importancia dos espazos abertos, e poder estar ao aire libre foi o desexo de moitas familias que se viron privadas desa gran necesidade. Eu, como son tan afortunada coma vós, puiden aproveitar moitos ratos ao aire libre aquí en San Cosme, paseando polos camiños, á beira dos regatos e do río Xallas, e mesmo saltando de leira en leira... Non me vistes? Pois tamén andiven polo medio dalgunha das hortiñas de San Cosme, e de Pazos..., e mesmo probei uns repolos deliciosos da Pereira!!!

Tamén houbo algunhas noites, sobre todo durante o verán, nas que me tumbei no patio e mirei para o ceo, preguntándome se noutros planetas tamén estarían sucedendo cousas tan preocupantes coma esta pandemia... Pero observar o ceo tranquilizábame, e ségueo facendo, porque as cousas poden ir regular aquí na Terra, pero aí arriba segue iluminando o Sol, a Lúa continúa trazando un percorrido ao noso redor durante algo máis de 4 semanas, as estrelas mantéñense agrupadas formando curiosas constelacións, etc. Non vos parece máxico? A nosa galaxia recibe o nome de “Vía Láctea”, pero cantas máis haberá no universo? O espazo é inmensamente grande, inmensamente descoñecido, inmensamente imaxinativo... E por iso este curso quero convidarvos a cruzar un pouquiño máis alá do lugar que percorren as aves, cruzar as zonas onde se asentan as nubes e observar todo o que sucede a partir dos 100 quilómetros de altitude... Animádesvos? Seguro que si!!!! E para comezar, propóñovos que me axudedes co lema para este proxecto, porque estou convencida de que as vosas ideas serán moi orixinais. Dádelle a esas cabeciñas e escribide as que se vos ocorran no modelo que vos entregarán as mestras. A última semana de setembro recollerémolas todas para elixir unha que se anunciará no cartel deste novo curso. Veña, veña, quero lelas canto antes no taboleiro do corredor para comezar a nosa viaxe polo universo...

UNHA APERTA ENORME!!!
                                            Rosiña

luns, 13 de setembro de 2021

PROTOCOLO DE ACCESO Á BIBLIOTECA

Bos días!!!

Como xa sabedes, a biblioteca do cole está aberta durante toda a xornada escolar, e durante o recreo da mañá poderedes facer uso dela para ler, buscar información, consultar internet, compartir xogos con outros nenos e nenas, elixir libros para levar, etc. 

Lembrámosvos que seguiremos co protocolo que publicamos o curso pasado, polo que aquí volo amoso coas modificacións realizadas:


Unha aperta, 

                   Rosiña

mércores, 8 de setembro de 2021

INICIAMOS O CURSO 2021-22

OLA, RAPACIÑAS E RAPACIÑOS!!!

Aquí estou de novo!!! Despois destes meses de vacacións, teño moitísimas ganas de vervos e de comezar un novo curso con todas e todos vós. Sodes a alegría do cole, e mañá este edificio encherase de vida coa vosa presenza, así que vos agardo impaciente... Espero que veñades con tanta ilusión coma min, e para dar a benvida a este novo curso, déixovos aquí unha canción que me gusta moito de Miriam Makeba, coñecida tamén como Mamá Afrika. Titúlase "Pata pata" e ten un ritmo tan apegadizo que estou segura vos fará bailar e cantar sen pensalo. Apertas enormes e ata mañá!!!!


Rosiña

martes, 29 de xuño de 2021

ATA SETEMBRO!!!

OLA, RAPACIÑOS E RAPACIÑAS!!!

Como estades? Espero que xa desfrutando das vacacións e aproveitando moito ao aire libre... Eu tamén o estou facendo, pero hoxe achegueime ata o cole e atopei unha sorpresa que quero compartir con todas: UN VÍDEO DAS NENAS E NENOS DE INFANTIL!!! Si, seica os últimos días quixeron despedirse do curso contándonos algunhas cousiñas que lles pareceron moi interesantes, e gravaron este vídeo coa profe Elena, para que poidades velo todas as familias, así que aquí volo deixo:

Vémonos en setembro!!!!

Unha aperta enorme,

Rosiña

xoves, 24 de xuño de 2021

DESPEDIMOS O CURSO 2020-21

Aquí vos deixo as fotos que fixemos o pasado 22 de xuño, o día que despedimos este curso tan diferente. Afortunadamente, a situación da pandemia foi mellorando e iso animounos a preparar unha pequena festiña á que invitamos ás familias do alumnado e a algunhas persoas que apreciamos moito no centro. Foi un acto sinxelo, feito con cariño, o mesmo que sentimos tamén por parte de todas as persoas que puidestes acompañarnos.

O alumnado de 6º presentou as actuacións que se realizaron no escenario, entregáronse os diplomas e orlas aos nenos e nenas que rematan Educación Infantil e aos rapaciños e rapaciñas que xa marchan para o Instituto...


Aproveitamos tamén a presencia de Beatriz e Lorena, delegada e representante da ONG "Ayuda en Acción", para agradecer publicamente a súa implicación co noso centro dentro do programa "RTV Enxebre":


E despois reunímonos no patio do cole para desfrutar da actuación de Peter Punk "Punkdemia".

Premendo na imaxe podedes ver todas as fotos que fixemos durante esta xornada, na que o mellor de todo foi, sen dúbida, que nos acompañarades coa vosa presenza!!!

O grupo de 6º encargouse de presentar o acto de fin de curso.

Unha aperta enorme e moi bo verán para todas!!!!

Rosiña

LIBRO DE PAXAROS

Regreso agora cunha novidade máis!!! En Educación Infantil tamén queren ensinarnos o moito que saben de paxariños, así que aquí vos deixo esta interesante recollida que, a modo de diario, fixeron durante o tempo que estivemos confinadas na primavera de 2020 e que titularon "Libro de paxaros". Despois deste curso, agora xa saben moitísimo máis, pero este traballiño ben é merecedor dun forte aplauso, porque lles quedou realmente fermoso...

Quero lembrarvos que, ao ser do curso 2019-2020, algunhas das súas páxinas están realizadas por nenos e nenas que xa están en 1º de Primaria, así que non volo perdades....

Premede sobre a imaxe para atopar algunhas das aves que viven no noso entorno:

O "Libro de Paxaros" de Infantil

Apertas,

Rosiña

AVES QUE VIVEN PRETO DA AUGA

Ola de novo!!!

Como xa sabedes, entre as actividades realizadas durante este curso estaba un pasapalabra que nós chamamos "Rosiñapalabra", que fixeron nas aulas de Primaria e gravaron en tres vídeos que podedes atopar no blog. O de 3º e 4º, centrado nas aves que viven preto da auga, vai acompañado deste traballo escrito no que participaron todas as nenas e nenos desa aula. Seguro que queredes velo, así que aquí volo deixo:

Preme aquí para coñecer esta magníficas aves

 

Apertas!

Rosiña

mércores, 23 de xuño de 2021

AS AVES E OS ODS

Como moitas de vós xa sabedes, os Obxectivos de Desarrollo Sostible son as metas que varios países pretenden acadar para o ano 2030. En 5º e 6º, nas clases de Valores, pensaron que podían unilo ao tema das aves, e fixeron un traballiño que acaba de saír da imprenta... Nel recollen cada un deses obxectivos e tamén unha ave que, por algunha das súas características, ensínanos que é posible conseguilo. Se queredes velo non tedes máis que premer na imaxe:

As aves, unha salvación ao noso planeta.

En hora boa a Mai e Ramiro, de 5º e 6º de Primaria, que se esforzaron moito nesta tarefa.

Apertas,

Rosiña

SANCOSMEIRO E GUÍA DE LECTURA

Ola!!!

A última semana do curso entregamos o nº 33 da revista "O Sancosmeiro", que recolle moitas das actividades que realizamos ao longo do curso. Xa sei que a tedes nas vosas casiñas, pero tamén vola deixo aquí, para que poidan lela outras persoas que non teñan acceso a ela:

Sancosmeiro 33

E a guía de lectura na que aparecen novidades que podedes ler durante estes meses de vacacións:

Guía de lectura

Unha aperta enorme,

Rosiña


martes, 22 de xuño de 2021

ORNITÓLOGAS E PIONEIRAS

Ola!!!

Outro traballo que chega coa fin do curso: un vídeo realizado en 5º e 6º de Primaria sobre un traballo de investigación adicado a mulleres ornitólogas. Partindo da celebración do "Día da nena e a muller na ciencia", e unido ao "Día da muller", quixeron centrar o seu estudo en mulleres que estiveran moi relacionadas co mundo das aves, e que ademais destacaran nalgún aspecto determinado. Así, aquí atoparedes sobre todo mulleres estadounidenses, pero tamén unhas cantas de España e unha latinoamericana coa que tiveron a sorte de conversar. Espero que aprendades moito e que vos resulte tan interesante como a este grupo, a quen dou tamén a en hora boa:

Unha aperta,

Rosiña

luns, 21 de xuño de 2021

ENQUISA SOBRE AVES

Boas tardes!!! 

Mural exposto na escaleira de 5º e 6º.

A piques de rematar o curso, recibo con moita ilusión os últimos dos vosos traballiños adicados ás aves. O de hoxe está feito polo alumnado de 5º nas clases de Matemáticas, onde quixeron saber cales eran as aves preferidas no noso colexio. Eses datos recolléronos nun mural e, para completalo e facelo chegar a máis xente interesada no tema, gravaron un programa en "Radio Rosiña" que vos presento aquí:


Sorpréndevos o resultado?

Unha aperta,

Rosiña

mércores, 16 de xuño de 2021

"ROSIÑAPALABRA" DE 5º E 6º

Ola!!!

Aquí chega o último programa de "Rosiñapalabra" adicado ás aves. Nesta ocasión, realizado polo alumnado de 5º e 6º, que tamén vos queren animar a xogar a este entretido xogo no que estamos aprendendo moito vocabulario. Coñecedes todas as aves terrestres das que falan as rapazas e rapaces de 5º e 6º? Imos alá!!!

Rosiña

NOTICIAS RADIOFÓNICAS DE RTV-ENXEBRE

OLA!!!

Esta mañá traigo unha moi boa nova para todas: "Radio Rosiña" estrea canle!!! Ademais do que xa temos, como resultado do proxecto realizado coa ONG Ayuda en Acción RTV-Enxebre, Sergio (Laboratorio de Radio) publicou os traballiños do alumnado que participou nesta marabillosa experiencia que xa podemos escoitar no seguinte enlace: 

 

RADIO ROSIÑA EN RTV ENXEBRE




Nesa canle atoparedes:

-"Os paxaros e as súas historias", relatos do alumnado de 1º e 2º de Primaria.

-"A historia de Plumitas", elaborada polas nenas e nenos de Educación Infantil.

-"Historias sobre a morriña" 

-"Un día en Ézaro", resultado da viaxe que ata alí fixeron Educación Infantil e 1º e 2º de Primaria.

-"Sabedes o que é "NICADA"? Descubrídeo neste programa!

-"Os dereitos da infancia", o programa gravado en directo en Vimianzo en colaboración cos centros de Monfero e Zas. 

Seguro que vos encanta escoitar a estas estupendas e estupendos reporteiras /os!!!

Rosiña

luns, 14 de xuño de 2021

VISITA A BALARÉS

A semana pasada rematou cunha xornada de convivencia con todo o alumnado e gran parte do profesorado á praia de Balarés. Esta actividade sempre a compartiamos coas familias das nenas e nenos do cole, pero este curso a pandemia fíxonos modificar tamén este plan. 

A xornada de convivencia reuniunos en Balarés.

Tivemos un día moi bonito, e aínda que sopraba algo o vento, non nos impediu desfrutar do paseo por Cabana de Bergantiños, a carón da desembocadura do río Anllóns, observando a fermosa paisaxe. En canto chegamos ao miradoiro de aves "José Luís Rabuñal", na praia da Urixeira, subimos ao bus que nos levou ata Balarés, onde pasamos o resto do día. Nesta praia xogamos, probamos o boa que estaba a auga e xantamos no fantástico piñeiral. Pasámolo moi ben estando todas xuntas nun espazo coma este, e desexamos que a próxima xornada de convivencia poida ser coa compañía das familias ao completo!!!!

Unha aperta,

Rosiña

"ROSIÑAPALABRA" DE 1º E 2º

Ola!!!

Que tal estades? Estamos xa na recta final e chegan os últimos traballiños das aulas, onde estivestes aprendendo moitísimo sobre as aves. Vistes o programa "Rosiñapalabra" de 3º e 4º? Acertastes moitas palabras? Seguro que si!!! Pois hoxe tráigovos un novo programa, nesta ocasión realizado polo grupo de 1º e 2º, a través do cal descubriredes moito vocabulario relacionado co mundo da ornitoloxía. Animádesvos a participar? Pois dádelle ao play!!!

Unha aperta,

Rosiña

xoves, 10 de xuño de 2021

"ROSIÑAPALABRA" DE 3º E 4º

Como xa sabedes, unha das actividades que se programou para realizar dentro do noso proxecto adicado ás aves estaba a edición do coñecido "Pasapalabra". Aproveitando que en 3º e 4º inauguraron a canle "Rosiña TV", pensamos que era boa idea emitilo en formato audiovisual, polo que así os iremos publicando. En cada aula de Primaria elixiron un grupo de aves para describilas tendo en conta o hábitat no que se desenvolven. Ás nenas e nenos de 3º e 4º tocáronlles as aves que viven en zonas húmidas, así que aquí están para sorprendernos con esta emisión de "Rosiñapalabra". Animádevos a xogar!!!!

 

Rosiña

SAN COSME DE ANTES EN "RADIO ROSIÑA"

As nenas e nenos de 3º e 4º traballaron moito con Sergio (do "Laboratorio de Radio" e "Ayuda en Acción"), e adicaron unha boa parte da formación a coñecer e falar da nosa parroquia, San Cosme de Antes. Como resultado dese traballo, preséntannos un podcast moi interesante que xa podedes escoitar en "Radio Rosiña". Desfrutádeo!!! Completouse esta actividade cun paseo polo entorno, que podedes ver premendo aquí

En hora boa, rapaciñas e rapaciños!!!

 

Rosiña



luns, 7 de xuño de 2021

CELEBRAMOS O DÍA DOS CIRRIOS CON ELIA

Hoxe foi o "Día Mundial dos Cirrios", unhas das aves máis fascinantes que tamén podemos atopar nesta zona a partir da primavera, xa que é unha ave que migra no outono, para pasar o inverno en África. Sorprende a cantidade de tempo que poden pasar no aire sen pousarse, xa que excepto para aniñar, o seu ciclo vital desarróllase en voo. Incluso durmen no aire!!! Así nolo contou a bióloga Elia Pérez Taboada ("Puertas Afuera Comunicación Medioambiental"), unha rapaza que nos veu falar hoxe sobre algunhas das aves coas que compartimos territorio, ao tempo que escoitamos o canto dalgunhas delas: o "chi-chi-pán" do ferreiriño real, a risotada do peto verde, o enigmático son da curuxa ou o peculiar canto da avenoiteira foron algúns deles.

Pero Elia tamén nos amosou materiais moi interesantes, algúns dos cales nunca tiveramos a oportunidade de observar: plumas de peto real, de curuxa, niños de aves paseriformes (que coñecemos como paxaros), pero tamén cranios moi diferentes e incluso egragópilas!!!

Ademais, Elia tamén nos amosou algunhas das amezas coas que poden atoparse as aves no noso concello e noutros lugares de Galicia. Entre eles: os cambios que realiza o ser humano na paisaxe, eliminando a natureza que nela se atopaba (estradas, autovías, minas, etc.), os tendidos eléctricos de alta tensión, as plantacións en grandes superficies que acaban coa biodiversidade do lugar, o uso de elementos químicos que poden ser moi perigosos (insecticidas e praguicidas de diferente tipo), a acumulación de lixo en zonas nas que non se xestiona (preocupa moito o plástico pero son moitos os desperdicios que poden influír negativamente nos animais), etc.

Elia é unha namorada das aves e as bolboretas.
 

Foi unha actividade moi interesante na que desfrutamos moito con Elia, ademais de aprender un montón de cousiñas moi importantes e necesarias para coidar a nosa natureza. Moitísimas grazas por todo, Elia!!!

Unha aperta,

                  Rosiña

venres, 4 de xuño de 2021

"O LIXO MARIÑO", UNHA ACTIVIDADE EN COLABORACIÓN CO CEIDA

O Centro de Extensión Universitaria e Divulgación Ambiental de Galicia, CEIDA, situado na illa de Santa Cruz, Oleiros (A Coruña), é un centro de referencia en canto á educación ambiental. As súas actividades están dirixidas a traballar na procura de solucións aos problemas ambientais, así como a fomentar boas prácticas entre as cidadás para que a pegada do ser humano na natureza non sexa tan negativa. Por este motivo, este curso solicitamos unha actividade titulada "O lixo mariño", que se dividiu en dúas partes: 

-por un lado, unha charla no centro sobre a problemática do lixo, onde Laura e Flor nos falaron da importancia dos mares, os problemas que lles afectan (cambio climático, sobrepesca, explotación industrial, lixo...) ou os impactos ambientais e socioeconómicos que provocan os desperdicios que chegan ao mar, etc.;

-por outra banda, aínda que a situación é moi preocupante, non debemos rendernos, podemos mellorala facendo moitas cousas que tampouco supoñen un grande esforzo. Unha delas foi a que realizamos este venres, que consistiu en visitar a praia de O Ézaro e observar como estaba.

Despois da recollida falamos dos residuos atopados con Jorge e Laura.
 

Para esta segunda actividade acompañáronnos Laura e Jorge, e en grupos pequenos fixemos un inventariado dos residuos que atopamos na praia, facendo despois unha posta en común na que quedou claro que a maior porcentaxe do lixo que atopamos pertencía ao grupo dos plásticos!!! Afortunadamente, o Concello de Dumbría realiza unha limpeza da praia a cotío, polo que os residuos atopados non foron moitos, algo que xa nos comentou antes de comezar o traballo Raúl, un dos concelleiros que nos recibiu á nosa chegada ao Ézaro. 

Esta saída coincide ademais con dúas datas ben importantes relacionadas coa natureza, xa que mañá, 5 de xuño, celébrase o "Día Mundial do Medio Ambiente", e o vindeiro martes, día 8, o "Día Mundial dos Océanos". A xornada foi realmente interesante e sei que desfrutastes moito, tanto con esta actividade como coas outras que completaron este fermoso día: visita á fervenza do Xallas, xantar ao aire libre, paseo pola praia, xeado... Vamos, que repetiriades outra vez seguro!!!

Moitas grazas ás persoas que nos acompañaron nesta importante formación!!!

Unha aperta,

                     Rosiña


xoves, 3 de xuño de 2021

UN GRUPO CON MOITO CONTO!!!

En 3º e 4º queren amosarnos que hai canteira de escritores e escritoras, así que despois de crear historias individualmente, estiveron en "Radio Rosiña" para gravalas e compartilas con todas nós. Paréceme esta unha actividade marabillosa que podedes aproveitar para escoitar na "Hora de Ler" ou cando máis vos apeteza...

E se algunha persoa máis se anima a redactar outras historias, estarei encantada de lelas e/ou escoitalas!!!

Mentras tanto, EN HORA BOA a todas as nenas e nenos de 3º e 4º, que tan bo traballo fixeron!!!

Se premedes sobre cada nome podedes acceder ao podcast directamente:

-ALICIA

-ÁNGEL 

-GUILLERMO

-ÍKER 

-ISMAEL 

-LUCÍA 

-LUZDIVINA 

-PABLO

-SORAYA

-UXÍA 

Aperta grande, 

                    Rosiña 

venres, 28 de maio de 2021

OBRADOIROS "GALICIENCIA"

Ao longo do curso fixemos moitas actividades on line, debido ás dificultades derivadas da covid. Sen embargo, desde o comezo tivemos moi claro que a cultura tiña que seguir chegando ao centro, que as nenas e nenos tiñades que facer obradoiros, coñecer, experimentar, investigar... Por iso a biblioteca estivo aberta todo o curso, as mochilas viaxeiras enchéronse con propostas para pasar máis horas das habituais nos nosos fogares, e solicitamos moitas actividades que nos parecían interesantes para realizar con todas vós, algunhas das cales tivemos a sorte de poder realizar presencialmente. Non é o caso desta, que tivo que ser a distancia, pero gustouvos tanto que aquí vos deixo algunhas imaxes para que poidades recordala e falar coas vosas amizades e familiares sobre ela. 

Foi toda unha experiencia facer de policías da CSI.

 

Organizadas por "Galiciencia", a primeira das actividades consistía nunha investigación forense, a través da cal comprobastes a importancia da ciencia para resolver desaparicións de todo tipo. A segunda estaba inspirada na Misión Mars2020 da NASA e na esperanza de que se poida lograr voar con motor noutro planeta. Polo momento, nas aulas de 3º, 4º, 5º e 6º estiveron facendo probas experimentais coas que pasaron un rato moi entretido e a través das que aprenderon moito!!!

Unha aperta,

                 Rosiña

 

 

inspírase na misión Mars2020 da NASA, que lanzou e aterrou con éxito o rover Perseverance en Marte.   

levaremos a cabo un conxunto de actividades que nos permitirán ir coñecendo a importancia da ciencia na investigación forense.

xoves, 27 de maio de 2021

EXCURSIÓN AO ÉZARO

Estou moi contenta de poder compartir con todas vós a primeira excursión do curso!!! Os primeiros grupos en estrearse este curso foron os de Educación Infantil e 1º e 2º de Primaria, que o pasaron en grande... O destino tamén era moi atractivo, xa que visitaron O Ézaro, a fervenza do río Xallas, a praia, aproveitaron para xogar e degustar os primeiros xeados... E como a temperatura era estupenda, tamén se atreveron a mollar os pés na beira do mar!!!   

Aprendemos moitísimo con Dani e Sergio.
 

Ademais, esta actividade fixérona en colaboración coa ONG "Ayuda en Acción", e acompañáronos Sergio ("Laboratorio de Radio") e Dani!!! E aproveitaron esa gran oportunidade para prestar moita atención a un dos compoñentes máis interesantes da natureza: os sons. En ocasións poden pasar desapercibidos, ben por falta de atención ou polos ruídos que xeramos nós ou outros elementos que se atopen no entorno, pero nesta viaxe quixeron que non se perderan no recordo, polo que moitos deles graváronos con estes dous profesionais da radio. 

A verdade é que tan só tedes que ver as fotos que fixeron para comprobar que pasaron unha xornada marabillosa!!! E todo o demais que queirades saber, preguntádelles a eles e elas; de seguro estarán encantados/as de contarvos...

Pasamos un día fantástico no Ézaro!!!

Unha aperta, 

Rosiña

mércores, 26 de maio de 2021

OBRADOIRO DE POESÍA CON ANDREA BARREIRO

Andrea Barreiro é, ademais de xornalista e comunicadora medioambiental, escritora. Para nós, unha escritora moi especial, xa que visitou o noso cole para realizar co alumnado de 3º, 4º, 5º e 6º un obradoiro fermosísimo sobre poesía, chamado "Cada día, a familia". Andrea pedíranos ter preparada unha imaxe de cada unha das persoas do grupo cunha persoa da súa familia, e partindo da poesía de Xela Arias e dalgunhas preguntas que a propia Andrea nos ía formulando, cada neno e nena do grupo foi construíndo un poema que quedou moi, moi bonito. De seguro nas vosas familias levaron unha estupenda sorpresa, e a verdade é que non é para menos... Como era un traballo moi persoal, non fixemos fotos dos traballos, pero Andrea firmou no noso libro de visitas da biblioteca e así puidemos retratala para non esquecela... Moitísimas grazas, Andrea!!!

Rosiña

luns, 24 de maio de 2021

INSTALACIÓN NATUREZA

OLA!!!!

No cole decidimos recibir o mes de maio cunha nova actividade artística: unha instalación. Esta forma de arte realízase nun espazo concreto, e a súa duración tamén é determinada, polo que se coñece como arte efémero, xa que se transforma e "desaparece" no tempo.

A nosa instalación ubicouse no patio interior do cole, e realizouse con elementos atopados na natureza propios da primavera: sementes, paus, follas, flores, pedras, froitos... Con todos eles fixemos unha composición por grupos, e aquí quero amosarvos o resultado.

Esta actividade xurdiu dun obradoiro que realizamos co CGAC, e no que participamos todo o alumnado de Primaria. Na nosa intervención, sen embargo, tamén se involucrou o alumnado de Educación Infantil, que tamén deixaron a súa pegada artística!!!

Todo o alumnado participou nesta obra de arte dun xeito moi natural.
 

En hora boa a todas por este resultado!!! Podedes ver todas as fotos premendo na imaxe.

Rosiña

domingo, 23 de maio de 2021

"RADIO ROSIÑA" EN RTV ENXEBRE

A semana rematou cunha actividade moi especial para o alumnado de 5º e 6º de Primaria: a gravación, en directo, dun programa de radio con "RTV Enxebre" no Auditorio de Vimianzo, no que tamén participaron o CPI Virxe da Cela de Monfero e o CEIP Labarta Pose de Zas. 

Este programa foi unha das actividades do proxecto que a ONG "Ayuda en Acción" desenvolve no noso centro durante este curso a través do "Laboratorio de Radio", de quen estivemos recibindo formación ao longo deste curso.

Foi un acto moi emotivo, no que o alumnado dos tres centros amosou a súa boa preparación e moito entusiasmo para que o programa se levara a cabo como estaba previsto. Todo iso, por suposto, coa axuda de Sergio e Dani, así como de Lorena, que en todo momento estiveron pendentes de todas e cada unha das persoas implicadas no proxecto.

As ondas das tres radios uníronse para dar voz á infancia rural, á que tamén se uniron tres grandes mulleres que os diferentes centros tiveron a oportunidade de entrevistar: Beatriz Varela (delegada de "Ayuda en Acción" en Galicia), Mónica Viqueira ("Plataforma de Organizaciós de Infancia" de Galicia) e a mestra Alicia López Pardo, integrante da "Rede Galega de Educación e Desenvolvemento Rural".

Desde o noso centro queremos agradecer a todas as persoas que fixeron posible esta inesquecible xuntanza, así como ao concello de Vimianzo, por concedernos a posibilidade de reunirnos nun espazo que permitiu manter as medidas recomendadas debido á covid-19. E, por suposto, á rapazada que representou aos tres centros a través das súas radios: "Onda Labarta", "Radio Xesteira" e a nosa "Radio Rosiña"

A voz da infancia rural rematou con esta foto conxunta.

Podedes ler tamén a noticia publicada polos xornais "La opinión de A Coruña" "La voz de Galicia" e Adiante Galicia.

Para ver as fotos, premede sobre a imaxe, e algúns vídeos do momento de ensaio premendo aquí.

Apertas!

              Rosiña

martes, 18 de maio de 2021

"MEU O MUNDO É", CANCIÓN PARA CELEBRAR O DÍA DAS LETRAS GALEGAS

As nenas e nenos de Educación Infantil envíannos hoxe este fermoso vídeo, no que bailan ao ritmo da canción "Meu o mundo é", de Paco Nogueiras, ao tempo que nos amosan tamén algunhas das súas palabras preferidas no noso idioma. Onte celebrouse en toda Galicia o "Día das Letras Galegas", así que esta montaxe tamén forma parte das actividades que no cole realizamos arredor da escritora Xela Arias e da nosa lingua, da que tan orgullosas debemos estar!!!!

Desfrutade con estas artistas, encantaravos!!!!

 

 Rosiña