venres, 27 de abril de 2012

Actividades Día do Libro

O xoves 19 recibimos, como estaba prevista a Visita da escritora, contacontos e actriz CHARO PITA.
Charo ofreceunos dúas sesións de contacontos. Unha para Infantil e 1º Ciclo e outra para 2º e 3º Ciclo.
As sesións foron financiadas polo centro e pola Asociación de Pais e Nais colaboradores do Comedor a partes iguais. Dende aquí queremos agradecerlles a súa colaboración.
Charo estivo espectacular!!! Encantáronos os seus contos. Os nosos rapaces xa coñecían os libros que ela ten publicados pois temoslos na biblio.
Foi un día cheo de maxia para nós. Un gran honor contar con ela nesta ocasión.
Charo!!! Queremos que volvas!!!! Esperámoste!!!



O luns 23 de abril para conmemorar o Día do Libro puxemos en práctica por primeira vez a experiencia dos APADRIÑAMENTOS LECTORES. Foi un momento moi especial para todos nós. Os Padriños e Madriñas lectores (alumnos de 2º e 3º ciclo) buscaron o lugar que máis lles gustou por todo o colexio para lerlles un conto aos seus afillados. 
E aquí os tedes!!!



LÉNDOLLES AOS PADRIÑOS: A continuación, os profes Guille e Xavi agasallaron aos Padriños Lectores con lecturas escollidas para a ocasión. A todos nos gustan que nos lean. Non é verdade??


EXPOSICIÓN: "O MEU LIBRO ESPECIAL": Durante estes días no corredor do colexio disfrutamos dunha fermosa exposición sobre os libros máis especiais para nós: alumnos/as e profes. Podedes vela aquí. Pulsade nas flechiñas para ver o traballo de cada un de nós.

domingo, 22 de abril de 2012

ACTIVIDADE LIM SOBRE OS BOSQUES

Dentro do noso Proxecto Integrado "Sementando bosques de palabras", preparamos esta actividade interactiva que presentamos a todo o alumnado de 2º e 3º ciclo co obxectivo de coñecer mellor os bosques. Trátase dunha actividade LIM  que permite xogar directamente se ter que baixar ningún programa ao noso ordenador.
Pinchas na pantalliña pequena da esquina superior dereita para xogar a pantalla completa.



Esperamos que aprendades moito con ela e sobre todo que a disfrutes!!

mércores, 18 de abril de 2012

OS LIBROS NOS LIBROS: EXPOSICIÓN E GUÍA

Co gallo da celebración do DÍA DO LIBRO o vindeiro luns 23 de abril, o Equipo de Biblioteca organizou unha Exposición de fondos titulada "OS LIBROS NOS LIBROS".    
       Os libros, ás veces, fanse unha homenaxe a sí mesmos converténdose nos protagonistas das súas narracións. É coma se os libros dixesen: agora imos falar de nós : de como nos fan, de quen nos escribe e nos ilustra, dos lectores que nos devoran, de quen nos coida e ordena... Incluso, as veces, ata deciden mesturar aos personaxes das súas páxinas e colocalos noutras historias para, así, sorprender aos lectores e facernos pensar que aínda hai miles de historias por escribir e as mesmas por ler.
Pincha na foto para ver más imaxes.
Ademáis tamén elaboramos unha pequena GUÍA DE LECTURA co mesmo título OS LIBROS NOS LIBROS que vos axudará a coñecer mellor todos estes libros que falan de si mesmos.
 Disfrutádeos moito!! Son pequenas xoias

martes, 17 de abril de 2012

VISITA A UN XORNAL: El Correo Gallego

Dentro das actividades programadas dentro do Proxecto Integrado "Sementando bosques de palabras", unha das visitas que queriamos facer era a de ver como se fai un xornal. Nos cursos máis altos estiveron traballando sobre o aproeitamento dos bosques e un dos seus beneficios é a producción de papel e os seus múltiples usos: un deles a producción de xornais.
Así que alá que nos fomos a ver como se facía un xornal: El correo Gallego. Aquí tedes as imaxes da visita:

luns, 16 de abril de 2012

CHARLA DA ESCOLA DE PAIS E NAIS

O venres 13 ás 13:30, dentro do programa de actividades arredor da conmemoración do DÍA DO LIBRO, a Escola de Pais e Nais do noso centro recibiu unha nova charla titulada"Que podemos facer para fomentar a lectura e mellorar o rendemento académico dos nosos fillos" a cargo de Mª del Pilar Allaríz Villanueva da ASOCIACIÓN NERIA.


Arriba, todas "estudando" moi concentradas os apuntes da profe Pilar.
Abaixo, foto de familia coa profe e do noso dire.



CONTACONTOS CON PEPA MARTÍN

O xoves día 12 de abril, en horario de 11 a 12 da mañá, os nenos e nenas de ed. infantil e 1º ciclo de Primaria disfrutaron dunha sesión de Contacontos con PEPA MARTÍN por xentileza da EDITORIAL NIVOLA e a LIBRERÍA LER de Santa Comba.
A actividade tivo lugar na na nosa biblioteca e alí Pepa ensinou aos rapaces o ciclo da auga e tratou de conciencialos sobre a importancia da auga empregando como fío conductor o libro "La vuelta al mundo de gota de agua" da editorial Nivola, que os rapaces coñecían ben.
Aquí tedes as imáxenes:

PROGRAMA DE ACTIVIDADES CELEBRACIÓN DÍA DO LIBRO

A semana pasada  comezamos coas actividades organizadas entorno a celebración do DÍA DO LIBRO.

O programa de actividades é o seguinte:

Esperamos que o disfrutedes!!!

luns, 9 de abril de 2012

COÑECENDO A HANS CHRISTIAN ANDERSEN

Dende o C.E.I.P. Mestres Goldar de Vigo, chéganos este traballo sobre Hans Christian Andersen. Lembrade que é a data de nacemento deste autor, o 2 de abril, como podedes ver máis abaixo, a que conmemoramos na celebración do Día do Libro Infantil e Xuvenil.
Con esta actividade LIM, elaborada pola mestra e coordinadora da biblioteca do CEIP Mestres Goldar Julia González, podedes coñecer un pouquiño mellor a este autor tan importante para a Literatura Infantil e tamén traballar algúns dos seus famosísimos contos. 
Esperamos que a aproveitedes e a disfrutedes!!
Gracias a Julia por compartir este impresionante traballo!!

luns, 2 de abril de 2012

DÍA DO LIBRO INFANTIL E XUVENIL

   Hoxe celébrase o Día Internacional do Libro Infantil e Xuvenil. A celebración foi promovida polo IBBY (International Board on Books for Young People) e elixiu esta data por coincidir co aniversario do nacemento do escritor danés Hans Christian Andersen.
    A finalidade da festa é promocionar os bos libros infantís e xuvenís e a lectura entre vós os máis xóvenes. Cada ano, un país membro do IBBY encárgase de editar o cartel anunciador e de difundir a mensaxe dirixida aos nenos. Este ano, o responsable é IBBY-México. O autor da mensaxe é o escritor Francisco Hinojosa e o ilustrador Juan Gedovius.
     Aquí vos deixamos a mensaxe de Francisco Hinojosa:

"Había unha vez un conto que contaba o mundo enteiro. Ese conto en realidade non era un só, senón moitos máis que comezaron a poboar o mundo coas súas historias de nenas desobedientes e lobos seductores, de zapatiños de cristal e príncipes namorados, de gatos inxeniosos e soldadiños de chumbo, de xigantes bonachóns e fábricas de chocolate. Poboárono de palabras, de intelixencia, de imaxes, de personaxes extraordinarios. Permitíronlle rir, asombrarse, convivir. Cargárono de significados. E dende aquela eses contos continuaron multiplicándose para dicirnos mil e unha veces “Había unha vez un conto que contaba o mundo enteiro…”
Ao ler, ao contar ou ao escoitar contos estamos exercitando a imaxinación, coma se fose necesario adestrala para mantela en forma. Algún día, seguramente sen que o saibamos, unha desas historias acudirá ás nosas vidas para ofrecernos solucións creativas aos obstáculos que se nos presenten no camiño.
Ao ler, ao contar ou ao escoitar contos en voz alta tamén estamos repetindo un ritual moi antigo que cumpriu un papel fundamental na historia da civilización: facer comunidade. Ao redor deses contos reuníronse as culturas, as épocas e as xeracións para dicirnos que somos un só os xaponeses, os alemáns e os mexicanos; aqueles que viviron no século XVII e nós que lemos un conto en Internet; os avós, os pais e os fillos. Os contos énchennos por igual aos seres humanos, a pesar das nosas enormes diferencias, porque todos somos, no fondo, os seus protagonistas.
Ao contrario dos organismos vivos, que nacen, se reproducen e morren, os contos, que xorden colmados de fertilidade, poden ser inmortais. En especial aqueles de tradición popular que se adecúan ás circunstancias, ao contexto do presente no que son contados ou reescritos. Trátase de contos que, ao reproducilos ou escoitalos, os converten nos seus coautores.
E había unha vez, tamén, un país cheo de mitos, contos e lendas que viaxaron polos séculos, de boca en boca, para exhibir a súa idea da creación, para narrar a súa historia, para ofrecer a súa riqueza cultural, para excitar a curiosidade e encher de sorrisos os beizos. Era tamén un país no que poucos dos seus poboadores tiñan acceso aos libros. Pero esa é unha historia que xa empezou a cambiar. Hoxe os contos están chegando cada vez máis a recunchos afastados do meu país, México. E ao atoparse cos seus lectores están cumprindo co seu papel de facer comunidade, facer familia e facer individuos con maior posibilidade de ser felices."