venres, 22 de xuño de 2018

FESTIVAL DE FIN DE CURSO

Pois desta maneira despedimos o 2017-18, un curso no que as viaxes, o turismo e o noso patrimonio foron a parte central da nosa aprendizaxe. E tamén estivo moi presente nas actuacións do festival de fin de curso!!! Seguro que estades desexando ver as fotos que fixemos, así que aquí volas deixo, para que poidades compartilas coas vosas familias, amizades, veciños... 
Unha aperta enorme e FELIZ VERÁN para todas as persoas que nos len a través do blog!!!
Premendo AQUÍ atoparedes un feixe de imaxes!!!


xoves, 21 de xuño de 2018

O SANCOSMEIRO Nº 31 E UNHA GUÍA DE LECTURA PARA O VERÁN

Desta maneira rematamos hoxe a xornada: entregando o último número da nosa revista escolar "O Sancosmeiro", que xa vai polo número 31. Esperamos que guste moito a todas as familias e que sexa un bo recurso para compartir lembranzas, conversas, sorrisos... Déixovola tamén no blog:



E a guía de lectura para o verán tamén:




mércores, 20 de xuño de 2018

AS NENAS E NENOS DE 4 E 5 ANOS EN RADIO ROSIÑA!!!!

Vaia notición!!!! E que alegría tan grande cando vos escoitei!!!! Esta mañá estiveron en "Radio Rosiña" as nenas e nenos de 4 e 5 anos!!!! E alí gravaron a historia de "A margarida branca", porque no festival de mañá queren cantar a canción. Como é moi curtiña, o profe Óscar propúxolles ler a historia desta flor. Encantoulles a idea, e aproveitando a nosa radio, pensamos que era boa idea lelo con tranquilidade no fermoso estudio que temos. E quedou tan ben que non me canso de escoitarvos... 
Lembrámonos moito de Uxía, que esta temporada non puido estar connosco, pero quédannos moitas aventuras máis en "Radio Rosiña"!!!!
Escoitade a primeira gravación destes marabillosos/as artistas: Alicia, Pablo, Anxo, Lucía, Luzdivina, Ainhoa, Laura e Olalla. Recoñecedes as súas voces?





luns, 18 de xuño de 2018

XORNADA DE CONVIVENCIA 2018

Vaia xornada tan estupenda a do venres!!! Tivestes un día espectacular, desfrutastes moito das actividades que fixestes e da compañía de todas as persoas que vos acompañaron...Unha mágoa que algunhas non puideran ir convosco, pero por suposto lembrástesvos moito delas e por iso tamén quero contarlles todo o que fixestes nesta xornada de convivencia tan turística...
En bus viaxastes ata O Grove, onde ás 12 subistes nun catamarán no que fixestes un percorrido pola Ría de unha hora de duración. Navegar polo mar mentras falabades, escoitabades ás persoas da empresa contándovos en que consistía o traballo das bateas en canto ao cultivo dos mexillóns, das vieiras e ostras foi unha experiencia única. Ademais, puidestes tamén bailar un pouco e degustar uns mexillóns exquisitos!!! 
Despois visitastes o Acuario, no que puidestes ver diferentes tipos de peixes ao tempo que vos ían contando algunhas das características de diferentes zonas de Galicia en canto aos ecosistemas marítimos.

E por último, o xantar. Para iso viaxastes ata a Illa da Toxa, e nun parque ben fermoso aproveitastes para comer, falar, xogar, etc. Despois da comida algunhas persoas animáronse a visitar a Aldea Grobit, e pouco máis tempo quedou, xa que tocaba regresar de novo a San Cosme.
Pasástelo xenial e no cole queremos agradecer a todas as persoas que axudaron a que todo saíra así de ben!!!!
Como estaredes ansiosos/as por ver as fotos, premendo AQUÍ podesdes acceder a elas!!!



TEXTOS GAÑADORES NO CONCURSO DAS LETRAS GALEGAS 2018

Pois aquí están os escritores que nos faltaba por escoitar, que gañaron este curso o premio das Letras Galegas 2018. 
Empezamos con Guille, de 1º de Primaria, que nos le así de ben a súa creación:


Seguimos con Alejandro, de 4º de Primaria, que presentou un conto que escribiu coa profe Cris na aula de A.L. e P.T. Alejandro, ademais, inspirouse nunha fermosa anécdota que vivimos este curso no cole, cando coñecemos aos peregrinos Ginés, Marina e Komotú no seu percorrido por San Cosme hacia Fisterra.


E, por último, Paula Barcia, tamén de 4º de Primaria, que tamén nos le o seu conto en "Radio Rosiña":


NORABOA A TODOS E TODAS, tanto ás persoas gañadoras coma a todas as que participaron no concurso!!!!

xoves, 14 de xuño de 2018

PROGRAMA ESCOLAR DE CONSUMO DE LEITE E PRODUTOS LÁCTEOS

O Ministerio de Agricultura e Pesca, Alimentación e Medio Ambiente, co apoio económico da Unión Europea, levou adiante esta iniciativa ao observar que as estatísticas amosan un descenso no consumo de leite e produtos lácteos na poboación española de menor idade. O obxectivo do programa é fomentar o seu consumo, ademais de dar a coñecer a importancia do leite para manter unha dieta equilibrada. 
Ao noso cole tamén chegou esta charla, que estivo dirixida por Patricia, quen expuxo os contidos en dúas quendas: a primeira para o alumnado de Infantil e 1º e 2º de Primaria (premede AQUÍ para ver as fotos); a segunda, para as nenas e nenos de 3º a 6º (premede AQUÍ para ver as fotos). 




mércores, 13 de xuño de 2018

A CLASE DE 1º E 2º RECOMENDA DESDE "RADIO ROSIÑA"

Ai, que alegría recibir as vosas gravacións!!!! Hoxe chegáronme as entrevistas que fixeron en 1º e 2º para o programa "Tes que lelo", onde os rapaciños e rapaciñas da clase de Óscar nos queren recomendar un montón de libros interesantes. Anotade ben, eh!!!!











NOVIDADES NO PATIO DO COLE

Durante esta temporada o patio do cole amosa algunhas sorpresas: xogos tradicionais pintados sobre o cemento!!!
A petición saíu da clase de Educación Infantil, xa que a todas e todos lles encantaba xogar no patio a máis cousas que correr, xogos de pelota e/ou de corda... Pero había ocasións nas que lles apetecía outro tipo de entretemento, así que xuntaban un bo puñado de xices e pintaban no patio diferentes taboleiros para xogar. Mais a chuvia facía que eses deseños duraran moito menos do que lles gustaría, así que escribiron unha carta solicitando que se puideran pintar para sempre!!! E nestas anda todo o cole, porque tamén quixeron colaborar os demais cursos, algo do que me alegro moitísimo!!!
Por agora só puidemos estrenar os que pintamos nas zonas cubertas, pero en canto quente o soliño, poderemos empezar tamén os de fóra. Queredes ver como van quedando? Premede AQUÍ!


sábado, 9 de xuño de 2018

TEXTOS GAÑADORES DO CONCURSO DAS LETRAS GALEGAS 2018

Desde Radio Rosiña pensamos que sería unha boa idea que todas as persoas interesadas puiderades escoitar os textos que gañaron o "Concurso das Letras Galegas 2018". Hoxe empezamos!!! A encargada de facelo foi Iria Blanco del Río (6º de Primaria), quen gañou un dos premios co poema que presentou. Encárgase Pablo González (5º de Primaria) de presentala, ademais de encargarse da mesa de control como un auténtico profesional. Queredes escoitalos? Aquí os tedes:




venres, 8 de xuño de 2018

OS PROXECTOS DOCUMENTAIS

Pois xa están aquí os Proxectos Documentais que fostes realizando ao longo deste curso... A través de "O mundo é máis lindo lendo" descubrimos que o turismo non consiste só en ir tomar o sol a unha praia, visitar museos ou facer fotografías diante de monumentos importantes... Hai moitas maneiras de viaxar e coñecer novos lugares, pero o importante é que sexamos responsables e que o impacto que causamos como turistas sexan o menos prexudicial posible: o respeto ao medio ambiente, ás comunidades que visitamos, o coidado dos bens considerados patrimonio, etc., teñen que estar por diante de todo!!! 
Queredes ver en que andiveron inmersos os diferentes grupos do cole? Pois aquí vos deixo os seus traballiños; seguro que léndoos aprendedes moitísimas cousas interesantes!
Empezamos co de Educación Infantil. Aquí levan moitos días de viaxe, percorrendo o mundo con Míster Fogg, o personaxe de "A volta ao mundo en 80 días". E o título deste coñecido libro de Julio Verne é tamén o do seu proxecto, no que nos amosan cousas que descubriron de Londres, Exipto, a India, a China, Xapón e Nova York!!! Creo que lles levou máis de 80 días, pero a volta dérona!!! NORABOA!!!


 
En 1º e 2º de Primaria centráronse na gastronomía como parte do noso patrimonio inmaterial, e para o seu proxecto elixiron unha das receitas máis características do noso concello: o bolo do pote. Ademais, este curso invitáronos a participar no programa do "Bolo miúdo", celebrado na Casa da Cultura de A Picota, onde tamén tiveron a oportunidade de elaborar este prato tradicional e mesmo de saír na tele. Un grupo de artistas!!! NORABOA por este bonito traballo: "O Bolo do Pote"!!!



En 3º e 4º probaron un montón de maneiras de viaxar, así que decidiron presentar un proxecto titulado "Os medios de transporte". NORABOA, rapaces e rapazas!!!



En 5º e 6º fixeron dous proxectos. O primeiro deles, nas clases de Lengua Castellana e Inglés, que titularon "Destino: Londres". Nel preparan unha viaxe para pasar uns días na capital do Reino Unido, con hotel incluído!!! Animádevos que xa nolo dan todo feito!!!



O segundo fixérono nas clases de Lingua Galega. Este ano o "Día das Letras Galegas" estivo adicado a María Victoria Moreno. A súa vila natal compartía con Mazaricos algo moi relacionado con isto do turismo, os dólmenes, así que decidiron unir a información de ámbolos dous lugares neste traballo que titularon "Unha ponte entre Mazaricos e Valencia de Alcántara".



NORABOA polos vosos traballos!!!

 

mércores, 6 de xuño de 2018

"TERÍA QUE SER PATRIMONIO CULTURAL..."-Exposición

No mes de marzo propúxenvos participar na exposición "Tería que ser patrimonio cultural...", cubrindo unha pequena ficha na que escribiriades sobre o ben do voso contorno que elixirades para incluír como tal. Algunhas das persoas que participastes enviastes tamén unha fotografía real, ademais de facer a vosa propia ilustración. Moitas grazas!!! 
Eu pensaba que ao mellor aínda medraba máis, pero a estas alturas de curso xa estou case convencida de que non achegaredes ningún máis, así que fotografeinos todos para que puiderades velos tamén aquí. Gustáronme moito!!! Algúns contaba que apareceran, pero outros sorprendéronme moitísimo!!! E a vós?




venres, 1 de xuño de 2018

PEDALEANDO POLA PICOTA


O mes de xuño inaugurámolo cunha marcha ciclista organizada polos encargados de Deportes do Concello, que reuniron aos tres centros do Concello na Picota. O percorrido, de 10 km. aproximadamente, estivo moi ben organizado, atendendo en todo momento calquera contratempo que tiveran os nenos e nenas: cansazo, saída de cadeas das bicis, etc. A cada participante entregáronlles un chaleco reflectante da DXT que, ao remate da marcha, levaron de agasallo.
Miguel, Jorge Lema, Joel, Pablo, Samuel, Brais Carreira, Martina, Brais Capelo, Íker, Jorge Otero, Nerea, Paula Barcia, Andrea, Aroa e Xoel partiron do cole así de contentos/as e animados/as!!! Acompañáronos/as Manoli e David.
As bicis foron trasladadas por persoal do Concello dende o centro ata A Picota.
A ruta pasou por lugares moi fermosos: A Picota, Sanfoga, Corzón, Ponte Olveira, Colúns, A Choupana, área recreativa de A Pontenova, Outeiro de Bois, Argueirón, A Picaraña e regreso á Picota. 
E tamén se reencontraron con bos amigos e amigas!!! Premede AQUÍ para ver todas as fotos!