sábado, 31 de outubro de 2020

CELEBRACIÓN DO SAMAÍN 2020

O venres, 30 de outubro, celebramos o Samaín no cole. É certo que foi moi diferente aos que adoitabamos facer, pero aínda así mereceu a pena adicar unha xornada a unha das festas que máis nos gustan. 

Durante a mañá, nas diferentes aulas léronse, contáronse e/ou proxectáronse historias relacionadas co medo, realizamos un obradoiro de música e preparamos petiscos terroríficos que degustamos antes do recreo. Tamén se fixeron actividades de plástica, que ao igual que as anteriores, desenvolvéronse nas aulas de cada grupo, mantendo así os agrupamentos estables de convivencia...

Ao mediodía, antes de xantar, entregáronse os premios ás cabazas máis votadas por todo o alumnado, e tamén aos relatos de medo que presentastes á décima edición deste concurso. En canto ás cabazas, alegreime moito ao comprobar que a participación foi moi alta, e adicastes parte do voso tempo coa familia para decorar unha que fotografastes e enviastes para o concurso. Moitísimas grazas!!! De todas elas, as que máis votos recibiron foron, en primeiro lugar, a de Alicia Alvite Ramos (3º de Primaria), en segundo a de Sofía Mourelle San Martín (Educación Infantil-4 anos) e o terceiro foi para a de Sara Labandeira Gerpe (5º de Primaria). Así de contentas recolleron os seus premios:

Alicia recolleu o 1º premio no Concurso de Cabazas.

A cabaza de Sofía gañou o 2º premio.

Sara recibiu tamén moitos votos e gañou o 3º premio.

Houbo tamén unha "Mención de honra" para a cabaza presentada por Daniel Ínsua Moldes (1º de Primaria). Ao ser unha das máis votadas tamén tería que estar entre as premiadas, pero como sabedes intentamos que cada ano leven premio persoas diferentes, pero cando o éxito é tan grande, consideramos que era xusto telo en conta, polo que se lle fixo entrega dun diploma e un agasallo. Dani non puido acompañarnos nesta xornada, pero a súa titora recolleu o premio que lle entregará en canto regrese!!!

A profe Sonia recolleu o premio de Dani.
 

A continuación, entregáronse os premios aos relatos. En Infantil presentaron un conto en cada aula, polo que obtiveron dous diplomas e dous agasallos: un para Educación Infantil de 3 e 4 anos, e outro para Educación Infantil de 4 e 5 anos. Premendo sobre a imaxe podedes descubrir as súas terroríficas historias!

O conto da aula de 3 e 4 anos leva por título "Unha tarde de medo no cole".

"A bruxa acabada" foi o título do conto que presentou a aula de 4 e 5 anos.

En canto a Educación Primaria, outorgáronse catro premios: 

Na aula de 1º e 2º, Olalla Suárez Grille

En 3º e 4º, Íker Freire Cambeiro

En 5º e 6º, o premio foi para Brais Carreira Antelo.


Tamén se concedeu un "Premio Especial" a Alejandro Villar Negreira, quen presentou unha historia creada por el na aula de P.T.

Estas historias está previsto gravalas en "Radio Rosiña" para compartilas con todas as persoas que nos sigan a través das ondas, así que estade moi atentas!!!! Mentras tanto, podedes lelas premendo AQUÍ.

Para ver as fotos que fixemos durante a xornada, só tedes que premer AQUÍ.

No seguinte vídeo podedes ver as cabazas presentadas a concurso e as súas creadoras:

Apertas,





venres, 30 de outubro de 2020

GUÍA DE SAMAÍN 2020

Aquí vos deixo a Guía de Lectura que fixen para o Samaín. Nesta ocasión non a imprimimos, pero fixemos un vídeo curtiño no que veredes algunhas das novidades relacionadas co medo, a intriga, o suspense... E, ao final da mesma, tedes tamén algunhas propostas para compartir en familia. Espero que vos sexa útil e que, no caso de que vos animedes a ler algún dos libros que nela van, os desfrutedes moitísimo:





luns, 26 de outubro de 2020

DÍA DAS BIBLIOTECAS

Aquí vos  presento o vídeo que realizaron as nenas e nenos do CEIP Víctor Sáenz para conmemorar o "Día das Bibliotecas", porque aínda que estamos vivindo unha situación que nos impide realizar as actividades do xeito no que estabamos acostumadas, sabemos que as bibliotecas non deben faltar nas nosas vidas!!! 

Espero que vos guste moito esta pequena montaxe que fixemos cos vosos recitados, poetas marabillosas!!!


venres, 23 de outubro de 2020

EN EDUCACIÓN INFANTIL FALAN DE DISFRACES EN "RADIO ROSIÑA"

O curso pasado adicamos o proxecto documental integrado ás aves, e debido á suspensión de clases no mes de marzo, quedaron algunhas cousiñas pendentes de facer ou de rematar. Este foi o caso de Educación Infantil, quenes se disfrazaron de pavos reais para celebrar o Entroido. En "Radio Rosiña" emitimos varios programas adicados aos disfraces, pero este grupo non puido rematar a súa gravación naquel momento, así que aproveitaron estes días de regreso ás nosas actividades presenciais para facelo. E quedoulles así de chulo!!! Escoitade, escoitade:

 




PROGRAMA SOBRE MAZARICOS EN "RADIO ROSIÑA"

O grupo de 3º e 4º gravaron un programa en "Radio Rosiña" moi interesante, no que falan de Mazaricos, o noso concello. Fanno con tanta emoción e profesionalidade que calquera que o escoite non lle quedará ningunha dúbida de que este lugar é máxico e está cheo de recunchos para coñecer e explorar... Con este programa queren promocionar esta zona, e estou segura de que o conseguirán!!! NORABOA, rapaces e rapazas!!! Fixestes un traballo estupendísimo!!!

Mural que elaboraron en 3º e 4º para promocionar Mazaricos.


 

xoves, 22 de outubro de 2020

SAMAÍN 2020

 OLA!!!!

Falta só unha semana para a celebración do Samaín, e nesta ocasión escríbovos a cartiña desde o blog da biblioteca, para que poidades lela e comezar os preparativos para os concursos que convocamos!!!

Anúnciovos tamén que o próximo venres organizaremos diferentes obradoiros, dos que vos informaremos a semana que vén.

Unha aperta enorme,


 
 


 


martes, 20 de outubro de 2020

ILUSTRACIÓNS PARA O DÍA DA MULLER RURAL

Na entrada adicada ao "Día Internacional da Muller Rural" escribín que recollería todas as ilustracións presentadas para conmemorar esta data, que se celebrou o pasado 15 de outubro. E hoxe, por fin, aquí vos presento os debuxos de todas as persoas que participastes!!! Espero que vos gusten moitísimo e que sigades valorando o traballo que todas estas mulleres fan día tras día, porque son merecedoras do noso recoñecemento en calquera data do calendario.

 

Unha aperta enorme,



xoves, 15 de outubro de 2020

DÍA INTERNACIONAL DA MULLER RURAL

Hoxe, 15 de outubro, celébrase o "Día Internacional da Muller Rural", e no Concello de Mazaricos invitáronnos a participar nun concurso de ilustracións a través das cales realizar unha homenaxe a todas as mulleres que temos a grande sorte de coñecer no noso cole: mulleres valentes, emprendedoras, agarimosas..., mulleres ás que admiramos por moitos motivos dos cales nos sentimos moi orgullosas!!!! No cole quixemos agradecerlles todo o que fan por nós e para iso gravamos un rap que compartimos tamén a través do blog da nosa biblioteca, esperando que lles guste moito e que desfruten tanto véndoo coma nós facéndoo. Aquí está o noso "Rap da muller rural":


 

En canto ás ilustracións, inspiradas nas avoas, nais, veciñas, mestras, etc.,  foron seleccionadas tres de todas as presentadas. Pero calquera delas é merecedora do noso recoñecemento, así que desde aquí queremos felicitarvos a todas as persoas polo voso traballo, que fixestes con tanta ilusión desde 1º ata 6º de Primaria; NORABOA A TODAS!!!

Aquí vos deixamos as ilustracións gañadoras nesta ocasión:

Zaira Núñez Tuñas (1º) inspirouse na súa nai manexando o tractor.

Ángel Grille Calvelo (4º) tamén representou o traballo no campo.

Mai Villar Vilas (5º) amosou o detalle dunha costureira.

En breve poderedes ver as ilustracións de todas as persoas que participastes, coas que queremos difundir o papel destas valentes mulleres!!! 

Tamén queremos compartir con vós o programa que emitiu o alumnado de 6º en "Radio Rosiña" esta mañá con motivo desta conmemoración. Podedes escoitalo e/ou descargalo no seguinte enlace:


Agradecemos tamén ao Concello de Mazaricos a súa invitación, desexando que sigan xurdindo propostas deste tipo ao longo do curso...

domingo, 4 de outubro de 2020

AS AVES, INDICADORES DE CALIDADE DE VIDA

Cartel de SEO/Birdlife

Esta fin de semana celebrouse o "Día das aves", para a cal a organización SEO/Birdlife elixiu un lema que amosa a importancia destes animais no noso entorno: "As aves, indicadores de calidade de vida". As aves son os mellores indicadores do estado de saúde do noso ambiente, son símbolo de vida, de calidade de vida. 

E no cole, xa que este curso seguiremos aprendendo todo o que poidamos sobre elas, tamén queremos ter en conta esta data, desexando que os seus cantos se sigan escoitando día tras día!!! 




venres, 2 de outubro de 2020

DESPEDIMOS AO CREADOR DE MAFALDA


Somos moitas as persoas que coñecemos a Mafalda, que lemos e desfrutamos coas viñetas dunha das rapaciñas de cómic máis coñecidas do mundo. O seu creador, Joaquín Lavado, máis coñecido como Quino, faleceu o pasado 30 de setembro na súa cidade natal, Mendoza (Arxentina). Mafalda foi o seu personaxe máis coñecido, e foi publicada por primeira vez no ano 1964, así que neste 2020 cumpre xa 56 anos!!! Sen embargo, esta nena segue sendo un exemplo a seguir en canto á súa opinión sobre o mundo que lle rodea. Daquela non se coñecía o coronavirus, e non había moita conciencia social sobre problemas que afectan á totalidade do noso planeta, pero as súas reflexións seguen a ser totalmente válidas na actualidade. Se non a coñeces, esta é unha boa ocasión para que a descubras.