domingo, 26 de novembro de 2017

O LABORATORIO DE RADIO XA ESTÁ EN MARCHA

A partir de hoxe, na columna lateral dereita atoparás esta imaxe, que te levará a un enlace directo a todos os recursos relacionados co proxecto "Radio na biblio", para o cal fomos seleccionados e que comezará a andar durante o presente curso. Premendo sobre a imaxe nesa barra lateral poderás ir lendo as novas que se vaian publicando, a partir das cales comezaremos a facer o noso traballo. As primeiras chégannos dende os "Recursos" de Bibliotecas Escolares...

Saúdos!!!

sábado, 25 de novembro de 2017

CONTRA A VIOLENCIA DE XÉNERO, CHEAS DE VIDA!!!

Esta fermosa canción de Guadi Galego foi a elixida no CPI Plurilingüe Eusebio Lorenzo Baleirón (Dodro) polo alumnado de 4º da ESO para realizar un videoclip ben fermoso!!! Quero compartilo convosco hoxe, 25 de novembro, Día Internacional contra a violencia cara á muller, e adicarllo a todas esas persoas que loitan polos dereitos en tantos recunchos do mundo, conseguindo que non deixen de estar cheas de vida!!! NORABOA tamén a todas as persoas que participaron na realización deste fermoso traballo:


venres, 24 de novembro de 2017

15 ANOS DESPOIS, RECIBIMOS UNHA CARTA MOI ESPECIAL

Pasaron 15 anos do afundimento do "Prestige". Moitas das persoas que agora convivimos no cole non estabamos aquí, pero algunhas si, e son moitas as que están emparentadas ou relacionas con persoas que naquel momento formaban parte da nosa comunidade educativa. Para as persoas que descoñezan esa noticia, quero dicirlles que foi un dos capítulos máis tristes na historia do noso país. E como ocorre noutras situacións de emerxencia, esta tamén foi un exemplo de solidaridade por parte de todas as persoas que trataron de axudar nesta grande traxedia. O petroleiro "Prestige" tinguiu de negro as costas de Galicia (e máis alá), e a marea negra matou a moitísimos seres vivos. Pero tamén nos deu unha lección moi válida a nivel social, e iso é o que vos quero contar hoxe aquí. Naquel momento, o grupo de 4º de Primaria escribiu unha carta a un dos colexios que máis sufriu esta catástrofe. Quince anos despois, o mesmo cole, o CEIP O Areal, coas persoas que agora o integran, quixo contestar aquela emotiva carta. Para as persoas que estabamos en San Cosme foi moi especial recibir estas letras, pero tamén para as que non, e queremos compartilas con todas as persoas que nos len e nos seguen, así que aquí volas deixo. Emocinádevos, porque non é para menos!!!



A continuación podedes ler a carta que escribiu o grupo mencionado de 4º de Primaria. Esperamos que algunha desas persoas poida lela e incluso contarnos que sentiu lembrando aquel momento.



E, por último, engadir unha foto ben fermosa no Cabo Vilán, onde se pode comprobar que o mar, afortunadamente, se foi recuperando!!!





martes, 21 de novembro de 2017

APRENDENDO SOBRE COGOMELOS

Esta mañá, o cole agardaba unha sorpresa agochadiña nun dos patios interiores: unha exposición moi coidada de cogomelos!!! Encargáronse da mesma Emilio e Mª Carmen, membros da Asociación Micolóxia "Sendeiriña" de Negreira. Ademais de achegar ao centro máis de 130 especies diferentes de cogomelos (recollidos en Negreira, Santiago e A Baña) que puidemos observar, cheirar e mesmo tocar, os nosos invitados tamén prepararon unha charla para contarnos moitas das características destes interesantes organismos. Tamén puxeron á nosa disposición unha interesante exposición de libros para que puideramos ollalos durante toda a xornada.
Foi unha xornada moi interesante e divertida, na que ademais aprendemos moitísimas cousas sobre os cogomelos!!! Moitísimas grazas a Emilio e Mª Carmen por este agasallo!!!

Premendo AQUÍ podedes ver todas as fotografías tomadas.

E como sei que vos gustará volver ler a información sobre os diferentes cogomelos, tamén vos deixo as presentacións que prepararon Emilio e Mª Carmen, que nos deixaron con moita amabilidade para ter á nosa disposición.


luns, 20 de novembro de 2017

SELECCIONADOS PARA O PROXECTO "RADIO NA BIBLIO"

Imaxe tomada do blogue do CEIP A Lama (Pontevedra)
POIS SI, rapaciñas e rapaciños!!!! Estou contentísima, porque fomos SELECCIONADOS para o proxecto "RADIO NA BIBLIO"!!!! Faime moitísima ilusión que sexades parte do inicio desta nova aventura. 


No contexto do PLAN LÍA, entre as medidas destinadas á mellora das capacidades lectoras do alumnado, contémplase o deseño e desenvolvemento de programas para a mellora da competencia informacional e mediática, e detalla, como medida concreta, a posta en marcha dun programa de radio escolar con vinculación á biblioteca.

Que vos parece a vós? Seguro que, coma min, estades desexosas de comezar!!!!
 




OS DEREITOS DA INFANCIA

Hoxe celebramos o Día dos Dereitos da Infancia, uns días antes de que chegue tamén a data sinalada no mes de decembro para conmemorar os Dereitos Humanos. Xa vos teño falado da Convención dos Dereitos dos Nenos, pero seguramente moitas persoas vos preguntaredes cal é a diferenza entre eles... Os Dereitos dos Nenos son, por suposto, Dereitos Humanos. Pero a Carta destes últimos non aporta unha protección especial á infancia, así que vendo a súa necesidade, elaborouse a Convención sobre os Dereitos do Neno, xa que hai dereitos dos adultos que no poden aplicarse aos nenos, e viceversa.
Quero tamén deixarvos aquí unha ligazón da Comisión Nacional Mexicana dos Dereitos Humanos, onde atoparedes un apartado adicado ás nenas, nenos e adolescentes. Nela poderás escoitar cancións, ver vídeos e xogar aprendendo moito sobre os dereitos... 


Ademais, na exposición do corredor poderás atopar tamén moitos libros relacionados con este tema, e entre eles tres novidades da biblioteca, sobre tres persoas que, coa súa labor, fixeron que as cousas neste mundo mudaran a mellor. Persoas que loitaron para conseguir que o dereito á educación, a vida sen conflictos ou unha natureza saudable formaran parte da nosa vida diaria. Non podes perder a oportunidade de coñecer as historias de Malala, Nelson Mandela ou Wangari Maathai:
 


domingo, 19 de novembro de 2017

UNHA OBRA DE TEATRO CONTRA O "BULLYING"

O xoves fomos ata a casa de cultura de A Picota para asistir a un espectáculo teatral sobre a historia dunha nena que foxe da escola, farta de ser o centro das burlas dos seus compañeiros e compañeiras. Na súa aventura atópase cun ser máxico, o Xeadeiro, quen lle ensina que dentro de cada unha/un de nós agóchase un ser único e especial, e que temos que crer en nós para acadar todo o que nos propoñamos. A través de cancións, contos, adiviñas e xogos, a nena recupera a súa autoestima.
A obra, representada pola compañía Redrum Teatro, é unha adaptación do libro "A nena que quería navegar", escrito por Álex Sampayo e Borja F. Caamaño e ilustrado por Rodrigo Chao. Este conto sobre o acoso escolar ou bullying podes atopalo na nosa biblioteca.
Podedes ver as imaxes desta xornada premendo AQUÍ.

sábado, 11 de novembro de 2017

CELEBRAMOS O MAGOSTO

Pois a semana rematou coa festa do Magosto, como xa vos anunciaramos a comezo da semana. Nesta ocasión, para a celebración invitamos a todas as nais e pais do noso alumnado, así como avoas e avós, pero tamén ás rapaciñas e rapaces que xa remataron no cole e se atopan agora estudando no Instituto. Andrea, Nuria, Rubén, Álex, un gustazo vervos de novo aquí!!! Foi así como aumentamos o número de persoas que nos reunimos na Biblioteca do cole, para escoitar a Celso Fernández Sanmartín, un contacontos ao que temos moito cariño e que nos fixo pasar unha tarde moi agradable de risas, historias sorprendentes e cancións divertidísimas. Todo isto despois de comer un bo puñado de castañas asadas que prepararon as nosas estupendas cociñeiras Lourdes e Mariví, a quenes queremos agradecer ese esforzo. E tamén a Víctor, o noso conserxe, quen nos axudou a mover todo o mobiliario da biblioteca para facer máis acolledor o espazo no que recibimos a todas as persoas que se achegaron ao cole. 
E como estaredes desexando ver as fotos, podedes facelo premendo AQUÍ.
Para ver as imaxes da sesión de contacontos, premede AQUÍ, e os vídeos, AQUÍ.

xoves, 9 de novembro de 2017

VIDE CELEBRAR O MAGOSTO CON NÓS E CON...

Mañá celebramos o Magosto no cole, e queremos convidar ás familias do noso alumnado e ás antigas alumnas e alumnos para que veñan pasar unha tarde de contacontos na nosa biblioteca. Estará connosco Celso Fernández Sanmartín, un contador lalinense que xa estivera hai varios cursos no noso centro. Esperamos pasalo moi ben e recibir a compañía de todas aquelas persoas que poidan e queiran acompañarnos.
 

venres, 3 de novembro de 2017

AS HISTORIAS PRESENTADAS NON PREMIADAS

O certo é que a participación foi total, así que unha boa maneira de valorar o esforzo que fixestes neste concurso de relatos de medo é publicar no blogue todas as historias que deixastes no buzón. Tedes a continuación os enlaces para ler as historias de 1º e 2º; as de 5º e 6º e as da aula de PT. DESFRUTADE CON ELAS!!! Bueno, máis ben debería dicir PASADE MOITO MEDO CON ELAS!!!




AS HISTORIAS DE 1º E 2º
AS HISTORIAS DE 5º E 6º
AS HISTORIAS DA AULA DE P.T.

xoves, 2 de novembro de 2017

AS HISTORIAS DE MEDO CHEGARON Á BIBLIOTECA

Esta mañá, durante a "Hora de Ler", reunímonos na biblioteca para escoitar as historias premiadas no "VIII Concurso de Relatos de Medo". E así, escoitamos a Iria Blanco, Jorge Lema e Sara lendo as súas creacións. Pero tamén a un numeroso grupo de Infantil que recibiu o premio pola súa historia colectiva. Podedes ver as fotos premendo AQUÍ. E como sei que vos encantará lelas de novo, déixovolas aquí:

mércores, 1 de novembro de 2017

GUÍA DE LECTURA

Con motivo da celebración do Samaín, os Equipos de Biblioteca e Dinamización da Lingua Galega do cole elaborou unha guía de lectura que incorpora novidades literarias de diferente tipo: obras que falan de viaxes, de medo, de personaxes fantásticos...

CELEBRAMOS O SAMAÍN

Rematou outubro e para despedilo, hoxe celebramos o Samaín no cole. Ao coincidir en martes, poucos días tivestes para decorar o corredor da escola coas cabazas que elaborastes nas vosas casas. Estou marabillada coas creacións que ides realizando ano tras ano, cada vez máis creativas e sorprendentes; non hai límite para a vosa imaxinación. Para ver o fermosas que quedaron premede AQUÍ.


Hoxe, a primeira hora, realizamos un obradoiro de música no comedor, onde cantamos dúas cancións sobre esta data: "O Samaín", de Uxía Lambona e a Banda Molona, e "Zombie Jamboree", de Rockapella. Ademais de transformarnos en personaxes monstrosos, tamén bailamos o limbo, co que nos divertimos moito vendo as dificultades que nos ía dando o descenso da barra que caracteriza este baile. Premede AQUÍ para ver o resto das imaxes.



A continuación, convertémonos en cociñeiros terroríficos, facendo estes petiscos que papamos antes de saír ao recreo. Para ver como fixemos premede AQUÍ.






Ao regresar do recreo, e coa axuda dalgunhas mamás, fixemos un obradoiro de maquillaxe no comedor, onde cada persoa foi elixindo o tipo de personaxe co que quería ser caracterizado: zombies, arañas, fantasmas, vampiros e vampiresas foron algúns deles, pero tamén había algún lobishome e algunhas bolboretas.  Podedes velas todas AQUÍ. Moitísimas grazas a Sonia, Lupe e Cris por botarnos unha man nesta actividade!!!

E, por último, entregamos os premios ás cabazas máis votadas e aos relatos que máis medo lle deron a Rosiña... 
O 3º premio nas cabazas foi para Zaira e Joel Núñez Tuñas. Coincidiu que son irmáns e que as súas cabazas empataron en puntuación!!! A de Zaira (Infantil-3 anos) representaba a praia de San Francisco, en Louro, fermoso lugar para pasar as vacacións de verán; Joel (4º de Primaria) preferiu o campo para levarnos de viaxe.

O 2º premio tamén estivo inspirado na praia como destino turístico. Para iso, Martina Pereira Tuñas (2º de Primaria) cubriu unha bandexa con xelatina azul e pan raiado, sobre o que colocou unha cabaza tomando o sol:


O 1º premio levouno unha auténtica obra de arte: a cabaza elaborada por Paula López Sanchiño (3º de Primaria), que resume moi ben a idea da temática do proxecto deste curso, tendo en conta sobre todo o patrimonio cultural etnográfico da nosa comarca:

En canto ás historias de medo, o próximo xoves serán lidas na biblioteca durante a "Hora de Ler", pero hoxe xa desvelamos quenes son os creadores destes terroríficos relatos:
En Infantil, toda a aula, que escribiu "Os vampiros de París"; en 2º, Sara Labandeira Gerpe, coa historia titulada "A nena que soñaba con monstros"; en 4º, Jorge Lema Zamora, con "As viaxes do terror"; en 6º, Iria Blanco del Río, quen escribiu "O trasno da ponte de Brandomil" e o premio especial foi para "O Bosque", escrito por Andrea Carballo Pombo (6º de Primaria).

Podedes ver o resto das fotos premendo AQUÍ.

NORABOA A TODAS E TODOS!!!!