UN NOBEL DE LITERATURA MOI MUSICAL

Menuda sorpresa!!! E vaia casualidade tamén que nesta ocasión o Nobel de Literatura fora concedido a un músico (por primeira vez na historia), xusto o curso no que adicamos o proxecto do centro á música!!! Pois si, no 2016 o premio foi para BOB DYLAN. Pero imaxino que non todas e todos vós o coñeceredes, así que quero contarvos un pouquiño quen é este músico.

Bob Dylan naceu en Minnesota no ano 1941, e desde os anos 60 adícase á música. A influencia de Bob Dylan nesta arte é recoñecida por grandes músicos do rock e do pop, coma os Beatles, os Rolling Stones, Bruce Springsteen, etc. A partir da súa relación con grandes cantautores desa época comezou a compoñer, inspirándose tamén nos poetas franceses e nas noticias do momento, que o animaron a iniciarse no mundo da canción protesta (criticaba a situación social e política). Todo isto revolucionou o mundo do folk, que abandonaría polo pop e no que tamén deixou unha pegada imborrable.

O certo é que as letras das súas cancións son poesía, aínda que a el non lle gustaba que lle chamaran poeta; definíase como "un artista do trapecio". 

Aquí vos deixamos unha das súas cancións máis coñecidas, "Blowin' in the wind", cos subtítulos en castelán para que poidades descubrir ao músico-poeta, acompañado de guitarra e harmónica:

EMILIO PRESÉNTANOS INSTRUMENTOS DE MÚSICA TRADICIONAL

Esta tarde visitounos Emilio, acompañado de Irene, que é a presidenta da Asociación de Amas de Casa de San Cosme. Emilio é músico e presentounos varios instrumentos musicais, para animarnos a asistir ás clases que a Asociación oferta para este curso: acordeón, frauta, pandeireta, tambor, gaita... Seguro que se vos animades desfrutaredes moitísimo tocando pezas como as que nos interpretou Emilio!!! Moitísimas grazas aos dous pola proposta!!! Desexamos que se poida formar un grupo ben xeitoso para que a música se instale na actividade diaria do noso entorno; ánimo!!!

Aquí tedes as fotos desta tardiña (preme sobre a imaxe para acceder ao álbum):

PARA MIN, A MÚSICA É...

Con esta actividade rematamos a primeira semana de outubro. Tratábase de contar o que é a música para cada unha/un de nós, sen ter en conta o que din os dicionarios e enciclopedias. E deste xeito luciu o taboleiro do corredor, con todas as vosas aportacións!!! Premendo sobre a imaxe poderedes ler todas as vosas definicións:

A MUSITECA COMEZA A SOAR!!!

Vaia alegría levei esta mañá nada máis entrar no colexio!!! Si, xa sei que é domingo, pero cheguei onte á noitiña a San Cosme e non puiden aguantar un día máis para ver como estaba o cole e a nosa biblioteca. Entrei a modiño, e nada máis crucei a porta xa vin o taboleiro cos lemas que propuxestes para o proxecto deste curso. Boísimos!!! E tamén me fixei en que votarades polo que máis vos gustou e, de todos eles, un adiantouse un chisco: A MUSITECA. Gústame!!! Non sei cal votaría eu no caso de que chegara a tempo, pero alegreime moito de que participara todo o cole na proposta do lema e que elixirades aquel que vos soaba mellor, porque diso se trata. Dá igual quen o ideara, o importante é que, a partir de agora, xa é de todas e todos nós, así que...
Damos a benvida á nosa MUSITECA!!!

A LECTURA, UNHA CHAVE DE FUTURO

Este é o título dun proxecto editado pola Xunta de Galicia que imprimiremos no centro para que comece a visitar os vosos fogares dentro das mochilas viaxeiras, xa que consideramos fundamental ter en conta os artigos que nel se recollen. Esta publicación destaca, entre outros, aspectos como:

          -a importancia da lectura para a vida, xa que as persoas que len desenvolven habilidades que lles permiten coñecer mellor o mundo que os rodea e tamén os sentimentos propios e os das demais persoas;

           -o gusto pola lectura é unha herdanza familiar. Canta máis importancia e estima se lle outorgue a esta actividade na casa, máis posibilidades hai de que se adquira o gusto polos libros;

           -a ameaza para a lectura non está en internet, senón en crer que na rede se pode ler igual que se le fóra dela.

Entre as persoas que colaboran nos textos está Cristina Novoa, a máxima responsable da Asesoría de Bibliotecas Escolares e para moitos unha das principais referencias á hora de falar de animación á lectura en Galicia. Deixámosvos uns vídeos nos que se recolle parte dunha conversa moi proveitosa na que, sobre todo, reflexiona sobre a animación á lectura dentro da casa:

“Aos pais hai que tratar de convencelos que o seu papel é primordial: como mediadores e como exemplo lector. Ningún pai che vai dicir que non quere a lectura para os seus fillos. O que pasa é que para moitos non está no seu contexto ou nunca a viviron. Non son lectores, pero iso non significa que non saiban que é boa para os fillos. Outra cousa é que perciban para que outras cousas, ademais de para o desenvolvemento escolar, pode servir a lectura”.

Cristina Novoa (1) from Ronsel de Ideas on Vimeo.

Cristina Novoa (2) from Ronsel de Ideas on Vimeo.

Cristina Novoa (3) from Ronsel de Ideas on Vimeo.

O TEMA PARA O PROXECTO DESTE CURSO É...

Ola, rapaciñas e rapaciños!!!

Como estades? Eu sigo no Brasil. Onte remataron os Xogos Paralímpicos, nos que España conseguiu un total de 31 medallas, a grande parte delas en natación, como as que gañou a nosa coñecida TERESA PERALES. A festa destes grandes deportistas paralímpicos coincidiu coa cerimonia de clausura: a pira non se acenderá ata dentro de 4 anos a miles de quilómetros de Río: os próximos Xogos Olímpicos celebraranse en Tokio.

E eu, durante estas semanas no Brasil, ademais de desfrutar dos acontecementos deportivos, tamén quixen coñecer a fondo esta cultura, así que aproveitei todo o que puiden: viaxes, espectáculos, xuntanzas con amizades, películas, encontros con persoas relacionadas co mundo da literatura, cociñeiros e cociñeiras, etc. Tantas cousas que non vou ter tempo para contárvolo todo!!! 

Pero o que si vos quero dicir é que houbo unha cousa que me sorprendeu moitísimo: a CAPOEIRA. Descoñecía por completo o que era isto, e a primeira vez que puiden ver un espectáculo de capoeira quedei marabillada. Introducida no Brasil por descendentes africanos sobre o século XVI, é unha arte marcial que combina danza, música e acrobacias. Caracterízase polos movementos de pernas e brazos e polos saltos. Tradicionalmente practicábase ao ritmo do "berimbau", que é un instrumento de corda percutida, pero na actualidade tamén se empregan outros instrumentos de percusión como acompañamento. Vendo o seguinte vídeo podedes facervos unha idea sobre como se leva a cabo:

E no seguinte podedes observar en que consiste unha clase de capoeira para nenos e nenas:

Bueno, non quero contarvos máis sobre a capoeira, pero si dicirvos que tanto me emocionei vendo aos brasileiros practicándoa que pensei: a capoeira ten algo de deporte e moito de música. Sobre o deporte xa investigamos, pero... sobre a MÚSICA non!!! Así que aquí vai a miña proposta: que tal se convertimos o 2016-2017 nun curso musical? Que banda/s sonora/s lle poñemos? 

Para empezar, anímovos a que me axudedes co lema. Chegarei na próxima semana, así que sería estupendo que xa o tiverades decidido!!! Veña, poñede xa esa creatividade en marcha; seguro que saen cousas tan atraíntes que non quedará unha soa persoa que non se enganche á biblioteca a través da música. Agardo as vosas propostas con tanta emoción que xa non sei se durmirei durante os próximos días...

Unha aperta enorme para todos, ARTISTAS!!!!

100 ANOS DE ROALD DAHL

Tamén a Biblioteca Pública Ánxel Casal de Santiago de Compostela publicou un boletín coa bibliografía de Roald Dahl. Varios deles témolos na nosa biblioteca, pero outros poden ser unha boa idea para un agasallo, para suxerir a súa compra no buzón da biblioteca, etc. Investigade de que trata cada un deles e decidide cal vos apetece ler...

Cen anos de Roald Dahl

Publish at Calameo

100 ANOS DO NACEMENTO DE ROALD DAHL

Seguro que unha grande parte de vós leu as novelas "As bruxas", "Matilda" ou "A marabillosa medicina de George". Ou tal vez viu películas como "Charlie e a fábrica de chocolate". Son todos estes títulos de obras do gran contador de historias ROALD DAHL, quen cumpriría hoxe 100 anos. 

Este escritor británico gusta tanto a nenas e nenos como a persoas adultas. A quen non lle gustaría ter os poderes de Matilda? Ou entrar na fascinante fábrica de Willy Wonka? Alguén rexeitaría repartir soños co xigante bonachón? A todas as persoas que nos gusta ler sabemos que a lectura permítenos "viaxar ao longo do mundo mentras estamos na nosa pequena habitación", como di Matilda, a protagonista dun dos seus libros máis exitosos.

Así que eu quero tamén aproveitar a ocasión do centenario dun dos escritores máis importantes do século XX para lembrarvos que na nosa biblioteca tedes varios exemplares seus. Animádevos a lelo, de seguro non vos defraudará e a vosa imaxinación ampliarase ata límites insospeitados...

BENVIDA AO CURSO 2016-17

Ola, rapaciñas e rapaciños!!!

Aquí estamos de novo!!! Como vos foi o verán? Seguro que tedes un montón de cousas para contarme. A min e aos mestres e mestras que vos reciben hoxe na escola. Xa me gustaría estar aí convosco. Mais nesta ocasión tamén me perderei a inauguración do curso, xa que estou no Brasil. Despois dun ano adicado ás Olimpíadas, non quixen perder a ocasión de viaxar ata aquí para vivilas en directo. Tiven moitísima sorte e atopei un billete a bo prezo nun avión moi especial: a comandante era unha vaquiña que seica naceu en Pino de Val, as azafatas eran unha gata e unha porquiña, e os "azafatos" eran un can e un rato. Non imaxinades que voo tan confortable!!! E Brasil é espectacular!!! Ademais de desfrutar das súas tradicións, da súa xente, da súa maneira de falar..., tamén asistín a varios dos acontecementos deportivos que alí se celebraron. Celebrei todas as medallas que conseguiu España, 17 en total, e retrateime con Carolina, Mireia, Ruth, Rafa e Pau. Escribo só os seus nomes porque xa os considero colegas meus, pero para os máis despistados, falo de Carolina Marín, Mireia Belmonte, Ruth Beitia, Rafa Nadal e Pau Gasol. 

E despois de tan fermosa experiencia, non quixen perder a ocasión de asistir tamén ás competicións Paralímpicas que están a celebrarse estes días. Ademais, despois da fermosa carta que nos escribiu Teresa Perales, apetecíame moito vela en acción. Xa vos contarei todos os detalles ao meu regreso!! Pero ata entón, quería mandarvos un saúdo moi forte e darlle a benvida ás rapaciñas de 3 anos e tamén ás novas mestras e mestres do cole. E, por suposto, tamén a todas as persoas que xa coñezo!!! Espero que teñades un fermoso comezo de curso e que veñades cheas de enerxía para aproveitalo ao máximo. Envíovos esta fermosa canción brasileira para que compartades no patio. A letra di, "o verde é maravilha"; este curso tamén pode ser unha marabilla!!! Comezamos xa!

FESTIVAL DE FIN DE CURSO-ACTUACIÓNS

Xa podedes ver as actuacións do noso festival de fin de curso. Intentamos que fora un bo peche das nosas "Olerpíadas", por iso soaron temas de Brasil, himnos, e houbo coreografías nas que se empregaban materiais propios das e dos mellores deportistas olímpicos.

Comezaron os nenos e nenas de Infantil, que elixiron unha canción brasileira para inaugurar o último festival do curso: "A janelinha":

1-Ajanelinha from bibliotecavictorsaenz on Vimeo.

Despois, tocoulles o turno a Iria, Miriam e Ainhoa, de 3º e 4º. Xuntas prepararon esta coreografía rítmica coa música "Alas":

2-Alas-Miriam, Ainhoa e Iria from bibliotecavictorsaenz on Vimeo.

A terceira actuación foi a de Álex Ínsua, de 6º, que interpretou a seguinte peza instrumental no teclado:

3-Don Juan-Álex Ínsua from bibliotecavictorsaenz on Vimeo.

Volveron subir os meniños e meniñas de Infantil con outro tema brasileiro: "Boi, boi". A diferenza do primeiro, este é un tema moito máis enérxico:

4-Boi, boi-Infantil from bibliotecavictorsaenz on Vimeo.

En 3º e 4º engadiron un ritmo con periódicos deportivos ao recoñecido "Campeóns":


4-Boi, boi-Infantil from bibliotecavictorsaenz on Vimeo.

Álex Ínsua tamén nos agasallou con esta "Jota de Pazos":


6-Jota de Pazos-Álex Ínsua from bibliotecavictorsaenz on Vimeo.

"O baile do cadrado" foi o tema elixido por 1º e 2º coa mestra Isa, que tamén bailou!


7-El baile del cuadrado-1º e 2º from bibliotecavictorsaenz on Vimeo.

Outro baile realizado por Andrea Labandeira, de 5º, con Paula, Soraya e Daniela, de 3º. Todo este esforzo para enviarnos unha fermosa mensaxe: "Be Happy".

8-Happy-Andrea, Paula, Soraya e Daniela from bibliotecavictorsaenz on Vimeo.

Despois foron as nenas e nenos de 6º quenes subiron ao escenario, para dicirnos a través do seu baile que "No hay dos sin tres":


9-No hay dos sin tres from bibliotecavictorsaenz on Vimeo.

A continuación volveron as ximnastas rítmicas máis espectaculares do cole: as nenas de 3º e 4º. Pablo non puido demostrarnos o seu talento nesta modalidade, xa que un accidente obrigouno a ter unha perna en repouso durante case todo o trimestre:

10-Canción Xogos Río 2016 from bibliotecavictorsaenz on Vimeo.

A seguinte actuación foi a de Nuria e Andrea, que interpretaron coas súas guitarras o tema "Greensleeves":

11-Greensleeves from bibliotecavictorsaenz on Vimeo.

A "Samba di Janeiro" soou nesta festa coa coreografía que prepararon en 3º e 4º:


12-Samba di Janeiro-3º e 4º from bibliotecavictorsaenz on Vimeo.

En 5º e 6º, en lugar de fixarse nos instrumentos das ximnastas rítmicas, elixiron os balóns para facer este ritmo:

13-Ritmo con pelotas from bibliotecavictorsaenz on Vimeo.

En 5º chegaron galopando, coa música da "Obertura de Guillermo Tell", de Rossini:


14-Obertura de Guillermo Tell from bibliotecavictorsaenz on Vimeo.

E, para rematar, o "Himno galego", que interpretaron en frautas 5º e 6º, e acompañaron cantando os grupos de 3º e 4º:

15-Himno galego from bibliotecavictorsaenz1 on Vimeo.

Despois fíxose a entrega dos diplomas por parte da ANPA, e tamén do alumnado que comezará a Educación Primaria o vindeiro curso, ademais de despedirnos das nenas e nenos de 6º e das mestras Ana, Isa, Patri e María. 

Esperamos que o pasárades moi ben e que en setembro nos vexamos cheas e cheos de ganas de iniciar un novo proxecto. Cal será???

BO VERÁN PARA TODAS E TODOS!!!!

Rosiña.