EXCURSIÓN A SANTIAGO DE COMPOSTELA

Esta semana comezamos viaxando... O noso destino: Santiago de Compostela, a capital de Galicia. Aínda que todo o cole compartimos o mesmo autobús, en Santiago dividímonos en dous grupos. Por un lado, as nenas e nenos de Primaria vimos as obras seleccionadas e premiadas no “Décimo Premio Auditorio de Galicia para novos artistas”: pintura, escultura, cerámica, vídeo, fotografía, encheron os nosos ollos e oídos de enerxía e bo facer. 

Despois de visitar a exposición, asistimos a unha sesión de curtametraxes de diversas nacionalidades na Sala Mozart do Auditorio. Baixo o título “Viaxe arredor do mundo”, as diferentes pezas audiovisuais amosáronnos realidades sociais e culturais de diferentes lugares do mundo. Turquía, Londres, Estados Unidos, Grecia e África foron algúns dos nosos destinos esta entretida mañá.

Premede AQUÍ para ver as fotos.

Mentras tanto, o grupo de Infantil visitamos a exposición “A Arte no Cómic”, na Sede Afundación. Centrada no cómic, nesta visita puidemos coñecer a historieta “Pikiblinder”, de Jacobo Fernández Serrano, inspirada en 26 obras emblemáticas de autores galegos como Francisco Leiro, Eugenio Granell, Maruja Mallo, Castelao, Laxeiro, Urbano Lugrís ou Julia Minguillón. E despois creamos a nosa propia composición, que quedou fermosísima e levamos para o cole, para que todas as persoas que queiran poidan ver o bos artistas que somos!!! 

 
 Rematada a visita ao museo, fixemos unha pequena parada na Oficina de Información e Turismo, onde nos amosaron en que consiste o seu traballo, e tamén nos agasallaron con materiais moi interesantes, relacionados coa cidade e co Camiño de Santiago. 

Premede AQUÍ para ver as fotos.

 

Despois destas interesantes visitas, fomos camiñando ata a Alameda, onde xantamos e xogamos durante un bo anaco, pasándoo de marabilla!!!

Premede AQUÍ para ver as fotos.

DÍA DA PAZ

Chega o 30 de xaneiro e, un ano máis, sumámonos á celebración do Día da Paz. Todos os días tratamos de repartir momentos de paz de maneiras moi diferentes: saudándonos, axudándonos, tratando de resolver os conflitos sen usar a violencia, practicando mindfulness, abrazándonos... En ocasións resultan momentos casi máxicos, e noutras require un maior control das nosas emocións, pero o importante é que todas as persoas pensemos que esta é a mellor maneira de camiñar. 

E xa que falamos de camiñar, deseñamos unha actividade relacionada co Camiño de Santiago, xa que será un dos proxectos que desenvolveremos ao longo do curso no cole. Para iso, eliximos as siluetas dos símbolos que máis rapidamente asociamos á paz, para marcar un camiño que faga recordar tamén á Vía Láctea, e que nos levará a un dos lugares preferidos do centro: a biblioteca!!!

Eu xa estiven vendo que recortarades moitas desas siluetas, que mañá colocaredes para que non deixen de brillar nunca... 

Mentras non chega ese momento, quería que virades tamén un par de vídeos que atopei para que reflexionedes e faledes sobre o que neles sucede.

O primeiro titúlase "Reach", e nel o director amosa o valor do altruísmo e a solidariedade. Toda boa acción acaba tendo a súa recompensa??? 

 

A outra curtametraxe leva por título "Swing of change". Ambientado no Nova York dos anos 30, despois da Gran Depresión (1929), a época na que se orixina o swing e na que existían grandes conflitos raciais. A curta conta a historia de Harry, un barbeiro racista que cambiará a súa actitude tras descubrir unha trompeta máxica.

 

 

CAMPO A TRAVÉS

Aínda que no centro non somos moitas persoas, tratamos de participar en todas aquelas actividades que nos parecen interesantes e que consideramos importantes na educación dos nosos rapaces e rapazas. Entre elas está fomentar a práctica de deporte. Xogar ao aire libre, correr, practicar algún deporte, etc., sempre é aconsellable, por iso o profe David vos anima curso tras curso a participar nas convocatorias de “Campo a Través”. Ademais, practicar deportes tamén pode ser un motivo polo que viaxar, non vos parece?

Este curso fostes bastantes os nenos e nenas que vos apuntastes. Para participar na "Fase Comarcal", o pasado 19 de xaneiro viaxaron ata A Baña Miguel, Brais Carreira, Samuel, Miriam, Pablo, Ainhoa, Jorge Otero, Nerea, Paula Barcia, Iria Blanco, Paula Maneiro, Martina, Aroa, Brais Capelo, Jorge Lema e Joel, que aí vedes na fotografía coa profe Manoli quen, xunto co profe David, acompañaron a este grupo de corredores e corredoras. 

Nesta primeira carreira logrou clasificarse Paula Maneiro Bergantiños, de 5º de Primaria. Para ver as imaxes e os vídeos, premede AQUÍ.

O venres seguinte celebrouse a "Fase Intercomarcal", en Noia, ata onde viaxaron Paula Maneiro e o profe David, que representaron ao noso centro nesta competición. Paula regresou sen medalla, pero para nós é unha CAMPIOA, estamos moi orgullosos de que chegaras ata aquí e desexamos que o vindeiro curso volvas ter a oportunidade de participar nesta carreira. E se vas acompañada de máis rapaces e rapazas, mellor!!!! Pero xa sabedes que para iso hai que facer deporte con frecuencia, entrenando e practicando é como se conseguen as cousas!!!!

Premendo AQUÍ podedes ver todas as imaxes.

PREPARANDO O ENTROIDO

Esta semana entrei na sala de profes e enriba da mesa atopei un sombreiro cargado de adornos que tiven que probar nada máis velo!!! Encantoume!!! Penso que vós aínda non tivestes a oportunidade de velo, pero xa a vindeira semana volo ensinarán as mestras e mestres do cole. Xa que este ano estamos traballando o tema do turismo e o patrimonio, así como participando no proxecto "Mirando polo Camiño", pensamos que era unha boa idea participar na recuperación dun dos Entroidos máis importantes do concello de Mazaricos. Trátase do Entroido de Arcos, do cal nos informamos a través de traballos de investigación de Suso Jurjo. Está formado principalmente por tres grupos: o exército dos panos, o coro dos vellos e o coro dos cegos. O exército dos panos era o grupo máis numeroso. Ían vestidos de branco, calzados con botas de cana alta e con varios panos nos ombros, cruzando o torso; nos pulsos prendían outros panos máis pequenos a modo de brazaletes. Levaban a cara descuberta e na cabeza un tocado moi vistoso, feito de cartón e adornado con plumas e pequenas xoias. Todos ían armados de espada.

Á fronte estaba o abandeirado, seguido polo xeneral, normalmente montado nun cabalo. Regardando ao xeneral, unha parella de gardas civís. Despois, o groso do exército. Primeiro desfilaban e seguidamente facían unha serie de movementos para rematar en rolda; algúns cantaban e tocaban a pandeireta, acompañando ao bailador e á bailadora.

Parece que a orixe destes desfiles militares está nas guerras napoleónicas de comezos do século XIX; hai que ter en conta que durante a Guerra da Independencia, Mazaricos enfrontouse aos franceses na Batalla de Ponteolveira.

A idea, pois, é disfrazarnos do exército dos panos. A proposta, que casualmente tamén fan dende o concello, levarase adiante nos tres centros do concello, que invita a participar o sábado de Entroido nun desfile en A Picota. Pero, antes diso, teremos que preparar os nosos traxes para o vindeiro 9 de febreiro!!!!

 

Aquí vos deixo algúns documentos para que aprendades moito máis sobre esta tradición que non debemos perder: 

-Para ver o vídeo "O Exército dos Panos volverá desfilar no Entroido de Mazaricos" preme AQUÍ.

-Para ver o vídeo "Mazaricos despide o Entroido co desfile do Exército dos Panos" preme AQUÍ.

-Para ver fotos e información sobre o Entroido de Arcos, preme AQUÍ.

-Para ler a noticia "Arcos recupera el viejo entroido", preme AQUÍ.

FELIZ 2018

Deste xeito iniciamos o trimestre e estrenamos ano. O calendario do 2018 está ilustrado coas imaxes de seis lugares moi representativos do noso contorno, sobre as cales colocamos aos rapaciños e rapaciñas do cole, para o cal contamos coa axuda dun gran fotógrafo profesional: Paco Rodríguez.

O resultado final xa colga en todas as aulas do cole, e imaxino que tamén nas vosas casiñas...