ENTRE LOBOS

Pois entre lobos estivemos o venres, 18 de marzo, durante toda a mañá. O Concello de Santa Comba organizou unhas "Xornadas Nacionais do Lobo", desenvolvendo diferentes actividades durante os días 18 e 19. Entre elas, a proxección da película "Entre lobos", baseada na vida de MARCOS RODRÍGUEZ PANTOJA, criado durante doce anos por unha manda de lobos, sen apenas contacto coa humanidade. O Concello convidounos a asistir á mesma, e decidimos que era unha boa idea ver esta película-documental, que contaba ademais coa presencia do propio Marcos, quen tivo ocasión de falar con nós, responder a algunhas das preguntas que lle fixemos as persoas asistentes (había varios centros educativos ademais do noso) e mesmo firmarnos dun xeito moi orixinal as entradas que nos entregaron no Edificio Multiusos de Santa Comba. Foi toda unha experiencia! Aquí podedes ver as fotos desa mañá, e se queredes coñecer máis sobre a vida do protagonista, premede sobre o seu nome ou sobre este enlace.

VISITAMOS UN MUSEO DE ARTE CONTEMPORÁNEA

Esta semana fomos de viaxe. Cantas ganiñas tiñamos!!! Nesta ocasión, o noso destino foi A Coruña, onde visitamos o Museo de Arte Contemporánea Gas Natural Fenosa, que se atopa á entrada da cidade. Pasamos alí case todo o día e aínda botariamos máis tempo, porque o pasamos moi ben e aprendemos un montón de cousas!!! Non fomos todo o cole, pero case: todas as persoas que quixeron e puideron desde os 5 anos ata 6º de Primaria, xunto coas nosas mestras e mestres, vivimos unha fermosa experiencia nun lugar que mereceu moito a pena.

Fixemos dous grupos: un desde 5 anos ata 3º de Primaria e outro desde 4º a 6º. O primeiro visitamos a exposición "Os rostros do naufraxio", baseada nos retratos. A través dalgunhas das obras da exposición, puidemos observar diferentes técnicas de captura e reprodución de imaxes en movemento. Tamén vimos un vídeo no que saía FÉLIX FERNÁNDEZ!!! Si, o mesmiño que nos visitou no cole no primeiro trimestre!!! Non puido estar con nós no Museo porque é un artista tan solicitado que non para, e nós contentísimas/os de que lle vaia tan ben! 

Pola tarde, despois de comer a comida tan rica que nos prepararan nas nosas casiñas, fixemos un obradoiro case máxico. Consistía en construír o dedo da nosa guía coma se fora real!!! E conseguímolo!!!

O grupo de 4º a 6º visitamos a exposición "Narrativas monumentales", fixándonos sobre todo en tres esculturas creadas con materiais ben pesados: o aceiro, a madeira e o granito. Sorprendéronnos moito e descubrimos tamén algúns trucos para que esas obras se mantiveran en equilibrio de xeitos ben diferentes aos que estamos acostumados a observar nos edificios que nos rodean. 

Pola tarde tamén visitamos a exposición baseada na figura humana "Os rostros do naufraxio", e rematamos cun obradoiro moi entretido: por equipos, tiñamos que continuar unha historia que comezaba igual para todos os grupos. Despois de redactala, había que decidir que papel iba realizar cada unha das persoas do equipo, aportando todas elas unha parte do seu corpo: unha persoa que xesticulase (rostro), outra que se movese (corpo) e unha máis que falase (voz). Todo para realizar un truco escénico que nos encantou: mentras o locutor narraba a historia, unha cámara gravaba os primeiros planos do rostro doutra das persoas do grupo, e a gravación víase nunha pantalla que se encaixaba na cabeza doutra das persoas. 

Pero, coma en moitas outras ocasións, a través das fotografías podemos ver moito do que nos aportou esta visita, que non foi pouco. Encantadísimas/os todas/os nós coas persoas que nos recibiron no MAC para ensinarnos tantas e tan interesantes cousas. Moitísimas grazas a todas!!!

DÍA INTERNACIONAL DA MULLER TRABALLADORA

Manuel María, o escritor ao que se lle adicará o vindeiro 17 de maio o Día das Letras Galegas, publicou no ano 1970 un libro chamado "Remol". Entre as súas páxinas podemos atopar un poema ben fermoso adicado ás mulleres galegas que non aparecen nas enciclopedias, nos libros, nos informativos, etc. E, cando aparecen, adoita ser por motivos que nos fan sentir pouco orgullosos e orgullosas da sociedade na que vivimos. Con este poema, Manuel María rende homenaxe a esas mulleres que temos preto, que vemos día tras día, que traballan arreo para sacarnos adiante, para manter a familia unida, para escoitarnos, para abrazarnos, para querernos... As compañeiras, as amigas, as veciñas, as irmás, as tías, as avoas, as nais... Ben se merecen esta e outras moitas maneiras de homenaxe, non credes? Pois a partir de hoxe, non vos paredes e, da maneira na que prefirades, escribídelle á muller que vós queirades uns versos, unha carta, unha postal... Agradecédello todos os días, pero se queredes aproveitar esta celebración, facede algo especial para entregarllo en persoa!!! 

Aquí podedes ler o poema do escritor da Terra Chá MANUEL MARÍA:

As mulleres galegas -labregas,

mariñeiras, artesás, obreiras,

pasado, pobo, presente,

alma e futuro de Galicia-

non foron cantadas

polos poetas cultos e premiados,

pechados nas súas torres de almasí:

eles, tan sensibles, non podían

adicarlles rondós e madrigales,

sonetos perfetísimos

a donas que falan en galego,

que son a forza do pobo,

porque non teñen xeitos requintados,

deprendidos en colexos elegantes,

nin vestidos fermosos,

nin frases retorneadas

-nunca foron á escola,

nin alternaron tampouco en sociedade-

i as súas maus non se semellan

ás azas dos paxaros,

nin teñen soavidades de veludo:

están encallecidas polo traballo,

son duras como as pedras,

só tenras pro garimo, 

con soavidades de mel

pra perdoar e comprender,

pra sementar tenrura e máis amor,

pra arrincar odios.

Tamén o mundo do deporte e o olimpíaco tivo marxinada á muller durante moitísimos anos, e mesmo na actualidade atopamos moitas disciplinas nas que apenas participa. Con motivo da celebración do Día Internacional da Muller, a páxina MARCA BUZZ publicou un artigo homenaxeando a 10 das mulleres máis importantes do deporte hoxe en día. Queres saber cales son? Preme enriba das letras vermellas e accederás ao documento.

Mentras tanto, no cole elaboramos unhas bandeiras olímpicas moi especiais, nas que cada grupo se centrou en cinco mulleres deportistas, especiais por moitas razóns que vos amosamos nas seguintes imaxes:

DÍA DE ROSALÍA

Esta mañá festexamos o DÍA DE ROSALÍA, desenvolvendo unha das propostas da Asociación de Escritoras e Escritores en Lingua Galega (AELG), colectivo que vén demandando dende hai varios anos incluír esta data nas celebracións dos centros escolares.
Dende o CEIP Víctor Sáenz sentimos que é esta unha data a ter moi en conta no calendario escolar, pois foi ROSALÍA a primeira en dar o paso na defensa da lingua galega coa súa obra "Cantares Gallegos". 

E nós, orgullosos do noso idioma, da nosa cultura, dos nosos artistas, participamos na elaboración dunha postal moi especial, deseñada pola a AELG para este 24 de febreiro de 2016. Por unha parte, aprendemos un poema moi fermoso de Rosalía, que ilustramos libremente cada unha/un de nós. E, pola outra, escribimos a nosa dirección, colocámoslle un selo rosaliano e engadimos algunha ilustración máis relacionada con Rosalía, cos libros ou coas flores, xa que o lema incluído na postal é "Agasalla un libro en galego e unha flor". E quedaron verdadeiramente fermosas!!! Queredes velas?

DESPEDIDA DO ENTROIDO

Nada máis regresamos das vacacións do Entroido, aproveitamos a primeira (e case única) raiola de sol para queimar o Meco. Con esta actividade remata esta festa tan arraigada na nosa cultura. Aquí vos deixamos as fotos desta mañá:

ENTROIDO 2016

Este ano case non nos deu tempo a repousar entre as festas do Nadal e as do Entroido! Seica ten algo de culpa nisto a lúa chea... O caso é que alá vai tamén o noso Entroido, centrado este ano nas Olimpíadas. Durante toda a semana o Meco foi deixando os seus mandadiños, moi deportivos nesta ocasión.

E o venres chegou o momento de lucir as nosas prendas máis deportivas!!! 

Quedou moi xeitoso e colorido: en Infantil convertéronse en campos de fútbol; en 1º e 2º elixiron un dos símbolos máis representativos das Olimpíadas: a antorcha, e verdadeiramente parecían estar prendidas!!!; 3º e 4º fixeron unha viaxe por todo o mundo converténdose nas nosas abandeiradas e no noso abandeirado máis especiais; 5º e 6º invitaron para a un bo grupo de deportistas de diferentes disciplinas que non dubidaron en sumarse ao Entroido do noso cole. E os mestres e mestras? Pois tamén foi variado: o mellor entrenador persoal do mundo, un xogador de baloncesto que mete triples sen querer, e un feixiño de mascotas olímpicas que encheron de cores e sorrisos o noso patio. E coma sempre, houbo nais que se animaron a acompañarnos vestidas para a ocasión, algo que nos alegra moito a todos e todas, porque o sentido do humor axuda a facer moito máis levadeiros os momentos menos alegres. E ademais, puidemos probar as primeiras filloas, orellas e rosquillas deste Entroido, ademais dalgún biscoito espectacular. Moitas grazas a todas as persoas que axudaron a facer posible a celebración dunha das festas máis tradicionais de Galicia. E o dito: a rirse todo o mundo e a desfrutar do Entroido!!!

DÍA DA PAZ 2016

Son moi variados os actos que se realizan en moitos colexios públicos para celebrar o Día da Paz, que conmemora a morte de Mahatma GANDHI en 1948. 

Tamén no CEIP Víctor Sáenz quixemos propoñer unha idea nova, relacionándoa co proxecto que estamos desenvolvendo sobre as Olimpíadas. Para comezar, pensamos que é imprescindible para un clima de paz coñecernos a nós mesmos, controlar as nosas emocións, saber expresar cales son os nosos sentimentos... Así foi como fixemos un traballo conxunto durante a mañá partindo do filme "Inside Out".  Tamén elaborarmos en grupos bandeiras olímpicas que se diferenciaban soamente no símbolo empregado (mans, pombas, etc.); o resto, era o propio da bandeira olímpica: as formas dos aros, as súas cores, o fondo branco... Expuxémolas no corredor do cole e quedaron moi, moi bonitas!! Tamén lemos un "Manifesto pola paz" que redactamos en 5º e 6º coa axuda da teacher Marina, coa que aprendemos a dicir a palabra PAZ en 15 IDIOMAS DIFERENTES!!!

E despois baixamos ao patio para bailar!!! Nesta ocasión quixemos aproveitar esta celebración para analizar a situación que están a vivir en Siria, así que nas clases de música viaxamos a través dos mapas a este país no que se cruzan tres continentes: África, Asia e Europa. E nesta rexión quedamos durante varios días para aprender unha danza dun país veciño a Siria: ISRAEL. O seu título: "Hora Chadera". Aquí podedes ler un pouquiño máis sobre isto:

E aquí podedes ver as fotos que sacamos nun día tan fermoso, no que rematamos... ABRAZÁNDONOS!!!

O NOSO FESTIVAL DE NADAL

Xa temos aquí as nosas actuacións do festival de Nadal, moi relacionado nesta ocasión cos deportes. O "pistoletazo" de saída dérono os rapaces e rapazas de 5º e 6º, recitando un poema de Xosé Neira Vilas que fala do outono, estación que, xunto co trimestre, despedimos o pasado mes de decembro.

Introdución-Poema de Xosé Neira Vilas from bibliotecavictorsaenz on Vimeo.

Os meniños e meniñas de Infantil, fixeron un baile olímpico co que animaron a todas as persoas asistentes a facer os xestos dalgúns deportes moi coñecidos:

Ed. Infantil - Baile Olímpico from bibliotecavictorsaenz on Vimeo.

Chegou despois o turno da nosa primeira solista: Nuria Esperante Maneiro, á guitarra.

3-Nuria á guitarra from bibliotecavictorsaenz on Vimeo.

A seguinte actuación subiu ao escenario en bicicleta, cos rapaciños e rapaciñas de 3º e 4º.

4-3º e 4º - A bicicleta from bibliotecavictorsaenz on Vimeo.

Non podían faltar as tradicionais panxoliñas... Álex Ínsua interpretou para todos nós, ao piano, a coñecidísima "Noite de paz".

5-Álex Ínsua - Noite de paz from bibliotecavictorsaenz on Vimeo.

E despois de Álex, moitísima marcha con esta coreografía de 1º e 2º:

6-1º e 2º - Eye of the tiger from bibliotecavictorsaenz on Vimeo.

Despois de 1º e 2º, Andrea Labandeira demostrou no escenario que é unha guitarrista marabillosa!

7-Andrea Labandeira á guitarra from bibliotecavictorsaenz on Vimeo.

A seguinte actuación foi para as nadadoras e o nadador nº 1 de 3º e 4º!!!

8-3º e 4º - Vida from bibliotecavictorsaenz on Vimeo.

A música tradicional tamén foi incluída neste programa de Nadal. Os encargados de facela soar nesta ocasión foron Álex Ínsua e Fran Amigo, de 6º, que cantaron acompañados das súas pandeiretas.

9-Álex Ínsua e Fran á pandeireta from bibliotecavictorsaenz on Vimeo.

A seguinte actuación, de 3º e 4º, achegounos á "Obertura" dunha das óperas máis famosas: "Carmen", de George BIZET. Esta música formou parte de moitísimas películas, campañas publicitarias... E seguro que tamén acompañou coreografías deportivas!

10-3º e 4º - Carmen from bibliotecavictorsaenz on Vimeo.

A última actuación solista foi a de Miguel Romero, de 5º, que se animou a interpretar un blues á guitarra.

11-Miguel Romero á guitarra from bibliotecavictorsaenz on Vimeo.

As actuacións do festival remataron con "Carros de lume" e "We are one", interpretadas polos grupos de 5º e 6º.

12-5º e 6º - Carros de lume from bibliotecavictorsaenz1 on Vimeo.

13-5º e 6º - We are one from bibliotecavictorsaenz1 on Vimeo.

E rematou o festival coa visita dos Reis Magos, que nos sorprenderon cuns agasallos de campionato. Na seguinte presentación de fotografías podedes ver algunhas das imaxes destes inesquecibles momentos:

NOVO GOOGLE SITES "OLÍMPICO"

Se premedes aquí, poderedes acceder á páxina que imos elaborando desde a Biblioteca para aprender moitas cousas sobre os Xogos Olímpicos. Tamén podedes acceder na barra lateral dereita do blogue, premendo sobre a imaxe do cartel das "Olerpíadas 2015-2016". 

CALENDARIO 2016

Pois xa está aquí o calendario do ano 2016. Nesta ocasión tocou centrarse en temas relacionados cos Xogos Olímpicos, e para iso eliximos estas 12 ilustracións que acompañarán os próximos 366 días deste ano recén estreado.