NACE "O PAPAGAIO", UN XORNAL MENSUAL

Sempre é unha alegría recibir noticias deste tipo, pero se ademais son en galego moito mellor!!! "O Papagaio" é un xornal mensual de oito páxinas a toda cor, dirixido a nenos e nenas de Primaria e Secundaria, no que se tratarán temas de actualidade nas diferentes seccións nas que se divide: Actualidade, Banda Deseñada, Ecoloxía, Ciencia e Tecnoloxía, Histoira e Cultura, Natureza, Integración e Seccións Abertas. 

Aínda que non comezará a publicarse ata o próximo curso, xa editaron de balde o número 0, para que poidades ir desfrutando da lectura desta nova publicación á que, dende o noso blogue, queremos desexarlle moitísima sorte!!! Se premes sobre a imaxe poderás ler o primeiro número:

GÓMEZ NOYA GALARDOADO CO PRINCESA DE ASTURIAS

Nun curso no que os deportes olímpicos estiveron moi presentes nas nosas aulas, hai que destacar a figura do triatleta galego Javier Gómez Noya. Onte foille concedido o "Premio Princesa de Asturias do Deporte", galardón que tamén recibiron en anteriores edicións Rafa Nadal, Pau e Marc Gasol ou Fernando Alonso. Gómez Noya é un dos mellores deportistas do noso país, e mostra disto son a cantidade de premios que conseguiu ata agora: cinco títulos mundiais, catro campionatos de Europa e unha medalla de prata nos Xogos Olímpicos de Londres 2012. Non sabemos aínda o que sucederá en Río, pero mentras tanto, Gómez Noya segue os seus entrenamentos con moito rigor: cada semana fai unha media de 30 quilómetros de natación, 400 de bici e ao redor de 110 correndo. Que vos parece? A todo isto hai que sumar as horas de ximnasio, estiramentos, fortalecementos, etc. Javier Gómez Noya disputou o seu primeiro tríatlon con 15 anos, así que aínda estades a tempo de animarvos vós tamén!!!

ILUSTRAMOS POEMAS DE MANUEL MARÍA

Durante a semana das Letras Galegas, dende a Biblioteca recibistes a invitación a participar nun libro especial, no que todas as persoas que quixeran participar tiñan que elixir un poema de Manuel María, ilustralo e recitalo. A primeira parte está rematada, así que xa podedes ver o fermoso que quedou este libriño feito con moito cariño por parte das rapaciñas e rapaciños de 3º, 4º, 5º e 6º. Agora andan preparando o recitado dos mesmos, para gravalos e que o traballo quede rematado para poder incluílo dentro dos fondos da nosa biblioteca. NORABOA, nenas e nenos, polo voso traballo extra e por facelo tan ben.

OS NOSOS PROXECTOS OLÍMPICOS XA ESTÁN AQUÍ!!!

Pois xa podemos ir vendo parte do resultado dos Proxectos Documentais que este curso elaboramos no cole. O tema, as Olimpíadas! E aquí tedes o que fixeron na clase de Pedagoxía Terapéutica coa mestra María: un estupendo traballo sobre a deportista Teresa Perales, unha gran loitadora!!! Sabedes que dicía esta nadadora paralímpica? "O único imposible é aquelo que non intentas". Así que tomade nota!!! O traballo feito por Andrea Carballo, Iria López, Álex Otero, Yanira París e Alejandro Villar titúlase "Eu tamén quero ser olímpica" e quedoulles así de fermoso:

Tamén en Educación Infantil traballaron moito durante o curso o tema dos deportes olímpicos, e fixeron un traballo moi completo que titularon "Río 2016". Aínda que se centraron no atletismo, neste proxecto tamén poderedes atopar moitas cousas máis: actividades plásticas, vocabulario sobre deportes, os seus traballos para algunhas das datas que celebramos no cole, etc. Desfrutádeo!!!

En 1º e 2º de Primaria, coa axuda da profe Isa, afondaron nesas figuras que tanto nos gustan dos Xogos Olímpicos: as mascotas! E no seu traballo fálannos das que representaron os Xogos dende que se celebraron en España (Barcelona '92) ata os que se celebrarán este ano, por primeira vez nun país latinoamericano: Brasil (Río 2016). A través deste proxecto coñecerás moito máis sobre cada unha destas mascotas: que tipo de personaxe é, quen a creou, que representa... Aquí tedes as "Mascotas olímpicas dende Barcelona '92 ata Río '16":

En 3º e 4º de Primaria emocionáronse coa auga e non saíron dela! O seu proxecto, titulado "Natación", está centrado neste deporte acuático que moitas e moitos de vós practican na piscina de Santa Comba e, no verán, tamén na praia. Aquí está todo o que aprenderon coa mestra Patricia:

En 5º e 6º de Primaria centráronse nas e nos deportistas das que foron disfrazadas no Entroido, estudando a súa biografía, e tamén investigaron un pouquiño de que iba cada un dos deportes aos que se adicaban. E o seu proxecto, "Deportistas e deportes olímpicos" quedou así:

POEMAS PARA AS LETRAS GALEGAS

Rosiña alegrouse tanto da vosa participación no "Concurso das Letras Galegas", que decidiu xuntar todos os poemas que non foron premiados para que poidades velos e lelos. Quere felicitar a todas as persoas que se animaron a escribir poesía, e está convencida de que o voso esforzo merece ser recoñecido, así que unha merecida NORABOA para todas e todos!!!

Ademais do poema premiado, en 1º e 2º presentaron estas fermosas poesías:

En 3º e 4º non se quedaron atrás, e presentaron os seguintes poemas:

En 5º, aínda que son pouquiñas/os, tamén presentaron entusiasmadas/os as súas creacións:

En 6º tardaron algo máis, pero finalmente tamén fixeron a súa aportación a este Concurso poético:

TEATRO EN INGLÉS

Esta semana regresamos ao Centro Cultural de A Picota para asistir a dúas funcións da compañía de teatro "Face 2 Face", que fai espectáculos en inglés para escolares.

O primeiro pase estivo dirixido a rapaciñas e rapaciños de Educación Infantil, 1º e 2º de Primaria, que desfrutamos moitísimo cunha obra na que a protagonista era unha abella moi, moi ocupada. E en que estaba tan ocupada "Busy Bee"? Pois en facer mel para a raíña. Invitounos a entrar no seu xardín e desfrutar coas súas aventuras, ao tempo que cantamos, bailamos e mesmo aprendemos algunhas palabras máxicas. 

Se queredes coñecer máis detalles da obra, preguntádelle a Xoel, Guille e Paula, porque eles estiveron enriba do escenario coa abelliña protagonista, e seguro que vos contan moitas máis cousas!!!

O segundo pase foi para o alumnado de 3º, 4º, 5º e 6º. Neste caso, a obra, "The Time Machine", transportounos a un período da historia moi lonxano da man de Jane e a súa mascota, un dinosaurio chamado Dino. Esta muller das cavernas descubriu accidentalmente unha máquina do tempo que a leva ao século XXI. Mais Jane non está preparada para a vida moderna dunha grande cidade. 

Tamén nesta segunda representación puidemos participar das aventuras da protagonista subidos ao escenario: Diego convertiuse nun dinosaurio excepcional, ao que todas e todos aplaudimos entusiasmadas/os.

Para as persoas que non puideron ver estes espectáculos, aquí tedes as fotos:

CELEBRAMOS O DÍA DAS LETRAS GALEGAS E OS MAIOS

Aínda que uns días despois do 17, celebramos o Día das Letras Galegas unido á festa dos Maios. Tivemos un día moi fermoso no que puidemos construír o maio con todas as flores, herbas e ramiñas que achegastes ao cole. Entre todas as persoas que nos reunimos no patio do cole logramos que quedara moi fermoso e que fora o decorado ideal para cantar e entregar os premios do Concurso de Poesía e Ilustración que convocamos nesta ocasión. Primeiro cantamos "O Maio de As Nogais", que xa sabemos tan ben! Despois, Nuria, Claudia, Sheila, Adrián e Andrea recitáronnos un poema de Manuel María titulado "A muiñeira" e a continuación bailamos a "Historia da muiñeira", con música de Pirilampo. Animouse todo o mundo e foi estupendo ver que da roda formaban parte todas as persoas que estaban no patio, excepto o noso querido Pablo, que ten que andar coa perna estirada durante unha temporada, e o profe David, que se encargou de facer as fotos. Tamén faltaron algunhas meniñas e meniños e algúns mestres e mestras... Botámolos de menos, pero adicámoslles o baile con moito cariño. A continuación podedes ver as fotos desta tardiña:

E, para rematar, entregamos os premios ás gañadoras e gañadores do Concurso das Letras Galegas. Nesta ocasión, os premiados foron:

-a aula de Educación Infantil, pola súa ilustración sobre o poema "O caracol", de Manuel María;

-Iria López Carreira, que levou o Premio especial do xurado polo seu poema "Gústame nadar";

-Jorge Lema Zamora gañou o Premio de 1º e 2º de Primaria co poema "O mariñeiro Manolo";

-Ainhoa Cal Currais escribiu a poesía "Casiña, casiña" e levou o Premio de 3º e 4º;

-Rubén Blanco Pereira atreveuse a resumir a vida de "Manuel María" nun poema, e levou o Premio de 5º e 6º.

Ademais de recoller o premio da man das súas titoras, todos leron as súas marabillosas creacións, e podemos asegurar que no noso cole a poesía ten futuro!!! Non a abandonedes, rapaciñas e rapaciños, estade atentas e atentos a ela, porque a poesía está en todas partes. O acto desta tarde, sen ir máis lonxe, foi moi poético!!!

MAXIA E HUMOR NA CASA DA CULTURA DE A PICOTA

O Concello ofertou dous espectáculos máxicos durante as últimas semanas. E aló fomos!!!

A primeira cita foi o 29 de abril, onde o MAGO CHARLANGAS presentou para todas e todos nós o seu novo espectáculo "Temporal", no que a maxia e o teatro se mesturaron creando unha historia na que navegamos pola nosa imaxinación. Coñecemos a un científico chiflado e os seus incribles experimentos, viaxando co Pirata Barbanegra en busca de tesouros máxicos.

A segunda cita, o 6 de maio, cando os grupos de Infantil e 1º e 2º de Primaria, xunto coas nosas mestras, desfrutamos moitísimo da actuación do PALLASO POPÍN PALOMERO. O pallaso Popín é un personaxe creado polo actor Adolfo Maguna, que leva máis de 30 anos adicado ao mundo da imaxinación e a actuación, facendo rir a todos os asistentes aos seus espectáculos polas súas ocurrencias e as súas improvisacións.

A CHAMA OLÍMPICA CHEGA A BRASIL

Pois si, rapaciñas e rapaciños, despois de catro días en Lausana (sede do Comité Olímpico Internacional) a chama olímpica xa aterrizou en Brasilia, a capital do país que este ano acollerá os Xogos. Carlos Nuzman, o xefe do comité organizador dos Xogos Olímpicos, descendeu dun avión no que se lía "Sueño olímpico a bordo" e, xunto a el, portaba a chama nunha lanterna. 

A primeira relevista do facho será unha xoven refuxiada siria de 12 anos, Hanan Dacka, quen fuxiu coa súa familia da súa cidade natal hai case catro anos. A partir de aí, o facho percorrerá 20.000 quilómetros, pasando por 328 cidades, ata Río de Janeiro, da man de 143 persoas, entre as cales haberá moitas e moitos deportistas.

Se premedes aquí podedes ver o momento no que a presidenta de Brasil, Dilma Rousseff, recibe a chama.
Tamén vos deixamos algunhas das imaxes do facho en Lausana:

COMEZA O MES DAS LETRAS GALEGAS

Xa está aquí maio!!! O mes das flores, da primavera, de moitas sementeiras, dos maios... E tamén é o mes no que en Galicia celebramos o Día das Letras Galegas. Nesta ocasión, o 17 de maio está adicado a un poeta moi querido: MANUEL MARÍA. E para que vaiades coñecendo máis profundamente a súa vida e obra (aínda que xa leva presente todo o curso entre nós), elaboramos unha páxina que recolle moitas das ligazóns que se foron elaborando ao longo do curso, para que poidades coñecer, coa axuda das vosas mestras, moitísimas cousas deste poeta que sempre tivo moi presente ás nenas e aos nenos da Galicia rural, onde conviven coa natureza coma o facedes todas e todos vós. Así que seguro que vos sentiredes moi identificados lendo os seus versos. Acordádevos de Manuel de Paderna: LEDE, LEDE e LEDE!!!! Premede sobre a imaxe e desfrutade!!!