EXCURSIÓN A SANTIAGO DE COMPOSTELA

Hoxe pasamos o día en Santiago de Compostela. Fomos todo o cole, pero o alumnado de Infantil e 1º e 2º de primaria viaxaron nun autobús e visitaron o Centro Galego de Arte Contemporánea (CGAC). Ademais de coñecer a exposición da man das monitoras Rebeca e Susana, tiveron tamén a oportunidade de realizar un obradoiro no que demostraron que a parte creativa dáselles verdadeiramente ben!!! Sorprendeume moito en que foron capaces de convertir un simple prato de cartón!!! Despois foron paseando polas rúas de Compostela ata a Alameda, onde xantaron na compañía do resto do cole.

A xornada foi ben bonita e para iso só hai que preguntarlles a elas e eles, e ver as fotos que fixeron, onde podemos comprobar que non perderon ningún detalle:

As Marías alegráronse moito de recibir a visita de Infantil, 1º e 2º.

Pola súa parte, 3º, 4º, 5º e 6º de primaria estiveron no CESGA, o Centro de Supercomputación de Galicia, no que Fernando e Mª José lles explicaron a función deste edificio situado no Campus da Universidade de Santiago, importantísimo para as persoas que se adican á investigación na nosa comunidade, grazas aos servizos que ofrece, entre os que destaca o almacenamento masivo de datos ou a posibilidade de acceso desde calquera ordenador conectado á rede Internet.

Mª José e Fernando despois de amosar as instalacións do CESGA.

E, por último, visitaron o Parlamento de Galicia, onde foron convidados a participar nun pleno dentro da Campaña Mundial pola Educación. Para iso, as ONG Ayuda en Acción e Educo propuxéronnos escribir un texto describindo o cole, explicar cales eran as melloras necesarias para que o centro fora inclusivo e plantexar algunhas preguntas para facer ás autoridades. Neste proceso guiounos Laura, a representante de Educo que visitou o noso centro. No Parlamento representáronnos Soraya e Guille, que o fixeron de marabilla e mesmo chegaron a emocionarnos co seu discurso e o ben que falaron nun ambiente tan novidoso para todos/as nós. Premendo na imaxe podedes ver tamén as fotos que fixeron (algunhas das cales nos enviou Laura), así coma o vídeo no que falan Soraya e Guille.

Soraya e Guille ocupando os sillóns do Parlamento.

Tamén podedes ver o vídeo completo deste acto premendo aquí.

A experiencia foi moi gratificante para todo o grupo, e desde aquí queremos agradecer a todas as persoas que o fixeron posible, en especial ás mencionadas ONG pola súa implicación connosco: Jenni e Laura.

E tamén ás que nos acompañaron nas actividades sinaladas anteriormente a esta: as monitoras do CGAC -Rebeca e Susana- e a Mª José e Fernando -do CESGA-, que con tanta atención nos recibiron. 

Unha aperta,

Rosiña

CELEBRAMOS OS DEREITOS

Un curso máis, no cole celebramos o "Día dos Dereitos da Infancia" e o "Día dos Dereitos Humanos", datas que adoitamos agrupar nunha actividade que aproveitamos tamén para decorar a árbore de Nadal. Este ano, debido ás circunstancias, e como vimos facendo desde setembro, participamos nestes actos conmemorativos co grupo no que estamos escolarizados, e despois facemos unha montaxe audiovisual para poder vernos todas as participantes. 

Para esta celebración, propuxemos facer oviños de aves, e decoralos libremente para colgar, xunto a un desexo, na nosa árbore, que cada neno e cada nena lía para a gravación. O resultado é o que podedes ver a continuación; espero que vos guste moito e que se vexan cumpridos tantos bos desexos!!! 

Unha aperta,

 

DÍA DOS DEREITOS

Hoxe celébrase o "Día dos Dereitos Humanos". Este ano, debido á situación provocada pola pandemia da covid-19, moitas das propostas de diferentes colectivos están dirixidas á necesidade de reconstruír para mellorar. Isto só é posible se somos capaces de crear igualdade de oportunidades para todas, abordar os problemas da pandemia e aplicar as normas de dereitos humanos para facer fronte ás desigualdades, á exclusión e á discriminación. 

En novembro falamos dos "Dereitos da Infancia"; o 3 de decembro do "Día Internacional das Persoas con Discapacidade", e hoxe dos "Dereitos Humanos". Convídovos a ver os vídeos que realizaron en 3º e 4º sobre Malala e Ana Frank, que podedes atopar no blog ou premendo sobre os seus nomes. Tamén podedes ver esta curtametraxe sobre Ian, quen nos transmite que no camiño cara a inclusión non hai tempo que perder. Aquí a tedes:

 

 

DÍA MUNDIAL DA INFANCIA

O 20 de novembro celébrase o "Día Mundial da Infancia", que cada ano lembra a firma da Convención sobre os Dereitos do Neno e da Nena, aprobada no ano 1989. Nela recóllense os 54 artículos que recollen os dereitos económicos, sociais, culturais, civís e políticos que os gobernos deben cumprir. Tamén define as obrigas e responsabilidades das nais e pais, do profesorado, das profesionais da saúde, das persoas adicadas á investigación e as dos propios nenos e nenas.

A Convención sobre os Dereitos do Neno e da Nena converteuse en lei en 1990, sendo firmada e aceptada por 20 países, entre eles España. Hoxe todos os países do mundo a aceptan, excepto Estados Unidos.

Sei que no cole estades traballando este tema durante estes días, e estarei encantada de ver as actividades que ides realizando relacionadas con el. A primeira é un traballiño fantástico que fixeron na aula de 3º e 4º de Primaria, onde estiveron coñecendo a Malala Yousafzai. Malala recibiu o Premio Nobel da Paz no ano 2014, sendo a persoa máis nova que acada ese galardón. Pero as rapaciñas e rapaciños de 3º e 4º cóntannolo moito mellor no seguinte vídeo:

EN HORA BOA POLO VOSO TRABALLO!!!

CELEBRAMOS O DÍA DOS DEREITOS

A árbore de Nadal chea de paxariños.

Hoxe, 10 de decembro, celebramos o "Día dos Dereitos" no cole. Para iso xuntámonos no corredor do cole, onde o alumnado de 5º e 6º preparou un pequeno texto informativo sobre a súa orixe e o que significa para todas e todos eles. Despois colgamos os nosos paxariños cheos de bos desexos para celebrar o Nadal. Nas súas siluetas había frases moi fermosas que facían referencia á igualdade, ao respecto, á liberdade, á paz... Cada persoa colgou o seu paxariño e leu o que nel incluía, enchendo a árbore non só de bonitas figuras e cores, senón tamén de palabras que debemos ter presentes en todo momento, xa que fan referencia ás cousas máis importantes da vida.

Para rematar o acto, escoitamos o podcast realizado en 3º e 4º sobre Ana Frank, coñecendo así a dura historia desta nena. 

Aquí vos deixo as fotos que fixemos esta mañá (premede sobre a imaxe para velas todas).

DÍA UNIVERSAL DA INFANCIA EN RADIO ROSIÑA

As nenas e nenos de 3º e 4º prepararon un traballo estupendo para celebrar o "Día Universal da Infancia", que queren achegar a todas as visitantes do noso blog. Para iso informáronse sobre Ana Frank, unha nena alemá de ascendencia xudía cuxa vida se coñece a nivel mundial polo libro "Diario de Ana Frank". Pero é mellor que vexades o vídeo que gravaron as nenas e nenos de 3º e 4º, porque o fan moito mellor ca min. Aquí volo deixo:

No seguinte enlace podedes acceder ao podcast que gravaron para Radio Rosiña:

NORABOA, RAPACIÑAS E RAPACIÑOS!!!!

CELEBRACIÓN DO DÍA DA PAZ

"Pegamentox", o virus de Infantil

Mañá ben fermosa a deste 30 de xaneiro, na que nos reunimos no corredor do cole para celebrar o "Día da Paz". Certo é que de sobra sabemos que este non é un tema que tratemos de atender soamente cada 30 de xaneiro, xa que cada un dos días que vivimos ha de estar marcado por situacións pacíficas: escoitarnos, axudarnos, respectarnos, abrazarnos, querernos... Sen embargo, nunca está de máis recordar a persoas que loitaron (e seguen loitando) para que os problemas que poidan xurdir non se solucionen mediante guerras, loitas e outras formas de violencia. Hoxe falamos de Mahatma GANDHI, pero tamén soaron nomes doutros grandes pacifistas mundiais: Martin Luther King, Teresa de Calcuta, Nelson Mandela; así como de artistas que fixeron da música, da pintura ou da literatura auténticos manifestos pola paz: John Lennon, Pablo Picasso ou Eduardo Galeano, entre moitas outras persoas.

E vós, nas diferentes aulas, deseñastes un Violentovirus moi malvado, pero como este curso sodes as mellores científicas do universo, conseguistes dar coa vacina para atacalo: a Vacina do Bo Trato. Despois de escoitar as vosas propostas, non me cabe ningunha dúbida de que funcionará!!!

Ademais diso, celebramos a "Carreira Save the Children", para a cal o grupo de 6º preparou unha presentación sobre Zaatari, o campo de refuxiados para o cal vai destinada a recadación de "Quilómetros de solidaridade" nesta XV edición.

E rematamos cantando e bailando, coas "Apertas que voan" de Paco Nogueiras. E démonos un feixe de abrazos, porque nos encanta!!!

Queredes ver as fotos? Premede na imaxe ou AQUÍ.

Tamén podedes ler a presentación que fixeron en 6º no seguinte enlace:

DÍA DOS DEREITOS NO COLE

Esta semana arrancou coa celebración dunha data moi importante para nós: os 70 anos da Declaración dos Dereitos Humanos. Este documento, firmado en París polos países da Organización das Nacións Unidas (ONU) en 1948, é un dos documentos máis importantes da historia da humanidade. Os dereitos humanos son os dereitos que temos todas as persoas polo simple feito de existir. Respectalos permite crear as condicións indispensables para que os seres humanos vivamos dignamente nun entorno de liberdade, xustiza e paz. Moitos deles foron elixidos por vós para decorar o símbolo do ADN, que acabamos colgando na nosa árbore de Nadal!!! Tristemente, moitos deses dereitos aínda non se cumpren en moitos lugares do noso pequeno planeta. Por iso pensamos que, neste ano adicado á ciencia, sería marabilloso podelos incluír dentro das instrucións do noso ADN. Se entre as instrucións xenéticas dese libriño, como nolo explicou Ángel Carracedo, estiveran todos estes dereitos, canto máis amor non habería no mundo!!! Cada unha de nós temos que facer todo o posible para que iso sexa así, estades de acordo?  

Podedes ver todas as fotos premendo na imaxe.

CELEBRACIÓN DOS DEREITOS DO NENO E HUMANOS

O vindeiro luns, 10 de decembro, celébrase o "Día dos Dereitos Humanos". Durante os últimos cursos vimos xuntando esta conmemoración á do 20 de novembro ("Día dos Dereitos do/a Neno/a"), así como á Carreira "Save the Children", na cal sempre participamos.

Nesta ocasión, eu aproveitei tamén para animarvos a participar na actividade da decoración da árbore de Nadal, que leva por título "O noso ADN". Xa que este curso vai de ciencia, pensei que sería unha boa maneira de desexar un Bo Nadal e adornar a nosa árbore colgando nela o símbolo do ADN cos dereitos que traballedes na aula, para falar deles a próxima semana. Déixovos aquí a carta, na que tamén anuncio o Concurso de Postais no que con tanta ilusión participades. Estou desexando ver as vosas creacións científicas!!!!

Unha aperta enorme,

PUM, PUM!, TEATRO EN SANTA COMBA

Esta mañá pasamos un ratiño no Auditorio Municipal de Santa Comba, onde asistimos á representación "Pum, pum", da compañía Baobab Teatro. 

"Pum Pum" é un espectáculo que fala da historia de Marieta, unha meniña rodeada de portas que se abren e contan historias, historias cotiás que lles pasan a todos os nenos e nenas. Pero unha delas garda un segredo que Marieta non contara a ninguén. E esta última porta fálanos dunha historia moi diferente ás outras que nos deixa unha mensaxe: non gardedes un mal segredo, contádeo e pesará menos!

Aínda que foi unha mágoa que non viñerades todos/as a vela, o alumnado de Infantil e 1º e 2º de Primaria desfrutou moito con este espectáculo que presentaba varias técnicas (teatro de actor/actriz, monicreques, máscaras, sombras) e con música orixinal creada para a obra e interpretada en directo. Aquí podedes ver o tráiler:

Baobab Teatro, Trailer Pum, Pum! gal. from BAOBABTEATRO on Vimeo.

Queremos agradecer ao Concello de Santa Comba a súa invitación a un espectáculo tan interesante, e á compañía Baobab Teatro polo seu traballo tan ben feito sobre un tema tan delicado. E, ademais, aínda se pararon a saudarnos a todos/as ao remate da actuación e a fotografarse diante do escenario con todos/as nós. Moitísimas grazas!!!

CELEBRAMOS OS DEREITOS

Arrancamos esta semana coa celebración dos Dereitos do Neno e Humanos. Ademais de ler e consultar os libros que temos na exposición do corredor, durante estes días nas aulas falamos moito de dereitos, uníndonos tamén á "Carreira Save the Children", que nesta ocasión se adicou a Sudán do Sur, o país máis xoven e tamén un dos máis vulnerables. Por este motivo, falamos de África, dos dereitos, das dificultades que atravesan as persoas sursudanesas, etc., expoñendo no corredor do cole un pequeno mural que resume algúns dos aspectos máis traballados nas aulas. E cantamos en galego unha canción de orixe francesa que tamén ten a súa versión en varios países africanos: "Frère Jacques", para o cal nos acompañaron os guitarristas e ukelelistas do cole!!!

Despois, colgamos os nosos desexos na árbore de Nadal, que este curso escribimos en cunchas de vieira, símbolo dos peregrinos do Camiño de Santiago. E, para rematar, un bo feixe de abrazos entre todas as persoas aquí reunidas!!!
Premendo AQUÍ podedes ver todas as fotos.

OS DEREITOS DA INFANCIA

Hoxe celebramos o Día dos Dereitos da Infancia, uns días antes de que chegue tamén a data sinalada no mes de decembro para conmemorar os Dereitos Humanos. Xa vos teño falado da Convención dos Dereitos dos Nenos, pero seguramente moitas persoas vos preguntaredes cal é a diferenza entre eles... Os Dereitos dos Nenos son, por suposto, Dereitos Humanos. Pero a Carta destes últimos non aporta unha protección especial á infancia, así que vendo a súa necesidade, elaborouse a Convención sobre os Dereitos do Neno, xa que hai dereitos dos adultos que no poden aplicarse aos nenos, e viceversa.

Quero tamén deixarvos aquí unha ligazón da Comisión Nacional Mexicana dos Dereitos Humanos, onde atoparedes un apartado adicado ás nenas, nenos e adolescentes. Nela poderás escoitar cancións, ver vídeos e xogar aprendendo moito sobre os dereitos... 

 

Ademais, na exposición do corredor poderás atopar tamén moitos libros relacionados con este tema, e entre eles tres novidades da biblioteca, sobre tres persoas que, coa súa labor, fixeron que as cousas neste mundo mudaran a mellor. Persoas que loitaron para conseguir que o dereito á educación, a vida sen conflictos ou unha natureza saudable formaran parte da nosa vida diaria. Non podes perder a oportunidade de coñecer as historias de Malala, Nelson Mandela ou Wangari Maathai:

 

CELEBRANDO O DÍA DOS DEREITOS

Coma noutras ocasións, tamén este ano traballamos no cole o tema dos Dereitos do Neno e o dos Dereitos Humanos. O primeiro deles, que se celebra cada 20 de novembro dende 1954, é un día para chamar a atención sobre a situación dos nenos e nenas máis desfavorecidos/as, dar a coñecer os dereitos da infancia e concienciar ás persoas da importancia de traballar día a día polo seu benestar e desarrollo. O obxectivo é recordar á cidadanía que os nenos e nenas son quenes máis padecen as crises e os problemas do mundo, e que todos e todas teñen dereito á saúde, á educación e á protección, entre outros, sen importar en que lugar do mundo nacen e/ou viven. 

O Día dos Dereitos Humanos celébrase todos os 10 de decembro. Este ano, esta data fixo unha chamada a todos para defender os dereitos dos demais, sen importar as súas características: dun refuxiado ou migrador, unha persoa con discapacidade, unha muller, un indíxena, ou calquera outra persoa en risco de ser discriminada ou sufrir algún acto violento. 

As Nacións Unidas elaboraron o seguinte vídeo para este 2016:

 

Entre as organizacións que traballan por conseguir que todas as persoas do mundo teñan dereitos está "Save the Children", ONG coa que colaboramos desde hai moitos anos. Nesta ocasión, a edición adicouse a Etiopía, un dos países de África que máis está padecendo as consecuencias da seca na actualidade, o que afecta a máis de 8 millóns de persoas!!! Foi por iso que tamén o alumnado de 5º e 6º nos contou algunhas cousas sobre Etiopía e a importancia da auga doce, imprescindible para a vida humana. 

Para rematar a sesión, colocamos a nosa particular árbore de Nadal, que nesta ocasión decoramos con notas musicais (corcheas) de diferentes cores nas que cada persoa escribiu un desexo relacionado cos dereitos da infancia e dos adultos. Esperamos que se vexan todos cumpridos!!! 

Se queredes podedes ver todas as fotos premendo AQUÍ.

DEREITOS E DESEXOS PARA O NADAL

Esta tarde xuntámonos no patio do colexio para celebrar un acto con motivo do Día dos Dereitos do Neno (20 de novembro) e os Dereitos Humanos (10 de decembro). Aínda que ambas datas xa pasaron, hoxe reunímonos para falar do traballo realizado nas aulas durante estas últimas semanas, e o alumnado de 6º tamén nos leu un pequeno resumo sobre a Convención dos Dereitos do Neno, aprobada pola Asamblea das Nacións Unidas no ano 1989. 

Xunto á actividade de traballar nas aulas os dereitos, este curso tamén engadimos unha novidade, que consistíu en convertir un aro olímpico nun adorno para a nosa árbore de Nadal. Así, cada grupo decorou varios aros e escribiu un desexo en cada un relacionado cos dereitos. Esta tarde lémolos e colgámolos na árbore, na que tamén engadimos imaxes relacionadas coas Olimpíadas: deportes, iconas, deportistas, etc.

E por último, fixemos unha carreira moi especial, ao participar na XII edición de "Quilómetros de solidariedade" de SAVE THE CHILDREN. Medrar san e feliz, cumprir anos, soñar con ser maior..., son algunhas das cousas que esperamos suceda na vida de calquera neno/a. Pero non todos poden facelo. Cada día morren no mundo 16.000 nenos e nenas menores de 5 anos a causa de enfermidades como a desnutrición, a diarrea, o xarampón ou a malaria, debido a que non teñen acceso á atención médica ou non dispoñen de alimentos e tratamentos adecuados a tempo. Así ocorre en países do continente africano coma Burkina Faso, Níxer, Mauritania ou Malí. E a estes países e aos que Save the Children destinará os fondos recadados entre todos/as nós. 

E aquí están as imaxes dunha tarde solleira na que tamén escoitamos cancións tradicionais africanas, mais estas non saen nas fotos:

PELÍCULAS E MÚSICA PARA CELEBRAR OS DEREITOS HUMANOS.

      Como non podía ser doutra forma, traballando o tema do cine, hai que celebrar o día dos Dereitos Humanos con películas.

    A primeira é unha película de animación española cun guión artellado ao redor do tema dos Dereitos Humanos e á Declaración dos Dereitos do Neno.
       Titúlase "El extraordinario viaje de Lucius Dumb".

     Conta que aos científicos do Planeta encargóuselles descubrir un aparello que convertese a Terra nun lugar onde as persoas puidesen ser felices; e o escollido para desenvolver tan importante encargo resulta ser Lucius Dumb. O protagonista viaxa xunto a dous extraterrestes a diferentes lugares, e a súa aventura xira en torno a nove historias que representan os nove dereitos fundamentais dos nenos. 

    O bo de Lucius descobre que o instrumento buscado non é máis que: "Os dereitos humanos": 

    A directora desta película é Maite Ruíz de Austri, e a cinta conta co apoio da ONG "Músicos sen fronteiras", quen compuxo o tema principal da banda sonora. A produtora, en reciprocidade, colabora con eles axudando cunha parte dos beneficios, que irán integramente a axudar ás nenas con sida e prostituídas de Tailandia, a través da "Fundación Baan Manina".

     Aquí vos deixamos o tráiler da película:

          E como vos falamos tamén de música, contarvos que a banda sonora está composta por Pedro Calero e Mili Vizcaína e chámase "Os Dereitos Humanos, o teu mellor instrumento". Todos os artistas, músicos, cantantes e técnicos son extremeños. Entre eles: Bebe, Nacho Campillo, Cira, Enrique Fernández, Gabriel Echave, Miriam Solís, Modesto Peña "Tato", Gene García e Ulises Fernández. 

           Escoitádea e loitemos todos porque os vosos dereitos, os dos máis pequenos, sexan protexidos en todo o planeta!

       Deixámosvos tamén, pinchando sobre esta imaxe, o acceso á páxina web oficial da película, que amosa unha chea de información e de xogos para vós. 

        Tamén temos unha curtametraxe titulada "My shoes" ("Mis zapatos"), de Nima Raoofi: 

        En catro minutos escasos a mensaxe queda moi clara. Despois de vela, podedes falar de moitos temas relacionados cos dereitos: envexa, compararse cos demais, xuzgar aos demais pola súa apariencia, conformarnos co que temos/somos, valorar aos que nos rodean e a nós mesmos, etc.

UN NOBEL DA PAZ ESPECIAL

No mes de outubro, o Comité noruego encargado de conceder os premios NOBEL, decidiu outorgalo nesta ocasión a dúas persoas que loitan polo dereito de todos os nenos á educación. Por un lado, ao indio Kailash SATYARTHI, quen deixou o seu traballo como inxeneiro informático para denunciar ás multinacionais que explotan aos nenos de entre 5 e 12 anos de idade. A organización que encabeza, "Global March", liberou da esclavitude empresarial a uns 80.000 nenose nenas en máis de 160 países. No seguinte vídeo podes ver un resumo do seu importantísimo esforzo:

Por outro lado, á paquistaní Malala YOUSAFZAI, a xoven á que os talibáns intentaron asasinar no ano 2012 por defender a escolarización das mulleres. Malala considera a educación "un poder para as mulleres, e iso é polo que os terroristas lle teñen medo á educación. Eles non queren que unha muller se eduque porque entón esa muller será máis poderosa". A pesar de ter tan só 17 anos de idade, leva anos loitando por este dereito, e co seu exemplo amosou que tamén a xuventude pode contribuír a mellorar as súas situacións. Como afirmou nun discurso no Parlamento Europeo, "algúns nenos/as non queren consolas, queren un libro e un bolígrafo para ir á escola".

No seguinte vídeo podes escoitar o seu discurso diante da Asamblea das Nacións Unidas, onde pronunciou outra destacada frase: "Un neno/a, un mestre/a, un libro e un lapis poden cambiar o mundo. A educación é a única solución". 

Kailash e Malala, a premiada máis xoven da historia, recolleron o Nobel da Paz o pasado 10 de decembro, Día dos Dereitos Humanos.

DEREITOS HUMANOS, 365 DÍAS AO ANO

"Dereitos humanos, 365 días ao ano" é o lema elixido este ano para conmemorar o Día dos Dereitos Humanos, que se vén celebrando cada 10 de decembro dende o ano 1950.

O Secretario Xeral das Nacións Unidas, Ban Ki-moon, pediu publicamente a todos os gobernos que cumpriran a súa obriga de protexer os dereitos humanos todos os días do ano. 

Durante estes días estase a celebrar en Lima (Perú), a "Conferencia sobre Cambio Climático", onde diversos expertos declararon que o cambio climático non se pode afrontar sen protexer os dereitos humanos: moitas persoas desfavorecidas, marxinadas, etc., levan unha forma de vida moi unida ao medio ambiente.

No cole tamén nos queremos comprometer a cumprir estes dereitos, xuntamente cos Dereitos do Neno. É por iso que esta semana sumarémonos á actividade "XI Carreira Quilómetros de solidaridade", que organiza Save the Children. Este ano, adicada á loita polos dereitos das crianzas de MALÍ. E lembrade que TODAS e TODOS podemos facer algo para coidalos e instalalos nas nosas vidas!

25 ANOS DA CONVENCIÓN SOBRE OS DEREITOS DO NENO

A Convención Internacional sobre os Dereitos do Neno cumpre 25 anos. Unha "convención" significa que os Estados participantes teñen a obriga de garantir o seu cumprimento. Esta é a diferenza co termo Declaración, que recolle unha serie de principios e normas que os Estados se comprometen a cumprir nas súas nacións.
No seguinte vídeo de Unicef resumen os dereitos que todos os nenos e nenas do mundo deberían ter:

Mais, infelizmente, non todos e todas os nenos e nenas teñen unha vida que respecte estes dereitos. Por iso é moi importante que sigamos coñecéndoos, traballándoos e loitando por eles, para que se cumpran aquí e en calquera recuncho do mundo!

DÍA UNIVERSAL DO NENO

Hoxe, 20 de novembro, celébrase o DÍA UNIVERSAL DO NENO. A Biblioteca xa expuxo no corredor do colexio as obras literarias sobre esta temática, que poderedes coller para traballar con elas nas aulas. Ademais, no blog tedes diferentes recursos que vos poden ser útiles. Pincha AQUÍ para acceder a eles.

E aquí vos deixamos unha canción para lembrar a todo o mundo que debemos aos nenos o mellor que poidamos darlle:

Tamén podedes acceder ao programa educativo de UNICEF pinchando AQUÍ.

Dende a biblioteca preparamos este vídeo de conmemoración para este día tan especial esperamos que vos guste.

DÍA INTERNACIONAL DO NENO 2013 from bibliotecavictorsaenz on Vimeo.
Vídeo elaborado pola Biblioteca Escolar do CEIP Víctor Sáenz de Mazaricos con imaxes publicadas polo xornal "EL PAÍS" nunha fotogalería dedicada ao día do neno o día 20 de novembro do 2013. Música. "Querote mais" de O SONORO MAXÍN.

EL CAZO DE LORENZO

El cazo de Lorenzo o é un libro que fala das dificultades dun neno diferente, Lorenzo. Un neno que cada día carga cun cazo, o seu cazo. Esta circunstancia chama a atención dos demais. O cazo dificúltalle as súas tarefas cotiás. Pero a verdade é que todos cargamos cun cazo, más grande ou máis pequeno, que nos acompaña, nos limita e condiciona...Algunhas persoas son conscientes delo e aceptan esta diferenza, a fan súa para medrar máis e mellor e para comprender aos demais.

O libro está escrito por Isabelle Carrier e está recomendado por FEAPS (Federación Española de Organizaciones en favor de la Personas con Discapacidad Intelectual).

Pregunta por el na nosa biblio!!!