venres, 15 de febreiro de 2019

ROSIÑA DEPORTES

Hoxe estrenamos un novo programa en "Radio Rosiña"!!! Chámase "Rosiña Deportes" e inaugúrase cunha entrevista moi entretida que o profe David fai ás persoas que se clasificaron na última competición de Campo a Través. Seguro que queredes escoitar as respostas de Jorge Otero, Paula Barcia e Paula Maneiro!!!! Pois xa sabedes: só tedes que premer no seguinte enlace:



PROGRAMAS RADIOFÓNICOS

A semana pasada estivo con nós Luís, un excepcional técnico de radio que forma parte de Rede ESPORA. Durante esa xornada, o alumnado de 4º, 5º e 6º afrontou os retos que Luís nos propuxo dun xeito moi profesional, como podedes comprobar nas seguintes gravacións.
Comezamos "Recitando poemas" de Ana Mª Fernández, que realizan deste xeito Jorge Otero, Paula Barcia, Álex e Pablo, quen ademais se encargou do son no noso estudio de "Radio Rosiña":


Tamén sobre poemas gravaron o seguinte podcast Joel, Nerea, Miguel e Mª José. Neste caso, o reto estaba en engadir palabras nos ocos nos que desapareceran as escritas por Pepe Cáccamo. E así de diferentes quedaron para o programa "Poemas porquiños":


E, por último, un reto que me encantou e penso que quedou moi fermoso: os "Mini-contos porquiños", nos que Luís nos entregou palabras coas que Jorge Lema, Daniela, Paula Maneiro e Samuel crearon unhas historias moi interesantes. Non as perdades:


E por hoxe ata aquí!!! Pero agárdannos moitas máis cousas os vindeiros días, así que estade moi atentos e atentas!!!!


mércores, 13 de febreiro de 2019

DÍA MUNDIAL DA RADIO

Hoxe é o Día Mundial da Radio!!!!! Ata o curso pasado, para moitas das persoas que compartimos o día a día neste cole esta noticia pasaba desapercibida, pero dende o curso pasado témola moi en conta. Formar parte do proxecto "Radio na Biblio", crear "Radio Rosiña", coñecer ás persoas de ESPORA... 
Este curso tamén recibimos a invitación de Rede ESPORA para participar na celebración do "Día Mundial da Radio 2019", gravando un podcast adicado ao diálogo, á paz e á tolerancia. Para iso, enviáronnos unha noticia sobre o "muro da vergoña", na fronteira entre México e Estados Unidos, que en 5º e 6º modificaron para convertir nunha nova esperanzadora. Unha vez redactada, Samuel (técnico de son) e Nerea (locutora) encargáronse de gravala en "Radio Rosiña". Unha vez enviada a Rede ESPORA, fixeron un noticieiro colectivo con todos os centros participantes, pero moi diferente aos que adoitamos escoitar, xa que o caracteriza a esperanza, cheo de noticias felices que desexamos algún día se fagan realidade!!! Recoméndovos escoitar todo o programa, pero se queredes buscar rapidamente a voz da nosa locutora, ide ao minuto 14.
FELIZ DÍA DA RADIO A TODOS E TODAS!!!


luns, 11 de febreiro de 2019

FORMACIÓN EN "RADIO ROSIÑA"

Alejandro, Paula B. e Jorge O. co noso gran técnico Pablo.
O pasado venres, 8 de febreiro, visitounos Luís, un gran coñecedor do mundo da radio no ámbito educativo. Luís forma parte de "Espora", a plataforma escolar que pretende crear unha potente rede de EScolas POla RAdio, e coa que vimos colaborando desde que formamos parte do proxecto "Radio na Biblio". O curso pasado coñecemos a Javier, quen nos iniciou neste interesante mundo da radio. Nesta ocasión foi o seu compañeiro Luís o encargado de achegar novos e interesantes retos ao alumnado de 4º, 5º e 6º. Foi unha intensa xornada na que puidemos comprobar que contamos con rapaces e rapazas interesados e interesadas en mellorar como locutores e locutoras de radio, pero tamén como técnicos de son. A todos/as eles/as, NORABOA!!! En breve comprobaredes que resultados tan marabillosos obtivemos desa mañá en "Radio Rosiña", pero mentras tanto déixovos as imaxes (premede sobre a foto), para que vos vaiades facendo unha idea do grande potencial que hai no cole de San Cosme!!!
Luís, moitísimas grazas polas túas propostas e a túa paciencia connosco!!! Esperamos leves tan bo recordo de nós coma o que deixaches ti aquí!!! Vémonos pronto!

 

DÍA INTERNACIONAL DA MULLER E A NENA NA CIENCIA

Hoxe, 11 de febreiro, celébrase o ¨Día Internacional da Muller e a Nena na Ciencia". Esta conmemoración é moi recente, xa que foi establecida pola Asamblea Xeral das Nacións Unidas no ano 2015. Este día é un recordatorio de que as mulleres e as nenas desempeñan un papel fundamental neste campo, e a súa participación debe fortalecerse. 
Ao longo da historia, o papel da muller na ciencia estivo pouco presente, e moitas nenas e rapazas viron prohibido o seu acceso polo simple feito de non ser homes. Este curso, co noso proxecto "Le con-ciencia", podemos comprobar que no noso cole todas as persoas somos capaces de aportar neste campo: os experimentos científicos fixéstelos todos e todas, a mesa de son da radio é manexada por nenos e nenas, nos proxectos estades participando nenos e nenas... Como pensar que a ciencia está relacionada co xénero? Para nada!!!!
Déixovos aquí un vídeo no que a gran coñecedora dos chimpancés Jane Goodall envía unha mensaxe moi interesante a todas as rapazas que queren ser científicas. Non podedes perdelo!!!

 
Gustaríame tamén invitarvos a participar nunha actividade ao longo desta semana, para a cal teredes de prazo ata o 8 de marzo, que é cando celebramos outra data: o Día da Muller.
Consiste no seguinte: elixir unha científica galega e investigar un pouquiño sobre ela (datos biográficos, estudos, traballo, en que destacou, por que tela en conta, etc.). O texto que elaboredes acompañarase dunha ilustración que fará cada unha e cada un de vós. En breve pasareivos o modelo que podedes empregar, así como a científica que vos será asignada. Ao mellor algún ou algunha de vós descubre a súa vocación, quen sabe...
E lembrade que hai unha páxina moi interesante na que podedes descubrir un montón de cousas interesantes sobre esta data no seguinte enlace (que tedes no Google Sites do proxecto):

https://11defebrero.org/


DESPEDIMOS A UNGERER, UN GRANDE ILUSTRADOR

Esta fin de semana faleceu Tomi Ungerer. Tal vez polo seu nome non vos decatedes de quen é, pero de seguro coñecedes algunha das obras que ilustruo:




Tomi Ungerer era un ilustrador e debuxante francés que naceu en Estrasburgo no ano 1931. Faleceu esta fin de semana, aos 87 anos en Irlanda, lugar no que vivía dende hai 40 anos. O seu libro "Os tres bandidos" é un dos máis emprestados na nosa biblioteca, así que quixen recordar a este artista cuxa obra foi observada por tantos olliños... Premendo AQUÍ podedes ler algo máis sobre este recoñecido ilustrador.


xoves, 7 de febreiro de 2019

FORMACIÓN EN "RADIO ROSIÑA"

"Radio Rosiña" continúa a súa actividade. Xa sabedes que ao longo do curso transmitimos os programas que xa coñecedes, e iniciamos as "Entrevistas porquiñas" que tanta ilusión nos fan. Agora andamos tamén a punto de inaugurar algún nova retransmisión, pero mentras non chegue ese momento, lembrade que mañá, 8 de febreiro, teremos unha xornada moi especial na nosa radio. O motivo? Visitaranos Luís, compañeiro de Javier Prado, quen estivo connosco o curso pasado para iniciarnos neste mundo de ondas sonoras. Luís é compañeiro de Javier, e tamén forma parte de "Redespora", así que seguro que trae uns retos ben interesantes para todas as persoas que participedes nesta formación. Déixovos aquí o cartel da actividade:


martes, 5 de febreiro de 2019

EXCURSIÓN A SANTIAGO DE COMPOSTELA

Non perdemos detalle no Museo de Historia Natural.
Pois xa fixemos a primeira grande excursión do curso!!! Si, xa sei que fixestes máis viaxes, pero esta foi a primeira na que pasamos a xornada enteira fóra todas as persoas do cole... Foi a primeira excursión para as nenas e nenos de 3 anos!!! E ademais, coincidiu co cumpreanos de Álvaro!!!! A verdade é que se estrearon dun xeito espectacular, xa que visitaron o Museo de Historia Natural. Acompañados por unha guía, case non tiveron tempo de pestanexar, xa que todo o que o Museo lles ía descubrindo chamaba a súa atención. Así que os grupos de Infantil, xunto co de 1º e 2º de Primaria, recibiron unha lección moi intensa sobre a vida animal e vexetal da que seguro lembran moita información!!!
Os collages de Lara Lars chamaron moito a nosa atención.
Pola súa parte, os grupos de 3º a 6º desfrutaron dunha obra de teatro no Teatro Principal. Titulada "Valentino Rufini e Alkil Pillabán de viaxe a Milán (e van sen un can)", dous actores da compañía "Talía" fixeron rir a todo o público cunha obra que amosou a maxia do teatro.
Para completar a mañá, visitaron tamén a exposición "MiiC2. Mostra Internacional de Ilustración Contemporánea", na Sede Afundación, onde descubriron a obra máis recente de artistas como as galegas Lara Lars e Iria do Castelo ou a andaluza María Hesse. Baseándose tamén nesta sorprendente e colorida exposición, fixeron un obradoiro moi interesante con Xiana, a guía que nos acompañou. 


Despois xuntámonos todas para xantar e, tras xogar un pouquiño, regresamos ao cole contentísimas!!!
Premendo sobre as imaxes podedes ver todas as fotos deste día tan especial, no que botamos moito de menos a quenes non puideron acompañarnos (Martiño, Andrea e, moi en especial, a Carla).


 

sábado, 2 de febreiro de 2019

A CANDELORIA

Hoxe, 2 de febreiro, é o Día da Candeloria!!! E a min faime moita ilusión, porque é unha data ben bonita. Cóntovos...
A palabra "candeloria" procede do termo latín candela, que significa "luz alimentada con cera ou sebo". A festividade que leva o seu nome celébrase o 2 de febreiro, un momento moi importante no ciclo astronómico, xa que coincide coa metade do inverno, xusto entre o solsticio de inverno e o equinoccio de primavera. Son moitos os refráns que fan referencia a ela, coma este:

POLA CANDELORIA... 
SE CHORA, INVERNO FÓRA; 
SE RI, INVERNO AQUÍ; 
PERO QUE CHORE, QUE DEIXE DE CHORAR, 
MITÁ DO INVERNO ESTÁ SEN PASAR.

Pero a min gústame moito tamén estoutro:

A PARTIR DA CANDELORIA, 
NINGUNHA AVE VOA SOA

lembrándonos que a celebración especial é que casan os paxariños.

https://www.canto-pajaros.es/

É certo que actualmente as persoas estamos algo saturadas de datas a celebrar, pero tamén penso que algunhas merecen a pena. A importancia que ten esta representación en Europa está representada en multitude de estampas nas que o símbolo do amor son parellas de aves xuntando os seus peteiros. Imaxinade aos paxariños migratorios retornando, para instalarse de novo no noso contorno, celebrando con cantos inimitables o que pode ser considerado o renacer da primavera. Isto si que é toda unha declaración de amor, nada que ver coa que nos queren convencer as campañas publicitarias...

E se queredes celebralo investigando sobre o canto das aves, premede sobre a imaxe e descubriredes moitos deles!

mércores, 30 de xaneiro de 2019

CELEBRACIÓN DO DÍA DA PAZ

https://photos.app.goo.gl/vJxcs3DuMjHyuVkN6
"Pegamentox", o virus de Infantil
Mañá ben fermosa a deste 30 de xaneiro, na que nos reunimos no corredor do cole para celebrar o "Día da Paz". Certo é que de sobra sabemos que este non é un tema que tratemos de atender soamente cada 30 de xaneiro, xa que cada un dos días que vivimos ha de estar marcado por situacións pacíficas: escoitarnos, axudarnos, respectarnos, abrazarnos, querernos... Sen embargo, nunca está de máis recordar a persoas que loitaron (e seguen loitando) para que os problemas que poidan xurdir non se solucionen mediante guerras, loitas e outras formas de violencia. Hoxe falamos de Mahatma GANDHI, pero tamén soaron nomes doutros grandes pacifistas mundiais: Martin Luther King, Teresa de Calcuta, Nelson Mandela; así como de artistas que fixeron da música, da pintura ou da literatura auténticos manifestos pola paz: John Lennon, Pablo Picasso ou Eduardo Galeano, entre moitas outras persoas.
E vós, nas diferentes aulas, deseñastes un Violentovirus moi malvado, pero como este curso sodes as mellores científicas do universo, conseguistes dar coa vacina para atacalo: a Vacina do Bo Trato. Despois de escoitar as vosas propostas, non me cabe ningunha dúbida de que funcionará!!!
Ademais diso, celebramos a "Carreira Save the Children", para a cal o grupo de 6º preparou unha presentación sobre Zaatari, o campo de refuxiados para o cal vai destinada a recadación de "Quilómetros de solidaridade" nesta XV edición.
E rematamos cantando e bailando, coas "Apertas que voan" de Paco Nogueiras. E démonos un feixe de abrazos, porque nos encanta!!!
Queredes ver as fotos? Premede na imaxe ou AQUÍ.
Tamén podedes ler a presentación que fixeron en 6º no seguinte enlace:




venres, 25 de xaneiro de 2019

FASE INTERCOMARCAL CAMPO A TRAVÉS EN PORTO DO SON

Esta mañá, dúas das rapaciñas e o rapaciño que se clasificaron para a Fase Intercomarcal de Campo a Través viaxaron ata Porto do Son. Alí xuntáronse coas demais persoas clasificadas de todos os centros participantes. Foi unha mágoa que Soraya non puidera acompañalos, porque seguro que Paula Barcia, Paula Maneiro e Jorge Otero lembran esta experiencia durante moito tempo. Aínda que non se clasificaron para a seguinte fase, pasárono moi ben e contáronnos con moita ilusión a súa viaxe ata Porto do Son con David e Juan José, onde remataron o percorrido que lles foi asignado  polo Monte Loreto segundo a súa categoría: Paula Barcia correu 500 metros, Jorge 800 e Paula Maneiro 1 quilómetro. NORABOA AOS TRES, ATLETAS INSUPERABLES PARA NÓS!!! 
Premendo sobre a imaxe podedes ver as fotos desta mañá. Premendo AQUÍ podedes acceder aos vídeos.




PRESENTACIÓN DE EXPERIMENTOS

Esta semana reservamos unha sesión para transformar a Aula de Audiovisuais nun auténtico laboratorio, xa que alí nos xuntamos todas as persoas do cole para presentar os experimentos científicos que realizamos nas diferentes aulas. Foi unha sesión moi divertida e interesante, na que descubrimos o que lle sucede ás piñas se as sumerximos en auga e onde agochan a súa semente, como podemos filtrar a auga sucia, como inchar un globo sen soprar, como facer unha lámpada de lava ou cal é o Principio de Arquímedes. 
Gustoume moitísimo ver o voso entusiasmo por esta actividade, así que quero animarvos a que sigades realizando experimentos en grupo, e o vindeiro mes convocareivos de novo para que os presentedes en público. Que vos parece?
Mentras tanto, podedes ver as imaxes desta sesión premendo nesta fotografía:



martes, 22 de xaneiro de 2019

EXPERIMENTOS NA BIBLIOTECA

Durante o mes de novembro e decembro realizastes algúns experimentos nas vosas aulas. Naquel momento a actividade iniciámola tendo en conta o "Día da Ciencia en Galego", e ademais de facer o experimento, propuxemos elaborar un libriño que recollera a experiencia de cada grupo. A actividade remataba coa presentación dos diferentes experimentos na biblioteca do cole, pero chegou o fin de trimestre e non nos deu tempo... Sen embargo, teño moitísimas ganas de saber que resultados obtivestes... Funcionaron? Saíron á primeira? Pensei que sería estupendo inaugurar o trimestre cos "Experimentos na biblioteca", así que alí vos espero mañá, despois do recreo, para que nos contedes... Non aguanto máis!!!!

venres, 18 de xaneiro de 2019

NOTICIA INTERESANTE RELACIONADA COA CIENCIA

Sabedes o que sucederá o vindeiro domingo? Pois nada máis e nada menos que unha eclipse de Lúa!!!! Non sei se as nubes nos permitirán velo, pero de ser así, atendede ben porque non se producirá outra ata o ano 2022! Xa sei que non falta tanto, pero se podemos desfrutar deste espectáculo astronómico, para que esperar 3 anos? Claro que hai outro inconvinte: o horario. A eclipse comezará ás 4:49 da madrugada; sobre as 5:43 comezará a verse xa de cor vermella, e ás 7:49 da mañá rematará este fenómeno, que tanto ten marabillado á humanidade ao longo da historia. Anímaste a madrugar moito? Se nos erguemos sobre as 7:30, e ás nubes non se lles ocorre ser protagonistas, poderemos percibila durante un ratiño.
Aquí vos deixo un enlace para que vos informedes un pouquiño máis. Premede na imaxe:

https://www.gciencia.com/ciencia/guia-eclipse-de-lua-galicia/

E por se non tes moi claro o que é iso das eclipses, podes ver este vídeo:

xoves, 17 de xaneiro de 2019

DÍA DA PAZ

Este curso celebramos o Día da Paz propoñendo unha actividade que nos enviaron desde UNICEF, que ademais ten moito que ver co mundo da ciencia. Déixovos aquí a carta que vos escribín para que poidades lela tamén desde o blog:



Os vídeos para entender un pouquiño o que é un virus son os seguintes:

 


Vémonos o vindeiro 30 de xaneiro!!!


martes, 8 de xaneiro de 2019

CALENDARIO 2019

Feliz 2019!!!!! Despois destes días de vacacións, xa tiñamos ganiñas de vernos, a que si? Vinvos chegar moi contentas a todas, e emocionadas por contar todas as cousas que vos pasaron estes días!!! Quedou claro que as ganas de falar non se foron co 2018!!! 
Tamén eu tiña ganas de vervos, de escoitarvos polo cole, de que ocuparades os distintos espazos deste edificio que tan grande e frío se me fai cando non estades. Bueno, é que un cole sen rapaciños e rapaciñas non é un cole... 
Pero tamén desexaba que chegara o día de hoxe para entregarvos o calendario do 2019, que imaxino xa teredes colgado nos vosos dormitorios... Quedouvos moi bonito!!! Nesta ocasión é un calendario moi especial, porque está adicado a unha persoa á que queremos moitísimo. Tendo en conta que o tema deste curso é a ciencia, esa persoa non podía ser outra que ÁNGEL CARRACEDO!!!! Esperamos que tamén a el lle faga moita ilusión recibir este agasallo no que participastes todas as nenas e nenos do C.E.I.P. Víctor Sáenz. Estou desexando que veña vernos para entregarllo!!!! Seguro que vós tamén.
Unha aperta enorme e ánimo neste 2º trimestre!!!

 




sábado, 29 de decembro de 2018

VÍDEOS DO FESTIVAL DE NADAL

Xa están aquí os vídeos do festival de Nadal!!!! Seguro que teredes moitas ganas de velos e de comentalos coas persoas que vos acompañan estes días de vacacións: familiares, amigos e amigas... Desfrutade moito con eles!!!!
En primeiro lugar, a presentación do festival:


No seguinte vídeo podedes ver a primeira actuación de Infantil: "Na casa da miña avoa".


A continuación, o grupo de ukeleles e guitarras e o coro de 1º, 2º, 3º e 4º interpretando "Heiche de contar un conto":


En 3º e 4º prepararon unha obriña de teatro moi simpática: "Loliña e a galiña".


Infantil volveu subir ao escenario para bailar con "A científica incorrixible":


1º e 2º tamén puxeron un toque de humor no escenario con "Os calzoncillos de Papá Noel":


Tamén repetiron o grupo de guitarras e ukeleles, que co coro de 1º, 2º, 3º e 4º tocaron e cantaron "A Lúa":


En 5º e 6º prepararon unha adaptación ao teatro da obra de Carlos Casares "A galiña azul", que podedes ver en dúas partes:




Este grupo foi tamén o encargado de pechar o festival, coa súa actuación "The final count-down":







E, ademais, cantamos o "Cumpreanos feliz" a Anxo e recibimos a Papá Noel!!!

venres, 21 de decembro de 2018

FESTIVAL DE NADAL


Que ben o pasamos esta mañá!!! Celebramos o Festival de Nadal, e estabamos cheas de ilusión por amosar ao noso público as cousiñas que con tanto cariño e esforzo preparamos nas diferentes clases!!!! Aínda que está todo gravado, os vídeos non se subirán ata dentro duns días, pero as fotos xa as podedes ver!!!! 

O festival foi presentado por Paula, Mª José, Daniela e Pablo, que cursan 6º de Primaria. As catro persoas estaban nerviosísimas, pero fixérono de marabilla!!! As actuacións do noso festival foron as seguintes:
-O grupo de Infantil bailou "Na casa da miña avoa";
-o grupo de guitarras e ukeleles, incentivado polo profe Óscar hai dous cursos, interpretou "Heiche de contar un conto", axudado polas voces dos nenos e nenas de 1º a 4º de Primaria;
-3º e 4º representaron a obra de teatro "Loliña e a galiña", conseguindo que todo o público se partira de risa;
-Infantil acompañou con xestos a canción "A científica incorrixible";
-1º e 2º puxeron outro toque de humor con "Os calzoncillos de Papá Noel";
-novamente o grupo de guitarras e ukeleles interpretou outro tema: "A lúa", no que o coro de 1º a 4º cantou estupendamente;
-5º e 6º representaron "A galiña azul", de Carlos Casares e
-de novo 5º e 6º con "The final countdown" para pechar o festival.

Rematado o festival, a ANPA contactou con Papá Noel e invitouno a visitar o cole. Marchou encantado de estar convosco e ademais deixouvos uns agasallos estupendísimos, non si? 

Todas as persoas reunidas no comedor esta mañá pasámolo moi ben, e queremos agradecer a todas as que se achegaron ao cole para compartir connosco este tempiño xuntas. Ao final, o verdadeiramente importante é este tempo que pasamos xuntas, falando, rindo, tranquilizándonos, bailando, cantando... Compartindo!!!! E así queremos seguir facéndoo durante o 2019!!!!

Mentras non están preparados os vídeos, premendo nas imaxes podedes ver as fotos deste festival.

Unha aperta enorme!!!!






Infantil pasouno en grande enriba do escenario
3º e 4º fixéronnos rir moito con "Loliña e a galiña"

O grupo de guitarras e ukeleles co grupo de voces que o acompañou

En 1º e 2º buscando os calzoncillos de Papá Noel

Un momento da representación "A galiña azul" de 5º e 6º

"The final countdown" pechando o festival deste 2018




xoves, 20 de decembro de 2018

XORNADA DE INCHABLES E OUTRAS ACTIVIDADES

Izan, Luzdivina e Valeria desfrutaron a tope!
A xornada de hoxe anticipou as próximas vacacións. Despois do recreo, a empresa encargada das actividades extraescolares no centro trouxo un dos agasallos cos que máis desfrutades as nenas e nenos do cole: os inchables!!!! Pero tamén organizaron xogos de equipo e algunha actividade individual, como a elaboración de chapas que vós mesmas/os deseñastes!!!
O xogo da ra tamén atrapou o entusiasmo de nenas e nenos
As imaxes xa amosan o ben que o pasastes, nun día que adicamos a ensaiar para o festival de mañá, entregarvos as notas, recoller algúns dos traballos que fomos facendo ao longo do trimestre, etc.
O paracaídas
Tamén nos encantou o obradoiro de chapas!!!
Premendo sobre as imaxes tedes as fotografías de hoxe. Queremos agradecer ás monitoras e ao monitor a súa proposta e o esforzo por desenvolvela desta maneira!!!


mércores, 19 de decembro de 2018

POSTAIS DE NADAL E GUÍA DE LECTURA

Alba, Pablo, Luzdivina e Olalla recollendo os premios.
Un ano máis, as postais de Nadal decoraron o noso corredor, e participaron todas no Concurso convocado polo centro. De todas elas, seleccionouse unha en cada aula: a de Olalla en Infantil, a de Luzdivina en 1º e 2º, a de Alba en 3º e 4º e a de Pablo en 5º e 6º. Destas catro finalistas, a que recibiu máis votacións por parte das nenas e nenos do cole foi a de Alba, polo que esa é a postal que neste Nadal se envía ás familias para desexar unhas felices festas dende o noso cole. Premendo sobre a imaxe podedes ver as fotos da entrega de premios que tivo lugar esta tarde.
E se premedes AQUÍ podedes ver todas as postais presentadas ao concurso. 

A postal de Alba cos nosos mellores desexos para este Nadal e o vindeiro 2019 podedes vela aquí:



Tamén vos deixo a Guía de Lectura que elaboramos dende a biblioteca, por se os Reis Magos ou o Apalpador vos queren agasallar con algunha desas recomendacións: