xoves, 13 de xuño de 2019

EXCURSIÓN Á FÁBRICA DA LUZ DE 5º E 6º

Xa están de volta as rapaciñas e rapaciños de 5º e 6º!!! A verdade é que durante estes tres días o cole estivo moito máis silencioso do habitual, e botamos moito de menos ás doce persoas que participaron na excursión de fin de curso nesta ocasión. Todas elas desfrutaron destes días no albergue da Fábrica da Luz, en Parada de Sil (Ourense), onde compartiron actividades, comidas, anécdotas e moito máis no fermoso entorno do río Mao. Ademais da beleza paisaxística do lugar, tamén coñeceron ás marabillosas persoas que se encargan de levar adiante este fantástico proxecto: Sara e Óscar. Con eles e co resto da xente que teñen contratada para que todo funcione perfectamente estiveron desde o luns ata o mércores os grupos de 5º e 6º, coas profes Sonia e Susi. Chegaron todas moi contentas, e queren amosarnos as fotos destas xornadas nas que descubriron que se levan moi ben e saben desfrutar en equipo dos diferentes momentos do día. Desde aquí tamén queren dar as grazas a Iván, o monitor que se encargou de que non houbera tempo para aburrirse; a María, que se encargou da limpeza do albergue e de servir algunhas das comidas; a Carmen e Lois, que foron os responsables de que comeramos tan rico e abundante e a Sara e Óscar, por suposto, pendentes en todo momento de que a súa estancia neste recuncho de Galicia sexa inesquecible!!! 
E aquí vos amosan as fotos que fixeron nesta fantástica excursión. Se queredes que vos conten algo máis falade con elas; estou segura de que estarán encantadas de compartir esta experiencia.

O primeiro día fixeron unha parada en Ourense antes de instalarse na Fábrica da Luz.

Iván recibiunos con xogos moi divertidos!
O segundo día adicárono a xogar, investigar en profundidade a auga do río Mao e a navegar en kayak polas súas augas ata abrazar o río Sil.

Navegar en kayak polos ríos Mao e Sil foi unha experiencia inesquecible.
O terceiro día camiñaron cume arriba para visitar as tumbas antropomorfas, coñecer un dos castiñeiros máis lonxevos do concello e retratarse diante dunha das vistas máis impresionantes dos canóns do Sil.

O último día camiñaron moito, pero vistas coma esta ben merecen ese esforzo.
Que envidia, non?
 

mércores, 5 de xuño de 2019

DÍA MUNDIAL DO MEDIO AMBIENTE

Hoxe celebrouse o Día Mundial do Medio Ambiente, e no cole recibimos o xornal con noticias moi interesantes adicadas a este tema que tanto nos preocupa. Premendo AQUÍ podedes acceder ao suplemento de "La voz de la escuela" que publica cada mércores o diaro "La voz de Galicia".
Pero tamén recibimos a noticia do nacemento dun novo diario, neste caso dixital, adicado á auga. Chámase "El Ágora" e inaugúrase con artigos moi interesantes, algúns dos cales amosan a preocupante situación deste ben natural tan preciado e tan maltratado polo ser humano. Pero tamén nos anima a actuar para poder deter o que pode ser unha grande catástrofe. 


TEMOS QUE ACTUAR O ANTES POSIBLE, NON VOS PARECE? 


Canto sabes sobre a auga? Premendo AQUÍ podes facer un test con 7 preguntas moi interesantes. 

E xa que este curso foi sobre a ciencia, que sucede si retorcemos un trapo mollado no espazo? Mirade o seguinte vídeo:


luns, 3 de xuño de 2019

PROXECTOS DE INVESTIGACIÓN SOBRE A CIENCIA

Xa comezou o último mes do curso, e como é habitual nos últimos anos, inaugurámolo coa presentación dos traballos que realizastes nas diferentes aulas sobre a temática do noso proxecto. Neste 2018-19 tocoulle ao tema da ciencia, que nos guiou desde o mes de outubro por camiños moi interesantes nos que tratamos de aprender todo o posible. Nas clases tamén fostes vós, as nenas e nenos de cada grupo, quenes decidistes en que queriades profundizar máis, ou cales eran aqueles apartados da ciencia que máis chamaban a vosa atención... E desa decisión colectiva naceron os traballos que durante a semana pasada foron chegando ao meu buzón. Hoxe quero presentárvolos aquí, para que poidades lelos e aprender aínda moitas máis cousas sobre este inmenso mundo que é a ciencia. Comezamos?
O primeiro que vos presento é o que realizou Alejandro na aula de Pedagoxía Terapéutica. A verdade é que léndoo entránlle gañas a calquera de ser científico:



En Infantil adicáronse a facer experimentos, e a través deste traballo queda claro que para este grupo a ciencia é divertidísima!!! Queredes comprobalo? Aquí tedes a súa recompilación:



En 1º e 2º de Primaria fixéronse tantas preguntas ao longo do curso que elixiron as que máis chamaron a súa atención para montar este traballo, no que ademais quixeron deixarnos claro que manexan de marabilla as novas tecnoloxías. Aquí o tedes:



En 3º e 4º investigaron sobre algúns animais e sobre algús espazos naturais de grande importancia. O resultado é este traballo que podedes ver aquí:



En 5º e 6º viaxaron ata o espazo e investigaron sobre o Sistema Solar e sobre a vida dalgunhas persoas que se adican a unha desas profesións que tanta xente soña con ser nalgún momento: astronautas! Quererá tamén algunha rapaza ou rapaz de 5º e 6º subir nunha nave espacial?



De seguro que vos gustaron tanto como a min!!! Tan só felicitarvos a todas as persoas que participastes na súa elaboración e animarvos a seguir realizando traballos deste tipo, nos que aprendemos moito máis que os contidos que neles amosades!!! Unha aperta,

venres, 24 de maio de 2019

VISITAMOS O MUNCYT DE A CORUÑA

Diante da cabina do "Lope de Vega".
Rematamos a semana viaxando ata A Coruña, onde visitamos un museo moi especial: o MUNCYT, o Museo Nacional de Ciencia e Tecnoloxía, situado no edificio Prisma de Cristal. Neste emblemático edificio, un cubo de vidro que xa foi galardoado con algún prestixioso premio de arquitectura, realizamos unha visita guiada por algunha das salas expositivas. Puidemos así coñecer aos robots Pepexán e Marilú, con quenes mantivemos unha interesante conversa e con quenes nos sorprendemos tamén moito. Na Sala "Iberia" contáronnos moitas curiosidades sobre os avións, e visitamos a cabina do Jumbo "Lope de Vega", un dos avións máis emblemáticos da historia de España, xa que no ano 1981 trasladou de Nova York a Madrid a obra cume do pintor Pablo Picasso: "O Guernica". E tamén vimos o primeiro ordenador e a lanterna da Torre de Hércules na Sala "Mayúsculas".

Por outra parte, fixemos dous obradoiros moi interesantes. O primeiro deles, para Infantil, 1º e 2º de Primaria, chamábase a "Vidrieira de Peteiro", no que traballamos en equipo amosando a nosa capacidade de observación e de clasificación, a nosa agudeza visual, a memoria e a orientación.

O acueduto aguantou grazas ao traballo en equipo.

 Para 3º, 4º, 5º e 6º de Primaria estaba reservado o "Obradoiro de enxeño", no que manexamos conceptos básicos de enxenería, tensións, esforzos, etc. A través de pezas moi lixeiras con formas diferentes, fomos quenes de construír o emblema da cidade -a Torre de Hércules- e un acueduto, ao tempo que fixemos unha viaxe pola historia ata a época romana.

Xogar, comer e compartir momentos de conversas e sorrisos completaron esta inesquecible excursión!!!
Premendo sobre calquera imaxe podedes ver o resto das fotos desta xornada.

https://photos.app.goo.gl/aygR3dNPiLyJ7ar76



mércores, 22 de maio de 2019

AS LETRAS GALEGAS EN "RADIO ROSIÑA"

Pois non podía faltar o noso programa en "Radio Rosiña" adicado ás Letras Galegas... Para iso, as nenas e nenos de 5º e 6º prepararon un novo programa de "As nosas celebracións", adicado nesta ocasión á data mencionada. E invitaron a ir á Radio ás persoas que recibiron un agasallo a semana pasada, no Concurso de Ilustración e Literario que convocamos cada curso no mes de maio. 
Así que a continuación escoitaredes un programa realizado por Samuel Arosa e Paula Barcia no control técnico, por Mª José e Jorge Otero nos micrófonos, e polas nosas invitadas Laura, Aroa, Paula Maneiro, e o noso invitado Íker Freire. Escoitade atentamente porque merecen moito a pena estas historias:




AS CREACIÓNS PRESENTADAS AO CONCURSO DAS LETRAS GALEGAS

O día que celebramos as Letras Galegas entregamos uns agasallos a catro das persoas que participaron no Concurso Literario que se convocou para que participarades todo o alumnado do cole. Cando publicamos a noticia sobre esta celebración enlazamos tamén eses textos gañadores, pero como nos pareceu que había outros traballos moi interesantes e merecedores tamén dun premio, aquí volos deixamos todos, agrupados por aulas, para que poidades lelos e relelos:

AS ILUSTRACIÓNS DE EDUCACIÓN INFANTIL:


 

OS TEXTOS DE 1º e 2º de PRIMARIA: 



OS TEXTOS DE 3º e 4º de PRIMARIA: 



OS TEXTOS DE 5º e 6º de PRIMARIA: 



Gustáronvos? A cales lle dariades vós un premio? Pois anímovos a facelo: felicitade ás persoas que escribiron esas historias que vos gustan, felicitádeas polo seu traballo, e animádeas a seguir escribindo!!!


martes, 21 de maio de 2019

O DOCE MUNDO DO MEL DE GALICIA

Joel estaba moi guapo vestido de apicultor.





Hoxe estivo no cole Beatriz Ríos Cebreiros, técnica do CRIXP (Consello Regulador da Indicación Xeográfica Protexida Mel de Galicia), que é o organismo encargado de controlar, amparar e certificar o "Mel de Galicia". 
Baixo o título "O doce mundo do mel de Galicia", esta campaña de sensibilización destinada aos nenos e nenas de Primaria procura achegar aos escolares de toda a xeografía galega o fascinante mundo da apicultura e os tesouros ocultos do chamado "ouro doce".
Ademais de contarnos que é o mel, como viven e traballan as abellas nas colmeas, cal é a labor da persoa que se adica á apicultura, etc., Beatriz tamén nos invitou a probar a vestimenta necesaria para traballar coas abellas, ademais de responder ás preguntas que lle fixemos.

E ademais, agasallounos con globos, repartiunos folletos informativos e, o que máis ilusión nos fixo, un botiño de mel de Galicia, que moitas xa probaron e afirmaron que está boísimo!!!

As nenas e nenos do cole lendo as etiquetas do mel que lles entregou Beatriz.
Lembrade que é moi importante ler o etiquetado dos produtos que mercamos!!!

(Premendo sobre a imaxe podedes ver máis fotos desta charla tan interesante)



luns, 20 de maio de 2019

CHARLA INFORMATIVA SOBRE O MEL

Mañá temos unha charla informativa sobre un produto natural con grandes propiedades beneficiosas: o mel.
O mel, fabricado polas abellas a partir do néctar das flores, co que combinan outras substancias propias, almacénano nos panais das colmeas, onde madura antes de ser consumido.
Este produto emprégase dende hai miles de anos en todo o mundo como alimento, como medicamento e como adozante.

Pintura rupestre na Cova da Araña (Bicorp-Valencia), que representa unha persoa recolectando mel dun panal arbóreo.
A actividade humana adicada á crianza e coidado das abellas recibe o nome de apicultura.
Mañá contarannos moitas máis cousas sobre este tema tan interesante, pero para que vos vaiades informando un pouquiño, aquí vos deixo 2 vídeos sobre o funcionamento dunha colmea:





domingo, 19 de maio de 2019

PODCAST DA RADIO GALEGA

OLA!!! Non sei se puidestes escoitar o programa "Diario Cultural" da Radio Galega o pasado 17 de maio... Eu escoiteino e emocioneime moitísimo pensando que moitas das persoas implicadas no traballo de "Radio Rosiña" e da biblioteca do cole estarían moi atentas ao que soaba a través das ondas. E non falo só da xente que está este curso no cole, xa que esta aventura comezou o ano pasado, así que hai varias persoas que deixaron unha pegada importante nela: a sintonía gravárona os grupos de ukelele e guitarra co profe Óscar, manexamos o equipo técnico grazas ás horas de formación que adicaron Javier Prado e Luís Losada (RedEspora), etc. E, por suposto, moitas grazas á Asesoría de Bibliotecas Escolares, que con esta iniciativa ampliou as linguaxes presentes na biblioteca, axudando a promover a expresión oral e o traballo colaborativo, entre outras moitas cousas!

Que bonito ademais que gañemos un concurso cun paxariño de cabeceira... NORABOA unha vez máis ás nenas e nenos de Infantil e á mestra Patricia. Tamén ao resto de colexios que participaron e obtiveron premio coma nós, porque seguro que nos aportarán ideas moi interesantes. Deixo aquí o enlace ao podcast para todas aquelas persoas que queiran escoitalo por primeira, segunda ou vixésima vez!!!



xoves, 16 de maio de 2019

MAÑÁ SAÍMOS NA RADIO GALEGA

Hoxe non temos cole, xa que é un dos días que a Consellería nos concedeu como non lectivos, pero teño que darvos unha noticia moi importante: MAÑÁ SAÍMOS NA RADIO GALEGA!!!! Bueno, sae o programa "O mazarico", que fixeron as nenas e nenos de Infantil en Radio Rosiña e que gañou un dos premios no I Concurso de Podcasts-Radio na Biblio. Imaxino que todas as persoas que nos seguen xa o escoitaron, pero na Radio Galega vai ser a primeira vez que o retransmitan, así que se non queredes perdelo, sintonizade a emisora e estade moi atentas ao "Diario Cultural" de mañá, 17 de maio, ás 14:45. O programa, adicado ao Día das Letras Galegas, falará do concurso, entrevistará a persoas que coordinan a biblioteca de diferentes coles e emitirán os programas gañadores. Podedes ler a noticia da emisión premendo AQUÍ.
Apertas!!!