domingo, 10 de setembro de 2017

BENVIDA AO CURSO 2017-18

Ola, rapaciñas e rapaciños!!!!
Como estades? Que tal vos foi o verán? Estou desexando vervos para que me contedes, aínda que algunhas cousiñas xa as sei, grazas a que teño moi bos informadores! Lembrades o Concurso da Fundación Fernando Blanco de Cee? Miguel Barrul fixera unha fermosa ilustración relacionada cos faros da Costa da Morte, e gañou o 1º Premio da súa categoría. Desde aquí queremos darlle a noraboa, e comparto con todos vós esta boa noticia. Se queredes ler como foi o acto de entrega dos premios, á cal tamén asistiu o noso director Xavier, premede AQUÍ
Polo demais, seguro que desfrutastes moito das festas que caracterizan á nosa comunidade no verán, e despois dun curso adicado á música, posiblemente vos fixastes moito máis nas orquestras, nos bailes, nas voces, etc. Imaxino tamén que moitas/os de vós vos pegastes algún chapuzón no mar, no río ou nunha piscina, aínda que o verán non foi todo o bo que desexariamos para realizar estas actividades. 
En calquera caso, o importante é que veñades con moitas ganas de comezar un novo curso, cheas/os de enerxía para arrancar un novo proxecto e de compartir grandes momentos con todas as persoas que convivimos no cole...
E que vos parece se comezamos con música? Aquí vos traigo unha canción chegada dun dos países máis musicais do mundo: Cuba!!! Está composta por un grupo de rapaces dunha comunidade de Matanzas que desenvolven un proxecto social moi interesante chamado "Maravillas de la Infancia. Cultivadores de sueños". A canción, "Alegría p'a mi gente" é todo un exemplo do que alí fan e transmite enerxía moi positiva, así que aquí vola deixo, para que comecemos o curso con moita alegría!!!

mércores, 28 de xuño de 2017

OS VÍDEOS DO FESTIVAL DE FIN DE CURSO

Pois xa temos aquí os vídeos do festival de fin de curso!!!! Así poderedes lembrar cada unha das actuacións, ou velas por primeira vez se non puidestes asistir á festiña. 
A primeira actuación foi a "Barcarola" de "Os contos de Hoffman", que compuxo Offenbach e que interpretaron as clases de 5º e 6º acompañados por Óscar ao piano:


A continuación subiron "Once damas atrevidas", canción que compuxo Óscar para 1º e 2º, baseándose no conto escrito por Oli e publicado por Kalandraka. E con todas as damas, o grupo de ukeleles e guitarras!!!


Chegou despois o grupo de Infantil, cunha canción tamén baseada nun conto sobre un gatiño. Composta por Susa Herrera, "Coñezo un gatiño" interpretárona co acompañamento de Óscar á guitarra:


A continuación poderedes ver un baile que prepararon por libre Yanira (6º curso), con nenos e nenas de 1º , 2º e 3º (Paula López, Paula Pereira, Brais Capelo, Alba e Joel). Aquí tedes "La bicicleta":


A seguinte actuación foi unha das máis aplaudidas e das que máis ilusión nos facía. Trátase dunha adaptación da historia de "Os músicos de Bremen", que a profe Chus fixo tras a insistencia de Alejandro Villar por representala no festival. Alejandro liounos a todas as persoas que puido para escenificala no escenario, e isto foi o que pasou:


Non hai máis que ver a seguinte actuación para saber que no cole temos un montón de artistas!!! Así nolo cantan as meniñas e meniños de Infantil, "Eu son un artista":


A seguinte actuación foi a de 5º e 6º, cunha coreografía dunha danza polaca: a "Danza da cruz"


Tamén houbo algunha actuación individual. A primeira delas foi a de Andrea Labandeira (6º), que nos interpretou o coñecido tema "Let it be" coa guitarra: 


Os seguintes en aparecer foron os nenos e nenas de 3º e 4º, que representaron a canción "Paco Papán", que compuxo Almudena Janeiro sobre o conto do mesmo título escrito por Patacrúa e publicado por OQO. Para poder velo preme AQUÍ.

En quixeron facer participar ao público, e ocorréuselles que unha boa maneira de facelo era a través do coñecido xogo "Simon says". E sucedeu isto:


Outro tema preparado por libre. Nesta ocasión, as protagonistas son Andrea Labandeira (6º), Soraya e Paula Maneiro (4º), quenes elixiron "Súbeme la radio" para bailalo así:


En 5º e 6º tocaron un arranxo nos instrumentos de placa da canción "Imagine". E para interpretala no festival liaron aos profes Óscar (piano) e David (cantando). E soou así de ben:


A seguinte actuación foi toda unha sorpresa: un monólogo de Rubén (6º) que nos fixo rir a todas as persoas alí presentes. Aquí tedes a este artista:


Continuamos despois cunha canción que é case un himno no noso cole: "Outra coma a de antes", de Héctor Lorenzo. Ademais de admirar a este músico, a canción tamén ten un significado especial para as persoas de 5º e 6º que viaxamos este curso á Ribeira Sacra. E así de bonito o cantaron no festival, acompañadas das guitarras de Rubén e Óscar


3º e 4º preparou un baile moi moderno: "Uptown funk".


Despois chegou a última inspiración sobre contos: "O corazón do xastre". Baseada no conto do mesmo título de Txabi Arnal e publicado por OQO, a canción compúxoa a mestra Susi e interpretárona as nenas e nenos de 5º e 6º acompañados por Óscar ao piano:


Tamén o profesorado preparou unha canción coa que quixo mencionar unha das cousas que máis practicamos e valoramos no centro: abrazarnos!!! Por iso elixiu este fermoso tema de Magín Blanco, que cantaron acompañados de Óscar á guitarra, a "Rumba das apertas"


E rematou o festival cunha canción moi divertida a cargo dos grupos de 1º e 2º: "Estou na lavadora", para marchar moi contentos/as, sacudir todas as morriñas, rockandrollear e desfrutar do verán. 


Esperamos que vos gustara tanto como a nós. BO VERÁN A TODAS AS PERSOAS QUE NOS VISITAN!!! VÉMONOS EN SETEMBRO!!!!

martes, 27 de xuño de 2017

FESTIVAL DE FIN DE CURSO

Pois coa celebración dun festival despedimos este curso 2016-17 e, como non podía ser doutra maneira, con música!!! E xa que nesta ocasión foi tamén a música a protagonista do proxecto anual deste curso, pensamos que estaría moi ben telo en conta para pechar a nosa Musiteca. Por ese motivo, cada grupo elixiu un conto sobre o que aprendeu unha canción que interpretou no festival. Pero tamén quedou oco para facer outras cousiñas que nos foron anunciando as/os magníficas/os presentadoras/es de 6º: bailes que montaron en pequenos grupos algunhas das alumnas e alumnos no seu tempo libre, cancións moi divertidas, acompañamentos instrumentais de temas coñecidos por todos nós, unha canción preparada polo profesorado, e mesmo unha representación teatral na que o gran protagonista foi Alejandro Villar!!! 
Coas imaxes e os vídeos desta xornada despedímonos de todos vós, desexándovos que pasedes un BO VERÁN e que vos carguedes ben de ENERXÍA para comezar en setembro unha nova aventura!!!


venres, 23 de xuño de 2017

O SANCOSMEIRO E A GUÍA DE LECTURA DE VERÁN

Pois aquí vos presentamos "O Sancosmeiro" nº 30, a nosa revista anual. Hoxe levástela para os vosos fogares, pero tamén queremos que poidades acceder a ela desde o blogue da biblioteca, e así tamén poden vela as persoas que poidan estar interesadas nela: alumnado que comezou en Secundaria, mestres e mestras que marcharon para outros centros, persoas que nos visitaron ao longo do curso, etc. 



Xunto coa revista tamén se entregou a Guía de Lectura para o verán, na que ademais de libros podedes atopar CD's ou libros con CD. Espero que vos guste moito!!!!


venres, 9 de xuño de 2017

UNHA SESIÓN DE ROCK CON VÍCTOR DE LAXE

Víctor de Laxe é un marabilloso rapaz de Laxe que visitou o noso centro este venres. Ademais, Víctor é un músico profesional namorado do rock, e por iso aceptou a invitación que lle fixemos: facer un percorrido pola historia deste estilo musical. 
Foi así como, a través de vídeos e de pequenos fragmentos musicais que tocaba o propio Víctor (coa guitarra, o baixo ou a harmónica) puidemos ver e escoitar como evolucionou o rock desde os seus comezos ata agora. E incluso nos amosou como se baila o rock and roll, aínda que aquí o público amosouse un pouquiño tímido... 
Tamén cantamos con Víctor as cancións que nos propuxo ter preparadas ("La plaga" e "Rock del primitivo"), aínda que ao final moitas das nenas e nenos conseguiron que o noso invitado tocara os acordes de cancións que coñecían moito mellor.
E rematamos baixando ao patio para montar unha curta batukada, xa que o tempo non deu para máis. Que ben o pasamos!!! Moitas grazas por vir, Víctor!!! Esperamos que marcharas coa mesma satisfacción coa que nos deixaches a todos nós aquí. 
E como seguro que queredes ver as imaxes dese día, podedes premer AQUÍ.

mércores, 7 de xuño de 2017

XA SOAN OS PROXECTOS DESTE CURSO

Pois si, nesta ocasión os proxectos dan ganas de lelos, pero tamén de escoitalos, xa que son moitas as obras musicais ás que fan referencia. Comezando por Infantil, que se centraron na figura do grande MOZART, aínda que tamén incluíron moitos dos momentos máis musicais do curso. Aquí tedes o seu fermoso traballo:



Na aula de Pedagoxía Terapéutica tamén traballaron moito e preséntannos un traballo sorprendente, que queremos tamén que poidades ver aquí. Seguro que hai un montón de cousas que descoñeciades e que vos deixan marabillados/as:



Na aula de inglés investigaron sobre os Beatles, e reuniron toda a información nun traballo moi atractivo. Non volo perdades:



Tamén en 1º e 2º traballaron moito!!! Nestes grupos centraron a súa atención en coñecer en profundidade dous instrumentos que se instalaron entre nós durante este curso: o ukelele e a guitarra, cos que tanto practicaron grazas ao profe Óscar. Mirade cantas cousas saben destes dous instrumentos de corda:





 
Nas aulas de 3º e 4º recolleron información sobre a orquestra sinfónica, e presentánnola neste traballo:



En 5º e 6º deseñaron o percorrido que quixeron investigar, e xurdiu un traballiño no que hai un remexolo de todo: épocas da historia da música, compositores, instrumentos... Tedes tamén aquí o resultado de todo iso que quixeron aprender:


luns, 5 de xuño de 2017

DÍA MUNDIAL DO MEDIO AMBIENTE

O 5 de xuño é o "Día Mundial do Medio Ambiente", unha data establecida pola ONU para sensibilizar á poboación mundial en relación a temas ambientais. Cada ano, ademais, elíxese un país anfitrión e un tema central sobre o que se realizan actividades en todo o mundo. No 2017 foi a quenda de Canadá, e o tema "Conectar ás persoas coa natureza". 
Así trataron tamén de conectarnos esta mañá nun espectáculo ao que nos invitou o Concello de Santa Comba. Os Monicreques de Kukas representaron, no Auditorio do Edificio Multiusos, a historia "O encoro enmeigado". A través dos seus personaxes, inspirados na vida real e nos seres fantásticos asociados a moitas das lendas da nosa cultura, puidemos descubrir que, como ben di o avó Marcelino, "O progreso non é malo, pero hai que construír o menos posible e respectando e sen danar á Natureza".
Desfrutamos moito con este espectáculo desta compañía creada en 1979 por Marcelino de Santiago "Kukas" e Isabel Rei, a máis antiga de Galicia e tamén unha das máis destacadas. 
Todas as persoas que asistimos á representación desfrutamos dunha posta en escena moi fermosa e coidada (as luces, a música, os movementos dos monicreques...), polo que felicitamos á compañía polo seu traballo e agradecemos ao Departamento de Cultura e Medio Ambiente de Santa Comba pola súa invitación.
Podedes ver as fotos desta mañá premendo AQUÍ.

 

domingo, 4 de xuño de 2017

UNHA XORNADA DE CONVIVENCIA MOI MUSICAL

Non podía ser doutra maneira!!! Despois dun curso no que a maior parte das actividades xiraron arredor do tema da música, a nosa musiteca está a punto de pechar as súas portas. Esta semana rematou coa "Xornada de Convivencia", un día que adicamos a compartir todos/as xuntos/as: nenos e nenas, nais e pais, avoas e avós, mestras e mestres... Nesta ocasión celebrámola en Santiago de Compostela. A primeira parada fixémola na Granxa do Xesto, situada na ladeira do Monte Pedroso. Alí, ademais de xogar, visitar os estanques e escoitar o concerto das ras, xantamos desfrutando tamén da tranquilidade deste espazo natural que reúne as características de parque e de bosque.
Despois, baixamos ata a Fundación SGAE, onde asistimos a un espectáculo ofrecido por Títeres Cachirulo en exclusiva para nós: "Pinocho", baseado no coñecido conto de Carlo Collodi. Ao rematar fomos dando un paseo ata o Auditorio de Galicia, onde asistimos a un dos espectáculos que máis ilusión nos facía: a "Novena Sinfonía" de Beethoven, interpretada pola Real Filharmonía de Galicia e o Orfeón Terra A Nosa. Este foi o motivo principal á hora de organizar esta xornada, porque: 
-a Novena Sinfonía de Beethoven é unha das obras máis importantes da historia da música; 
-escoitar unha orquestra en directo é marabilloso, e ademais na Filharmonía coñecemos a algúns dos seus integrantes, sobre todo a Luis Soto, o frautista que visitou o noso cole por Santa Cecilia;
-se ademais da música instrumental tamén hai música vocal, e dentro dos membros do coro está o profe Óscar, que máis podemos pedir para pechar o noso proxecto "Bailemos na musiteca"? 
Foi todo un auténtico luxo compartir esta experiencia na xornada de convivencia, emotivo tamén porque se trataba dun concerto solidario, adicado a visibilizar o traballo que realiza a Asociación Galega de Heteroplasia Ósea Progresiva para avanzar na investigación desta enfermidade ultrarrara e dexenerativa. 
O director, Paul Daniel, conseguiu tamén facer partícipe ao público deste momento, invitándonos a cantar co coro, cos solistas e coa orquestra a popular versión da "Oda á alegría" de Miguel Ríos. 
E ao rematar o concerto, fomos felicitar a Óscar e a Luis. E entre saúdos e felicitacións, xuntámonos para facer unha foto espectacular: todas as persoas xuntas, ás que se sumaron algunhas moi coñecidas pola comunidade educativa (Pili, mestra no cole durante moitos anos e á que seguimos lembrando tantas veces!;Vera, quen estivo no noso centro ensinándonos danzas húngaras o curso pasado), así como Óscar, Luis e o mesmo Paul Daniel! Premendo AQUÍ podedes ver as imaxes desta xornada.


A Novena de Beethoven, símbolo da liberdade, herdanza espiritual da humanidade... XA FORMA PARTE DA NOSA HISTORIA!!!!

martes, 30 de maio de 2017

EXCURSIÓN DE 5º E 6º NA RIBEIRA SACRA

Este curso, ao ser tan pouquiñas as persoas que cursan 6º de Primaria, á excursión de fin de etapa sumouse tamén o grupo de 5º. As seis persoas que nos apuntamos (Rubén, Andrea Labandeira, Yanira, Iria, Miriam e Andrea Carballo), acompañadas dos mestres Óscar e Susi, pasamos tres días na Ribeira Sacra desfrutando da natureza, de xogos en grupo e da compañía das persoas que nos recibiron na Fábrica da Luz: Sara, Óscar, Iván, Carmen e Sara. A todas elas queremos agradecer que nos fixeran pasar uns días estupendos e inolvidables, nos que botamos moito de menos a quenes non puideron vir con nós: Ainhoa, Álex e Iria.
Fixemos moitísimas fotos. Para ver as do primeiro día, premede AQUÍ.
As do segundo día, marcadas pola ilusión de montar en kayak polo río Mao ata a súa desembocadura no Sil, podedes velas premendo AQUÍ.


O terceiro día visitamos os Balcóns de Madrid, pero tamén fixemos un roteiro no que descubrimos moitas outras cousas que podedes ver premendo AQUÍ.


mércores, 24 de maio de 2017

MUSICAL NA CASA DA CULTURA DE A PICOTA

Onte viaxamos ata A Picota para asistir a un espectáculo fantástico: "Os Rockenstein", unha obra teatral representada polo grupo Malasombra. Nela, catro actores deron vida aos personaxes deste musical no que o doutor Rockentain é un grande profesor, científico e inventor, pero tamén un melómano consciente de que a boa música está desaparecendo. Para poñerlle remedio, decide crear no seu laboratorio unha criatura co fin de convertila nunha estrela musical cuxa misión será salvar ao mundo da desaparición do rock. Teatro, música e humor fusionáronse neste espectáculo ao que asistimos todo o centro excepto o alumnado de 5º e 6º, que se atopaban na Ribeira Sacra, onde viaxaron de excursión de fin de etapa. Premede AQUÍ para ver todas as fotos.


venres, 19 de maio de 2017

CELEBRAMOS OS MAIOS E AS LETRAS GALEGAS

Xa estamos de cheo na primavera!!! E no mes de maio hai unha data moi importante para celebrar na nosa comunidade: o Día das Letras Galegas. As persoas que convivimos no noso cole comunicámonos en galego, estamos orgullosas do noso idioma, asistimos a eventos culturais na nosa lingua... Este 17 de maio estivo adicado á figura de Carlos Casares quen, ademais de escritor, estivo moi unido ao mundo da educación, xa que tamén exerceu como mestre. Neste curso propuxemos un cambio no concurso que celebramos cada ano, animándovos a deseñar carteis que anunciaran esta festa ou a dos Maios, xa que quixemos unir os dous eventos nun fermoso 19 de maio. E así de bonito foi:
-primeiro, saímos ao patio para montar o noso maio, que nesta ocasión levou ata castañas!;


-despois, cantamos "Este é o Maio". Ademais das claves, Óscar encargouse de que soase tamén a guitarra eléctrica acompañando as nosas voces;


-por último, entregamos os premios, fixemos moitas fotos e démonos un montón de abrazos!!!

O Premio especial foi para Álex Otero, de 6º curso de Primaria, quen fixo un cartel anunciando as Letras Galegas no que incluíu un debuxo de Carlos Casares:


En Infantil o premio foi para Ángel Grille, que elaborou un fermoso cartel sobre a obra "A galiña azul" de Carlos Casares:


En e 2º o premio foi para Mai Villar, que elaborou un fermoso cartel anunciando a celebración dos Maios:


En 3º e recolleu o premio Paula Maneiro

En 5º e , a premiada foi Andrea Labandeira, que tamén presentou un orixinal cartel sobre a celebración dos Maios:




martes, 16 de maio de 2017

PERSOAS CHEAS DE VIDA!!!

Que maneira tan fermosa de homenaxear o Día das Letras Galegas!!! A raíz dun curso celebrado en Ferrol sobre o coro escolar, decidiuse xuntar a máis de 1000 nenos e nenas de varios centros desta comarca, coa finalidade de estimular a creación deste grupo de agrupacións musicais a partir do repertorio de músicos galegos actuais. A canción elixida para estrear tan emocionante iniciativa foi "Cheas de vida", que interpreta GUADI GALEGO, xunto con GUILLE FERNÁNDEZ á guitarra, no seu disco "Lúas de outubro e novembro". Baixo a dirección de RAMÓN BERMEJO, 1000 nenos e nenas reuníronse nunha nave do estaleiro de "Navantia" para gravar esta fermosa e emocionante experiencia. Tedes que ver o vídeo!!! E propóñovos tamén aprender a canción e, coma sempre, que non deixedes de cantar!!! 


mércores, 10 de maio de 2017

VIAXE Á IDADE MEDIA

Hai un par de semanas liamos varios textos na "Hora de Ler" sobre a música na Idade Media. Ademais de coñecer a música popular dos trobadores e dos xograres, tamén puidemos achegarnos ao canto gregoriano, que soaba nas igrexas e catedrais desde o século V ata o XV. 

Este martes puidemos imaxinar tamén como sería a vida nalgúns dos edificios máis representativos desa época. Para isto viaxamos ata dous concellos moi achegados ao noso: o de Vimianzo e o de Zas. No primeiro fixemos unha parada no Castelo, onde Manuel nos foi contando a súa historia ao tempo que nos amosaba algunhas das partes máis importantes do mesmo (o foxo, as torres, o patio de armas, os fortes muros, os escudos, as ventás para disparar frechas, etc.).
O castelo foi construído entre finais do século XII e comezos do XIII polos Mariño de Lobeira. Da primitiva fortaleza soamente quedan os restos do que puido ser unha torre do homenaxe no actual patio de armas. A comezos do século XV pasa a mans da familia Moscoso, quenes conseguirán o título de Condes de Altamira, chegando a converterse nunha das familias nobiliarias con máis influencia da Península.
No século XV prodúcense as Guerras Irmandiñas nas que o pobo, cansado das opresións económicas dos señores feudais, toman esta fortaleza. O Arzobispo de Santiago Alonso II de Fonseca apodérase do castelo, pero uns anos máis tarde, Lope Sánchez de Moscoso, Conde de Altamira, volverá a Galicia para recuperar a súa propiedade, polo que pertencerá a esta familia ata o século XIX. 
No ano 1870 é adquirido por Ramón Martelo Núñez, presidente da Deputación da Coruña, e o seu fillo, o poeta Evarito Martelo restáurao para convertelo na súa residencia de verán. En 1965 o edificio sofre un devastador incendio, e posteriormente Dolores Martelo de la Maza lega esta propiedade ao Arzobispado de Santiago, que en 1973 a venderá á Deputación de A Coruña.  
A Deputación rehabilitouno, e actualmente está xestionado polo Concello de Vimianzo. A fortaleza de orixe medieval atópase en moi bo estado de conservación e está convertida nun museo de artesanía en vivo no que todo o ano se poden contemplar palilleiras, artesás do liño, cestería, prata e vidro, olería de Buño, coiro e maquetas de barcos, con exposicións permanentes destos traballos artesanais. 
Podedes ver todas as fotografías premendo AQUÍ.

E despois, sen deternos, cambiamos de concello, para ir ata a parroquia de O Allo, en Zas. Aquí agardábannos Os Quinquilláns, quenes se encargaron de trasladarnos á vida nas Torres do Allo, un dos pazos máis antigos de Galicia. Os Quinquilláns interpretaron os personaxes de Francisca Riobóo e Víctor López Seoane, un dos personaxes máis famosos que habitou o pazo. Este naturalista foi tal vez o que tivo a idea de facer unha entrada ás Torres entre árbores que medran ás dúas marxes da estrada: carballos e pradairos, entre outras, forman un fermoso corredor que onte lucía espectacular.
Os Quinquilláns explicáronnos algunhas das actividades que se realizarían neste pazo durante esa época: os tributos que pagaban os campesiños, a organización da casa, como elaboraban o pan, entre outras cousas. E case contratan a algún dos rapaciños do cole para comezar a traballar no pazo como panadeiro!!! Para ver todas as fotos, premede AQUÍ.
Tamén podedes ler a noticia publicada no xornal "La Voz de Galicia" (edición de Carballo), para a cal nos retratou o fotógrafo José Manuel Casal, premendo AQUÍ.
Desde o C.E.I.P. Víctor Sáenz queremos agradecer a invitación que o Concello de Zas nos fixo para coñecer esta parte da nosa historia, facilitándonos incluso o transporte.

martes, 9 de maio de 2017

O CARBALLO DO ADRO DE SAN COSME

Suso Jurjo é o técnico de cultura do concello de Mazaricos. No cole coñecémolo, sobre todo, porque nos recibe na Casa da Cultura de A Picota cada vez que asistimos a algún espectáculo alí programado. O pasado 29 de abril, no diario dixital da Costa da Morte "Que pasa na costa" publicaron un artigo escrito por Suso, no que fala sobre o carballo do adro de San Cosme de Antes, a parroquia na que estamos nós!!!! Nel, Suso cóntanos que este marabilloso carballo, que pode chegar aos 300 anos, posúe un tronco de tres metros e medio de perímetro, e cada unha altura de tres metros e trinta centímetros. É tamén espello das estacións: "no inverno íspese para que os ventos en vez de bourear o seu respectable corpo, asubíen melancólicas baladas. Pero na primavera engalánase cun verdecente mantelo estampado de formas polilobuladas que sombrea e refresca o adro parroquial nos calorosos días do verán".
Tamén podemos coñecer algunhas lendas que relacionan este carballo coa mitoloxía, así como todo aquelo que ofrecía á comunidade: alimento (as landras), abrigo (a súa madeira ardía quentando os fogares), xogo (cos seus bugallos xogábase como ás canicas), etc. 
Podedes ler todo o artigo premendo AQUÍ.

sábado, 6 de maio de 2017

HÉCTOR LORENZO

A segunda visita desta semana foi a de Héctor Lorenzo. Este marabilloso músico, que xa nos visitara no 2014, veunos presentar un traballo moi fermoso que naquela ocasión todavía estaba iniciando: "Cousas de papá". Este libro de poemas, escritos por Raúl Gómez Pato e ilustrados por Blanca Barrio, foron musicados polo noso invitado desta mañá. 
"Cousas de papá" é divertido, imaxinativo e musical. Conta a historia dun pai e dunha nena... Non, mellor non... Conta a historia dun pai e dun neno... Tampouco... Non conta ningunha historia. "Cousas de papá" é un libro de poemas escritos por un pai algo tolo e moi divertido, que viaxa en vasoria, constrúe hidroavións de papel, escorrenta os pesadelos e domina á perfección a linguaxe da fantasía. 
Pasámolo moi ben esta mañá, a través da música e da poesía, xogando cos versos, escoitando a Héctor... Moitísimas grazas por vir, por cantarnos tan bonito e por tratarnos con tanto cariño!!!
Premede AQUÍ para ver todas as imaxes e os vídeos que fixemos na nosa biblioteca!

SERVANDO BARREIRO, "O BARDO ABELARDO"

Esta semana estivo marcada por dúas visitas moi especiais. A primeira delas chegounos da man do Consorcio Editorial, a través de Narciso, quen nos propuxo traer ao cole a Servando Barreiro. Servando preséntase como "O Bardo Abelardo", un músico e contador de historias, ao estilo dos antigos bardos, que eran os antigos poetas celtas que cantaban as fazañas dos heroes e dos deuses, recollían as tradicións, etc.
Os seus espectáculos combinan a nosa rica tradición cultural con historias máis actualizadas para sensibilizar aos máis novos coa música, a poesía e a defensa e coidado do medio a través dos contos e as cantigas.
Pero nesta ocasión, inaugurando o "Mes das Letras", quixo tamén render homenaxe a Carlos Casares no ano no que se lle adica o día das Letras Galegas 2017: a partir dunha presentación sobre o escritor, o Bardo Abelardo foinos levando por algunhas das súas obras máis coñecidas, presentándonos a Leoncio, o inventor da bomba da Felicidade, e outras historias máis, adaptadas tamén para podelas cantar acompañados da súa concertina
Ademais da imaxe que podedes ver aquí, podedes ver o resto das fotos e ver os vídeos desta tarde premendo AQUÍ.
E se queredes coñecer máis a Servando Barreiro, visitade o seu blogue premendo AQUÍ.

xoves, 4 de maio de 2017

MAIO, MES DAS LETRAS


https://sites.google.com/view/carlos-casares/p%C3%A1gina-principal

Aquí tedes a CARLOS CASARES, o autor homenaxeado este ano polo Día das Letras Galegas. Seguro que nas aulas xa estades coñecendo a súa obra, ou sabendo cousiñas sobre a súa vida.
Tamén eu quero deixarvos varios enlaces interesantes sobre este tan querido escritor. Se premedes sobre a imaxe, atoparedes unha listaxe (en google sites) a través da cal podedes acceder a xogos, vídeos, cancións, contos, etc.
Seguro que o pasades moi ben, así que: A QUE
ESPERADES PARA ENTRAR?

luns, 1 de maio de 2017

DO, RE, MI, MOZART XOGA AQUÍ

Títeres CachiruloA compañía "Títeres Cachirulo" instalou o seu escenario na nosa biblioteca. Con motivo das actividades adicadas ao Día do Libro, trouxemos un espectáculo de marionetas moi musical: "Do, re, mi, Mozart xoga aquí". As marionetas de fío talladas en madeira cóntannos como recibe o neno Mozart a invitación do emperador para tocar en Palacio. Isto esperta a envexa e desconfianza do mestre de cámara, que intentará impedir a celebración do concerto. Pero este neno, vivaz e alegre, sedúceo coa súa xenialidade musical, incorporada nos seus xogos e quefaceres cotiáns.
Este espectáculo, que xa leva varios anos coa compañía, levou o Premio ao Mellor Espectáculo de Marionetas no 4º Festival Iberoamericano de Teatro "Cumbre de las Américas", celebrado no 2008 en Arxentina.
E eu, que estiven observándovos desde que comezaron a aparecer os distintos personaxes sobre o escenario ata que rematou a historia, podo asegurar que no cole desfrutamos moitísimo con esta aventura a través das marionetas manipuladas por Jorge Rey e Carmen Domech, que nos tiveron totalmente hipnotizados durante algo máis de 1 hora. Manipuladas e creadas, xa que eles mesmos son os encargados do seu deseño e a súa elaboración!!!
Ademais de entreternos moitísimo con esta historia, tamén nos brindaron a oportunidade de ver a parte de atrás do escenario, onde colocan as marionetas, contándonos como as manexan e mesmo permitíndonos que nós mesmos as probaramos. 
Foi todo un pracer para nós; esperamos que tamén Jorge e Carmen leven un bo recordo do noso centro e volvan visitarnos en máis ocasións.
Seguro que queredes ver as fotos!!! Pois premede AQUÍ!!!

martes, 25 de abril de 2017

DÍA DO LIBRO

O 23 de abril celébrase o Día Mundial do Libro. Nesta ocasión, ao coincidir cun domingo, decidimos adiantarnos o venres á celebración, aínda que algunhas das actividades programadas prolongaranse ata a semana que vén. 
Este é o cartel no que se anuncian as actividades colectivas:



Durante a tarde desenvolvemos parte delas. Xuntámonos no patio do cole para ler o poema que cada ano por esta data edita a Consellería de Cultura, Educación e Ordenación Universitaria. Nesta ocasión, o texto é de Rosalía Fernández Rial, unha poeta que nos leva co libro ao mundo da palabra e da música! Podedes lelo aquí:



Despois, cantamos xuntos a canción "O libro máxico", do grupo Migallas, que rematamos cos abrazos que tanto nos gusta dar e recibir!!! Ademais, nesta ocasión puidemos compartilos tamén con Joaquín Castaño, que pasou a mañá connosco, facendo varias sesións de mindfulness nos diferentes niveis educativos.

E por último chegou o momento dos apadriñamentos e amadriñamentos lectores. O día tan espléndido que tivemos permitiu que tiveramos unha grande oferta de espazos nos que poder desenvolver as lecturas elixidas: as sombras do patio, as aulas, a sala de profes, as escaleiras... Coma sempre, desfrutamos moito deste ratiño léndonos, ao que nesta ocasión engadimos a creación de ilustracións sobre as historias que tiveron a sorte de ser elixidas. Quedaron todas moi fermosas!!! Podedes velas no "Punto de merenda" da biblioteca ou premendo AQUÍ.

E sei que andades tamén deseñando os vosos marcapáxinas. Estou desexando velos!!! Mentras tanto, podedes ir vendo as fotiños que fixemos durante esta xornada tan especial premendo AQUÍ.

luns, 24 de abril de 2017

RECIBIMOS A JOAQUÍN CASTAÑO

JOAQUÍN CASTAÑO é responsable da Escola Internacional de Ioga en Galicia e nas Illas Baleares. A súa paixón por introducir o ioga e a meditación no ámbito da educación levouno a formarse como mestre de ioga para nenos/as e desarrollou varios programas en colexios e centros galegos, ademais de impartir formación a docentes.
Este curso, os mestres e mestras do cole estamos levando a cabo un grupo de traballo sobre Mindfulness. O mindfulness, tamén coñecido como conciencia plena, é unha das maneiras de practicar a meditación.
Diversos estudos demostran que a práctica de mindfulness pode convertirse nunha ferramenta para mellorar a calidade de vida das persoas en moitísimos aspectos: autocontrol, saúde, adaptación a situacións adversas, etc.
Por este motivo, quixemos invitar a Joaquín a realizar un obradoiro coas nenas e nenos do cole. E con ese obxectivo nos visitou o venres, 21 de abril. Ao longo da mañá, Joaquín compartiu ratos moi agradables nos diferentes grupos, desde Infantil ata 6º de Primaria, traballando en pequenos grupos algunhas das actividades que podemos incluír na nosa vida diaria. Unha delas tamén a practicamos no comedor, xuntándonos todas as persoas para adicar uns minutos á respiración, tratando de concentrar toda a atención neste acto indispensable para a vida.
O resultado foi moi positivo! Tanto que todas as persoas que participamos nesta xornada queremos repetir!!! JOAQUÍN, MOITÍSIMAS GRAZAS!!! A través das imaxes realizadas durante esta mañá podedes comprobar o moito que significou incluír esta actividade na rutina escolar (premede AQUÍ para velas). O noso desexo agora é que continúe e que tamén se vaia instalando nos fogares das familias do noso alumnado...