venres, 19 de maio de 2017

CELEBRAMOS OS MAIOS E AS LETRAS GALEGAS

Xa estamos de cheo na primavera!!! E no mes de maio hai unha data moi importante para celebrar na nosa comunidade: o Día das Letras Galegas. As persoas que convivimos no noso cole comunicámonos en galego, estamos orgullosas do noso idioma, asistimos a eventos culturais na nosa lingua... Este 17 de maio estivo adicado á figura de Carlos Casares quen, ademais de escritor, estivo moi unido ao mundo da educación, xa que tamén exerceu como mestre. Neste curso propuxemos un cambio no concurso que celebramos cada ano, animándovos a deseñar carteis que anunciaran esta festa ou a dos Maios, xa que quixemos unir os dous eventos nun fermoso 19 de maio. E así de bonito foi:
-primeiro, saímos ao patio para montar o noso maio, que nesta ocasión levou ata castañas!;


-despois, cantamos "Este é o Maio". Ademais das claves, Óscar encargouse de que soase tamén a guitarra eléctrica acompañando as nosas voces;


-por último, entregamos os premios, fixemos moitas fotos e démonos un montón de abrazos!!!

O Premio especial foi para Álex Otero, de 6º curso de Primaria, quen fixo un cartel anunciando as Letras Galegas no que incluíu un debuxo de Carlos Casares:


En Infantil o premio foi para Ángel Grille, que elaborou un fermoso cartel sobre a obra "A galiña azul" de Carlos Casares:


En e 2º o premio foi para Mai Villar, que elaborou un fermoso cartel anunciando a celebración dos Maios:


En 3º e recolleu o premio Paula Maneiro

En 5º e , a premiada foi Andrea Labandeira, que tamén presentou un orixinal cartel sobre a celebración dos Maios:




martes, 16 de maio de 2017

PERSOAS CHEAS DE VIDA!!!

Que maneira tan fermosa de homenaxear o Día das Letras Galegas!!! A raíz dun curso celebrado en Ferrol sobre o coro escolar, decidiuse xuntar a máis de 1000 nenos e nenas de varios centros desta comarca, coa finalidade de estimular a creación deste grupo de agrupacións musicais a partir do repertorio de músicos galegos actuais. A canción elixida para estrear tan emocionante iniciativa foi "Cheas de vida", que interpreta GUADI GALEGO, xunto con GUILLE FERNÁNDEZ á guitarra, no seu disco "Lúas de outubro e novembro". Baixo a dirección de RAMÓN BERMEJO, 1000 nenos e nenas reuníronse nunha nave do estaleiro de "Navantia" para gravar esta fermosa e emocionante experiencia. Tedes que ver o vídeo!!! E propóñovos tamén aprender a canción e, coma sempre, que non deixedes de cantar!!! 


mércores, 10 de maio de 2017

VIAXE Á IDADE MEDIA

Hai un par de semanas liamos varios textos na "Hora de Ler" sobre a música na Idade Media. Ademais de coñecer a música popular dos trobadores e dos xograres, tamén puidemos achegarnos ao canto gregoriano, que soaba nas igrexas e catedrais desde o século V ata o XV. 

Este martes puidemos imaxinar tamén como sería a vida nalgúns dos edificios máis representativos desa época. Para isto viaxamos ata dous concellos moi achegados ao noso: o de Vimianzo e o de Zas. No primeiro fixemos unha parada no Castelo, onde Manuel nos foi contando a súa historia ao tempo que nos amosaba algunhas das partes máis importantes do mesmo (o foxo, as torres, o patio de armas, os fortes muros, os escudos, as ventás para disparar frechas, etc.).
O castelo foi construído entre finais do século XII e comezos do XIII polos Mariño de Lobeira. Da primitiva fortaleza soamente quedan os restos do que puido ser unha torre do homenaxe no actual patio de armas. A comezos do século XV pasa a mans da familia Moscoso, quenes conseguirán o título de Condes de Altamira, chegando a converterse nunha das familias nobiliarias con máis influencia da Península.
No século XV prodúcense as Guerras Irmandiñas nas que o pobo, cansado das opresións económicas dos señores feudais, toman esta fortaleza. O Arzobispo de Santiago Alonso II de Fonseca apodérase do castelo, pero uns anos máis tarde, Lope Sánchez de Moscoso, Conde de Altamira, volverá a Galicia para recuperar a súa propiedade, polo que pertencerá a esta familia ata o século XIX. 
No ano 1870 é adquirido por Ramón Martelo Núñez, presidente da Deputación da Coruña, e o seu fillo, o poeta Evarito Martelo restáurao para convertelo na súa residencia de verán. En 1965 o edificio sofre un devastador incendio, e posteriormente Dolores Martelo de la Maza lega esta propiedade ao Arzobispado de Santiago, que en 1973 a venderá á Deputación de A Coruña.  
A Deputación rehabilitouno, e actualmente está xestionado polo Concello de Vimianzo. A fortaleza de orixe medieval atópase en moi bo estado de conservación e está convertida nun museo de artesanía en vivo no que todo o ano se poden contemplar palilleiras, artesás do liño, cestería, prata e vidro, olería de Buño, coiro e maquetas de barcos, con exposicións permanentes destos traballos artesanais. 
Podedes ver todas as fotografías premendo AQUÍ.

E despois, sen deternos, cambiamos de concello, para ir ata a parroquia de O Allo, en Zas. Aquí agardábannos Os Quinquilláns, quenes se encargaron de trasladarnos á vida nas Torres do Allo, un dos pazos máis antigos de Galicia. Os Quinquilláns interpretaron os personaxes de Francisca Riobóo e Víctor López Seoane, un dos personaxes máis famosos que habitou o pazo. Este naturalista foi tal vez o que tivo a idea de facer unha entrada ás Torres entre árbores que medran ás dúas marxes da estrada: carballos e pradairos, entre outras, forman un fermoso corredor que onte lucía espectacular.
Os Quinquilláns explicáronnos algunhas das actividades que se realizarían neste pazo durante esa época: os tributos que pagaban os campesiños, a organización da casa, como elaboraban o pan, entre outras cousas. E case contratan a algún dos rapaciños do cole para comezar a traballar no pazo como panadeiro!!! Para ver todas as fotos, premede AQUÍ.
Tamén podedes ler a noticia publicada no xornal "La Voz de Galicia" (edición de Carballo), para a cal nos retratou o fotógrafo José Manuel Casal, premendo AQUÍ.
Desde o C.E.I.P. Víctor Sáenz queremos agradecer a invitación que o Concello de Zas nos fixo para coñecer esta parte da nosa historia, facilitándonos incluso o transporte.

martes, 9 de maio de 2017

O CARBALLO DO ADRO DE SAN COSME

Suso Jurjo é o técnico de cultura do concello de Mazaricos. No cole coñecémolo, sobre todo, porque nos recibe na Casa da Cultura de A Picota cada vez que asistimos a algún espectáculo alí programado. O pasado 29 de abril, no diario dixital da Costa da Morte "Que pasa na costa" publicaron un artigo escrito por Suso, no que fala sobre o carballo do adro de San Cosme de Antes, a parroquia na que estamos nós!!!! Nel, Suso cóntanos que este marabilloso carballo, que pode chegar aos 300 anos, posúe un tronco de tres metros e medio de perímetro, e cada unha altura de tres metros e trinta centímetros. É tamén espello das estacións: "no inverno íspese para que os ventos en vez de bourear o seu respectable corpo, asubíen melancólicas baladas. Pero na primavera engalánase cun verdecente mantelo estampado de formas polilobuladas que sombrea e refresca o adro parroquial nos calorosos días do verán".
Tamén podemos coñecer algunhas lendas que relacionan este carballo coa mitoloxía, así como todo aquelo que ofrecía á comunidade: alimento (as landras), abrigo (a súa madeira ardía quentando os fogares), xogo (cos seus bugallos xogábase como ás canicas), etc. 
Podedes ler todo o artigo premendo AQUÍ.

sábado, 6 de maio de 2017

HÉCTOR LORENZO

A segunda visita desta semana foi a de Héctor Lorenzo. Este marabilloso músico, que xa nos visitara no 2014, veunos presentar un traballo moi fermoso que naquela ocasión todavía estaba iniciando: "Cousas de papá". Este libro de poemas, escritos por Raúl Gómez Pato e ilustrados por Blanca Barrio, foron musicados polo noso invitado desta mañá. 
"Cousas de papá" é divertido, imaxinativo e musical. Conta a historia dun pai e dunha nena... Non, mellor non... Conta a historia dun pai e dun neno... Tampouco... Non conta ningunha historia. "Cousas de papá" é un libro de poemas escritos por un pai algo tolo e moi divertido, que viaxa en vasoria, constrúe hidroavións de papel, escorrenta os pesadelos e domina á perfección a linguaxe da fantasía. 
Pasámolo moi ben esta mañá, a través da música e da poesía, xogando cos versos, escoitando a Héctor... Moitísimas grazas por vir, por cantarnos tan bonito e por tratarnos con tanto cariño!!!
Premede AQUÍ para ver todas as imaxes e os vídeos que fixemos na nosa biblioteca!

SERVANDO BARREIRO, "O BARDO ABELARDO"

Esta semana estivo marcada por dúas visitas moi especiais. A primeira delas chegounos da man do Consorcio Editorial, a través de Narciso, quen nos propuxo traer ao cole a Servando Barreiro. Servando preséntase como "O Bardo Abelardo", un músico e contador de historias, ao estilo dos antigos bardos, que eran os antigos poetas celtas que cantaban as fazañas dos heroes e dos deuses, recollían as tradicións, etc.
Os seus espectáculos combinan a nosa rica tradición cultural con historias máis actualizadas para sensibilizar aos máis novos coa música, a poesía e a defensa e coidado do medio a través dos contos e as cantigas.
Pero nesta ocasión, inaugurando o "Mes das Letras", quixo tamén render homenaxe a Carlos Casares no ano no que se lle adica o día das Letras Galegas 2017: a partir dunha presentación sobre o escritor, o Bardo Abelardo foinos levando por algunhas das súas obras máis coñecidas, presentándonos a Leoncio, o inventor da bomba da Felicidade, e outras historias máis, adaptadas tamén para podelas cantar acompañados da súa concertina
Ademais da imaxe que podedes ver aquí, podedes ver o resto das fotos e ver os vídeos desta tarde premendo AQUÍ.
E se queredes coñecer máis a Servando Barreiro, visitade o seu blogue premendo AQUÍ.

xoves, 4 de maio de 2017

MAIO, MES DAS LETRAS


https://sites.google.com/view/carlos-casares/p%C3%A1gina-principal

Aquí tedes a CARLOS CASARES, o autor homenaxeado este ano polo Día das Letras Galegas. Seguro que nas aulas xa estades coñecendo a súa obra, ou sabendo cousiñas sobre a súa vida.
Tamén eu quero deixarvos varios enlaces interesantes sobre este tan querido escritor. Se premedes sobre a imaxe, atoparedes unha listaxe (en google sites) a través da cal podedes acceder a xogos, vídeos, cancións, contos, etc.
Seguro que o pasades moi ben, así que: A QUE
ESPERADES PARA ENTRAR?

luns, 1 de maio de 2017

DO, RE, MI, MOZART XOGA AQUÍ

Títeres CachiruloA compañía "Títeres Cachirulo" instalou o seu escenario na nosa biblioteca. Con motivo das actividades adicadas ao Día do Libro, trouxemos un espectáculo de marionetas moi musical: "Do, re, mi, Mozart xoga aquí". As marionetas de fío talladas en madeira cóntannos como recibe o neno Mozart a invitación do emperador para tocar en Palacio. Isto esperta a envexa e desconfianza do mestre de cámara, que intentará impedir a celebración do concerto. Pero este neno, vivaz e alegre, sedúceo coa súa xenialidade musical, incorporada nos seus xogos e quefaceres cotiáns.
Este espectáculo, que xa leva varios anos coa compañía, levou o Premio ao Mellor Espectáculo de Marionetas no 4º Festival Iberoamericano de Teatro "Cumbre de las Américas", celebrado no 2008 en Arxentina.
E eu, que estiven observándovos desde que comezaron a aparecer os distintos personaxes sobre o escenario ata que rematou a historia, podo asegurar que no cole desfrutamos moitísimo con esta aventura a través das marionetas manipuladas por Jorge Rey e Carmen Domech, que nos tiveron totalmente hipnotizados durante algo máis de 1 hora. Manipuladas e creadas, xa que eles mesmos son os encargados do seu deseño e a súa elaboración!!!
Ademais de entreternos moitísimo con esta historia, tamén nos brindaron a oportunidade de ver a parte de atrás do escenario, onde colocan as marionetas, contándonos como as manexan e mesmo permitíndonos que nós mesmos as probaramos. 
Foi todo un pracer para nós; esperamos que tamén Jorge e Carmen leven un bo recordo do noso centro e volvan visitarnos en máis ocasións.
Seguro que queredes ver as fotos!!! Pois premede AQUÍ!!!

martes, 25 de abril de 2017

DÍA DO LIBRO

O 23 de abril celébrase o Día Mundial do Libro. Nesta ocasión, ao coincidir cun domingo, decidimos adiantarnos o venres á celebración, aínda que algunhas das actividades programadas prolongaranse ata a semana que vén. 
Este é o cartel no que se anuncian as actividades colectivas:



Durante a tarde desenvolvemos parte delas. Xuntámonos no patio do cole para ler o poema que cada ano por esta data edita a Consellería de Cultura, Educación e Ordenación Universitaria. Nesta ocasión, o texto é de Rosalía Fernández Rial, unha poeta que nos leva co libro ao mundo da palabra e da música! Podedes lelo aquí:



Despois, cantamos xuntos a canción "O libro máxico", do grupo Migallas, que rematamos cos abrazos que tanto nos gusta dar e recibir!!! Ademais, nesta ocasión puidemos compartilos tamén con Joaquín Castaño, que pasou a mañá connosco, facendo varias sesións de mindfulness nos diferentes niveis educativos.

E por último chegou o momento dos apadriñamentos e amadriñamentos lectores. O día tan espléndido que tivemos permitiu que tiveramos unha grande oferta de espazos nos que poder desenvolver as lecturas elixidas: as sombras do patio, as aulas, a sala de profes, as escaleiras... Coma sempre, desfrutamos moito deste ratiño léndonos, ao que nesta ocasión engadimos a creación de ilustracións sobre as historias que tiveron a sorte de ser elixidas. Quedaron todas moi fermosas!!! Podedes velas no "Punto de merenda" da biblioteca ou premendo AQUÍ.

E sei que andades tamén deseñando os vosos marcapáxinas. Estou desexando velos!!! Mentras tanto, podedes ir vendo as fotiños que fixemos durante esta xornada tan especial premendo AQUÍ.

luns, 24 de abril de 2017

RECIBIMOS A JOAQUÍN CASTAÑO

JOAQUÍN CASTAÑO é responsable da Escola Internacional de Ioga en Galicia e nas Illas Baleares. A súa paixón por introducir o ioga e a meditación no ámbito da educación levouno a formarse como mestre de ioga para nenos/as e desarrollou varios programas en colexios e centros galegos, ademais de impartir formación a docentes.
Este curso, os mestres e mestras do cole estamos levando a cabo un grupo de traballo sobre Mindfulness. O mindfulness, tamén coñecido como conciencia plena, é unha das maneiras de practicar a meditación.
Diversos estudos demostran que a práctica de mindfulness pode convertirse nunha ferramenta para mellorar a calidade de vida das persoas en moitísimos aspectos: autocontrol, saúde, adaptación a situacións adversas, etc.
Por este motivo, quixemos invitar a Joaquín a realizar un obradoiro coas nenas e nenos do cole. E con ese obxectivo nos visitou o venres, 21 de abril. Ao longo da mañá, Joaquín compartiu ratos moi agradables nos diferentes grupos, desde Infantil ata 6º de Primaria, traballando en pequenos grupos algunhas das actividades que podemos incluír na nosa vida diaria. Unha delas tamén a practicamos no comedor, xuntándonos todas as persoas para adicar uns minutos á respiración, tratando de concentrar toda a atención neste acto indispensable para a vida.
O resultado foi moi positivo! Tanto que todas as persoas que participamos nesta xornada queremos repetir!!! JOAQUÍN, MOITÍSIMAS GRAZAS!!! A través das imaxes realizadas durante esta mañá podedes comprobar o moito que significou incluír esta actividade na rutina escolar (premede AQUÍ para velas). O noso desexo agora é que continúe e que tamén se vaia instalando nos fogares das familias do noso alumnado...

DÍA DA TERRA 2017

O sábado 22 de abril foi o Día da Terra. E Google adicoulle o doodle, así que aquí vos quero deixar o enlace para que poidades ver a historia dun raposo que un día soña co final do noso mundo. Que decide facer este animaliño en canto esperta? 



O Día da Terra foi instaurado polo estadounidense Gaylord Nelson, para concienciar á xente da importancia de coidar o planeta. O primeiro ano no que se celebrou foi en 1970, cando dúas mil universidades, dez mil escolas (de Primaria e Secundaria) e centenares de comunidades aceptaron esta proposta.
Esta boa iniciativa foi moi ben acollida desde a súa creación, sendo unha oportunidade para xuntarse por un mundo limpo e non maltratado polo ser humano. Sempre podemos facer algo a favor do planeta; non tiremos a toalla!!!


SOBRE LIBROS E MÚSICA

Mirade que vídeo tan fermoso me enviou un bo amigo!!! Chegoume xustamente hoxe, un día despois de que se celebrara o Día do Libro, pero quero compartilo con vós porque a mensaxe debería manterse ao longo dos 365 días do ano: conseguir a paz no mundo, algo para o que o protagonista do vídeo é posible a través dos libros!!!



Por outra parte, e relacionando o tema da música coa literatura, quería contarvos que tamén hai moitas persoas compositoras que se inspiran en libros. Premendo sobre a imaxe podedes atopar 15 cancións que falan de libros.




Tamén quero deixar dous vídeos para os e as máis pequerrechos/as do cole. O primeiro é de Disney; como se dunha "Hora de ler" musical se tratara, titúlase "A hora da sinfonía":


O seguinte, tamén é un contiño sobre o son, "A illa dos sons". Está realizado por unha directora e compositora que nos presenta as diferentes familias de instrumentos, ao tempo que soan algunhas das melodías clásicas máis coñecidas por todos nós:
  

E, por último, "A terra da música", unha curtametraxe de Disney que conta a historia de amor entre unha rapaza violín e un rapaz saxofón que viven en lugares distanciados: ela, no país Sinfonía; el, na illa do Jazz. O amor xurde entre ambos, pero poderán xuntarse a pesar do distanciados que viven?


mércores, 5 de abril de 2017

VISITOUNOS CONCHA BLANCO

A mañá de hoxe foi moi especial no cole. O motivo? Recibimos a visita da escritora CONCHA BLANCO, como xa anunciaramos hai varias semanas. Tres días despois de que se celebrara o Día Internacional do Libro Infantil e Xuvenil, recibir a unha das escritoras en lingua galega máis coñecidas foi todo un orgullo para nós.
Despois do recreo xuntámonos na biblioteca, e alí Concha falounos un pouco de datos históricos que sucederon o 5 de abril de diferentes anos. Tamén nos lembrou datas relacionadas cos libros e outras anécdotas máis persoais. Pero o momento no que mellor o pasamos foi cando puidemos facerlle as preguntas que fomos apuntando durante esta temporada, preguntas que xurdiron tras ler a súa autobiografía ou algunha das súas obras. E Concha contestou tranquilamente unha por unha, convertendo a sesión nun rato moi entretido. Así, descubrimos cal é o seu escritor preferido, por que lle gusta escribir dentro do coche, como se fixo escritora, as súas afeccións, se prefire comezar a escribir as súas historias a man ou directamente no ordenador, cales son as súas temáticas preferidas..., e un montón de cousas máis!!! 
Despois, firmounos algúns dos exemplares dos nenos e nenas que os trouxeron ao cole, e tamén algúns dos que temos na biblioteca e que tanto nos gustan. Un deles, ademais, inspirou ao profe Óscar para preparalo con música, e esta foi a nosa maneira de agradecerlle a Concha a súa visita ao noso centro: cantando e lendo o poema "Un, dous, tres" do seu libro "Do, Re, Mi, fantasía". E pensamos que lle gustou moito!!! Como seguro que lle gustaron os agasallos das meniñas e meniños de Infantil, e que Concha levou para a súa casiña.
Desde aquí queremos agradecer a posibilidade de reunirnos con Concha a Isabel, da libraría "Ler" de Santa Comba, que nos facilitou este encontro e moitas outras cousas! Graciñas ás dúas por facer posible un rato tan agradable.

Quen sabe se desta xuntanza sae algunha historia, ou algún escritor ou escritora?

Premede AQUÍ para ver todas as fotos do encontro.

DÍA INTERNACIONAL DO LIBRO INFANTIL E XUVENIL

O pasado domingo, 2 de abril, celebrouse o Día Internacional do Libro Infantil. A data non é unha casualidade: coincide co nacemento do escritor danés Hans Christian ANDERSEN. "A Sereíña", "O parrulo feo" ou "O soldadiño de chumbo" son algúns dos títulos dos libros de Andersen que seguramente coñezas. 
Cada ano, ademais, un ilustrador elabora un cartel e encárgaselle a un escritor un texto para a celebración. Nesta ocasión o país elixido foi Rusia. O cartel elaborouno Mikhail Fedorov, e o texto foi escrito polo poeta Sergey Makhotin, que traduzo aquí ao galego para todos vós:

Medremos cos libros!
Na miña infancia gustábame construír casiñas con bloques e todo tipo de xoguetes, adoitaba usar como tellado libros infantís ilustrados; en soños, subía ata o interior da casa, deitábame na cama feita con caixas de mistos e contemplaba as nubes ou o ceo estrelado, todo dependía da imaxe que máis me gustara. 
Instintivamente, seguín a lei de vida de todo neno que busca inventar ambientes e, para conseguilo, un libro foi de auténtica axuda.
Despois medrei e aprendín a ler; na miña imaxinación, un libro comezou a parecerse máis a unha bolboreta ou a un paxara que a un tellado. As páxinas do libro eran como ás e susurros. Era como se o libro saíra voando inesperadamente pola ventá aberta hacia espazos descoñecidos. Collino, empeceino a ler e o libro tranquilizoume. Despois seguino a través doutros mundos, mentras o meu universo imaxinario se ía extendendo. 
Que alegría ter un novo libro nas miñas mans! Ao principio non sabes de que trata, resistéste á tentación de abrilo pola última páxina, e que ben ule! Ten un aroma especial a libro, un aroma excitante e único.
A medida que vas medrando o mundo vaise complicando. Enfréntaste a cuestións que incluso un adulto é incapaz de resolver. Sen embargo, é convinte poder compartir as dúbidas e os segredos con alguén, e aquí é cando o libro vén na túa axuda. Probablemente moitos de nós plantexámonos algunha vez: eu escribín este libro! E, de pronto, o personaxe favorito parece ser coma ti e incluso vive os mesmos problemas; outro personaxe non se parece en nada a ti, pero queres que sexa coma o teu ideal, valente e capaz!
Faime rir cando un rapaz ou unha rapaza me din "non me gusta ler"; non lles creo, seguro que comen xeados, xogan e ven películas moi interesantes. Noutras palabras, gústalles divertirse. A lectura, fronte ao desarrollo dos sentimentos e a personalidade, non é unha tarefa tan agotadora, se ben, ante todo, é un grande pracer.
Precisamente, esta é a intención dos autores que escriben libros para nenos! 

Tamén a editorial Anaya fixo esta fermosa ilustración co título "Abraza un libro, abraza un amigo", que podedes ver aquí e na biblioteca do cole! E a vós, que tanto vos gustan os abrazos, cal será o próximo libro que abracedes? 

 


martes, 28 de marzo de 2017

INESQUECIBLE MIGUEL HERNÁNDEZ

Hai hoxe 75 anos morría un dos poetas en lingua castelá máis importantes da nosa recente historia. Chamábase MIGUEL HERNÁNDEZ e era da Comunidade Valenciana. Naceu no ano 1910 e tocoulle vivir un dos momentos máis duros en España: a guerra civil e a ditadura. E, con ela, unha época de miseria enorme... As consecuencias de todo isto fixeron que Miguel Hernández morrera de tuberculose con tan só 31 anos. 
Eu déixovos aquí un pequeno contiño escrito por el: "El potro oscuro".


E, se premedes AQUÍ, podedes ler máis información sobre este querido poeta. 

luns, 27 de marzo de 2017

ENCONTRO CON CONCHA BLANCO

Ola, rapaciñas e rapaciños!!!
Como xa ben saberedes polos vosos mestres e mestras, o próximo 5 de abril visitaranos CONCHA BLANCO!!!!! No cole estamos todos moi ilusionados coa visita desta escritora tan achegada a nós. Por un lado, porque na biblio contamos con varias das súas obras, así que algunhas desas historias seguro que viaxaron nas mochilas viaxeiras, nos caixóns de lecturas, ou mesmo as elixistes vós mesmos para ler no tempo libre. Por outro, porque no clube de lectura do cole comezaron a ler unha das súas últimas publicacións, que redactou conxuntamente coa súa filla María Canosa: "Será correcto?" é unha guía sobre o protocolo escrita de maneira entretida e informal e a excusa destes días para pasar un rato falando entre "Os Xurelos Lectores" do cole. Pero ademais Concha Blanco é de Cee, que é un pobo que coñecemos moitas das persoas que estamos no cole!!! E o seu último libro publicado, "Do, Re, Mi, fantasía" está na exposición de libros sobre o proxecto deste curso "Bailemos na musiteca".
Pois con todo isto, eu, Rosiña, decidín prepararvos un pequeno caderno con toda a información que penso deberades coñecer para recibir a Concha. Nel atoparedes a súa autobiografía, así coma as obras publicadas e unha páxina para que vaiades pensando e anotando todo aquelo que vos gustaría saber sobre esta grande escritora. E non esquezades que tedes un recuncho adicado a ela no corredor do cole, así que... a que estades esperando para coñecer algunha das súas obras? 
Aquí vos deixo tamén o caderno para que poidades lelo tantas veces como desexedes!

Unha aperta!

martes, 21 de marzo de 2017

DÍA MUNDIAL DA POESÍA

Onte comezou a primavera, e con ela un montón de novidades, entre as que destacamos o Día Mundial da Poesía, proposto pola UNESCO no ano 1999 para celebrar o equinoccio da recén inaugurada estación.
Son moitas as actividades que se celebran hoxe relacionadas coa poesía, e tamén nós queremos telas en conta. Ao longo deste curso xa falamos moito de música, e de poemas unidos á mesma, xa que tamén as cancións son poesías que soan dun xeito diferente. Nesta ocasión, no cole estades preparando uns fermosos marcapáxinas con poemas elixidos por vós que algúns músicos e/ou compositores/as convertiron en cancións. Estas creacións rematarán esta semana na "Casa Pego", que é o restaurante de San Cosme situado ao lado do colexio, e onde se encargarán de repartilos a todas as persoas que acudan ao mesmo durante estes días, como agasallo aos seus clientes e co único obxectivo de difundir algo tan fermoso como é a lectura de poemas, así como dando a coñecer tamén grandes escritores/as en lingua galega e/ou castelá e importantes músicos e compositores/as.  Ata onde chegarán eses marcapáxinas? En que libros durmirán cando comecen a súa viaxe? Cantos nos contarán o comezo da súa viaxe?
En breve vos contaremos...
Mentras tanto, aquí vos deixo algunhas páxinas poéticas que poden ser do voso interese. Premede sobre a imaxe e desfrutade con todos os poemas que leades, e soñade...

https://sites.google.com/view/paxinaspoeticas/p%C3%A1gina-principal

E, xa que estamos este curso bailando na nosa musiteca, aquí vai un poema de Antonio García Teijeiro moi musical: "Unha man bica a arpa".


sábado, 18 de marzo de 2017

CHARLA SOBRE OS RILES E A DOAZÓN DE ÓRGANOS

ALCER é a Asociación para a Loita Contra as Enfermidades de Ril. O pasado martes, tres membros de ALCER visitaron o noso centro, onde se reuniron co alumnado de 5º e 6º de Primaria, para falar sobre a importancia dos riles dentro do noso organismo: a súa función, os problemas que xorden cando estes fallan, como se poden solucionar, etc. 
E presentáronnos o caso dunha rapaciña que se atopa nesa situación: os seus riles non funcionan e ten que acudir a un hospital 3 días á semana durante 4 horas para realizar unha sesión de diálise. A diálise emprégase como substituto da función normal dun ril e permite, entre outras cousas, eliminar do sangue produtos tóxicos. Unha persoa que teña que asistir a diálise con esa frecuencia, non pode facer moitos plans a longo prazo, polo que recibir un ril dunha persoa doante é unha noticia marabillosa!!! Pensádeo por un momento...
Un transplante pode facer que a vida dunha persoa nunha situación así volva ser normal. E isto non só sucede cos riles, xa que hai outros órganos que podemos doar: pulmóns, corazón, intestinos, fígado, páncreas... Dende aquí queremos agradecer a charla ofrecida por ALCER no noso centro. Se queredes saber máis sobre esta Asociación e informarvos sobre este xesto tan bondadoso, podedes visitar a páxina web de ALCER premendo AQUÍ.




NOTICIAS DO PAPAGAIO: O LIXO ELÉCTRICO E ELECTRÓNICO

A revista "O Papagaio", á que estamos subscritos, xa vai polo número 6. Nesta ocasión trae unha noticia que chamou a atención dunha boa parte do alumnado, e queren contala para todas as persoas que seguen o noso blogue. Trata sobre o lixo eléctrico e electrónico. Como imaxinaredes, na actualidade é enorme a cantidade de obxectos deste tipo que utilizamos na nosa vida cotiá: electrodomésticos, ordenadores, móbiles, memorias USB, etc. E que facemos cando deixan de funcionar e queremos desfacernos deles? Seica en Galicia producimos máis de 4.000 toneladas deste tipo de lixo ao ano!!! Pois non debemos tiralos en calquera colector, xa que é moi contaminante, e moitos dos elementos que os compoñen son tóxicos, polo que prexudican o medio ambiente e a saúde dos seres humanos. Unha pila botón pode contaminar 600.000 litros de auga; a batería dun móbil, 50.000 e un só frigorífico pode emitir unha cantidade de gases equivalente aos dun coche circulando durante 15.000 km. Que barbaridade!!! Polo tanto, debemos prestar moita atención a este tipo de obxectos. 
Que deberiamos facer? Pois levalos a un punto limpo, que son os lugares habilitados polos concellos para almacenar os residuos que non se poden botar nos colectores da rúa. Premendo sobre a imaxe inferior podedes consultar todos os puntos limpos de Galicia, onde se indica tamén a dirección, o horario e o tipo de lixo que recollen, ademais doutro tipo de información moi interesante.

http://sirga.xunta.gal/listaxe-de-puntos-limpos

Agradecemos dende aquí a sección de "O Papagaio" adicada á ecoloxía, e lémbrovos que na Biblio tedes moitos libros relacionados con este tema!!!

sábado, 11 de marzo de 2017

EXCURSIÓN A COMPOSTELA

O pasado mércores, coincidindo co Día da Muller, viaxamos á capital galega para asistir a unha actuación estupendísima do grupo de percusión ODAIKO, que ofreceu un concerto didáctico no Auditorio de Galicia no que desfrutamos moitísimo. Ademais de coñecer varios e interesantes instrumentos dunha das familias de instrumentos que máis nos atraen, rímonos moito coa posta en escea destes catro rapaces fantásticos.
Pero antes puidemos facer unha pequena parada na Praza de Abastos, onde enchemos os nosos ollos e os nosos narices con todas as cores e olores dos produtos que alí se ofrecen: peixe, marisco, froita, verduras e hortalizas, pans, queixos, comida recén cociñada, etc. Desfrutamos moito desta visita exprés a un dos lugares máis emblemáticos de Santiago.
E despois do concerto, aproveitando o sol que iluminaba as rúas de Compostela, demos un paseo pola zona vella: percorremos algunhas das rúas máis coñecidas, algúns rincóns agochados moi fermosos, visitamos a Catedral e as prazas que a rodean, o grupo de Infantil fixemos unha parada en Correos para enviar varias cartas, saudamos ás Marías, a Valle Inclán e a Rosalía na Alameda, observamos as súas árbores, e descansamos nas escaleiras que dan entrada ao Campus universitario, onde comemos e xogamos un ratiño antes de regresar a San Cosme. Foi un día completo e moi fermoso; para ver o ben que o pasamos premede AQUÍ.

venres, 10 de marzo de 2017

COMEZA A ACTIVIDADE NO INVERNADOIRO

A falta duns días para que comece a primavera, no invernadoiro comezamos xa a facer algunhas actividades. Sacamos as plantas que non daban froito e aireamos a terra, ademais de abonala. E esta semana chegaron as primeiras plantas: amorodeiras, leitugas, repolos, coliflores, brócoli, cebolas e porros foron as encargadas de inaugurar esta nova temporada. E para que todas estas plantas medren moito, as meniñas e meniños do cole, xunto cos seus mestres, plantáronas con moito cariño durante esta tarde... Agora, iremos coidándoas para que poidamos desfrutalas nos menús que nos preparan Lourdes e Mariví no cole.
Premendo AQUÍ podedes ver algunhas das imaxes desta tarde!

DESPEDIMOS O ENTROIDO

Coa queima do Meco rematamos a celebración dunha festa con maior tradición no noso país: o Entroido!!! Ata o ano que vén!!!

Podedes ver as fotos premendo AQUÍ.

ANTÍA CAL, UNHA MESTRA ILUSIONADA CON CAMBIAR O MUNDO

Aquí a tedes. Chámase Antía Cal e o pasado 8 de marzo, o periódico "El País" fíxolle unha entrevista que publicou coincidindo co "Día da Muller". Antía, coñecida tamén como Tita, conta a historia da súa vida dende que naceu en Cuba (onde estaban emigrados os seus pais) ata  que se instalou en Galicia. O seu soño era ser mestra, e conseguiuno!!! Pero Antía, que ten case 94 anos, tamén tivo que loitar contra moitas inxustizas polo feito de ser muller (estudar unha carreira, facer as tarefas da casa, etc.). Neste repaso pola súa traxectoria, destaca a apertura dunha escola en Vigo á que podían asistir os rapaciños/as na etapa infantil, nun momento da historia no que en España non se consideraba importante a escolarización ata os 7 anos. Coa súa historia, tan interesante, e que podedes ler completa premendo AQUÍ, pechamos esta primeira semana de marzo.
Ademais, tamén podedes ver o documental sobre esta pioneira da ensinanza en España, titulado "A palabra xusta" e dirixido por Miguel Piñeiro, aínda que hoxe é o último día. Premede AQUÍ.

domingo, 5 de marzo de 2017

DÍA INTERNACIONAL DA MULLER

O Día Internacional da Muller conmemórase cada 8 de marzo. Esta data é recoñecida pola ONU como unha xornada para reivindicar a igualdade e reflexionar sobre a situación das mulleres na sociedade. É certo que na nosa comunidade as cousas mudaron ao longo da historia, pero todavía queda camiño por percorrer para que poidamos falar de igualdade. Sen ir máis lonxe, e centrándonos no tema da música, sobre o que xira o proxecto deste curso, cantas mulleres compositoras coñecemos?, cantas directoras?, cantas construtoras de instrumentos? Pero ao lado de Bach, Mozart, Beethoven ou Stravinsky tamén deberían figurar nomes de mulleres que os libros de historia esqueceron durante moitos anos. 
Como exemplo, a película "Nannerl, la hermana de Mozart", preséntanos a unha nena prodixio. Ao final dunha xira familiar que durou 3 anos, coñeceu ao fillo do rei Luís XV, quen a anima a escribir a súa propia música. Pero Nannerl era unha muller, e as mulleres non tiñan dereito a compoñer.  Aquí podedes ver o tráiler da película:


Tamén podedes ver no seguinte vídeo un programa adicado ás mulleres compositoras ao longo da historia:


O músico Miguel Bosé tamén participou hai varios anos nunha homenaxe ás mulleres, "Que vivan las mujeres", a través dun anuncio publicitario para unha marca de roupa chilena:


E en Galicia? Pois tamén aquí temos marabillosas representantes, que ademais de facer boa música, amosan un grande interese por apoiar campañas, actos, etc., na procura da igualdade entre homes e mulleres. Así, podemos falar de MARÍA MANUELA, SES, UXÍA SENLLE, MERCEDES PEÓN, SUSANA SEIVANE, NAJLA SHAMI... E GUADI GALEGO, da cal eliximos unha fermosa canción que adica a todas as mulleres que loitaron na sociedade galega por sacar adiante a familia, que traballaron arreo no mar, no campo... Titúlase "Matriarcas" e podedes escoitala e ver o vídeo aquí:


Pero antes destas artistas, houbo outras, coma EUGENIA OSTERBERGER. Nacida no ano 1852 en Santiago de Compostela, foi unha figura relevante no panorama musical e cultural de Galicia no último tercio do século XIX. Instalouse en A Coruña, onde firmaba as partituras co nome de Madmoiselle Saunier, apelido que tomou do seu marido. En 1907 mudouse á Costa Azul francesa, onde se lle perde a pista. Sen embargo, a editorial Ouvirmos acaba de publicar un libro-CD con 15 pezas para voz e piano desta grande compositora, para coñecela e/ou redescubrila!!! Se queredes escoitar un anaquiño da súa música, premede AQUÍ.