xoves, 28 de abril de 2022

EXCURSIÓN DE 5º E 6º A PONTEVEDRA

Ola, rapazas e rapaces!!!

Hoxe escríbovos para contarvos por que esta xornada non estiveron no cole as nenas e nenos de 5º e 6º: foron de excursión a Pontevedra!!! A viaxe, dentro das programadas polo "Proxecto Terra", foi unha proposta dentro das actividades do Club de Lectura. Para iso, tiveron que madrugar un pouquiño máis que un día normal, pero mereceu a pena, xa que aproveitaron moito o tempo que pasaron na cidade do Lérez. Acompañáronnas unha guía profesional, Uxía, a quen queremos agradecer os coñecementos que compartiu connosco, e os mestres Xavier e Susi. Durante a mañá descubriron algúns dos edificios máis fermosos de Pontevedra, ao tempo que Uxía lles ía contando parte da súa historia, coñecendo moitos datos interesantes. Visitaron a oficina de información turística e, despois de descansar un pouquiño, achegáronse ao Museo de Pontevedra e a Museo Castelao, onde lles chamou moito a atención o moderno edificio. Ao tempo que camiñaban polas prazas e rúas da cidade, puideron comprobar que Pontevedra é merecedora de premios que recoñecen as súas boas prácticas para mellorar as condicións de vida das persoas que a habitan: na parte vella case non hai tráfico, moitas rúas son peonís e está moi limpa.

Xantaron nun parque onde tamén puideron xogar un ratiño, antes de continuar a viaxe hacia Lourizán. Aquí atópase un enorme pazo de estilo modernista que non pode visitarse, pero o máis fermoso e interesante do lugar atópase ao seu redor: o xardín!!! Cheo de árbores chegadas de diferentes partes do mundo, é un lugar fabuloso para aprender e desfrutar paseando, ao tempo que conversaron sobre camelias de diferentes tipos, teixos, buxo, cedros, etc.

Todo o grupo regresou moi contento da experiencia, e con ganas de repetir!!!

Apertas,

Rosiña


luns, 25 de abril de 2022

UNHA VISITA MOI ESPECIAL

Esta mañá recibimos unha visita moi especial na nosa biblioteca: un cuarteto de música. E digo especial porque as catro persoas que se achegaron hoxe ao cole son catro músicos profesionais que actualmente forman parte da Real Filharmonía de Galicia. O frautista, Luís Soto, xa é ben coñecido no centro, e despois das veces que tivemos a sorte de escoitalo en directo, considerámolo un amigo máis!!! Pero hoxe, ademais, Luís chegou na compañía doutras tres persoas marabillosas: Nikolay Velikov (violín), Ioana Ciobotaru (viola) e Millán Abeledo (violoncello). Como é que estes tremendos músicos nos adicaron parte da mañá non só a escoitar música de Mozart senón tamén a probar a tocar os seus instrumentos? Pois todo xurdiu a raíz do libro que estiveron a ler no Club de Lectura, "O xenio da Cidade do Sal", escrito por Fina Casalderrey. Este libro, ademais dunha historia divertida sobre Mozart, inclúe un disco no que estes músicos interpretan unha serie de cuartetos do famoso compositor aos que se engade algunha peza tradicional galega. A partir de aí, e aproveitando que Xavier, o director do cole, coñece a Luís desde hai tempo, argallaron este espectáculo marabilloso e inesquecible. A todo iso hai que engadir a bondade dos músicos para que as nenas e nenos puideran achegarse aos instrumentos e mesmo facelos soar!!! Que privilexio!!! Seguro que non esquecen unha experiencia tan gratificante!!! 

Moitísimas grazas, Nikolay, Ioana, Millán e Luís polo tempo que nos adicastes, polas vosas interpretacións e por encher esta mañá o cole e os nosos corazóns de música.

Rosiña

venres, 22 de abril de 2022

LECTURAS NA BIBLIO CON TONE MARTÍNEZ

Premede aquí para ver as fotos.
Aquí está o resumo dunha das actividades que realizamos no cole para celebrar o "Día do Libro": a visita á nosa biblioteca de Tone Martínez. Nesta ocasión, Tone veu acompañado dunha morea de historias e... de bechos!!! Si, porque así chamaba a súa madriña aos bichos que atopaba nos bosques, prados e outros lugares nos que pasaban moito tempo xuntos. Desta maneira, Tone consegue deixar de xogar moito tempo coas maquiniñas e desfrutar moito, moito, da natureza que o rodea. Xusto hoxe, que é o "Día Mundial da Terra", foi ben bonito escoitar estas historias na voz dun actor tan estupendo coma Tone. Historias moi relacionadas co planeta que nos acolle e que debemos coidar día tras día, pero tamén cos libros, xa que moitas das aventuras que nos contou Tone atópanse nalgúns dos libros da nosa biblioteca, como "A Mosca chosca"; outros, como "O grilo Míllelo" gustouvos tanto que habemos mercalo. Pero tamén houbo outras historias que lle contou a súa madriña, quen ademais lle ensinou a importancia de respectar e coidar o medio ambiente para seguir desfrutando del. Así, entre bechos, foi como pasamos esta mañá extraordinaria. Moitísimas, grazas, Tone; encantounos!!!

Apertas e FELIZ DÍA DA TERRA E DO LIBRO,

Rosiña

 

CELEBRAMOS O DÍA DO LIBRO

Ola, amiguiñas e amiguiños!!!

Que tal pasastes as vacacións do 2º trimestre? Seguro que cargastes ben as pilas para comezar o último tramo do curso!!! Ademais, empezamos con forza, xa que esta semana se celebra o "Día do Libro", e xa que o día -23 de abril- coincide coa fin de semana, decidimos adiantar a súa celebración no cole para este venres. Para iso contratamos unha actuación na biblioteca que comentarei noutra entrada do blog. Pero hoxe escríbovos porque chegou ao meu correo algo que fixestes no cole que me gustou moitísimo: un conto viaxeiro. É unha das actividades realizadas dentro do programa "Rapazas emprendedoras nas TIC" do Plan Proxeta+, ademais da aportación colectiva para celebrar esta Semana do Libro. Aquí vos presento a "Daniela, a inventora que cambiou o mundo":

 

Unha aperta enorme e FELIZ DÍA DO LIBRO!!!

Rosiña

luns, 11 de abril de 2022

DESPEDIMOS O 2º TRIMESTRE

Pasámolo xenial con Paco Nogueiras.
Hoxe despedimos o 2º trimestre do curso, e vaia xeito de facelo!!! Nada máis e nada menos que co grande PACO NOGUEIRAS!!! Paco xa nos visitou coa súa "Radio Bule Bule" para celebrar o "Día mundial da radio", e para hoxe trouxo o seu espectáculo "Brinca Vai!", no que interpreta cancións adicadas a moitas das datas que celebramos ao longo do ano: o Entroido, o Nadal, o Magosto... Tamén deixa oco para cantarlle á amizade, á importancia de plantar árbores (e todo tipo de plantas) e moitas máis!!! E é que Paco é todo un showman, xa que ademais de tocar un montón de instrumentos, fíxonos rir moitísimo coas súas bromas e coa relación tan especial que ten con esa máquina que o acompaña a todos os concertos.

Pasámolo xenial, en especial Breixo, xa que lle gusta moito Paco e firmoulle o seu disco. Incluso rematou a actuación coa canción que el lle pediu: "Radio Bule Bule". Tampouco se esquecerán del as rapazas e rapaces que se achegaron a pedirlle un autógrafo ao rematar o concerto, non si?


Moitas grazas, Paco, e ata a próxima!!!!

Apertas,

Rosiña

xoves, 7 de abril de 2022

PROGRAMA Nº 3 DE ROSIÑA DJ

Ola, xentiña!!!

Antes de rematar o trimestre, o alumnado de 5º e 6º quixo contarvos cales son as músicas seleccionadas para este mes de abril, así que adicaron un ratiño da xornada de hoxe a gravar en "Radio Rosiña" o terceiro programa de "Rosiña DJ". Espero que vos guste tanto a selección coma os comentarios que tan ben fan este grupo de nenos e nenas, cada día máis profesionais...

Unha aperta,

Rosiña 

martes, 5 de abril de 2022

OBRADOIROS CIENTÍFICOS

Comezamos a semana con dúas xornadas adicadas á ciencia! Para iso, viñeron ao cole Suso e Amparo, as persoas que forman "Ciencia en movemento" e que xa coñecemos de cursos anteriores. Nesta ocasión, trouxeron varias propostas relacionadas co universo, xa que é o tema sobre o que estamos centrándonos este ano. O luns asistiron ao mesmo o alumnado de 3º a 6º de Primaria, e o martes tocoulle a quenda ás aulas de Infantil e 1º e 2º de Primaria.

A través das fotos podedes lembrar todo o que nos contaron sobre o sistema solar, algunhas curiosidades dalgúns planetas, as fases da lúa, a importancia dos avances científicos para coñecer o espazo, etc. E tamén houbo tempo para realizar algún experimento moi interesante. 

O alumnado de 5º e 6º atendendo ás explicacións de Suso.

Julia amosando o seu experimento.

Moitísimas grazas a Suso e Amparo por achegarnos, unha vez máis, todos estes interesantes contidos.

Apertas,

Rosiña 

OBRADOIRO DE SANCOSMEIROS

OLA A TODOS/AS!!!

Nas últimas datas, o alumnado de 3º e 4º está realizando un pequeno proxecto sobre o sancosmeiro. Como sabedes, o sancosmeiro é un sombreiro tradicional galego, elaborado con palla trenzada e cosida, orixinario da nosa parroquia, San Cosme de Antes, desde sempre gran produtora de cereais.
Actualmente, son moi poucas as persoas que saben elaborar este tipo de sombreiros, polo que a continuidade desta parte da nosa cultura está en risco. Para resolver esta situación, é moi importante que a infancia e a xuventude da zona aprenda e se interese polos sancosmeiros.
Por este motivo, en 3º e 4º elaboraron o seguinte vídeo no que nos falan sobre o sancosmeiro:
 

Tamén convidaron ao resto do colexio a participar nun obradoiro de elaboración de sancosmeiros a cargo da asociación "Trenzarte", no que aprenderon a trenzar a palla e mesmo fixeron unha pulseira que levaron de agasallo! Encantoulles a experiencia, e podedes comprobar a través destas imaxes en que consistiu a actividade na que as artesás nos guiaron con moita paciencia:

O obradoiro tivo lugar na Aula de Natureza.
 

Por último, realizaron unha fotografía a todo o alumnado e persoal do centro vestindo un sancosmeiro, e a verdade é que vos queda realmente ben a todas, e xa estou eu pensando tamén en facer un retrato con este sombreiro tan espectacular!

Premendo aquí podedes ver as fotos individuais.
 

Con todas as fotos elaboraron o seguinte vídeo:

En 3º e 4º continúan traballando sobre o tema, polo que moi pronto traerannos máis novidades; estade moi atentos/as!!!!!

Recordade que a continuidade do sancosmeiro é responsabilidade de todos/as. Animádevos a seguir aprendendo!!!!

Apertas, 

Rosiña.

venres, 1 de abril de 2022

OBRADOIRO "PENEIRANDO EMOCIÓNS"

Este primeiro de abril recibimos no cole ás integrantes de "Aquelar psicoloxía", que desenvolveron para todos os grupos do cole un obradoiro sobre as emocións. Esta actividade, dentro do programa de igualdade do Concello de Mazaricos e financiada polo Pacto de Estado Contra a Violencia de Xénero, consistiu en traballar a intelixencia emocional a través dun conto sobre o que se comentaban as diferentes situacións nel relatadas. Como ben sabedes, este é un tema ao que prestamos moitísima atención no cole, así que esta actividade foi unha continuación a todas as que imos realizando nas aulas de Infantil e Primaria. Pareceunos moi interesante e valoramos positivamente que este tipo de obradoiros se extendan a cantos máis lugares mellor, xa que regular e dirixir as nosas emocións é un dos aspectos que, como seres humanos, non debemos ignorar.

Moitas grazas ás rapazas de "Aquelar psicoloxía" que se achegaron ata o noso cole para compartir esta mañá connosco!!!

O alumnado participou nas actividades de "Aquelar".

Rosiña